Bedbed eo E Bin
Elder Donald L. Hallstrom
Jān Būreejtōnji eo an Jiljilimjuonn̄oul ro
Nokon in Jota eo an CES n̄an Rūm̧m̧an Ded ro • Nobōm̧ba 2, 2014 • Ogden Tabernacle, Ogden, Utah
Ej juon iien em̧m̧an n̄an Sister Hallstorm im n̄a n̄an pād ippemi jotenin. Ilo am kalimjōk mejān ro kōm maron̄ lo er jotenin rainin, kōm̧ij antone aolep rūm̧m̧an ded ro ipeļaakin laļ in, jim̧or ro rejjan̄in m̧are im ro em̧ōj aer m̧are, im rej kobatok ilo iien kadiwōjļo̧k in ilo mejatoto. Ewōr am iien em̧m̧an n̄an itoitak ilo kajjojo jikin ko ilo Kabun̄ in. Em̧ōj am ioon elōn̄ iami im elōn̄ ro āinwōt kom̧. Em̧ōj am ioon rūm̧m̧an ded ro rej kab oktaktok im ro rej kajjieon̄ bwe ren lukkuun oktaktok. Em̧ōj am ioon rūm̧m̧an ded ro rej jōbwābwe im ro em̧ōj kōro̧o̧ltok er—ak, lukkuun lo m̧ool, em̧ōj aer lo m̧ool eo. Em̧ōj am ioon ro rejjab jen tōmak in ad, ro ej kab m̧ōj aer peptaij, im ro rej jen bwijjin ro etto an baam̧le ko aer pād ilo Kabun̄ in. Kōm̧ij kam̧ool ke aolep rej ajri ro nejin Anij im ewōr ad aolep iien em̧m̧an n̄an bōk aolep kōjeram̧m̧an ko an mour indeeo.
Ilo etan ritōl ro an Kabun̄ in, ij lukkuun m̧ōņōņō in ba, “Kōmij iakwe kom̧!” Kanooj epake lale rikanaan ro im rijilōk ro im jeļā kajjeer āinwōt aō jeļā, imaron̄ ba kōn juon lōke bwe rej lukkuun m̧ool in kea kake rūm̧m̧an ded ro an Kabun̄ in. Kom̧ij aorōk ko an rainin im ilju. Kōmij aikuji kom̧!
Kweilo̧k in ej kōm̧m̧an jān Tabernacle eo ilo Ogden, juon em̧ eo eaiboojoj ekar kōkkāāl im āinwōt Ogden Utah Temple eo eaiboojoj. Tampeļ in im tabernacle in kar bar aje jān Būreejtōn Thomas S. Monson jiljino wiik ko remootļo̧k. Tampeļ in ej juon iaan tampeļ ko 143 im rainin rej jerbal ilo Kabun̄ in im ilo ijoko otemjej ilo laļ in. Āinwōt juon wāween eo ej kwaļo̧k jon̄an aō rūtto, ak em̧m̧anļo̧k ba, wāween an Irooj kōmōkajļo̧k jerbal eo An, ke ikar ļotak ekar wōr ralitōk wōt tampeļ ko.
Kōjerbal tampeļ in āinwōt juon naan ej kōmeļeļeik bar juon men, jotenin inaaj kōnono kōn bedbed ko. Kōn jekjek in im ekkal eo an aolep tampeļ, jerbal eo eaorōk ej ererakļo̧k kōn ta eo jab maron̄ in pidodo loe n̄e būroojāāk eo ej dedeļo̧k—pedped eo. N̄an waanjon̄ak, men in ej juon pija in tampeļ eo ilo Philadelphia Pennsylvania, eo kiiō rej kalōke. Eļan̄n̄e ededeļo̧k, m̧win elukkuun in em̧m̧an naaj 82 nee aetok in n̄an po eo an im wallōn̄ļo̧k 195 nee n̄an ilōn̄ ļo̧k ijo enjeļ Moronai ej pād ie. Ilo am loe, enaaj lukkuun in juon jerbal eo eaiboojoj! Bōtaab, jekdoon jon̄an an naaj aiboojoj im em̧m̧an lale m̧win, enaaj jorrāān jen kōto ak dān. Jōkjōk kein renana, eļan̄n̄e rejjab etali, emaron̄ lukkuun kajorāān im bar āinwōt kakkure m̧win em̧m̧an.
Jeļā ke men kein rekajoor remaron̄ lukkuun kajorāān tampeļ eo, engineers ro rekar ļōme im rikkal ro rekar kūbwij juon ro̧n̄ 32 nee m̧wilaļ in ium̧win aolepān pija eo an m̧wiin. Ro̧n̄ in kar kūbwiji laļļo̧k n̄an dekā ko itulaļtata in Pennsylvania n̄an kōm̧m̧ane juōn bedbed eo enaaj pen n̄an ekkal ioon. Joor ko im bedbed eo rekar ekkeijaak ippān dekā eo ilo bedbed eo buļōn bwidej kōn dekā ko rej emjak n̄an bōbrae kōto ko rekajoor im dān ko rekajoor aer toor ioon bwidej. Emjak ko rekar kūbwiji laļļo̧k 50 ļo̧k n̄an 175 nee n̄an ippān dekā eo ibuļōn bwidej im ekkejel kōn 250,000 baun kōn kajjojo jikwaea inij. Emjak ko rej 15 nee ettolo̧k in kōtaan ilo jimor jemļo̧kin.
Iaar kwaļo̧k tipidikin meļeļe eo n̄an katakin kōn un in: Ejjab āinwōt kalōk juon em̧ (eo kōn meļeļe in ejjab n̄an juon iien aetok), ilo kalōk mour ko ad indeeo (im kojatdikdik, n̄an indeeo), jet iien jejjab lukkuun kalimjōk jekjek in im ekkal eo an pedped ko ad. Ilo m̧ool, jej jedmatmat ioon aijet im epidodo kareel er jān kajoor ko rakauwōtata.
Jej jokwe ilo juon laļ eo emaron̄ in kaipokpok—eļan̄n̄e kōtļo̧k, emaron̄ kōm̧m̧an bwe jān meļo̧kļo̧k wōn lukkuun kōj. Būrejtōn Thomas S. Monson ekar ba:
“Mour in ej juon iien mālijjon̄, juon iien n̄an kam̧ool n̄an kōj eļan̄n̄e jej erreo n̄an ro̧o̧l n̄an im̧aan mejān Jemedwōj Ilan̄. N̄an ad maron̄ in mālijjon̄, jej aikuj in jelm̧ae apan̄ ko im men ko reppen. Men kein remaron̄ kōjepepļo̧k kōj, im pedped in jetōb ko ad remaron̄ kōk im rōm̧—en̄in ej, eļan̄n̄e pedped in tōmak ko ad, naan in kam̧ool ko ad an m̧ool eo rejjab m̧wilaļ im dim ilo kōj.
“Jemaron̄ atartar wōt ilo tōmak eo im naan in kam̧ool eo an ro jet jidik wōt iien. Āliktata ej aikuj wōr ad make juon peded ekajoor im m̧wilaļ ilo kōj, ak jej jāmin naaj maron̄ in jutak ņae kōto ko an mour, ko renaaj itok.”1
Jisōs Kraist ekar kōmeļeļeik ilo wāween in, kōnono kōn juon armej eo ej ron̄jake im ļoor E:
“E ej āinwōt ļeo ekar kalōk m̧weo im̧ōn, im kūbwij laļļok n̄an ijo e m̧wilal, im likūt bedbed eo an ioon bar: im n̄e ibwijleplep eo ekar itok, im ekar bun̄ūt m̧weo, im jab maron̄ in kōm̧akūti: kōnke ekar ekkal ioon bar.
“Ak eo ej ron̄ ainikieō, im jab kōm̧m̧ane, ej āinwōt ļeo ekar ejjeļo̧k an bedbed ekar kalōk m̧weo im̧ōn ioon bok; bar āinwōt ņo eo ekar bun̄ūt m̧weo, im emōkaj an kar bun̄; im jorāān eo an m̧weo ekar ļap” (Luk 6:48–49).
Jisōs Kraist ej dekā eo im jej aikuj in kalōk pedped eo ad ioon. Irooj ekar keidi E make āinwōt ejm̧aan eo an Israel im kajoor an kar kwaļo̧k, eo ej ekkal ioon ejm̧an in ejjamin naaj wotlo̧k (laleD&C 50:44).
“Kom̧win kile bwe adwōj Anij eļap” Moses ekar ba.” “Ejm̧aan Eo, An jerbal e weepān” (Duteronomi 32:3–4). David ekar ba, “Irooj aō ejm̧aan im aō m̧ōn tōrak, … aō likōpejn̄ak, … aō im̧ōn bar e utiej” (2 Samuel 22:2–3). Irooj ekar ba n̄an Enoch n̄a Messaia eo, Kiin̄ eo an Zaion, ejm̧aan eo an lan̄ (Moses 7:53). Nipai ekar nebar Irooj āinwōt “ejm̧aan in lo̧mo̧r” im “ejm̧aan in wānōk” (2 Nipai 4:30, 35). Aiseia ekar kūr n̄an Irooj “juon dekā n̄an ļon̄tak dekā em̧ōj mālejjon̄e, dekā in dem̧an em̧ e aorōk n̄an ļon̄tak e pen” (Aiseia 28:16). Paul ekar kōnono kōn rijilōk im rikanaan āinwōt bedbed eo an kabun̄ eo, kōn “Kraist Jisōs e make lukkuun dem̧an em̧” (Epesōs 2:20).2
Ejjab kāāl katak in. Ilo juon jekjek ak bar juon, aoelpādwōj meļeļe kake. Em̧ōj kaktakin kōj jān ro jined im jemed, ilo Būraimere, ilo kūlaaj ko im Doulul eo an Jiron̄ ro im kūlaaj ko im doulul ko an Aaronic Priesthood eo, ilo jemenere, ilo institute, jān mijenede ro rej jerbal aolep raan, jān ro m̧ōttad, jān ritōl ro an Kabun̄ ijo jokwe ie, jān jeje ko rekwojarjar, im jān rikanaan ro im rijilōk ro rej mour. Innām, etke ekanooj pen n̄an elōn̄ iaad n̄an mour kake?
Ekwe, elukkuun pidodo ba, ej aikuj itok jān ļōmņak ko ad n̄an būruwōd im n̄an jetōb ko ad. Ej aikuj in ļapļo̧k jān ta eo jet iien jej ļōmņak ak em̧ool ta eo jet iien jejen̄jake—ej aikuj in erom wōn kōj. Kōtaan eo ad ippān Anij, Jemed, im karōk eo An indeeo, im ippān Jisōs Kraist, eo Nejin im ad Ejm̧aan, ej aikuj in lukkuun in jutak dim bwe en m̧ool an erom dekā in jabōn em̧ an pedped eo ad. Innām piktokid ej erom m̧oktata juon armej indeeo—juon ļaddik ak leddik nejin Anij—im an juon ribōk leen ekam̧oolol kōn kōjeram̧m̧an ko an Pinmuur eo an Jisōs Kraist. Kadkad ko jet rejim̧we maron̄ inem̧m̧an ekkal ioon bwe pedped eo kōnke jenaaj jeļā ewi wōt eo indeeo im ewi wōt eo an jidik iien im ekōjkan karōki im̧aan tata. Im kadkad ko jet im iminene ko aer (jet rekanooj aorōk jān laļ in) jenaaj aaet kālet n̄an kowaani.
Eļap aō iakwe al eo ekam̧ōņōņō “Bedbed eo E Bin” Ijo em̧m̧an tata ippa ej (ejjjab juon menin bulōn̄) jān Mormon Tabernacle Choir eo. Jijōt im̧aan in wōt kumi in al in ilo tōre eo kweilo̧k eo eļap im ron̄jake im en̄jake kajoor in okōn eo im ainikien ko im al eo im naan ko ilo al eo ekōm̧m̧an bwe in kōņaan jutak im kobaļo̧k ippāer. Jeļā bwe naaj kar ān̄in ņam̧ōjļo̧k eō jān Conference Center eo, iaar bōjrak. Ron̄jake aļ in em̧m̧an kar al kake emān wiik ko remootļo̧k ilo m̧wein̄an eo an jibbon̄ in Jabōt in kweilo̧k eo eļap. Laudin̄din̄ kōn naan ko; eļaptata ron̄jake ko ilo eoon eo āliktata. Eļaptata ilo eoon jijlimjuon, bōtaab kar al kake ijin āinwōt eoon emān.
Jem̧aanļo̧k, ikar pād ilo juon kweilo̧k ilo tampeļ eo ilo Salt Lake ippān ro uwaan Būreejtōnji eo Kein Kajuon, Doulul eo an Jon̄oulruo Rijilōk ro, im aolep Ritōl ro Routiej jet an Kabun̄ in kar jitōn er n̄an headquarter ko an Kabun̄ in. Kōm kar al eoon ko jilu āinwōt ekkā ad kōn kōm̧m̧ane ilo iien kweilo̧k in kwojkwoj eo ak kweilo̧k ko jet. Bōtaab ilo iien in Būreejtōn Monson eaar ba, “Jān al eoon jiljimjuon.” Ippān aolep riutiej rein rem̧m̧an an Kabun̄ in, ekoba rikanaan ro im rijilōk ro remour, kōm kar al:
Jetōb eo ilo Jisōs ekar em̧m̧akūt n̄an kakkije
Ij jāmin, ij jab maron̄, kōm̧ake iaan ippān rikōjdat eo An;
Jetōb in, hell enaaj aikuj witidtid,
Ij jāmin, ban, Ij jāmin, ban,
Ij jāmin, ban, ban ilo̧k jān e!3
Men in ej ke kwaļo̧k wōn kwe? Ej ke kwaļo̧k wōn eo kwoj jerbal n̄an erom āinwōt? Kijejeto eo an kalōk im dāpij wōt juon pedped ilo jetōb ejjab pidodo. Jekjek in ekkal eo ej bōk juon kijejeto to̧o̧n wōt an juon mour em̧m̧an bōk jikin, im dāpiji.
N̄an kom̧ ro rej lukkuun in kajjieon̄, ilo m̧ool kōmij nōbar kom̧ im kōņaan n̄an jeļā kom̧ij ita. Jouj im kōjerbal social media ko im kwaļo̧k ta eo kom̧ij kōm̧m̧ane ilo ami kōjerbal #cesdevo, im kam̧ōjļo̧k naan eo “Ij kalōk pedped in jetōb eo aō kōn …” Uwaak ko renaaj okoktak jon̄an wōt an jekjek ko an kajjojo, im bwe ejjab nana. Juon alen, jentōj eo n̄an kadedeļo̧k ej “Ij kalōk pedped in jetōb eo aō kōn …” Kōm naaj m̧ōņōņō n̄an ron̄ jān kom̧ im n̄an katak jān kom̧ kōn ta eo ej waļo̧k ilo mour ko ami.
Eļan̄n̄e ejjan̄in kar wōr juon ami pedped eo jej kōnono kake, ak kōn jerwane kar kōm̧man bwe en kōk ak rup, ejjab rum̧ij n̄an jerbal tiljek im kōjparok n̄an kōkōm̧anm̧anļo̧k. Aolep kein jerbal ko kom̧ij aikuji rej pojak n̄an kom̧. Men kein rej ejja kein jerbal ko wōt n̄an dāpij pedped eo kar kajutake. Kom̧ jeļā ta ko. Rej koba jar ejjab jokod, em̧m̧an; ekkatak gospel eo raan otemjej jān jeje ko rekwojarjar; niknik bōk kuņaan ilo kweilo̧k ko an Kabun̄, eļaptata jān bōk m̧ōttan kwojkwoj eo kōn kōttōpar em̧ool; kōm̧m̧ani wōt jerbal ko an jab ļōmņak kōn kōj make; im niknik kōjparok bujen.
Bar juon kein jerbal eaorōk ej kapilōk eo an rikanaan ro remour. Ewōr jon̄oul ļalem em̧m̧aan ro ioon laļ in me rejtake āinwōt rikanaan ro, rilolo ro, im rikkwaļo̧k revelesōn ro. Rej kabwijer kii ko an priesthood eo an Anij. Jej katak jān er. Jej kotak peid n̄an rejtake er ruo alen juon iiō. Jej jar kōn er aolep raan. Mekarta, kōjeram̧m̧an eo ejej uwaan an tōpar ennaan eo aer emaron̄ tōl n̄an dik kam̧oolol kōn aorōk eo an.
Būreejtōn Henry B. Eyring ekar kakkōl: “Kappukōt iaļ eo n̄an ineem̧m̧an ilo kapilōk eo an rikanaan ro emeļeļe ippān ro ekajoor tōmak ko aer. Eļan̄n̄e juon rikanaan ej kōnono, ro me edik tōmak ko aer remaron̄ ļōmņak rej wōt juon em̧m̧aan eo elo̧ļe ej kwaļo̧k juon rōjan̄ em̧m̧an. Innām eļan̄n̄e kapilōk eo an elukkuun em̧m̧an n̄an er im ļap meļeļe in, jokkun wōt juon ippān ta eo rej kōņaan kōm̧m̧ane, rej bōke. Eļan̄n̄e ejjab, rej ļōmņake barāinwōt riab in rōjan̄ ak rej lo jekjek ko aer rej em̧m̧an n̄an mour eo aer juon kapilōk ejejjet.”
Būreejtōn Eyring ekar wōnm̧aanļo̧k: “Bar juon men ejjab m̧ool n̄an tōmake bwe kālet eo n̄an bōk ak jab bōk kapilōk eo an rikanaan ro ejjeļo̧k oktak jān jokālet eļan̄n̄e bōk rōjan̄ eo em̧m̧an im bōk kōjeram̧m̧an ko an ak n̄an pād wōt ijo jej pād ie. Bōtaab kālet eo ejjab n̄an bōk kapilōk in kanaan eo eukōt lukkuun pedped eo me jej jutak ie. Eļapļo̧k an erom kauwōtata.”4
N̄an kalōk im dāpij juon pedped, keememej pedped ko jilu: visōn, wujlepļo̧k, im jeļā kipel kwe make. Visōn ej maron̄ eo n̄an loe. Ilo nememe an gospel eo, jet iien jej ņa etan menin “kōttōpar indeeo.” Āinwōt an Jekab kar kōmeļeļeik, ej lo “men ko āinwōt aer lukkuun waļo̧k, im … kōn men ko āinwōt aer naaj waļo̧k” (Jekab 4:13).
Wujlepļo̧k ej ikdeelel eo n̄an kōm̧m̧an kallim̧ur. Emakijkij ad ņa etan men kein “bujen ko.” Ilo tu jejjet in, jemaron̄ kōm̧m̧ani bujen ko ippān Anij kōn kain̄i ko an priesthood eo. Kememej, kōn menin ilo kain̄i ko, kajoor in rūkanij eo ej waļo̧k (D&C 84:20). N̄an kakobaba n̄an Anij, jej aikuj in ikdeelel n̄an kōm̧m̧ani kallim̧ur ko n̄an kōj make, n̄an ro pāleed (ak n̄an erom eo pālele), n̄an ro m̧ōttad, im n̄an ro im jej jerbal n̄an er.
Kipel kwe make emaron̄ kōmļeļeik āinwōt maron̄ eo n̄an mour jejjet ippān visiōn eo im ippān kallim̧ur ko jaar kōm̧m̧ani. Kōļapļo̧k kipel kwe make ej aorōk n̄an eddōkļo̧k kōnke ekanooj kobaik katak im kōm̧m̧an. Āliktata, kajoor eo an ad pedped ilo jetōb eo ej waļo̧k jān ekōjkan ad mouri mour ko ad, eļaptata ilo iien ko enana tam̧m̧ier im apan̄.
Elōn̄ iiō ko remootļo̧k Būreejtōn Gordon B. Hinckley ekar kwaļo̧k bwebwenato in Caroline Hemenway, eo ekar ļotak ilo Janwōde 2, 1873, ilo Salt Lake City, kein karuo in ajri ro 11:
“Ke ej dettan in ron̄oul-ruo Caroline ekar m̧areik George Harman. Ekar wōr jiljimjuon nejier ajri, juon ekar mej ke ekar nin̄nin̄ wōt. Innām, ke eaar jiln̄uul-ratimjuon iiō dettan, ļeo pāleen eaar mej im kar kōm̧m̧an bwe en juon lio emej pāleen.
“Jejtōr eo an, Grace, eaar m̧areik būratōr eo an ļeo pāleen, David. Ilo 1919, ilo tōre eo enana an kar waļo̧k nan̄inmej in flu eajeded, kar lukkuun jelet David, innām lio pāleen, Grace, ekar jino nan̄inmej. Caroline ekar kauik er im ajri ro nejier barāinwōt ro nejin make. Ilo ioļapļap in kaen̄taanan kein, Grace ekar keotak juon nejin ļaddik, innām ekar mej ilowaan jet wōt awa. Caroline ekar bōk nin̄nin̄ eo euddik n̄an m̧weo im̧ōn make im ijo eaar najidiki im kōjparok mour eo an ajri eo. Jilu wiik tokālik leddik eo nejin make, Annie, eaar mej.
“Ilo tōre in Caroline ekar jako 2 nejin make ajri, ļeo pāleen, im jejtōr eo an. Jorrāān eo eaar kanooj ļap. Ekar okjak. Eaar mour jān okjak jab in kōn juon jekjek eļap in tōn̄al. Bōtaab eaar jab kadikdik. Eaar wōnm̧aanļo̧k wōt ilo kōjparok nin̄nin̄ eo nejin jejtōr eo an; im būratōr eo an kōn kien, jemen ajri eo, eaar itok kajjojo raan n̄an lo ļaddik jidikdik eo. David Harman im Caroline raar tokālik m̧are, im eaar wōr jon̄ouljilu ajri ilo m̧weo im̧wer.
“Innām ļalem iiō ko tokālik David eaar en̄taan jān juon jorrāān me kar waļo̧k juon mālijjon̄ ekanooj ļap n̄an ro me raar en̄taan ippān. Ilo juon iien eaar kōjerbal juon kein karreo ekajoor n̄an kōppopo ine n̄an kallib. Menin eaar pād ilo ānbwinin, im jekjek ko raar kauwōtata. Kilin im kanniōk in raar wōtlo̧k jān dii ko diin. Loon im n̄iin raar wōtlo̧k. Caustic solution eo kar lukkuun kakkure an mour.
“Caroline ekar lale ilo tōre in nan̄inmej nana in, im ke eaar mej liin eaar make kōn ajri ro nejin ļalem im ajri ro ralitok nejin jejtōr eo an, im juon jikin kallib 280 eika ijo liin im ajri ro raar kalbūni, ekkat ine, utdikdiki, im m̧adm̧ōde n̄an bōktok ebwe n̄an kakke n̄an aikuj ko aer. Ilo iien in liin eaar barāinwōt būreejtōn an Doulul eo an Kōrā, juon jerbal liin eaar kabwijere ium̧win jon̄oulralitok iiō ko.
“Ke eaar lale baam̧le eo im eļļo̧ke pein iakwe eo erreo n̄an ro jet, liin ekōn iiōk ralitok ļoob in pilawe ko juon raan im kwaļ en̄oul ejouj in nuknuk ko juon wiik. Ekar kanne kuwat in leej wōjke ko im pijitebōļ ko kōn tōn, im lale taujin lo̧lo̧ ko rej pedo kōn jidik jāān. Un̄n̄are pein make eaar jon̄ak eo an. Aipedped liin kar ļōmņake āinwōt jerawiwi. Liin eaar lale ro men ko m̧weien make im pukōtļo̧k ro jet ilo juon jetōb in jouj me ekar jab kōtļo̧k bwe ro eaar kile n̄an aer kwōle, kenwaan, ak pio̧.
“Tokālik liin eaar m̧areik Eugene Robison, eo, ejjab etto, ekar jorāān jān stroke. Ium̧win ļalem iiō ko m̧ae an mej liin eaar kaaoik e im kōjparok e ilo aolepān aikuj ko an.
“Āliktata, kar m̧ōk, ānbwinin kar jelete jān jekjek ko an tōn̄al, liin eaar mej ke kar jiljinon̄oul-jijlimjuon iiō dettan. Iminene in jerbal im kūtarre jerbal eo me eaar katōke ilo ajri ro nejin kar nōbar kilaer aolepān iiō ko. Nin̄nin̄ eo euddik, nejin jejtōr eo an, eo liin kar kōkkajiririk jān awa eo ke eaar ļotak, jim̧or ippān ļaddik im leddik ro jein, kar kōm̧m̧an jān juon ļamļam in iakwe im kam̧oolol, [kar leļo̧k n̄an Brigham Young University] juon oran jāān eo eļap kapidodoik [juon] em̧ aiboojoj me [kar etņake etan].”5
An wōr juon pedped epen ej juon kōjparok eļap jān ubrar ko an laļ in. Jej aikuj lukkuun pukōt ta eo Rileman ro raar ekkatak jān Ammon im em̧m̧aan ro jitōn bōro kar bōk ke rekar ba bwe er “kar oktak tok n̄an Irooj, [im] raar jamin kar bun̄” (Alma 23:6).
Mary Ann Pratt kar m̧areiki Parley P. Pratt ilo 1837. Ālkin aer kar em̧m̧akūtļo̧k n̄an Missouri, ippān ļo̧k jet Armej ro Rekwojarjar, raar kijenmeji kakkure ko renana. Ke rekar bōk Parley, ippān ļo̧k Rikanaan Joseph, jān juon kumi in rinana ilo Far West, Missouri, im kar kalbuuji, Mary Ann ekar do̧lool ilo peet, lukkuun nan̄inmej, ejja iien wōt eaar kōjparok ruo ajri ro reddik.
Tokālik, Mary Ann eaar loļo̧k ļeo pāleen ilo kalbuuj im kar pād ippān ium̧win jidik iien. Eaar jeje, “Iaar jokwe ilo jikin kalbuuj ippān, eo eaar juon jikin etutu, emarok, ettonoon, ilo an ejjeļo̧k an jikin kadiwōjļo̧k mejatoto, ewōr ie juon bo̧o̧k jidikdik kōm̧m̧an jān aen ilo dam̧ eo juon. Eo kar kipel kōm̧ n̄an kar kiki ie.”
Ālkin an Parley kar diwōj jān kalbuuj, Mary Ann im ļeo ippān raar mijenede ļo̧k n̄an New York im England im kar pād ilubwilijin ro raar “āliktata kar lukkuun m̧ōk ilo aindoontok n̄an Utah,” āinwōt an liin kōmeļeļeiki. Parley kar m̧ane im mej tōre eo eaar bar jerbal e juon mijen.
Mekarta ainikien in ilo mour, Mary Ann Pratt ekar m̧ool. Ekar kwaļo̧k, “Iaar peptaij tok n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata … kar kam̧ool n̄an n̄a kōn m̧ool ko an katak ko jān rikwaļo̧k eo m̧oktata iaar ron̄jake; im iaar ba n̄an būruwō, eļan̄n̄e enaaj wōr jilu wōt renaaj dābdep n̄an tōmak eo, inaaj juon iaan oran ro jilu; im jen aolep kakkure ko iaar kijenmeji iaar en̄jake en̄jake eo wōt; būruwō eaar jab oktakļo̧k jān kar ļōmņak eo.”6
Unin kōnono eo jaar ekōnono kake ej lukkuun aorōk n̄an n̄a. Jemaron̄ katak jān ro jet. Jemaron̄ ekkatak jān ro jet. Jemaron̄ katak jān bōd ko im tōprak ko an ro jet. Bōtaab ejjeļo̧k juon emaron̄ kōm̧m̧ane n̄an kōj. Ejjeļo̧k juon emaron̄ kalōk n̄an kōj pedped in jetōb eo ad. Ilo jekjek in jej rikkal em̧ eo ad make.
Āinwōt an Hilamōn kajoor katakin, “Im kiiō, ro nejū m̧aan, kememej, kememej bwe ej ioon ejm̧aan in ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko ami; bwe n̄e devil enaaj jilkintok kōto ko an rekajoor, aaet, mōdi ko an ilo aire, aaet, n̄e aolep wōt dekā im lan̄ rekkajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧an eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄” (Hilamōn 5:12).
Juon iaan en̄jake ko ilo mour eo aō ekanooj ļap an ekkal pedped eaar waļo̧k 36 iiō ko remootļo̧k. Ālkin kadedeļo̧k ekkatak ko am ilo university, Diane im n̄a kar em̧m̧akūtļo̧k n̄an Honolulu (ijo iaar ļotak im rūttoļo̧k ie) n̄an jino lenkan eo juon an mour ko am. Eaar erom juon lenkan aitok—27 iiō ko. Juon wōt kūr kar itok jān rikanaan eo eaar kōm̧m̧an bwe kōmin em̧m̧akūt jān Hawaii.
Hawaii Tampeļ, kiiō jeļā kake āinwōt Laie Hawaii Tampeļ kōnke ewōr ruo tampeļ ko ilo Hawaii, kar m̧oktata aje jān Būreejtōn Heber J. Grant ilo (jejjet in) Thanksgiving Day eo, Nobōm̧ba 27, 1919. Eaar tampeļ eo kein kajuon kar ekkal ilikin Utah, ijjello̧kin Kirtland im Nauvoo. Ium̧win enan̄in jiljinon̄oul iiō ko eaar jerbal n̄an Rikwojarjar ro ilo Hawaii im, bwe eļap wōt ilo tōre eo, ro ilo aolepān Pacific im Asia. Ilo ioļapļap in 1970 ko, eaar wōr juon aikuj n̄an tampeļ bwe en epaakļo̧k, ļapļo̧k, im bar kōkāāl. Kōn menin, tampeļ eo kar aikuj in bar aje, eo ekar kōm̧m̧an ilo Juun 13, 1978.
Kar tōl ilo iien bar aje eo ekar Būreejtōn eo an Kabun̄ in Spencer W. Kimball. Ippān ekar rikōkapilōklōk eo an kein kajuon im kein karuo, N. Eldon Tanner im Marion G. Romney. Kar bar pād ilo iien eo kar Ezra Taft Benson, Būreejtōn eo an Doulul eo an Jon̄oulruo Rijilōk ro, im ro jet jān Jon̄oulruo im Jiljilimjuonn̄oul eo. Ejjab juon men eo me kwoj maron̄ loe ilo Kabun̄ in eļapļo̧k rainin, an lōn̄ Em̧m̧aan ro eto aer jerbal ippān doon n̄an juon iien ettoļo̧k jān headquarter ko an Kabun̄. Bōtaab ekar am kōjeram̧m̧an ilo1978.
Ikar juon ritōl an priesthood edik ilo tōre in im kar kajjitōk jen kamitti eo ej lolorjake bar aje eo an temple n̄an aō loloorjake kōjparok eo im ialen m̧akūtkūt n̄an Būreejtōn Kimball im ro m̧ōttan. Ikar jab kōņaan kōm̧m̧an bwe eddo in aō en ļap jān jon̄an; rekar lukkun ļap aer jipan̄ im pād iutlūkū. Bōtaab, ta eo eddo eo aō ekar letok ej epaakeļo̧k Būreejtōn Kimball. Juon wiik aetokin ekoba jilu raan ko n̄an m̧wein̄an ko n̄an bar kōjeram̧m̧an temple eo, juon koba ippān doon ekar em̧m̧an, juon iien kweiļo̧k an ijoko ipealakin ekar ļap, eaar kanooj epaak aō lale Būreejtōn eo an Kabun̄ in. Ikar lale an kwaļo̧k, kam̧ool, im kanaan kōn mālim im kōn kajoor. Ikar lo kate eo an reļļap n̄an kwaļo̧k n̄an “juon eo” ej kajjitōk bwe en bwebwenato ippān im juon eo ej kile ilo iien kweilok ko ak im̧aan iaļ ko an. Ikar kam̧ool an aolep iien “āinwōt kein jerbal ilo pein Anij” (Alma 17:9). Ekar lukkuun ļap aō bulōn̄.
Ilo jem̧ļo̧kin wiik eo, kōm̧ kar pād ilo airport eo n̄an jepļaakļo̧k eo an Būreejtōn Kimball im ro m̧ōttan. Bar juon alen, bwilōn̄ kōn jabwe im rie jerbal eo aō, ij kwaļo̧k menin: Būreejtōn Kimball eaar itok n̄an n̄a im kam̧oolol eō kōn kijejeto ko aō. Eaar jab lukkuun aitok, ilo ānbwin, im ij juon em̧m̧aan āineea. Eaar jibwe eō kōn kōļa in jakit eo aō im kanooj kanōk laļļo̧k eō n̄an tōpar aitokan. Innām eaar mejān maiki jepa im kam̧oolol eō. Ālkin an etetalļo̧k jet bun̄tōn nee ko, Būreejtōn Kimball eaar bar ro̧o̧ltok. Eaar kanōk eō ilo ejja jekjek eo wōt im kinōōr laļļo̧k n̄a bar juon alen. Iien in eaar mejānmaik turejet in turin meja im ba n̄an eō ej iakwe eō. Innām eaar jepļaak.
Iiō eo m̧oktaļo̧k, juon bok in bwebwenato in mour eo an Spencer W. Kimball kar diwōjtok, jeje jān ļaddik eo nejin im ļaddik eo jibwin. Ilo tōre eo ikar bōke im riiti, ikar lo ke ekar kalimomo. Bōtaab, ālkin iien in em̧m̧an ippān Spencer Woolley Kimball, ikar ro̧o̧l n̄an m̧weo jen airport eo im kadiwōjtok bok in emijel jān jikin bok eo am, en̄jake juon ikdeelel n̄an bar riiti juon alen. Ilo raan ko jet tok ālik, aolep awa ko ij rūj ikar jab kipel eo make, ikar riiti im kejakļo̧kijen. Kwoj ke loe, ikar kiiō riit kōn juon eo ilukkuun in iakwe. Ikar kiiō riit kōn juon eo ijeļā ke ej lukkuun iakwe eō. Ikar kiiō riit kōn juon eo im imaron̄ kōm̧m̧an jabdewōt kōnke ijeļā jabdewōt men ej kajjitōk enaaj n̄an em̧m̧an eo aō make.
Jen men ko rem̧m̧an jen iien in, ebar wōr aō juon bwebwenato. Men jab in elukkuun in itino n̄an kwaļok, ak jen e ij lukkuun jook kake. Ij kile ke ekar ejjeļo̧k aō iakwe jab in im kautiej n̄an ro eļap aer aorōk ippa, ro uwaan Anij ko ilan̄, im eļaptata n̄an Jisōs Kraist, Rilo̧mo̧o̧r im Ripinmuur. Men in ej kōm̧m̧an bwe in katak kōn “mour eo An” im jen jar im jitlo̧k im kejakļo̧kijen n̄an jeļā ke kiō ij riit kōn juon eo ilukkuun iakwe. Ij kiiō riit kōn juon eo ijeļā ke ej iakwe eō. Ij kiiō riit kōn juon eo imaron̄ kōm̧man jabdewōt kōnke ijeļā jabdwōt men ej kajjitōk ej n̄an em̧m̧anļo̧k eo aō make.
Ro m̧ōtta reddik jitōnbōro, ij kam̧ool bwe jeļā in em̧ōj an kōm̧m̧an oktak ilo mour eo aō im ilo baam̧le eo am. Ij kaiur in kobaik, ekar jab make kōm̧m̧an bwe kōm en ilo ejjeļo̧k bōd im ekar jab kōm̧m̧an bwe mour en pidodo. Men in enaaj jōkkar n̄an karōk eo an Anij. Bōtaab ta eo ekar boktok ej kōjatdikdik ilo bedbed eo—”juon kōjatdikdik emeran im wānōk” (2 Nipai 31:20). Ejjan̄in kar wōr lōmņak n̄an ebbwer, bōjrak, ak jelliktak. Ij kōjatdikdik enaaj āindein n̄an kom̧.
Āinwōt an em̧m̧an im āinwōt kom̧, ilo jarlepju jon̄an wōt in, elōn̄ lan̄lōn̄ im elōn̄ metak. Kajjojo, kom̧ maron̄ en̄jake eddo ko an men ko reppen ilo mour in. Emaron̄ men ko ilo baam̧le ko ami ejjab āinwōt am̧ kōņaan bwe ren āinwōt. Bōlen kwoj lokjak kōn tōmak ņe am̧. Bōlen kwoj kōjerbale juon men ilo kar mour ne am̧—emaron̄ juon men kwar kōm̧m̧ane ak juon men eo ekar jab em̧m̧an aer kōm̧m̧ane n̄an kwe. Jet iami ewōr mālijjon̄ ko ami ilo ānbwin ak kōlmenļo̧kijeņ ak en̄jake ko im āinwōt relukkuun ļap n̄an ami eddo kaki. Jekdo̧o̧n ta jekjek eo kom̧ij pād ie, wōr juon pedped epen naaj kadikļo̧k eddo ko ami. Kōn enaan ko ilo an eo ekkā al kake “N̄a nejin Anij”7ilo būruwōmi im jetōb eo ami im ejjab wōt ilo tiōmi, im kōn juon atartar ilo Pinmuur eo an Rilo̧mo̧o̧r, Jisōs Kraist, emaron̄ wōr aenem̧m̧an im jokne ilo ilubwiljin iien ko reppen.
Rainin emaron̄ in aorōk, bar āinwōt pād ilo bwebwenato in mour kein ad. Emaron̄ raan eo jej kōm̧m̧an kālet im kōm̧m̧ane mije ko n̄an kalōk ak n̄an kalōk pedped eo ad. N̄an jet iaad, emaron̄ ilo ad joļo̧k jet iaan m̧anit in iminene ko ak m̧akūtkūt ko rej kainepataik Anij. N̄an jet, emaron̄ in bar karōk mour ko ad im kōm̧m̧an bwe iakwe eo ad n̄an Anij en lōn̄tata. Eļap jān jabdewōt wōņāān. Ilo m̧ool, ej men eo eaorōk tata ilo jerbal ko ilo mour kein ad.
Āinwōt juon make ak kajjojo āinwōt an maron̄ n̄an juon jarlepju eļap, ij kwaļo̧k aō kam̧ool kōn Jisōs Kraist, dekā in jabōn em̧ eo an Kabun̄ in im Ejm̧aan an mour kein ad. Ij kam̧ool kōn āt eo etan ekwojarjar. Ij kam̧ool kōn malim eo An im kōn jerbal eo An im, eļaptata, kōn pinmuur eo an, eo ej kōm̧m̧an bwe en pidodo n̄an kōj kajjojo, jekdo̧o̧n men ko jekar kōm̧m̧ani m̧okta ak rainin, n̄an itok n̄an E (lale Moronai 10:32), ilo etan Jisōs Kraist, amen.
© 2014 jān Intellectual Reserve, Inc. All rights reserved. Kōmālim ilo kajin English: 01/14. Ko̧mālim ukook: 01/14. Ukook eo an “Bedbed eo E Bin.” Marshallese. PD10051036 874