Anaonsmen

Elda Pol V. Jonson

Blong Olgeta Seventi

JES Divosen blong Ol Yang Adalt • 2 Novemba 2014 • Ogden Tabenakol, Ogden, Yuta

Ol dia brata mo sista, wanwan long yumi i wan boe o gel blong wan Papa long Heven we i lavem yumi, we i singaotem mo givim insperesen long ol lida blong givim help mo daereksen long yumi. Hem i wan blesing blong joen tugeta taem yumi stap lanem samting long olgeta we oli gat wok mo raet blong tijim yumi. Tangkyu blong stap ia tedei. Blong stat, mi wantem givim yufala tu smol anaonsmen.

Fas anaonsmen i we, stat long Jenuware 2015, ol JES divosen olsem hemia, bae oli singaotem olgeta ol Wol Divosen blong Ol Yang Adalt. Ol wol divosen ia bae oli hapen tri taem long wan yia—long Jenuware, Mei mo Septemba. Ol jenis ia oli blong haelaetem se wanwan brodkas oli impoten, mo blong mekemsua se wanwan yang adalt, long weaples yufala i stap long hem, mo long wanem situesen, i gat invitesen blong tekpat. Mifala i hop se bae yufala i traehad blong kam long wanwan divosen mo leftemap tingting blong ol narawan blong kam wetem yu, blong yu mo olgeta, i save gat wan janis blong joen tugeta, lisin long kaonsel we i kam long ol lida, mo kasem revelesen mo daereksen blong yuwan. Mifala i leftemap tingting blong ol prishud lida blong mekem ol wol divosen ia oli ol impoten taem long ol lokol eria blong yufala.

Nara anaonsmen i long saed blong ol klas blong relijin we oli stap graduet long hem long Ol institiut blong relijin mo long ol yunivesiti blong Jos. Edukesen Bod blong Jos mo Bod blong Ol Trasti blong BYY, BYY-Aedaho, BYY Hawae, mo LDS Bisnis Kolej oli apruvum fofala niu kos we bae oli stat blong yusum long Septemba 2015. Ol kos ia oli: “Jisas Kraes mo Gospel we I No Gat En,” “Ol Tijing mo Doktrin blong Buk blong Momon,” “Ol Fandesen blong Gospel we I Kambak,” mo “Famle we i no save finis.”

Ol niu kos ia, tingting i stap se bae oli ol konaston blong eksperiens blong relijin edukesen blong yufala. Oli lukluk nomo long ol skripja mo ol tijing blong ol lata-dei profet, wetem wan spesel lukluk i go long Sevya, doktrin blong Hem, mo ol impoten taem insaed long histri blong Jos. Taem yu stap stadi tru long olgeta tabu standet buk, ol skripja bae oli kam blong oli wivim tugeta, mo helpem yu blong developem moa stadi long gospel, mo blong andastanem moa mo laekem moa wanwan buk blong ol tabu standet buk. Ol klas ia, bae oli bildimap ol eksperiens blong yuwan mo blong Jos we yu bin gat bifo wetem gospel stadi. Bae oli helpem yu blong yusum ol gospel prinsipol long ol wei we oli go wetem situesen blong yu naoia.

Mi save talem tu se evri skripja kos wetem ol nara relijin klas we oli stap naoia bae oli gohed blong stap long ol institiut mo yunivesiti blong yumi. Evri niufala kos ia, evri niu studen bae oli tekem, mo bae i stap tu blong ol studen we oli stap naoia. Plis tekem ol klas ia mo wok tugeta blong graduet long wan Jos yunivesiti o institiut blong relijin. Sapos yu finisim ol kos blong save graduet, tingting blong tekem ol klas ia taem yu stap gohed blong stadi long gospel tru long patisipesen blong yu long institiut o relijin klas long yunivesiti blong Jos. Long ol dei we oli stap kam, bae yufala i save lanem moa long saed blong ol niu klas ia taem yufala i visitim education.lds.org.

Mi save stret se taem yufala i tekpat long wol divosen mo ol relijin klas, bae yufala i andastanem moa ol skripja, bae yufala i joen wetem ol narawan we bae oli leftemap mo givim insperesen long yufala, mo bae yufala i mekem fet mo testemoni blong yufala long Jisas Kraes i kam strong moa. Bae i olsem wetem wanwan long yufala, long nem blong Jisas Kraes, amen.