Stap Kwaet mo Save se, Mi, Mi God

I kam long Elda M. Rusel Balad

Blong Kworom blong Olgeta Twelef Aposol

JES Divosen blong Ol Yang Adalt • 4 Mei, 2014 • San Diego, Kalifonia

Ol dia yang brata mo sista blong mi. Mi stap long San Diego, Kalifonia mo hapi blong toktok long yufala. I gud tumas blong stap tedei naet long JES divosen ia. Mifala i welkamem yufala evriwan ol yang adalt long naet ia, wetem yufala ol impoten senia hae skul studen. Mifala i welkamem tu evri riten misinari. !Jos mo Lod i glad long evri seves blong yufala!

Mo laswan, mifala i welkamem yufala we i stap rere blong go long misin. Lod i nidim ol stret mo gud yang woman mo yang man blong helpem Hem blong karem Isrel i kambak, mo mekem wol i rere from Seken Kaming blong Kraes.

Mi wantem yufala blong save se Lod i lavem yufala mo trastem yufala. Fas Presidensi mo Kworom blong Olgeta Twelef Aposol oli biliv long yufala mo prea from yufala oltaem. Yufala i fiuja blong Jos, mo Lod i gat plante gudfala blesing blong yufala taem yu stap laef long wol ia.

Bae mi ripitim mo talemaot gud poen ia—bae yufala nao i lidim Jos long 20 o 30 yia taem. Sam long yufala bae i givim seves olsem ol bisop; stek presiden; misin presiden; Praemeri, Yang Woman, mo Rilif Sosaeti presiden; mo tempol presiden mo sista lida blong tempol. Yes, yufala we i harem mi long naet ia, bae yufala i save kam ol lida long ol komuniti, mo ol kantri, ol memba blong jeneral presidensi blong ol woman, o wan Jeneral Atoriti Seventi, o wan memba blong Kworom blong Olgeta Twelef Aposol.

Tedei, !Yu no save nating wanem gudfala fiuja we i stap long fored blong yu!

Ol Jos Lida

Mi bin harem se sam pipol oli ting se ol lida blong Jos oli stap laef long “wan wol blong olgetawan nomo.” Wanem we oli fogetem, hem i we mifala i ol man mo ol woman we i gat eksperiens, mo mifala i bin laef long plante ples tumas, mo mifala i bin wok wetem plante pipol we oli kam long defren situesen. Wok blong Jos we mifala i gat naoia, i stap tekem mifala i go raon long wol; mifala i mitim ol lida blong politik, relijin, bisnis, mo yumaniterian blong wol. Nomata we mifala i bin visitim Waet Haos long Wasington D.K. mo ol lida raon long wol, mifala i bin visitim tu olgeta we oli no gat samting long haos blong olgeta, long wol ia, mo lukim mo givhan long olgeta we oli pua.

Taem yufala i tingting gud long laef mo seves blong mifala, bae yufala i save agri se mifala i stap luk mo eksperiensem wol long sam wei we sam tu oli mekem. Bae yufala i luksave se mifala i no stap laef mifalawan nomo, olsem fulap nara man.

Samfala oli talem se mifala i olfala tumas. !Yes, i tru se naen long ol Aposol oli gat moa long 80 yia! Mi mi 85 yia.

Be. I gat wan samting abaot wanwan mo kombaen waes blong mifala we bae i givim sam kamfot long yufala. Mifala i eksperiensem evri samting, wetem ol risal blong ol defren pablik loa, mo polisi, ol harem nogud, ol trabol, mo ol ded insaed long famle blong mifala. Mifala i save wanem i stap gohed long laef blong yufala tu.

Bae mi talem tu se i no gat wan long Olgeta Twelef we i man blong sem. Mifala i gat strong fasin. Mekem se, taem mifala i wan long wan desisen, bae yu save se mifala i bin toktok raon, mo mekem desisen ia afta we mifala i bin prea fulap mo tingting plante.

Ol apu pikinini blong mi oli ting se mi “taf tumas”—olsem toktok blong olgea. Mi harem se sam yang singgel adalt oli talem se mi mi “save evri samting.” !Mi hop se i gud blong “save evri samting”

Hat blong mifala i yang, mo Lod i blesem mifala blong muvum wok blong Hem i go fored long ol bigfala wei. Tedei, bae mi tokbaot wetem yufala tri impoten topik: wan, hem i wei blong yusum teknoloji; tu, hem i faet agensem ponografi; mo tri, hem i doktrin blong mared.

1. Wei blong Yusum Teknoloji

Faswan, wei blong yusum teknoloji. Long 2007 mo 2008, mi toktok long ol studen we oli graduet long BYY–Hawae mo BYY–Aedaho. Long ol taem ia, mi bin talem: “Yumi no save stanap long saed laen taem we ol narawan, wetem toktok blong yumi tu, i traem blong eksplenem wanem nao Jos i stap tijim.”¹ Long tetaem ia, mi askem strong long ol graduet blong yusum ol niu teknoloji blong tekpat long storian truaot wol abaot Jos. Mi ting se mi save gud samting taem mi givim tingting ia blong oli serem tingting blong olgeta long ol blog. Stat long taem ia, mi kam blong save Fesbuk, Twita, Pinteres, YuTiub, Guggul+, Instagram, mo iven taem mi stap livim ofis blong mi sekretari blong mi i talem abaot wan samting we i Snapjat. Kas! i luk olsem wol blong teknoloji i no save stap kwaet blong sam minit.

!Mobaelfon blong mi i gud tumas! !Ol Smatfon oli smat tru! Oli givim fulap janis, olsem blong kasem infomesen, kasem ol map, serem ol foto, mo ol mesej, mo tu, wanwan taem blong toktok long wan nara man.

Wol blong tedei we yumi stap long hem i stap jenis oltaem; long sam wei i gud, mo sam wei i no gud gud tumas.

Ol samting we i mekem Laef Bifo i defren long Laef Tedei

Stat long taem blong Adam mo Iv kasem taem blong Josef mo Ema Smit, wol i stap jenis sloslo, long wan jeneresen i go long narawan.

Ol pipol blong bifo, oli bin stap glad long fulap laet blong heven, mo tudak we i gud, we i no gat laet long rod, laet blong trak, i no gat tumas doti long ea long ol taon raon long wol. Long ol taon tedei, kolosap i no posibol blong luk skae long naet olsem we Ebraham, Moses, Rut, Elisabet, Jisas mo ol fas Lata-dei Sent oli bin luk.

Oli bin glad tu blong harem ples i kwaet, i no gat tumas man we i mekem noes, we i spolem dei mo speseli naet blong olgeta. Noes blong tedei, blong trak, plen, mo samting we samfala long yufala i singaotem miusik, i stap draonem gud gudfala wol ia.(Yufala i mas andastanem, long taem blong mifala, wanem we yufala i ting se miusik mo wanem mi ting se hem i miusik—i defren bigwan long miusik.) Yu nomo save go long wan restrong we i no gat miusik i plei. Iven long ol bus longwe insaed long wol, kwaet ples ia bae noes blong wan plen long skae i brekem.

Laswan, ol pipol blong bifo, oli stap olgetawan long ol wei we yumi no save tingting long hem long wol blong yumi we i bisi mo fulap tumas. Iven taem yumi stap yumiwan tedei, yumi save yusum ol samting ia, ol laptop, mo Tivi blong kipim yumi bisi.

Olsem wan Aposol, mi askem yufala wan kwestin naoia: ?Yu yu gat wan kwaet taem blong yuwan? Mi bin stap askem miwan sapos olgeta we oli laef bifo oli gat moa janis bitim yumi blong luk, filim, mo eksperiensem Spirit long laef blong olgeta.

I luk olsem taem wol blong yumi i stap kam moa waes, moa laod, mo moa bisi, yumi gat bigfala jalenj blong filim Spirit long laef blong yumi. Sapos i no gat. kwaet taem long laef blong yu—!stat naoia long naet ia!

Kaonsel blong Profet

Hem i impoten blong stap kwaet mo lisin, mo folem Spirit. I gat plante samting tumas we i pulum tingting blong yumi, i bitim eni narafala taem long histri.

Evriwan i nidim taem blong tingting kwaet longtaem, mo skelem samting. Iven Sevya blong wol, long seves blong Hem long wol, i faenem taem blong mekem olsem: “Nao taem hem i sanemaot ol man, hem i go antap long wan hil, hemwan, blong i prea. Taem tudak i kam Jisas i stap hemwan.”²

Yumi evriwan i nidim taem blong askem yumiwan ol kwestin, o blong intaviu wetem yumiwan bakegen. Plante taem, yumi bisi tumas mo wol ia i gat tumas noes mekem se i had blong harem ol toktok blong heven “stap kwaet mo save se [Hem, Hem i ] God.”³

Ol hantul, olsem ol smatfon, oli ol blesing, be tu, oli save pulum tingting blong yumi blong no harem “kwaet smol voes.” Oli nid blong stap ol wokman blong yumi, be i no ol masta blong yumi. Eksampol, sapos afta tedei long naet ia yu serem tingting we i kam antap blong divosen ia long sosol media, smatfon blong yu i wan wokman. Sapos yu luk tru long Intanet, smatfon blong yu i wan masta.

Tingbaot wanem Elaeja i lanem: “Hae God i no kamtru long win; …Hae God i no stap long graon we i seksek; … Hae God i kamtru long faea,” be Lod i toktok long kwaet smol voes.”⁴

Wei we Yumi Yusum Teknoloji

Kwestin: Yu ones. ?Hamas taem yu spendem evri dei long mobaelfon blong yu, o tablet, be no kaontem taem yu stap yusum long skul o Jos wok blong yu?

I gud blong yusum, mo oli wan blesing. Be, taem ol smatfon oli stat blong blokem rilesensip blong yu wetem ol fren mo famle—mo moa impoten, wetem God—yumi nid blong mekem wan jenis. Long sam long yufala, bai I nid blong stretem yufala smol; be long sam narawan, I nidim bigfala jenis .

Mi wari tu se blong teks tumas, go tumas long Fesbuk, Twit, mo Instagram i stap tekem ples blong storian—toktok stret long wan narawan, mo toktok long prea wetem Papa blong yumi long Heven, mo tingting long ol samting we oli moa impoten long laef.

Plante taem ol yang pipol oli stap long sem rum wetem famle, o fren, be oli stap bisi blong toktok wetem wan we i no stap, mo stap mestem wan janis blong storian wetem olgeta we oli stap kolosap. Taem hemia i hapen, !ating bae yu nid blong aot long rum, mo sendem wan teks mesej i go long olgeta blong pulum tingting blong olgeta!

Wanem we mi lanem moa long laef blong mi, i kam long taem we mi stap lisen long olgeta we oli gat plante eksperiens we oli olfala mo oli lanem fulap impoten samting we mi nidim blong save. Plis tekem janis ia blong visitim mo toktok wetem papa, mama, anti mo angkel, mo ol bubu taem oli stap yet wetem yufala.

Mi wari tu long sam long yufala we i stap jekem imel, Fesbuk, Twita, o Instagram o stap sendem ol teks mesej long taem blong miting ia we I impoten tumas long Jos blong Jisas Kraes blong Ol Lata-dei Sent —tabu sakramen miting blong yumi. Long impoten miting ia, yumi sapos blong tingting nomo long Lod tru long prea, singsing ol hym, mo tekem ol saen blong bodi mo blad blong Hem, be i no blong fas long ol hantul blong yumi. Yu no save konek wetem Spirit long taem blong presentesen blong sakramen mo semtaem lukluk o sendem wan mesej long smatfon o tablet blong yu. Koneksen ia i nidim Laet blong Kraes, we i aot long maen blong yu i go long hat blong yu wetem wan lav mo ful tingting we i strong.

Mi save se plante long yufala i gat ol skripja mo ol nara tul blong Jos long ol mobaelfon mo ol tablet. Mi harem se sam papa mo mama, mo lida blong Jos oli wari long niufala divelopmen ia, be mi, no.

Jos i stap yusum ol niu samting long teknoloji blong helpem yumi blong pusum wok blong Lod i go fored. Yumi stat blong sendem ol misinari blong yumi long ol seling bot long ol yia 1830, be afta yumi yusum ol niu bigfala sip we oli givim long ol yia 1860. Mo afta, yumi bin glad long ol plen olsem bes wei blong sendem ol misinari blong mekem wok blong olgeta raon long wol long ol yia 1960.

Histri i stap ripitim hemwan long ol gud wei. Long bifo, Isrel i holemtaet ol toktok blong ol profet long ol skrol. Mo i bin hapen se, ol fas Kristin pipol oli yusum wei blong fasem ol pepa long wan saed, ol fasfala stael blong wan buk.

Tedei, tu taosen yia afta, yufala ol yang pipol i stap ridim ol skripja blong yufala long ol smatfon o tablet—yufala i stap ridim olsem we Jisas i stap ridim olgeta taem oli givim wan skrol blong Aesea blong ridim long Nasaret. Yufala tu i save skrol ⁵—be plis, i no long taem blong sakramen. I tru. Long samfala minit ia nomo, yu save tingting long Atonmen blong Sevya taem yu stap lukaotem Spirit blong Lod blong blesem yu long wik we i stap kam. Mo gat tingting ia blong putum smatfon o tablet blong yu long airplane mode (eaplen mod) long ful taem blong klas long Sandei. Bae yu gat yet ol skripja, ol toktok blong jeneral konfrens, hymbuk, mo ol lesen, be noes blong ol teks mesej bae i no pulumaot tingting blong yufala.

Proteksen aot long ol strong win

Antap long fasin blong faenem taem blong lukluk mo tingting kwaet longtaem, yumi nidim tu blong faenem wan ples, olsem we oli talem long Doktrin mo Ol Kavenan, we bae i wan ples blong sekiuriti mo ples blong haed long hariken.”⁶

Yumi nidim wan spesel ples blong haed, we yumi save haedem yumi fulwan long ol fos blong ol lektrik tul taem yumi ofem olgeta mo save konek long Spirit blong God.

Wan long ol bes ples blong konek wetem Spirit, hem i long tempol—Haos blong Lod. I tru, yumi save talem sem samting abaot ol jos bilding, wetem ol seminari mo institiut klasrum. Yumi save faenem ples blong haed insaed long ol hom o apatmen blong yumi taem yumi jusum nomo blong ofem evri samting, mo stap kwaet mo save long ol samting blong God.

Blong helpem yumi blong faenem wol ia we Adam mo Iv, Ebraham mo Sara, mo Josef mo Meri oli faenem God, mo blong helpem yumi blong faenem wan ples blong filim mo harem voes blong Lod tedei, mi invaetem yufala blong go long tempol plante taem mo ofem ol mobaelfon blong yufala mo putum olgeta i stap bifo yu go long yad blong tempol.

Long evri odinens insaed long Haos blong Lod, bae yu harem ol naesfala lanwis, toktok mo promes we Lod i givim long ol pikinini blong Hem. Hem i long ples ia nomo we yu save harem ol naes toktok ia we i givim insperesen.

Sapos yu no save kasem wan tempol rekomen naoia, visitim yad blong tempol. Bae mi mekem wan impoten poen long ples ia sapos yu neva harem bifo: I no gat wan samting i stopem yu, o wan narafala man blong visitim yad blong tempol. Lod i wantem yu blong yu rere blong stap klin inaf blong kasem wan tempol rekomen, mo kam long tempol kwiktaem. Taem yu wokbaot long yad blong tempol, bae i planem, insaed long hat blong yu, wan tingting blong wantem kasem wan rekomen, mo go long tempol oltaem.

Be Setan, long narasaed, i no wantem yu blong go long tempol, o stanap long sado blong wan tempol. Hem i wantem yu blong go longwe long tempol from se tempol i Haos blong Lod.

Mi wantem talem gud long wanwan long yufala se taem yu go long tempol, o visitim yad blong tempol, bae yu wokbaot long tabu graon, semmak olsem ol fas petriak mo mama oli bin mekem bifo. Oli bin stap lukluk nomo long rod blong olgeta we i no save finis, mo ol samting we oli impoten moa long laef. Olsem olgeta, yu save lukluk blong filim paoa mo ples blong heven.

Sapos yu jusum, yu save harem kwaet smol voes blong Spirit insaed long tempol o long tabu graon blong hem long sam wei we bae i neva hapen long yu long stoa, long restrong, mo long ol pablik ples. I tru, bae yu faenem se tempol i wan nambawan ples blong kasem ol ansa long ol prea blong yu.

I no longtaem i pas, Presiden Tomas S. Monson i dediketem Gilbet Arisona Tempol. Long taem blong dedikesen prea, hem i askem Lod: “Bae Tabu Spirit blong Yu bae i stap long ples ia, mo paoa blong Hem, bae evriwan we i kam insaed long ol wol (blong tempol) ia bae oli filim.” Hem i prea, mo talem tu: “Bae haos ia, we i Haos blong Yu, bae i wan ples blong haed we i gat pis, wan ples blong haed long taem blong hariken blong laef mo noes blong wol. Bae i wan haos blong kwaet tingting long saed blong ol samting blong laef mo tabu plan blong Yu from mifala.”⁷

Evri tempol we oli dediketem i go long Lod oli wan ples blong haed we i gat pis, wan ples blong haed long taem blong hariken blong laef mo noes blong wol, … [mo] wan haos blong kwaet tingting.”

Oposisen

Wol we yumi stap laef long hem i stap muvaot kwiktaem long ol tijing blong Kraes, hemia long saed blong ol loa mo ol kastom. From hemia, Setan i stap wok ovataem blong miksim tingting blong ol boe mo gel blong God, mo blong tanem olgeta we God i jusum olgeta blong oli no mekem diuti blong olgeta mo blong oli no kasem fulwan ol blesing blong Lod.

Setan i wantem yu blong yu stop blong mekem ol gud fasin we yu lanem long hom, long seminari, mo long institiut mo long misin blong yu—olsem blong stadi skripja evri dei, prea evri dei, stap klin inaf blong tekem sakramen evri wik, mo givim seves wetem hat blong yu. Hem i wantem tu blong yu stap long saed laen long ol impoten faet blong tedei.

Tingbaot se yumi stap long wo ia—i no wan wo wetem masket mo bolet. Be, wo ia i ril, wetem fulap man i kasem kil. Wo ia, hem i wo ia we i stat long Spirit Wol mo i stap gohed naoia.

Pol i invaetem yumi blong putum “ful klos blong God blong faet.” Hem i talem: “olgeta we yumi stap faet agens … long laef blong yumi oli no man, …be ol devel we oli stap olbaot long wol ya, ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak long wol ia.”⁸

Olsem wan Aposol blong Lod Jisas Kraes, mi invaetem yu, tedei, blong putum “ful klos blong God blong faet” mo joenem faet ia tedei, semmak olsem ol boe blong Hileman oli bin mekem plante yia i pas. Yu no wet kasem taem yu mared, o statem longfala rod blong wok, o kam olfala. Jos i nidim ol yut blong yumi naoia. !Lod i nidim yu naoia!

Bae yu tingbaot se ol tu taosen strong soldia “oli bin mekem wan kavenan blong faet from fridom blong ol man blong Nifae.”⁹ Jos i nidim ol strong soldia blong tedei we oli bin mekem wan kavenan blong “stanap olsem ol witnes blong God evri taem mo long evri samting, mo long evri ples.”¹⁰

Buk blong Momon i tokbaot ol strong soldia ia olsem ia:

“Olgeta evriwan ia oli ol [yangfala], mo oli strong long taem blong faet, mo tu, long paoa mo ol aktiviti; be luk i no hemia nomo—oli ol man we oli bin tru long evri taem long eni samting we ol lida blong olgeta … i trastem long olgeta blong mekem.

“Yes, oli bin ol man we oli ones mo oli tru, from we ol papa mo mama blong olgeta i bin tijim olgeta blong holem ol komanmen blong God mo blong wokbaot stret long fored blong hem.”¹¹

Yufala, ol yang woman mo ol yang man. Yufala i ol gel mo boe blong Hileman blong tedei. I gud blong oli talem abaot yufala olsem we oli bin talem abaot olgeta: “Oli bin stat long taem ia blong givim wan bigfala sapot.”¹²

2. Faet blong Agensem Ponografi

Nambatu samting we mi wantem tokbaot long yu. Yumi evriwan i mas sapotem faet blong agensem ponografi, wan nogud sik we i stap go raon long wol. Lisin long mi tedei taem mi stap eksplenem wan eksampol blong waes tingting blong Lod.

Moa long 180 yia i pas, Lod i talemaot loa blong helt blong Hem, wetem wan woning long saed blong yus blong tabak.¹³ Ol milian pipol oli bin lisin long Lod, be plante moa oli no bin mekem. I no gat wan i bin save long tetaem ia, o iven taem mi yangfala olsem yufala, wanem smok i save mekem. Tedei, afta plante yia blong stadi long saens, naoia yumi save risal blong smok we i kansa blong lang o ol nara sik we i mekem man i ded. Tok blong Waes blong Lod i bin wan proteksen blesing.

Long wan semmak wei, Lod, tedei, i bin wonem yumi abaot ol risal blong ponografi. Ol milian pipol oli fetful blong folem kaonsel blong Lod, be plante narawan oli no fetful. Yumi no wet 180 o iven 10 yia blong faenemaot ol risal blong ponografi from se stadi blong saens tedei i talemaot finis se ponografi i stap mekem ol yang adalt oli handikap long plante wei, mo i stap putum posen long janis blong olgeta blong gat wan mared we i gat lav mo i stap longtaem.

Stadi i soem tu se taem oli yusum ponografi plante taem, i save lidim man blong gat rabis fasin, mo i save jenisim waea blong bren blong holemtaet wan long kalabus blong adiksen.

Stadi i talem se i tru se ponografi i givim sam tingting we oli no ril, mo i tijim wan denja fasin long saed blong helti fasin blong man i go wetem woman.

Ponografi i moa denja taem i mekem tingting blong yu i luk ol pipol olsem ol samting we yu no nid blong tingting long olgeta, mo olsem ol samting blong no respektem long saed blong filing mo bodi.

Wan nara pat blong ponografi, i we, hem i wan “sikret” aktiviti. Olgeta we oli yusum oli haedem olgeta, o talem se oli yusum smol, mo haedem long boefren, gelfren o patna blong olgeta. Stadi i faenem se taem ol pipol oli haedem olgeta olsem—taem oli mekem ol samting we oli no praod long hem mo stap kipim olgeta samting ia i sikret long memba blong famle mo ol fren—i no spolem nomo rilesensip blong olgeta, mo i livim wan filing se oli stap olgetawan, be tu, i mekem olgeta oli moa isi blong kasem sik long tingting, tingdaon long olgeta, mo stap wari bigwan. Blong kipim ol sikret i spolem tras.

Faswan, yumi mas stap longwe long ponografi from i kilim man i ded. I kilimded stret, gudfala rilesensip wetem man—i prapa spolem gud mared mo famle. I prapa spolem gud spirit blong man o woman we i yusum ponografi from se hem i wan bigfala posen we i kilimded bodi mo tingting.

Ol dia yang brata mo sista blong mi, no foldaon long trap ia. No tingting se sapos yu go long misin, o taem bae yu mared bae yu save stopem rabis fasin ia. Sapos yu stap long hem naoia, sapos yu foldaon long trap blong fasin ia, kasem help long saed blong spirit naoia. Yu save winim ponografi wetem help blong Sevya. !No wet! !Mi askem strong long yu blong lego samting ia! I gat plante risos long LDS.org we bae i karemaot tudak ia blong ol pikja blong ponografi.

Hemia ol dei blong jalenj—be oli no ol bigfala jalenj moa bitim hemia long taem blong Hileman mo ol strong soldia blong hem taem oli bin stanap blong difendem ol famle blong olgeta mo Jos. Hemia taem blong yufala blong tekem step fored mo joenem ol grup blong ol nara stret mo gud yang man mo yang woman blong faet agensem ponografi.

3. Doktrin blong Mared

Naoia, mi wantem tokbaot nambatri topik long yufala. Mo mi wantem yufala blong andastanem gud taem mi talem posisen blong Jos long saed blong mared olsem we Papa long Heven i bin givim long yumi tru ol skripja mo long “Famle: Wan Ofisol Toktok i Go long Wol.” Pepa ia i talem: “Famle, God nao i odenem. Mared bitwin man mo woman hem i wan stamba samting folem plan ia blong Hem we i no save finis. Ol pikinini oli gat raet blong oli bon insaed long mared laef blong papa mo mama. Oli gat raet tu blong groap long han blong papa mo mama we tufala i agri mo folem ol promes we tufala i bin mekem long mared blong tufala wetem fasin blong stap fetful long tufala oltaem.”¹⁴

Ol Aposol oli ol gadman antap long taoa blong luk mo tijim ol doktrin blong Kraes. Evriwan long yufala i save se stret mining blong mared i stap go lus tedei. I gat olgeta pipol we oli statem toktok from mining blong mared long saed blong raet blong man. Fas Presidensi mo Kworom blong Olgeta Twelef Aposol oli eksplenem ples we Jos i stanap long hem, mo doktrin blong stamba tingting blong God, mo plan blong ol spirit pikinini blong Hem blong gotru long laef long wol ia, we i stamba long laef blong yumi we i no gat en mo i no save finis.

Mi ting se plante long yufala oli no bin ridim toktok we i bin kamaot eli long yia ia. Mi kwotem toktok ia, mo askem blong yufala i lisin gud:

“Ol jenis long loa blong kantri, bae oli no jenisim, mo oli no save jenisim, stamba loa we God i putum i stap. God i wantem luk yumi holemtaet mo obei ol komanmen blong Hem nomata wanem tingting o fasin i stap hapen long sosaeti. Loa blong Hem long saed blong jastiti i klia gud: fasin blong gat seks, i stret nomo bitwin wan man mo wan woman we tufala i mared folem loa olsem hasban mo waef. Mifala i askem strong long yufala blong luklukbak mo tijim ol memba blong Jos long doktrin we i stap long ‘Famle: Wan Ofisol Toktok i Go long Wol.’

Ofisol Toktok ia i gohed blong talem:

“Semmak olsem olgeta we oli stap promotem sem seks mared oli gat raet blong oli tritim gud olgeta, i semmak tu long olgeta we oli agensem sem seks mared. …

“Olsem ol memba blong Jos, yumi responsibol blong tijim gospel blong Jisas Kraes mo talemaot ol bigfala blesing we bae i kam taem wan i folem ol komanmen blong God, mo tu, ol panismen we wan i save kasem taem i no folem. Mifala i invaetem yufala blong prea se, ol pipol long evri ples, bae hat blong olgeta i sopsop blong akseptem ol trutok blong gospel, mo we waes tingting bae i kam long olgeta we bae oli disaed long ol bigfala poen blong fiuja blong ol sosaeti.”¹⁵

Mi save se yufala i lavem mo sapotem Lod mo sastenem ol profet blong Hem, be tu, mi save se sam long yufala i konfius long mining blong desisen blong Jos blong sapotem plan we God i soemaot long saed blong ol pikinini blong Hem.

Mi save tu se sam long ol yut blong yumi oli traehad blong andastanem olsem wanem wan i save eksplenem doktrin long saed blong famle mo mared, mo semtaem, stap kaen, stap kwaet, mo lav long olgeta we oli no agri. Maet yufala i fraet se bae oli singaotem yufala se man blong jajem man, mo no laekem nara man.

Maet yu save wan we i stap traehad wetem fasin blong laekem narawan we i sem seks olsem hem, o i mekem desisen blong laef wetem wan we i sem seks olsem hem. Lav blong yu long man o woman ia, olsem wan boe o gel blong God i save krietem wan hat taem insaed long yu blong traem blong lavem mo sapotem hem, be stil stanap long plan blong Lod we i no save finis blong stap glad.

I mas klia long yumi long naet ia—Jos blong Jisas Kraes blong Ol Lata-dei Sent i biliv se “eksperiens blong man i laekem man o woman i laekem woman i wan ril samting long plante pipol. Blong laekem nomo, i no wan sin, be blong mekem folem filing ia, i wan sin. Nomata wanwan man o woman i no jusum blong gat kaen filing ia, oli jusum blong mekem folem ol filing ia. Wetem lav mo andastaning, Jos i go aot long evriwan long ol pikinini blong God, wetem tu olgeta we oli gat filing long wan we i semmak long olgeta.”¹⁶

Jos i no tijim, o sapotem fasin blong sakemaot man, o eni nara aksen we i no Kristin fasin. Yumi mas lavem mo traehad blong helpem ol narawan blong oli andastanem se i no gat wan man we bae i sakemaot o tanem baksaed long ol komanmen blong God.

Wan Witnes mo wan Woning

Laswan. Insaed long “Famle: Wan Ofisol Toktok i Go long Wol,” Fas Presidensi mo Kworom blong Olgeta Twelef i talem: “Mifala i wonem, olgeta we oli stap brekem ol kavenan blong jastiti, olgeta we oli stap mekem nogud long ol man, woman o pikinini blong olgeta, o oli no mekem ol wok insaed long famle blong olgeta, bambae olgeta ia oli mas lukaot from God bambae i jajem olgeta. Mo tu mifala i givim woning se seraot blong famle bae i mekem se wanwan man o woman, ol komuniti, mo ol kantri bae oli fesem ol had taem we ol profet blong yumi bifo mo naoia oli stap talem.”¹⁷

Mi mi wan we mi joen long woning ia. Olsem wan gadman antap long taoa, mi mi responsibol blong “blo long bubu mo wonem ol pipol.”¹⁸ Tedei, mi tok stret mo sendem wan voes blong woning. Mi mekem olsem from se mi lavem yufala, mo mi wantem yufala i andastanem we yumi mas fesem Lod mo obei ol komanmen blong Hem. Hemia nao diuti blong mi.

Gud Nius

Woning blong Lod i kam tu wetem wan invitesen blong kam long Hem. Papa blong yumi long Heven i bin save ol risal blong stap laef long wan wol we i foldaon, taswe, hem i givim wan Sevya, “wan smol sipsip we oli kilimded hem finis stat long stat blong wol,” from ol pikinini blong Hem.¹⁹ Insaed long gospel blong Jon, yumi lanem: “God i lavem tumas ol man long wol, nao hem i givim mi, mi stret Pikinini blong hem, miwan nomo we hem i gat blong olgeta man we oli bilif long mi bambae oli no save lus, oli gat laef we i no save finis.”²⁰

Plis tingbaot se gospel i “gud nyus ia.” Hem i wan mesej blong hop. Sapos yu stap long trabol, askem help. Lod i gat sore mo i save fogivim man.

Aposol Pol i bin tijim:

“I no gat man we i save tekemaot yumi long Kraes ya we hem i lavem yumi tumas. Maet yumi gat trabol, gat hadtaem, man i spolem yumi, yumi hanggri, man i wantem kilim yumi ded …

“Be nating. Kraes ya we i lavem yumi tumas, hem i stap mekem we yumi winim olgeta samting ya oltaem.

“Mi save finis we … i no gat ded, o laef, o ol enjel, o sam narafala paoa long heven, o wan samting we i stap finis, o we bambae i kam,

“i no gat samting long ples blong God o Hom blong ol Dedman we i save tekemaot yumi long God we i lavem yumi tumas, we yumi joen long Jisas Kraes, Masta blong yumi.”²¹

From Jisas Kraes nao, pis i save tekem ples blong filing blong rong. Helti rilesensip i kambak. Adiksen i go lus evriwan.

Yumi nidim blong letem famle mo fren blong yumi i save trutok ia—God, Hem i lav. Mo “hem i askem evriwan blong kam long hem mo tekempat long gud fasin blong hem; mo hem i no tanem baksaed long eniwan we i kam long hem.”²²

Mifala i nidim yufala blong joenem wok blong sevem man, bifo long misin, long misin mo afta long misin.

Wei blong stap yusum teknoloji i blesem ol laef

Lod i invaetem yufala blong tekpat mo yusum sosol media we yu laekem blong serem gospel wetem mo stanap olsem ol boe mo ol gel blong Hileman long taem nao ia long ol bigfala faet blong ol las dei. Hem i wantem yufala blong kam ol strong soldia blong tedei we i stanap strong mo i joen blong difendem trutok. Hem i wantem yufala blong gat strong paoa long tingting mo stap strong blong fesem enemi. Mifala i save se, long en, Lod bae i win mo Setan bae i lus.

Tru long ol defren sosol media, yu save gat gospel storian wetem famle, fren, mo long yufala ol riten misinari, wetem ol foma investigeta mo ol niufala memba. Yu save stanap olsem ol witnes from trutok mo difendem kingdom.

Stap Difendem Kingdom

Mi save se sam long yufala i wari se bae oli no jajem gud yufala, oli daonem yufala mo tok strong long yufala sapos yu difendem Papa long Heven mo Lod Jisas Kraes, mo Jos. Mi andastanem wari blong yu.

Mi wok long Britis Misin afta long en blong Wol Wo 2 olsem wan yang misinari. Long tetaem ia, ol Momon “oli tokbaotgud mo nogud olgeta,”²³ mo oli stap laf mo jikim ol misinari. Ol pipol oli stonem mifala wetem ol samting. Be, mifala i no stop, mifala i gohed blong talemaot testemoni blong mifala mo serem gospel. Olsem Abinadae, mifala i no stop; olsem Pol, mifala i no stop; mo olsem Sevya mifala i no stop. Long tetaem ia, mifala i no save se wok blong mifala bae i kasem wea. Mifala i gat 14 distrik mo i no gat stek. Tedei, i gat 46 stek blong Saeon long ol Britis Aelan.

Ol dia yang fren blong mi we mi lavem tumas, no wari long olgeta ia long bilding ia we i bigwan mo we i gat fulap spes. Nifae i bin luk se bae oli jikim mo poenem “fingga long olgeta we oli kam mo kakae long frut ia.”²⁴ Yufala i no stap olsem olgeta ia we, afta we oli testem frut, oli sem, from olgeta we oli stap jikim olgeta; mo oli go folem ol rod we i no blong folem mo oli lus.”²⁵

Yufala i wan bigfala mo impoten jeneresen, mo hemia i wan gudfala taem blong stap laef. Fiuja i saen i stap. Talem long yuwan: “Mi stap helpem Lod taem mi go aot mo serem testemoni blong mi mo blong tijim ol trutok we God i talemaot long ol las dei.”

Naoia, yu gat wan janis blong yusum evri sosol media ia wetem waes blong serem wanem yu bin lanem mo filim tedei long naet. Tingbaot se i gat wan stret taem mo ples blong yu yusum sosol media, mo serem ol tingting mo testemoni blong yu long saed blong ol samting we yu stap lanem mo filim long wan long ol taem ia.

Testemoni mo Witnes

Bae Lod i blesem yu wetem waes bitim wanem we sora blong yu i harem, blong yu save luksave wetem waes se yumi stap long bigfala faet ia, mo yumi mas stanap tugeta, yangfala mo olfala. Mi prea se bae Papa blong yumi long Heven i lukaot gud long yu mo blesem yu. Plis, bakegen, save hamas nao mifala i lavem yufala. Mo mi askem Papa blong yumi long Heven blong blesem wanwan long yufala evriwan long wea ples yu stap long hem long wol ia, we yu stap harem divosen ia long naet ia wetem pis blong Lod insaed ol hat blong yufala, wetem wan kwaet witnes mo tru tingting se Jisas Kraes i laef, se Hem i pikinini blong God, se hemia i Jos blong Hem. Bae pis mo paoa ia i stap wetem yu. Bae Papa blong yumi long Heven i lukaot gud long yu. Bae yu neva fogetem rod ia we yu stap long hem, yufala evriwan i impoten long fiuja, blong rere long wol ia blong dei ia taem Jisas Kraes bae i talem “I inaf ia nao” mo bae i kambak mo rul mo stap olsem Sevya, Lod blong ol lod, King blong ol king, Ridima blong wol, we mi testifae se Hem i laef. Yumi bin stap tokbaot ol samting we oli impoten long hem tedei. Bae yumi livim miting ia mo fulap wetem lav long Lod mo wan strong tinting blong wantem givim seves long Hem, hem i prea blong mi wetem tingting i stap daon, long tabu mo long nem we yumi lavem tumas blong Lod Jisas Kraes, amen.