Aisea e taua ai le faalogo ma mulimuli i perofeta soifua?

Tatou te lagolagoina uso o le Au Peresitene Sili ma le Korama a Aposetolo a le Toasefululua o perofeta, tagatavaai ma talifaaaliga. O a latou aoaoga e atagia mai ai le finagalo o le Alii. Latou te tuuina mai faatonuga, lapataiga, ma fautuaga mai le Alii mo o tatou aso. Ua faamanuiaina i tatou i le saogalemu, filemu, ma le malosi faaleagaga pe a tatou faalogo ma usitai i a latou fautuaga.

Saunia oe lava ia faaleagaga

O a fautuaga ua tuuina mai e perofeta soifua ua e faaaogaina i lou olaga? Pe ua faamanuiaina faapefea oe i le mulimuli ai i lena fautuaga?

Aisea e taua ai i tamaitai talavou i lau vasega ona maua se molimau i perofeta soifua? E mafai faapefea ona e fesoasoani ia i latou ia iloa o se matua faamanuiaga lava le i ai o perofeta soifua e taialaina i latou i ona po nei?

Suesue ma le agaga tatalo mau ma punaoa nei. O a mea ua uunaia oe e faasoa i tamaitai talavou?

Amosa 3:7; MF&F 1:4, 37–38; Mose 6:26–38 (E fetalai mai le Alii ia i tatou e ala mai i Ana perofeta)

MF&F 21:1, 4–7 (Ua folafola mai e le Alii ia faamanuiaga silisili ia i latou o e mulimuli i le perofeta)

Ronald A. Rasband, “Tutu Faatasi ma Taitai o le Ekalesia,” Ensign po o le Liahona, Me 2016, 46–49

David A. Bednar, “Ua Filifilia e Molimau Atu i Lou Igoa,” Ensign po o le Liahona, Nov. 2015, 128–31

Tagai M. Russell Ballard, “Nofo i Totonu o le Vaa ma Pipiimau!” Ensign po o le Liahona, Nov. 2014, 89-92

Carol F. McConkie, “Ola e Tusa ma Upu a Perofeta,” Ensign po o le Liahona, Nov. 2014, 77–79

“Savali mai le Au Peresitene Sili, ” Mo Le Malosi o le Autalavou (2001), ii–iii

“Perofeta,” Faamaoni i le Faatuatua (2004), 141–42

Vitio: “Tatou te Manaomia Perofeta Soifua”

2:45

Aoao atu i le ala a le Faaola

Na tuuina atu e le Faaola ni fesili ia i latou na Ia aoaoina ma tuuina atu foi ia i latou avanoa e fai atu ai foi a latou lava fesili. O a ni fesili e mafai ona e tuuina atu o le a fesoasoani ai i tamaitai talavou e mafaufau ma loloto ai o latou lagona e uiga i perofeta soifua? E mafai faapefea ona e faaalia e te fiafia i a latou tali?

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Fesili i tamaitai talavou pe faapefea ona latou tali atu pe afai e fesili atu se uo o se isi tapuaiga po o le a se fautuaga na tuuina atu e lo latou perofeta i le autalavou. Faitau o se vasega, le parakalafa muamua o le “Savali mai le Au Peresitene Sili” o i le Mo Le Malosi o le Autalavou. Fesili i tamaitai talavou pe aisea latou te manatu ai e taua le faalogo ma mulimuli i le perofeta soifua?
Valaaulia tamaitai talavou e mafaufau ma faasoa mai se tala mai le Tusi a Mamona e faapupula ai le manaomia o le faalogo ma mulimuli i le perofeta soifua. O nisi faataitaiga e ono aofia ai tala e uiga ia Liae, Tupu o Peniamina, Apinati, po o Samuelu le sa Lamana. O a ni mea ua latou aoao mai i nei tala? O a ni aafiaga e mafai e tamaitai talavou ona faasoa mai ina ua latou mulimuli i le fautuaga a le perofeta?

Aoao faatasi

O le a fesoasoani gaoioiga taitasi nei i tamaitai talavou e malamalama ai i le taua o le mulimuli i perofeta soifua. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Tofi ia tofu tamaitai talavou ma se mau se tasi o mau fautuaina i lenei otootoga ma fai i ai e vaavaai mo mafuaaga tatou te manaomia ai se perofeta ma faamanuiaga e maua mai le mulimuli i le perofeta. Valaaulia tamaitai talavou e faasoa mai o latou manatu. Faamatala se aafiaga patino na e mulimuli ai i fautuaga a le perofeta, ma molimau atu e uiga i mea sa aoaoina ai mai le faia. Valaaulia tamaitai talavou e faasoa mai o latou lava aafiaga.
Faitau le vaega o le lauga a Elder Ballard lea na ia faatusatusa ai le perofeta soifua i se tagata taiala, ma fai se lisi o auala e tutusa ai le tagata taiala i se perofeta. Valaaulia tagata o le vasega e mafaufau ma faasoa atu nisi o talafaatusa e mafai ona latou faaaoga e aoao atu ai isi pe aisea e taua ai le mulimuli i perofeta ma aposetolo.
Faaali atu ata o le Au Peresitene Sili ma le Korama a Aposetolo e Toasefululua (e pei o ata o i le lomiga o le konafesi o le Ensign po o le Liahona). Molimau atu o nei tamalii uma o ni perofeta, tagatavaai, ma talifaaaliga. Valaaulia tamaitai talavou e fai se lisi i luga o le laupapa o fautuaga na tuuina mai e perofeta soifua (aumai ni kopi o le lomiga aupito lata mai o le konafesi aoao o le Ensign po o le Liahona e fesoasoani latou te manatua ai). E faapefea ona faamanuiaina o latou olaga ma olaga o o latou aiga i le mulimuli i lenei fautuaga?
Tuu atu i tamaitai talavou taitasi se kata laitiiti. Valaaulia tamaitai talavou e faitau se tasi o saunoaga talu ai nei a Peresitene Monson, ma sue se faamatalaga latou te mananao e tusi i luga o le kata e ave i le fale ma faapipii i o latou potu pe teu i a latou tusitusiga paia. Fai i ai e faasoa mai a latou faamatalaga ma faamatala pe aisea ua latou filifilia ai.
Faaali le vitio “Tatou te Manaomia Perofeta Soifua” pe faitau faatasi ni vaega o le saunoaga a Elder David A. Bednar “Ua Filifilia e Molimau Atu i Lou Igoa.” E mafai foi ona e faitau i le mataupu o “Perofeta” i le Faamaoni i le Faatua. Valaaulia tamaitai talavou e vaavaai mo mafuaaga e taua ai le faalogo ma mulimuli i perofeta soifua. Fai i ai e faasoa mai mea ua latou maua. Valaaulia tamaitai talavou e faasoa mai a latou molimau e uiga i le perofeta.

2:45
Faasoa atu i le vasega le faamatalaga lenei mai le lauga a Sister Carol F. McConkie “Ola e Tusa ma Upu a Perofeta”: “E tusa ai ma tulaga faatonuina o le lalolagi, o le mulimuli i le perofeta e ono inosiaina, le sa'o i manatu faaupufai, po o le le taliaina faaleagafesootai. Ae o le mulimuli i le perofeta e sao i taimi uma lava” (Ensign po o le Liahona, Nov. 2014, 78). O a nisi o mafuaaga e tuu mai e tagata mo le le mulimuli i le perofeta? Valaaulia tagata o le vasega e suesue i le vaega o totoe o le lauga a Sister McConkie po o le lauga a Elder Ronald A. Rasband “Tutu Fatasi ma Taitai o le Ekalesia” mo mea e mafai ona latou fai atu i se tagata o loo taumafai e faalotovaivai i latou mai le mulimuli i le perofeta. Fai i ai e faasoa mai mea ua latou maua.

Fai i tamaitai talavou e faasoa mai mea sa latou aoaoina i le aso. Pe ua latou malamalama i le manaomia o perofeta soifua? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia tamaitai talavou e mafaufau pe o le a faapefea ona latou ola i mea ua latou aoaoina i le aso. Fai atu i nisi o i latou e faasoa mai mea ua uunaia ai i latou e fai.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.