61:53

Kijn̄en̄e Wōt, im Jeļā Bwe N̄a Anij

Elder M. Russell Ballard

Jān Doulul eo an Jon̄oulruo Rijilōk ro

Nokon in Jotan an CES n̄an Rūm̧m̧an Ded ro • Māe 4, 2014 • San Diego, California

Likao im jiron̄ ro eddik aō jitōnbōro, ij m̧ōņōņō n̄an kōnono n̄an kom̧ jān San Diego, California. Ej juon ikdelel n̄an pād ilo nokon in jotan an CES. Jej karuwaineneik kom̧ aolep rūm̧m̧an ded ro joten in, ekoba kom̧ rijikuuļ senior ilo high school raorōk. Kōmij m̧ōņōņō n̄an ami pād ippām. Kōmij barāinwōt karuwaineneik mijenede ro raar ro̧o̧l. Kabun̄ in im Irooj rej kam̧oolol kōn aolep jerbal eo ami raiboojoj!

Āliktata, jej karuwaineneik kom̧ ro me rej pojak in erom mijenede ro. Irooj ej aikuj jiron̄ im likao ro rejim̧we n̄an jipan̄ E aiin Israel im kōpooj laļ in n̄an Itok eo Kein Karuo An.

Ikōņaan bwe kom̧in jeļā bwe Irooj ej iakwe kom̧ im lōke kom̧. Būreejtōnji eo Kein Kajuon im Doulul eo an Jon̄oulruo Rijilōk ro rej tōmak ilo kom̧ im emakijkij jar kōn kom̧. Kom̧ij ilju im jekļaj eo an Kabun̄ in, im Irooj ewōr ippān elōn̄ kōjeram̧m̧an ko rem̧m̧an n̄an liwaj n̄an kom̧ ilo mour ko ami.

In āliji im kalikkar meļeļe in—kom̧ naaj tōl Kabun̄ in ilo 20 n̄an 30 iiō ko jān kiiō. Jet iaami kom̧ naaj jerbal āinwōt bisop ro; stake būreejtōn ro, mijen būreejtōn ro, būreejtōn ro an Būraimere, Doulul eo an Jiron̄ ro, Doulul eo an Kōrā; im būreejtōn ro an tampeļ im matron ro. Aaet, ewōr ro rej ron̄ ainikiō joten in rej ro me renaaj bōlen erom ritōl ro ilo jukjukinpād ko im laļ ko, membōr ro an būreejtōnji ko reutiej an kōrā ro ak em̧ool juon Rutiej an Kabun̄ Jiljilimjuonn̄oul ak juon bōlen membōr in Doulul eo an Jon̄oulruo Rijilōk ro.

Rainin kom̧ij jab jeļā ta juon ilju im jekļaj ekabwilōn̄lōn̄ ej im̧aami!

Ritōl ro an Kabun̄

Emōj aō kar ron̄ bwe jet armej rej lōmņak ritōl ro an Kabun̄ in rejjab kanooj “jeļā ta ej waļo̧k laļ in.” Ta eo remeļo̧kļo̧k ej bwe jej em̧m̧aan im kōrā ro eļap jeļā ippāer, im kōm̧ ar mour ilo elōn̄ jikin ko rokoktaktak im jerbal ippān elōn̄ armej jān jekjek in mour ko rokoktaktak. Ijjitōn̄ ko am kiiō an em̧ool ekōm̧m̧an bwe kōmij itok-itak aolepān laļ in, ijo kōmij kweilo̧k ippān ritōl ro an kien, kabun̄, pejnej, im humanitarian an laļ in. Men̄e kōm kar bar loļo̧k White House ilo Washington, D.C., im ritōl ro an laļ ko aolepān laļ in, kōm kar bar loļo̧k elōn̄ wōt im̧ōko rem̧m̧an ilo laļ in, ijo kōm kar kweilo̧k im kwaļo̧k n̄an rijeram̧ōl ro.

N̄e kom̧ij lukkuun ļōmņak kōn mour ko am im jerbal in kwaļo̧k, kom̧ naaj kanooj errā bwe kōmij lo im jeļā laļ in ilo wāween ko ro jet rej. Kom̧ naaj kile bwe edikļo̧k am “kōttoļo̧k” kom̧ijj jān elōn̄ armej.

Ro jet rej ba kōm rūtto. Ekwe, em̧ool bwe ratimjuon iaan Rijilōk ro rej rōrūttoļo̧k jān 80 iiō dettaer! Ij 85.

Mekarta, ewōr juon men kōn kajjojo im koba in māletlet an Rijilōk ro me rej aikuj letok jet n̄an kaenōm̧m̧an. Em̧ōj am jeļā kake, ekoba kaje ko an kakien im kien ko rokoktak im inepata ko an public, jorrāān ko, mej ko ilo baam̧le ko am make. Kōm jeļā ta eo ej waļo̧k ilo mour ko ami.

In barāinwōt kam̧ool bwe ejjeļo̧k iaan Jon̄oulruo eo rej jook. Kajjojo iaam ewōr piktok ko rekajoor. Kōn menin n̄e kōmij ippān doon ilo juon jokālet, kom̧ maron̄ jeļā bwe em̧ōj am kar kapilōk ippān doon im itok n̄an jokālet eo ālkin eļap jar im lukkuun ekōnono.

Ajri ro jibū em̧ool ļōmņak “ilikkuun jejjet”—n̄an kōjerbal naan ko aer. Iaar ron̄ bwe jet rūm̧m̧an ded ro rej ba bwe ijeļā “kein kapeel ko raan kein.” Ij kōjatdikdik em̧m̧an n̄an jeļā “kein kapeel ko raan kein”!

Kōm epād kajoor eo an jodikdik ro, im Irooj ej kōjeram̧m̧an kōm n̄an kōm̧akūt jerbal eo An im̧aanļo̧k ilo wāween ko rekabwilōn̄lōn̄. Joten in inaaj ekōnono ippāmi jilu unin kōnono ko raorōk: juon, kōjerbal technology; ruo, tariņaik pija im bok ko renana; im jilu katak eo an m̧are—jilu unin kōnono ko rekanooj aorōk me jej jelm̧ai rainin .

1. Kōjerbal Technology

M̧oktata kōjerbal technology. Ilo 2007 im 2008 eo, iaar kōnono n̄an rijikuuļ in kadiwōjļo̧k ro ilo BYU-Hawaii im BYU-Idaho. Ilo tōre ko iaar ba, “Jejjab maron̄ kowaan n̄an em̧m̧akūt ilo an ro jet, ekoba rijum̧ae ro ad, kajieon̄ kōmeļeļeik ta eo Kabun̄ in ej katakin.”¹ Ilo tōre eo iaar libjōrjōr rikadiwōjļo̧k ro n̄an kōjerbal em̧m̧an eo an technology n̄an erom bōk kuņaan ilo bwebwenato eo aolepān laļ in kōn Kabun̄ in. Iaar ļōmņak iaar jeļā kōjerbal menin kapeel ko rainin ke iaar elmakot bwe ren kwaļo̧k meļeļe ko aer ilo blog ko. Jān tōre eo, kar kwaļo̧k n̄an n̄a Facebook, Twitter, Pinterest, YouTube, Google+, Instagram, im innām rijeje eo aō eaar jiron̄ eō, ke iaar em̧m̧akūt, juon men kōn Snapchat. Wow! Technology ejjab maron̄ bōjrak an eddōkļo̧k em̧ool ilo tōre in kiiō.

Cell phone eo aō ekabwilōn̄lōn̄! Smartphone ko rej lukkuun remeletlet! Rej letok n̄an kōm ekanooj lōn̄ iien ko rem̧m̧an raiboojoj, ekoba tōpar meļeļe ko, bōk iaļ ko ilo māp, kwaļo̧k pija ko im ennaan ko, im em̧ool kōnono ippān juon alen ilo juon iien.

Laļ kāāl eo me jej kiiō mour ie eļap an oktak, eo ilo jet wāween ko em̧m̧an im ilo jet wāween ko emaron̄ in erom jab kanooj em̧m̧an.

Oktak ko ikōtaan Etto im Kiiō

Jān raan ko an Adam im Eve m̧ae raan ko an Joseph im Emman Smith, laļ in eaar rum̧ij an oktak jān juon epepen n̄an bar juon.

Armej ro ilo etto raar mour kōn eļap wōt meram jān lan̄ im maron̄ ilo jab inepata, an ejjeļo̧k meram ko itōrerein iaļ ko, meram jān car k,o im meram ko kōm̧m̧ani loe ilo aolep jikin kweilo̧k ko ad aolepān laļ in. Ilo jikin kweilo̧k ko rainin, ekanooj pen n̄an lo lan̄ ilo bon̄ āinwōt Abraham, Moses, Ruth, Elisabeth, Jisōs, im Armej ro Rekwojarjar ilo Raan-ko Āliktata kar loe.

Rej barāinwōt lem̧ōņōņō kōn lur eo, kōn jet ainikien ko kōm̧m̧an in armej waļo̧k ilo raan ko aer im eļaptata bon̄ōn ko aer. Kauwaron̄ron̄ in raaan kein jān waan ettōr ko, baļuun ko, im jet iaami emaron̄ kōjan̄ al ko jet rej ļōmņak rejjab al ak kein kauraron̄ron̄. (Kom̧ij aikuj meļeļe, jān epepen eo aō, ta eo kom̧ij ļōmņak ej al im ta eo ij ļōmņak ej al—eļap ad ettoļo̧k jān doon.) Kom̧ij jab maron̄ etal n̄an juon im̧ōn m̧ōn̄ā ilo an ejjeļo̧k al kōjan̄i. Em̧ool ilo ibuļōn wōjke ko rettoļo̧k ilo laļ in, lur eo emakijkij an kakkure jān juon baluun ilōn̄ ilo mejatoto.

Āliktata, armej ro ilo tōre ko m̧okta raar en̄jake ajimakeke ilo elōn̄ wāween ko jejjab maron̄ ļōmņaki ilo laļ in etarpok im poub. Em̧ool n̄e jej make ļo̧k rainin, jemaron̄ ekōnono ippān ro jet kōn kein kapeel ko rainin, laptop ko, im TV ko n̄an kam̧ōņōņōik kōj im m̧ad.

Āinwōt juon Rijilōk, ij kiiō kajjitōk ippāmi juon kajjitōk: Ewōr ke ami make iien ejjab ekeroro? Iaar ļōmņak eļan̄n̄e ro raar mour etto eaar ļapļo̧k aer iien em̧m̧an jān kōj kiiō n̄an lo, en̄jake, im en̄jake an Jetōb eo pād ilo mour ko aer.

Ealikkar, ilo an laļ in ad meramļo̧k, kauwaron̄ron̄ļo̧k,im poubļo̧k, ewōr juon ad apan̄ eļapļo̧k n̄an en̄jake Jetōb ilo mour ko ad. Eļan̄n̄e ejjeļo̧k juon iien elur ilo mour eo am̧, kom̧ naaj ke jino joten in n̄an pukōte jet?

Kanaan in Kapilōk

Eaorōk n̄an ikōn̄ wōt im ron̄jake im ļoor Jetōb eo. Ekanooj lōn̄ ad kam̧ad ko n̄an kam̧ad ad, eļapļo̧k jān jabdewōt tōre ilo bwebwenato an laļ in.

Aolep rej aikuj iien n̄an kejōkļo̧kjeņ im ļōmņak. Em̧ool Rilo̧mo̧o̧r eo an laļ in, ilo tōre in jerbal in kwaļo̧k eo An ilo mour in, eaar lo iien n̄an kōm̧m̧ane āindein: “Im ke em̧ōj An jilkinļo̧k jar ko, Ej make lōn̄ļo̧k n̄an toļ bwe En jar. Im ke e bon̄, Ej pād ijo im make wōt iaan.”²

Jej aolep aikuj iien n̄an kajjitōk ippān make kajjitōk ko ak n̄an ewōr juon iien ad make n̄an intōrpiuki kōj make. Emakijkij ad kanooj poub im laļ in ekanooj kauwaron̄ron̄ jon̄an epen n̄an ron̄ naan ko in lan̄ “pād wōt, im jeļā bwe N̄a Anij.”³

Device ko jibwi ilo peid, āinwōt smartphone ko, rej juon kōjeram̧m̧an, bōtaab remaron̄ barāinwōt kam̧ad kōj jān ron̄jake “ainikien eo eikōn̄, edik.” Rej aikuj in rijerbal ro ad, ejjab m̧aajta ro ad. N̄an waanjon̄ak, eļan̄n̄e kiinļo̧k joten in kwoj kwaļo̧k ļōmņak ko reim̧we jān nokon in ilo social media, smartphone eo nejūm̧ ej juon rijerbal. Eļan̄n̄e kwoj lale Intōrnet, smartphone ko ej juon am̧ m̧aajta.

Kememej ta eo Elijah eaar katak: “Jeova ear jab pād ilo kōto eo; … Jeova ear jab pād ilo m̧akūtkūt laļ: … Jeova ear jab pād ilo kijeek eo,” bōtaab Irooj eaar kōnono ilo juon ainikien e dik im e mera.”⁴

Ad Kōjerbal Technology

Bar juon kajjitōk: Ilo m̧ool, ewi jon̄an am̧ joļo̧k iien aolep raan ilo cell phone eo ak tablet eo am̧, ejjab koba jerbal ko an jikuuļ ak Kabun̄ in?

Kōjerbali ejejjet, im rej juon kōjeram̧m̧an. Mekarta, n̄e smartphone ko rej jino bōbrae kadkad ko ad ippān ro m̧ōttad im baam̧le eo—im em̧ool eaorōkļo̧k ippān Anij—jej aikuj in kōm̧m̧ane juon oktak. N̄an jet iaami, oktak eo enaaj dik; n̄an ro jet, emaron̄ in ļap.

Ij bar n̄urbōktak bwe kanooj ļap jeje ilo talboon, Facebook, tweet, im Instagram rej bōk jikin kōnono—kōnono kajju n̄an doon im kōnono ilo jar ippān Jemedwōj Ilan̄ im ļōmņak kōn men ko me raorōk tata ilo mour.

Ekanooj emakijkij, jodikdik ro lo er make ilo ejja ruum̧ eo wōt ippān baam̧le ak ro m̧ōttaer bōtaab repoub in kōnono ippān juon eo ejjab pād ijo, kōn menin jerwane iien eo em̧m̧an n̄an loļo̧k ro iturier. N̄e menin ej waļo̧k, bōlen kwoj aikuj diwōjļo̧k jān ruum̧ eo im jilkinļo̧k bar ennaan eo n̄an aer m̧adwaj ippam̧!

Ta eo iaar katak eļaptata ilo mour eo aō eaar itok jān ron̄jake ro eļap jeļā ippāer, ro me raar mour aitok ļo̧k im kar katak elōn̄ men ko raorōk iaar aikuj bwe in jeļā. Jouj im bōk n̄an em̧m̧an eo n̄an loļo̧k im kōnono ippān ro jinemi im jememi, kōrā ro naaj jinemi im ro ulepemi, ro jibūmi im jim̧mami ilo aer mour wōt.

Ij bar inepata bwe jet iaami kom̧ij lali email, Facebook, Twitter, ak Instagram account ko ami ak jilkinļo̧k ennaan ko ilo talboon ilo iien koba ko raorōk tata ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata eo kar kōjepļaaktok—kweilo̧k in kwojkwoj eo ad ekwojarjar. Ilo kweilo̧k kein raorōk jej aikuj kalimjōk Irooj kōn jar, al al ko, im bōk kōkaļļe in Ānbwiniin im bōtōktōkin ijello̧kin kōjerbal menin kapeel ko nejid. Kom̧ij jab maron̄ ekkeijel n̄an Jetōb eo ilo iien kōm̧m̧ane kwojkwoj eo ilo ami lali ak jilkinļo̧k juon ennaan ilo smartphone ak tablet eo nejūm̧. Ekkeijel in ej aikuji Meram eo an Kraist, waļo̧k jān ļōmņak ko ami n̄an būruwōmi kōn iakwe euruur im ewujlepļo̧k.

Ijeļā bwe elōn̄ iaami elōn̄ aer jeje ko rekwojarjar im kein jipan̄ ko jet an Kabun̄ in ilo talboon ko ami im tablet ko. Im iaar em̧ool ron̄ bwe jet jinen im jemen im ritōl an Kabun̄ in rej n̄ūrbōktak kōn wōmņaanļo̧k in ekāāl tata, bōtaab ijjab.

Kabun̄ in eaar iien otemjej bōk kein kapeel ko n̄an jipan̄ iuun m̧aanļo̧k jerbal eo an Irooj m̧aanļo̧k. Jaar jino jilkinļo̧k mijenede ro ilo tim̧a ko ilo 1830 ko, bōtaab jaad bōk em̧m̧an eo kar letok kōn tim̧a steam ko ilo 1860 ko. Innām kōjerbal baļuun ko ilo āinwōt jekjek eo em̧m̧an tata n̄an bōkļo̧k mijenede ro ad n̄an jikin jerbal ko aer ilo aolepān laļ in ilo 1960 ko.

Bwebwenato ej ālij emake ilo wāween ko eļap aer kaitoktoklimo. Jem̧aan, Israel eaar kōjparok naan ko an rikanaan ro ioon jāljel ko. Ilo juon tōre, ilo tōre ko im̧aan an Christian raar jino kōjerbal codex, im ilo tōre eo im̧aan an bok in raan kein.

Kiiō jej ruo taujin iiō tokālik, im kom̧ jodikdik ro rej riiti jeje ko rekwojarjar ilo smartphone ko ak tablet ko ami—riiti āinwōt an kar Jisōs riiti ke Eaar leļok n̄an E jāljel eo an Isaiah n̄an riiti jāne ilo Nazareth. Kom̧ bar maron̄ “kōnono”⁵—bōtaab jouj, ab “lali” ilo iien kōm̧m̧ane kwojkwoj eo. Em̧ool, ilo minit ko jejjo komaron̄ kalimjōk Pinmuur eo an Rilo̧mo̧o̧r eo ilo ami pukōt Jetōb eo an Irooj n̄an kōjeram̧m̧an kom̧ ilo wiik eo ej pedotok. Im ļōmņak in door smartphone ak tablet eo nejūm̧ ilo airplanemode n̄an aolep awa ko jilu ilo Jabōt. Enaaj pād wōt jeje ko rekwojarjar ami, ekōnono ko an kweilo̧k eo eļap, bok in al, im bok in katakin ko bōtaab rejjamin naaj kōm̧ad jān ennaan ko rej itok ak kōjeļļā ko rej make waļo̧k.

Jikin Kone jān Lan̄

Ilo kakobaba n̄an pukōt iien eo n̄an ļōmņak im kejōkļo̧kjeņ, jej bar aikuj in pukōt juon jikin, āinwōt an kar kwaļo̧k ilo Doctrine im Covenants, me enaaj juon kattōrak im… juon jikin kone jān lan̄.⁶

Jej aikuj juon jikin kone ejeno̧lo̧k ijo jemaron̄ kōttoļo̧k kōj make jān kōm̧ad ko an electronic device ko ad kōn kabōjraki bwe jān maron̄ ekkeijel n̄an Jetōb eo an Anij.

Juon iaan jikin ko rem̧m̧an tata n̄an ekkeijel ippān Jetōb eo ej ilo tampeļ eo—Im̧weo Im̧ōn Irooj. Aaet, menin emaron̄ in ba kōn im̧ōk jet an Kabun̄ kar aji, ekoba kūlajruum̧ ko an jemeneri im institute im ruum̧ ko jet an im̧ōko. Jemaron̄ lo jikin kone ilo im̧ōko im̧ōd ak apartment ko n̄e jej kālet n̄an kuni men ko im ikōn̄ wōt im jeļā kōn men ko an Anij.

N̄an jipan̄ kōj lo laļ eo me Adam im Eve, Abraham im Sarah im Joseph im Mary kar lo Anij ie, n̄an jipan̄ kōj lo juon jikin n̄an en̄jake im ron̄ ainikien eo an Irooj rainin, ij kūr kom̧ n̄an etal n̄an tampeļ eo. Ilo̧k emakijkij jon̄an eo kom̧ maron̄, im kuni smartphone ko nejimi im doori m̧okta jān ami deļo̧n̄e meļan ko an tampeļ eo.

Ilo aolep kain̄i ko ilo Im̧weo Im̧ōn Irooj, kom̧ naaj ron̄ kajin eo eaiboojoj, naan ko, im kallim̧ur ko kar litok jān Irooj n̄an ajri ro Nejin. Ej jikin eo wōt kom̧ maron̄ ron̄ naan ko raiboojoj, reim̧we.

Eļan̄n̄e kom̧ij jab karbōb n̄an juon peba in mālim an tampeļ kiiō, loļo̧k meļan ko an tamepļ eo. In m̧ōk kōm̧m̧ane juon un ekanooj aorōk n̄e kom̧ij jan̄in kar ron̄ m̧okta: Ejjeļo̧k menin bōbrae kom̧ ak jabdewōt jān loļo̧k meļan ko an tampeļ eo. Irooj ekōņaan bwe kom̧in kōpooj kom̧ make n̄an erom erreo an peba in mālim an tampeļ ilo iien eo em̧ōkaj tata kom̧ maron̄. Etetal ilo meļan ko naaj katōk ilo būruwōmi juon ikdeelel n̄an bōk juon peba in mālim im ilo̧k n̄an tampeļ aolep emakijkij.

Satan, ilo turejet eo juon, ejjab kōņaan bwe kom̧in etal n̄an tampeļ ak em̧ool n̄an jutak ilo aeloror eo an tampeļ. Ekōņaan bwe ko̧min joļo̧k em̧ool epaakeļo̧k tamepļ eo kōnke tampeļ eo ej Im̧weo Im̧ōn Irooj.

Ij m̧ool n̄an kajjojo iaami bwe ilo ami etal n̄an tampeļ ak loļo̧k meļan ko an tampeļ eo, kom̧ naaj etetal ioon meļan kwojarjar, wōt āinwōt kar patriak ro im kōrā ro pāleer etto im etto. Raar kalimjōk wōt iaļ eo indeeo eo aer im men ko raorōk an mour. Āinwōt er, kom̧ maron̄ bar kalimjōk wōt kajoor in en̄jake eo im piktok eo an lan̄.

Eļan̄n̄e kom̧ij kālet, kom̧ maron̄ ron̄ wōt, ainikien eo edik an Jetōb eo ilo tampeļ eo ak ilo meļan ko rekwojarjar an ilo wāween ko kom̧ij jamin naaj ilo jikin kaikujkuj ko, ilo jikin m̧ōn̄ā ko, im ilo jikin ko ilobwilej. Ilo m̧ool, kom̧ naaj lo bwe tampeļ eo ej juon jikin em̧m̧an n̄an bōk uwaak ko n̄an jar ko ami.

Jem̧aanļo̧k, Būreejtōn Thomas Monson eaar aje Gilbert Arizona Tamepļ eo. Ilo tōre in jar in aje eo eaar kajjitōk ippān Irooj, “Kōm̧m̧an bwe Am̧ Jetōb Kwojarjar en jokwe ijin, im an im̧we en maron̄ en̄jake jān aolep ro rej itok n̄an lowaan oror ko an.” Eaar bar jar: “Kōm̧m̧an bwe menin, Im̧win Im̧ōm̧, en juon jikin ekwojarjar an aenōm̧m̧an, juon jikin kone jān ļan̄ ko an mour im aen̄wen̄we an laļ in. Kōm̧m̧an bwe en juon im̧ōn ikōn̄ kejōkļo̧kjeņ kōn paoktok indeeo eo an mour im karōk eo Am̧ ekwojarjar n̄an kōj.”⁷

Aolep tampeļ ko kar aji n̄an Irooj rej “juon jikin kwojarjar an aenōm̧m̧an,” juon jikin kone jān ļan̄ ko an mour im aen̄wen̄we an laļ in… [ im] juon im̧ōn ikōn̄ an kejōkļo̧kjeņ.”

Jum̧ae eo

Laļ in me jej kiiō mour ie em̧ōkaj an ļapļo̧k im ļapļo̧k an ettoļo̧k jān katak ko an Kraist ilo kien ko im m̧anit ko an. Āinwōt juon tōprak, Satan ej buuļ jerbal n̄an pukōj ļaddik im leddik ro nejin Anij im n̄an kōjaaļ ro lukkuun kar kālet jān kakūrm̧ool jerbal eo aer im bōk juon tarlep eo an kōjeram̧m̧an ko an Irooj.

Satan ekōņaan bwe en bōjrak ami kōjerbal iminene ko rem̧m̧an kom̧ kar katak ilo kapijuknen, ilo jemeneri im institute, im ilo mijen ko ami—āinwōt ekkatak jeje ko rekwojarjar raan otemjej, jar raan otemjej, erreo ilo bōk m̧ōttan kwojkwoj eo wiik otemjej, im kōm̧man jerbal in jipan̄ em̧ool, en̄jake in bōro. Ebar kōņaan bwe kom̧in jutak ilo rejet eo an tariņae ko raorōk im ļap an rainin.

Kememej, jodikdik ro aō jitōnbōro, jej pād ilo tariņae—bōtaab ejjab juon tariņae an buu ko im joot ko. Mekarta, tariņae eo em̧ool, ippān armej ro rellōn̄ em̧ōj jelet er. Tariņae eo ej ilo m̧ool wōnm̧aanļo̧k an juon eo me eaar jino laļ eo m̧okta.

Paul eaar kūr kōj n̄an “kōņak aolepen kein tariņae an Anij” “Bwe adwōj oktak e jab ippān bōtōktōk im kanniōk, a ippān jiōb ro, ippān ro re kajoor, ippān ro irooj in marok i laļ, ippān jeran jetōb re nana ijo ko i lan̄.”⁸

Āinwōt juon Rijilōk an Irooj Jisōs Kraist, ij kūr aoelpānwōj ro rej ron̄jake ainikiō, ilo laļ in eļap me jej mour ie, in n̄an “kōņak aolepen kein tariņae an Anij” im koba ilo tariņae eo rainin, āinwōt ļōm̧aro nejin Helamōn kar elōn̄ iiō ko remootļo̧k. Jab kōttar m̧ae iien kom̧ij m̧are ak jino jerbal in ami toon wōt ami mour, ak rūttoļo̧k ie. Kabun̄ in ej aikuji jodikdik ro ad kiiō. Irooj ej aikuji kom̧ kiiō!

Kom̧ naaj kememej bwe ruo taujin ritariņae ro “raar deļo̧n̄ ilo bujen eo n̄an ire kōn anemkwoj an ri Nipai ro.”⁹ Kabun̄ in ej aikuji ritariņae ro rainin me raar kōm̧m̧ane juon bujen “n̄an jutak āinwōt ri kam̧ool ro an Anij ilo aolep iien ko im ilo aolep men otemjeļo̧k, im ilo jikin ko.”¹⁰

Bok in Mormon ej kōmeļeļeik ritariņae rein āinwōt in:

“Im er aolep kar likao em̧m̧an ded … , im raar pen otem pen kōn peran, im barāinwōt kōn kajoor im wāmourur; a lo, en̄in eaar jab aolep—raar … m̧ool iien otemjej ilo jabdewōt men kar door ilo aer kōjparok.

“Aaet, raar armej in m̧ool im jatōr, bwe kar katakin er n̄an kōjparok kien ko an Anij im etetal jim̧we im̧aan Mejān.”¹¹

Kom̧ jiron̄ im likao ro rej leddik im ļaddik ro nejin Helamōn rainin. Kōm̧m̧an bwe en kar ba kōn kom̧ ilo an kar ba n̄an er: “Raar erom kiiō ilo tōre in iien in … juon rejtak eļap.”¹²

2. Tariņaik Pija im Bok Nana

Men eo kein karuo me ikōņaan kōnono n̄an kom̧ kake ej bwe kom̧j aikuj koba ilo tariņae in ņae pija im bok nana. Ej juon nan̄inmej enana me ej ajeded aolepān laļ in. Ij kajjitōk ippāmi joten in n̄an ron̄jake eō ilo aō kōm̧eļeļeik juon waanjon̄ak an māletlet an Irooj.

Elōn̄ļo̧k jān 180 iiō ko remootļo̧k, Irooj eaar kwaļo̧k kien ājmour eo An, ekoba juon kakkōļ kōn kōjerbal tobacco.¹³ Milien armej ro raar ron̄jake Irooj, bōtaab elōn̄ļo̧k raar jab. Ejjeļo̧k juon ejeļā ilo tōre jab eo ak em̧ool ke iaar dedjab kane ami aitok an kōbatat jelete. Rainin, ālkin n̄oul iiō in ekkatak an science, jej jeļā jelet eo an kōbatat ilo cancer in aj im nan̄inmej ko jet rekamejmej. Naan in Meletlet an Irooj eaar juon kōjeram̧m̧an in kōjparok.

Ilo ejja jekjek ko Irooj ilo raan ko am eaar kakkōl kōm kōn jelet ko an pija im bok nana. Milien armej retiljek kar ļoor kapilōk eo an Irooj, ilo an ro jet rellōn̄ kar jab. Jejjab aikuj kōttar, ro m̧ōtta jitōnbōro, n̄an 180 ak em̧ool 10 iiō ko n̄an lo jelet ko renanan an pija im bok nana kōnke kiiō ekkatak an science raar kwaļo̧k bwe pija im bok nana rej kakkure rūm̧m̧ad ded ro ilo jet wāween ko im kakkure iien ko aer an juon raan wōr juon jemjerā in m̧are em̧m̧an im aitok kitien.

Ekkatak eo eaar bar kwaļo̧k bwe emakijkij kōjerbal pija im bok nana emaron̄ tōl ļo̧k n̄an m̧wil ko renana im maron̄ ukōt jerbal an kōmālij eo an juon armej ilo juon wāween me enaaj aujidi armej eo n̄an an̄urlep.

Ekkatak eo eaar bar kalikkar bwe pija im bok nana ej tōl kōtmene ko rewaan im bōkļo̧k jajeļo̧kjeņ kauwōtata kōn kōtaan epaak ājmour an armej.

Eo ekauwōtata tata, jekjek ko an pija im bok nana kom̧ij lo armej āinwōt menoknok me kom̧ maron̄ kowaane im jab kautieje jim̧or ilo en̄jake im ānbwiin.

Bar juon jekjek an pija im bok nana ej bwe ekkā an juon m̧akūtkūt “eņojak.” Ro rej kōjerbale emakijkij aer ņooj aer kōjerbale ak kōptata in ņooj ekōjkan an ļap aer kōjerbale jān jabdewōt, ekoba ro m̧ōttaer im ro pāleer. Ekkatak ko kar lo bwe n̄e armej ro rej ņooj er make ilo jekjek in—n̄e rej kōm̧m̧ane men ko rejjab bun̄ būruwier im kōjparok men kein reņojak jān ro uwaan baam̧le ko aer im ro m̧ōttaer—ejjab wōt kōmetak kadkad ko aer im door aer en̄jake ajimakeke bōtaab bar kōm̧m̧an bwe ren ļapļo̧k aer bōk inepata, en̄taan im jab lōke er make. Ņooj wōt ekakkure lōke.

Āliktata, jej aikuj joļo̧k pija im bok nana kōn kōj make kōnke ekamejmej. Eaar m̧an kadkad ko an armej rem̧m̧an—kakkure m̧are ko im baam̧le ko. Ej kakkure jetōb eo an armej eo me em̧ōkaj an bōk āinwōt baijiin eo ekamejmej ej m̧an ānbwiin im ļōmņak.

Ļaddik im leddik ro reddik jitōnbōro, jab po. Jab ļōmņak bwe n̄e kom̧ij etal n̄anmijen eo ami ak n̄e kom̧ij m̧are kom̧ij jab maron̄ kabōjrak m̧wil in an̄ūr in. Eļan̄n̄e kom̧ij iiaio ie kiiō, eļan̄n̄e kom̧ij allok ilo jerbal in, bōk jipan̄ ilo jetōb kiiō. Kom̧ maron̄ anjo ioon pija im bok nana kōn jipan̄ eo an Rilo̧mo̧o̧r. Jab kōttar ! Ij akweļap kōn ippāmi n̄an ilo̧k jān e! Elōn̄ kein jipan̄ ko ilo LDS.org me renaaj joļo̧k makok lep eo an annan̄ ko an pija im bok nana.

Errein raan ko reppen—bōtaab ejjab apan̄ļo̧k jān tōre ko an Helamōn im ritariņae ro an ke raar jutak n̄an bōbrae baam̧le ko aer im Kabun̄ eo. En̄in ej tōre eo n̄an wōnm̧aantak im koba ippān jar ko an ro jet rejim̧we im likao im jiron̄ ro rekijejeto em̧man dettaer n̄an pataik tariņae eo ņae pija im bok nana. En̄in ej juon eo jej aikuj anjo̧ ioon, im kom̧ij aikuj anjo̧ ioon ilo mour ko ami make.

3. Katak eo an M̧are

Kiiō ikōņaan kōnono n̄an kom̧kōn unin kōnono eo kein kajilu ilo m̧ōkaj. Im ikōņaan bwe kom̧in meļeļe, mejmejkaruo jon̄an wōt aō maron̄, ļōmņak eo an Kbaun̄ kōn m̧are āinwōt an Jemed Ilan̄ ej iakwe kar letok n̄an kōj kōn jeje ko rekwojarjar ad im “Baam̧ļe Eo: Juon Naan in Kean̄ n̄an Laļ in.” Peba jab in eim̧we ej kwaļo̧k: “Baam̧le eo ej ekkapit jān Anij. M̧are ikōtaan juon em̧m̧aan im juon kōrā ej aorōk n̄an karōk indeeo eo An. Ajri ro rej maron̄ ļotak ilo kadkad ko an m̧are, im n̄an karūttoļo̧k jān juon jemen im juon jinen ro rej kautiej kallim̧ur ko an m̧are kōn likkuun m̧ool.”¹⁴

Rijilōk ro em̧ōj leļo̧k eddo eo n̄an riaorn̄ron̄ ro ioon tawōr ko n̄an lo im katakin katak ko an Kraist. Aolepāmi kom̧in jeļā bwe meļeļe eo iminene kake an m̧are ej luko̧ro̧re rainin. Ewōr ro me rej ejaki kōbawe eo ioon meļeļe eo an m̧are ilo meļeļe eo an jim̧we ko an kien. Būreejtōnji eo Kein Kajuon im Doulul eo an Jon̄oulruo Rijilōk ro eaar kōmeļeļeik ļōmņak eo an Kabun̄ in im unleplep ko an katak eo an Anij im karōk eo n̄an ajri in jetōb ro Nejin n̄an jeļā mour in, eo ej aorōk n̄an mour indeeo eo ejjeļo̧k jem̧ļo̧kin im mour indeeo.

Ij kōtmene elōn̄ iaami remaron̄ kar jab riiti ennaan eo kar je jinoin iiō in. Ij kout jān ennaan in im kajjitōk ippāmi n̄an kanooj ron̄jake:

“Oktak ko ilo kakien an kien ejjab, ilo m̧ool jab maron̄, ukōt kakien an mour me Anij eaar ejaake. Anij ej kōtmene kōj n̄an dāpij im kōjparok kein ko An ikijien oktak in ļōmņak ko ak eddōkļo̧k ko ilo jukjukinpād. Kien Erreo eo An ealikkar: kadkad ko an m̧ōm̧ an kanniōk rej jejjet wōt ikōtaan juon em̧m̧aan im juon kōrā me rej ļeo im lio pālele ilo jejjet im ilo kien. Jej libjōrjōr kom̧ n̄an etale im katakin membōr ro an Kabun̄ in katak eo epād ie ilo ‘Baam̧le Eo: Juon Naan in Kean̄ n̄an Laļ in.’”

Ennaan eo ej wōnm̧aanļo̧k wōt:

“Ejja āinwōt ro me raar kwaļo̧k m̧are an m̧aan n̄an m̧aan, kōrā n̄an kōrā rej karbōb n̄an kōm̧m̧an ejja āinwōt, em̧ool n̄an ro rej jum̧ae. …

“Āinwōt membōr ro an Kabun̄ in, jej eddo n̄an katakin ko̧jpeļ eo an Jisōs Kraist im n̄an kwaļo̧k kōjeram̧m̧an ko reļļap me būki kōn ron̄jake kein ko an Anij barāinwōt kaje ko ban ko jāni kōn kowani. Kōmij kūr kom̧ n̄an jar bwe armej ro jabdewōt jikin naaj kapidodoik būruwier n̄an m̧ool ko an ko̧jpeļ eo, im bwe māletlet jab in naaj leļo̧k n̄an ro me kūr ioon n̄an kālet unin kōnono ko raorōk n̄an ilju im jekļaj eo an jukjukinpād.”¹⁵

Kiiō, ijeļā kom̧ij iakwe im rejtake Irooj im rie rikanaan ro An, bōtaab ij bar jeļā bwe jet iaami remaron̄ tarpok ilo meļeļe eo kōn jokālet eo an Kabun̄ in n̄an rejtake karōk eo kar kwaļo̧k an Anij n̄an ajri Nejin.

Ij bar jeļā bwe jet iaan jodikdik ro ad rej kakkōt n̄an meļeļe ekōjkan n̄an kōmeļeļeik katak eo ipeļaakin baam̧le im m̧are im rej jouj wōt, em̧m̧an, im iakwe ņae ro me rejjab errā. Kom̧ maron̄ mijak bwe kom̧ naaj ļōmņak kake āinwōt juon eo ej jab kautiej ro jet.

Kom̧ maron̄ jeļā juon eo ej kakkōt kōn kan̄ōl eo an m̧aan n̄an m̧aan, kōrā n̄an kōrā ak kar kōm̧m̧ane juon jokālet eo n̄an mour ilo kadkad eo an m̧aan n̄an m̧aan kōrā n̄an kōrā. Ami iakwe n̄an armej eo āinwōt juon ļaddik im leddik nejin Anij emaron̄ ejake juon kakkōt itulowa ilo ami kajieon̄ iakwe im rejtake e im jutak wōt n̄an karōk indeeo an m̧ōņōņō an Irooj.

Eaar alikkar aō kwaļo̧k joten in, Kabun̄ eo an Jisōs Kraist im Armej ro Rekwojarjar ilo Raan-ko Āliktata rej tōmak bwe “jeļā eo kōn kan̄ōl an m̧aan n̄an m̧aan, kōrā n̄an kōrā ej juon em̧ool ekapokpok n̄an elōn̄ armej. Kan̄ōl eo make ejjab juon jerawiwi, bōtaab kōm̧m̧ane ej. Em̧ool men̄e kajjojo ejjab kālet n̄an kain kan̄ōl ro, rej kālet ekōjkan n̄an uwaaki. Kōn iakwe im meļeļe, Kabun̄ in ej pukōtļo̧k aolep ajri ro nejin Anij, ekoba [ro kōn kan̄ōl an m̧aan n̄an m̧aan, kōrā n̄an kōrā].”¹⁶

Kabun̄ in ejjab katakin ak jojomar ņae kipel ak m̧akūtkūt ko jet rejjab an rikūrijin. Jej aikuj iakwe im kajieon̄ jipan̄ ro jet meļeļe bwe ejjeļo̧k juon aikuj kowaan ak kabōjrak kien ko an Anij.

Juon Kam̧ool im Juon Kakkōl

Āliktata, ilo “Baam̧le Eo: Juon Naan in Kean̄ n̄an Laļ in,” Būreejtōnji eo Kein Kajuon im Doulul eo an Jon̄oulruo Rijilōk ro kar ba: “Kōmij kakkōļ bwe jabdewōt ro rej rube bujen ko an kien erreo, ro rej kakkure pāleen ak ro nejin, ak ro rej likjab in kōtōprak eddo ko an baam̧ļe eo naaj juōn raan ņaruwier im̧aan Anij. Barāinwōt, kōmij kakkōl bwe ejeblōklōk in baam̧le eo enaaj bōktok ioer kajjojo, jukjukin pād ko, im laļ ko buromōj ko kōnono kaki m̧oktaļo̧k jān rikanaan ro m̧okta im rikanaan ro kiiō.”¹⁷

Ij juon eo eaar koba ilo kakkōl jab in. Āinwōt juon iaan riaron̄ron̄ ro ioon tawōr eo, ij eddo n̄an “uuki jilel eo, im ej kakkōl armej ro.”¹⁸Joten in iaar kajoor im lōn̄aj ainikien kakkōl eo. Ij kōm̧m̧an āindein kōnke ij iakwe kom̧ im kōņaan bwe kom̧in meļeļe jej aikuj jelm̧ae Irooj im kōjparok kien ko An. En̄in ej aō jerbal.

Nuuj Em̧m̧an

Kakkōl eo an Irooj ej bar itok kōn juon kūr n̄an itok n̄an E. Jemed ilo Lan̄ eaar jeļā kaje ko an mour ilo juon laļ elikjab im kōn menin kar letok juon Rilo̧mo̧o̧r, juon “Lamb eo, em̧ōj m̧an E, jān jino kōm̧anm̧an laļ” n̄an ajri ro Nejin.¹⁹ Ilo ko̧jpeļ eo an Jon, jej katak, “Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”²⁰

Jouj im kememej bwe ko̧jpeļ eo ej “nuuj em̧m̧an.” Ej juon ennaan an kōjatdikdik. Eļan̄n̄e kom̧ij pād ilo jorrāān kiiō, bōk jipan̄. Irooj ej meanwōd im jeorļo̧k bōd.

Rijilōk Paul eaar katakin:

“Wōn enaaj kōjepel kōj jān yokwe an Kraist? Naaj jorrāān ke, ak en̄taan, ak matōrtōr, ak n̄ūta, ak keelwaan, ak uwōta, ak jāje? …

“Jaab, ilo men kein otemjej eļap ad anjo̧ kōn Eo ear yokwe kōj.

“Bwe Ij ļōmņak e jab mej ak mour, e jab enjeļ raan ak jetōb ro, e jab men ko kiiō ak men ko renaaj itok,

“E jab utiej ak m̧wilaļ, ak jabdewōt bar juon men in kōm̧m̧an, enaaj maron̄ in kōjepel kōj jān yokwe an Anij, eo ilo Kraist Jisōs ad Irooj.”²¹

Kōnke kōn Jisōs Kraist, aenōm̧m̧an emaron̄bōk jikin bōd. Kadkad ko remourur remaron̄ kōjepļaaktok. An̄urlep ko remaron̄ anjo̧ ioer.

Jej aikuj in kōm̧m̧an bwe baam̧le eo ad im ro m̧ōttad ren jeļā m̧ool in—Anij ej iakwe, “E ej kūr tok er aolep n̄an itok n̄an Ippān im bōk leen em̧m̧an eo An; im E ejjeļo̧k Ej kabōjrak e jān an itok Ippān.”²²

Kōmij aikuji kom̧ n̄an bōk kuņami ilo jerbal in lo̧mo̧o̧r m̧okta im ilo iien eo im ālkin mijen ko ami.

Kōjerbal Technology n̄an Kōjeram̧m̧an Mour ko

Irooj ej kūr kom̧ n̄an bōk kuņami im kōjerbal social media platform ko kom̧ij kōņaan n̄an kwaļo̧k ko̧jpeļ eo im jutak āinwōt ļaddik im leddik ro nejin Helamōn raan kein ilo pata ko reļļap an raan ko āliktata. Ej kōņaan bwe kom̧in erom ritariņae ro raan kein me rej jutak pen im ippān doon n̄an bōbrae m̧ool eo. Ej kōņaan bwe kom̧in peran im kijin̄en̄e ilo jelm̧ae rikejedet ro. Kōm jeļā bwe ilo jem̧ļo̧kin Irooj enaaj wiini raan eo im Satan enaaj luuj.

Jān elōn̄ social media platform ko, kom̧ maron̄ kōnono ko̧jpeļ eo ippān baam̧ļe, ro m̧ōttami, im, n̄an kom̧ mijenede ro raar ro̧o̧l, em̧ool ippān kar rūkkatak ro ami im membōr ro rekāāl. Kom̧ maron̄ jutak āinwōt rikam̧ool ro n̄an m̧ool eo im bōbrae aelōn̄ in kiin̄ eo.

Bōbrae Aelōn̄ in Kiin̄ eo

Ijeļā jet iaami rej inepata kōn bōd ļōmņak kake, kajirere kake, im em̧ool kakkure eļan̄n̄e kom̧ij jutak kōn Jemedwōj Ilan̄ im Irooj Jisōs Kraist im Kabun̄ in. Ij meļeļe n̄ūrbōktak ko ami.

Iaar jerbal ilo British Mijen ālkin jem̧ļo̧k in Pata eo an Laļ in II āinwōt juon mijended edik. Ilo tōre eo Mormon ro raar “juon aliūn̄ūrn̄ūr naan in kinaak,”²³ im mijenede ro raar ettōn̄ kake er im kajirere. Armej em̧ool rej kad er, im jet naaj kar kapiloik kōj Mekarta, kōm kar jab jeliklik, bōtaab kōm kar wōnm̧aanļo̧k n̄an kwaļo̧k naan in kam̧ool ko am im kwaļo̧k ko̧jpeļ eo. Āinwōt Abinadi, kōm kar jab ebbwer; āinwōt Paul, kōm kar jab ebbwer; im āinwōt Rilo̧mo̧o̧r eo, kōm kar jab ebbwer. Ilo tōre eo kōm maron̄ kar jab ļōmņak kōn jelet eo an jerbal ko am. Eaar wōr am 14 district koi m ejjeļo̧k stake ko. Rainin, 46 stake ko an Zaion rej loi ilo Britsih Isle ko.

Ro m̧ōtta reddik jitōnbōro, jab inepata kōn ro ilo m̧weo eļap im em̧m̧an. Nipai eaar lo bwe raar kajirere im jitōn̄ļo̧k “ro jet kōn peier im raar itok im pād im m̧ōn̄ā lee neo.”²⁴ Jab āinwōt ro me “ālkin aer kar edjon̄e leen wōjke eo raar jook, kōn ro raar kajjirere kake er; im raar wōtlo̧kļo̧k ilo iaļ ko remo im raar jebwābwe.”²⁵

Kom̧ij juon epepen eo eļap im aorōk, im en̄in ej tōre eo eļap n̄an mour! Ilju im jekļaj eo erabōlbōl. Ba n̄an eok make joten in, “Ij jipan̄ Irooj ilo aō pukōtļo̧k n̄an kwaļo̧k naan in kam̧ool eo aō im n̄an katakin m̧ool eo an Anij kar kwaļo̧k tok ilo raan kein āliktata.”

Kiiō, ewōr ami iien eo em̧m̧an n̄an kōjerbal aolep social media in ilo meļetlet n̄an kwaļo̧k ta eo kom̧ kar katak im en̄jake bōlen em̧ool joten in. Kememej bwe ewōr juon iien em̧m̧an im jikin n̄an kom̧ n̄an kōjerbal media, im kwaļo̧k ļōmņak ko ami im naan in kam̧ool eo kōn men ko kom̧ij katak im en̄jake ej juon iaan iien ko.

Naan in Kam̧ool

Kōm̧m̧an bwe Irooj en kōjeram̧m̧an kom̧ kōn māletlet eļapļo̧k jān iiō ko ami, bwe kom̧ naaj lo̧ļe ilo kile bwe jej pād ilo tariņae in im jej aikuj jutak ippān doon, dik im rūtto. Ij jar bwe Jemed Ilan̄ enaaj mije kom̧ im kōjeram̧m̧an kom̧. Jouj, bar juon alen, jeļā ewi jon̄an am iakwe kom̧. im Ij kajjitōk ippān Jemed Ilan̄ n̄an kōjeram̧m̧an kajjojo im aolep kom̧, jekdo̧o̧n ia kom̧ij pād ie ilo laļ in, bwe rej ron̄jake nokon in joten in, kōn aenōm̧m̧an an Irooj ilo būruwōmi, kōn kam̧ool elur im m̧ool bwe Jisōs Kraist ej mour, bwe E ej Nejin Anij, bwe en̄in ej Kabun̄ eo An. Kōm̧m̧an bwe aenōm̧m̧an im kajoor eo ren pād ippāmi, kom̧ij aorōk, aolep kom̧ kajjojo, n̄an ilju im jekļaj an kōpooj laļ in n̄an raan eo n̄e Jisōs Kraist enaaj ba “Ebwe” im naaj bar ro̧o̧ltok im kakien im anjo̧ āinwōt Rilo̧mo̧o̧r, Irooj an irooj ro, Kiin̄ an kiin̄ ro, Rilo̧mo̧o̧r an laļ in, eo ij kam̧ool emour. Jaar kōnono kōn men kein me raorōk n̄an E joten in. Kōm̧m̧an bwe jān ilo̧k jān kweilo̧k in obrak kōn iakwe n̄an Irooj im juon ikdelel n̄an jerbal n̄an E ej jar jar ettā, ilo āt kwojarjar im iakwe an Irooj Jisōs Kraist, amen.