Ta Laajrak in Ekkal eo an Kabun̄ eo an Kraist?
Elder Tad R. Callister
Jen Būreejtōnji eo an Jiljilimjuonn̄oul
Nokon in Jota eo an CES n̄an Rūm̧m̧an Ded • Jānwōde 12, 2014 • Brigham Young University–Provo
Ej menin m̧ōņōņō jotenin n̄an pād ippāmi ro renaaj ritōl im jinen im jemān Kabun̄ in. Kōn wōt menin, ij tōmak bwe ilju eo an Kabun̄ in ej pād ilo kōjparok im meram. Ilo wāween in, ikōņaan kōnono kōn Kabun̄ eo juon raan kom̧ naaj tōl e.
Ilo section eo kein kajuōn ilo Doctrine and Covenants, Irooj ej kwaļo̧k ennaan in ekajoor im em̧m̧an: En̄in ej kabun̄ eo wōt em̧ool im epād ilo aolepān laļ in (lale D&C 1:30). Ta meļeļein menin? Ejjab meļeļein bwe kabun̄ ko jet ejjeļo̧k jidik m̧ool ko ippāer, kōnke ilo m̧ool ewōr jet m̧ool ippāer. Melele eo in bwe Kabun̄ in wōt ewōr aolepen m̧ool ko kar kōroltok ilo epepen in —kabun̄ eo wōt ewōr kain̄i ko remenin aikuj n̄an mour ippān Anij im kabun̄ eo wōt ewōr priesthood eo an Anij n̄an kōm̧m̧ani kain̄i kein ilo wāween eo ekwōjarjar im wōrtokjen. Ta kam̧ool eo ewōr ippād kōn ļōmņak in em̧ool?
Jet iiō rem̧oot ļo̧k kōm̧ro kōrā eo pāleeō kar aikuji juōn em̧ ekilep ļo̧k n̄an baam̧le eo am̧, kōm̧ kar lo juōn jikin eļap n̄an ekkal. Kōm̧ kar joļo̧k iien jerbal ilo juon pija in em̧ eo enaaj kake aikuj ko an baam̧le eo am̧. Kōrā eo pāleeō eaar jin̄aik juon kōjem ej lemlem kōtaan ruum̧ in kiki eo im ruum̧ in ikkure eo emaron̄ peļļo̧k n̄an juon baam̧le ekilep im m̧akūtkūt ko an jodikdik. Ippān jet jikin ilo kūraaj eo, kōm̧ ar jin̄aiki juon ruum̧ ijo ajri ro remaron̄ m̧ad ie im m̧ad ilo ikkure ko rem̧m̧an. Juon ruum̧ edik kar kalōke iturin kūraaj eo n̄an kakkoņkoņ m̧ōn̄ā im ko jet. Men kein im pija ko jet raar koba ilowaan juon pija in em̧. M̧weo innām eaar ekkal ekkar n̄an karōk kein.
Ke m̧weo eaar jino ekkal, ekkā am kar leļo̧k n̄an rikkal eo juon kōllaajrak eo eoktak eaar ukōt ļo̧k pija in m̧weo. Ke eaar lukkuun dedeļo̧k m̧weo, eaar lukkuun jejjet karōk eo an n̄an pija in m̧weo ilo an oktak jān iien n̄an iien. eļan̄n̄e kwaar bōk pija in m̧weo im keedi ippān aolep em̧ ilo laļ in, ewōr jete em̧ ko renaaj jejjet keedi n̄an e? Juon wōt—m̧weo im̧ōm̧. O, emaron̄ wōr jikin n̄an kajim̧wi ijen im ijeņ—juon ruum̧ jon̄an wōt juon, jet wintō rejjab oktak—ak pedped n̄an pedped, ruum̧ n̄an ruum̧, wintō n̄an wintō, kōttal n̄an kōttal, ewōr wōt juon em̧ ejjjet keedi n̄an pija in m̧weo—m̧weo im̧ōm̧.
Ilo ejja wāween in, Kraist eaar kalōk juon em̧ em̧m̧an n̄an kakke aikuj ko ilo jetōb an ajri ro Nejin. Ņae etan Kabun̄ eo An. Laajrak in ekkal ilo jetōb n̄an Kabun̄ in maron̄ loe ilo Kalim̧m̧ur Ekāāl. Iien n̄an iien Rilo̧mo̧o̧r eo eaar kōm̧m̧an “kōllaajrak in oktak” n̄an pija in m̧weo. Āinwōt juon kōllaajrak in oktak ilo jetōb kar itok ilo wāween juon revelesōn. N̄an waanjon̄ok, Rilo̧mo̧o̧r eo eaar kean̄ Rijilōk ro An n̄an kwaļo̧k ko̧jpeļ eo n̄an m̧weo im̧ōn Israel ak jab n̄an Riaelōn̄ ro (lale Matu 10:5–6) Ālkin wanlōn̄ļo̧k an Rilo̧mo̧o̧r eo, mekarta, ekar leļo̧k n̄an Piter juon laajrak in oktak ilo mour in jetob—juon madenlok ilo etonak—bwe kojpel eo ej aikuij in kio katakin nan riaelon ko (lale Jerbal 10). Menin ekar walok n̄an Piter ej katakin ruo pedped in katak nan kakien im relukkuun aorōk ilo Kabun̄ eo an Kraist: Juon, laajrak in ekkal eo emaron̄ in oktak, ak kōn wōt m̧adenļo̧k jen Kraist, im kein karuo, m̧adenļo̧k kein naaj itok nan rikanaan eo im ekar rikonono an Anij ilo lalin. Ilo bar juon naan, Kabun̄ eo an Anij ej aikuij in kakien kōn m̧adenļo̧k ko jen lan̄ im kōn laajrak.
Eļan̄n̄e juōn ej ikdelel n̄an pukōt Kabun̄ eo an Kraist rainin, ej aikuij in keidi laajrak in ekkal eo loe ilo kallim̧ur ekaal ippān aolep kabun̄ ko an rikūrijin ro ilo laļ in m̧ae iien enaaj loe kabun̄ eo enaaj jokkin wōt juōn ippān laajrak in ekkal in—doulul eo m̧okta nae doulul eo raan kein, katak ko m̧okta nae katak ko kiō, kain̄i ko m̧okta nae kain̄i kein, leen ko aer m̧okta ņae leen kein, im m̧adenļo̧k ko nae m̧adenlok kein. Eļan̄n̄e enaaj kōm̧m̧ane menin emaron̄ lo jet iaan kabun̄ kein im ewōr jet iaan men kein rej jokkin wōt juōn—enaaj lo juōn im men ruo katak ko roktak, jet kain̄i renaaj āinjuōn, jet iaan ra ko epād ejja et ko wōt—ak enaaj lo juōn wot kabun̄, Kabun̄ eo an Jisōs Kraist im armej ro rekwōjarjar ilo Raan-ko Āliktata, im enaaj einwōt laajrak in ekkal in ilo aolep wāween. Kiō, ikōnaan likūt menin jej watōk ke ejimwe n̄an ad wate. Jen alōklo̧k n̄an paij eo jinointata an laajrak in ekkal in im lale kar wāween doulul in kabun̄ eo an Kraist enwōt an kwalok ijin.
Jen alōkļo̧k n̄an paij eo jinon tata ilo larak in ekkal eo im lale ta kar “tu jim̧we” in kabun̄ eo an Kraist ilo an kwaļok ijin.
Kein kajuōn, Kabun̄ eo an Kraist ekar pedped ioon rijilōk im rikanaan ro. Ke Paul ekar jeje n̄an jet iaan membōr ro rekāāl an Kabun̄ eo, ekar ba ke kiiō rekar “kalōk kom̧ ioon foundesōn an rū jelōk kab ri kanaan, Kraist Jisōs e make lukkuun dem̧ōn em̧” (Epesōs 2:20; emphasis added)
Rijilōk ro raar meļeļe aorōk in aikuj eo n̄an kōm̧m̧an bwe doulul eo an rijilōk ro en pād wōt ilo tu jejjet in. Ke juōn rijilōk, einwōt Judas, kar mej juōn mōttan pedped eo ekar jako,” rijilōk ro 11 raar koba ippān doon im kelet ribōk jikin bwe pedped in en bar likieo juōn alen. (lale Jerbal 1:22–25).
Jōkjōk in ej kam̧ool aorōk in bwe en wōr doulul an rijilōk ro jon̄oul-ruo. Jon̄an an kar aorōk rijilōk ro n̄an em̧anļo̧k eo an kabun̄ eo bwe Paul ekar kwalok ewi toon ad aikuji er: “ M̧ae ien jenaaj tōpar juōn wōt ilo tōmak” (Epesōs 4:13). Innām ekar kōmļeļeik etke: bwe jen jab maron̄ “makūtkūt kōn jabdewot kōto in katak” (Epesōs 4:14). Ekkar n̄an melele in, rijilōk ro raar lukkun pen ilo aer kōjparok katak ko bwe ren jim̧we.
Lomņak mok jidik ne in kar kwalok juōn bwbewenato nan juon armej ej pad maanu ilo juon line aetok im ej aikuij in kar kwalok nan armej eo juon mannin, im etal wōt m̧ae iien enaaj kar jem̧ļo̧kin ļain eo. Ta eo enaaj waļo̧k n̄an bwebwnato eo? Enaaj kar oktak. Aolep iien ej oktak; eindein koj armej. Ekar bar eindein ippān katak ko kar katakin jen rijilōk ro einwōt aer kar ajeded ilo elōn̄ jikin ko kab bukōn ko. Ilo an katak kein etal jen juon armej n̄an bar juon, ej jino an oktakļo̧k. Toon wōt an kar pād rijilōk rein, remaron̄ kar kajimwe katak kein ilo aer jeje leta ak enaan ko aer make. Ak ke rijilōk rein rekar jako, ekar ejjeļo̧k juōn jekjek n̄an kajim̧we im kōm̧m̧an bwe en jokkin wot juōn, ekar ejelok eņ tello̧kin n̄an kajim̧we, innām ejjab etto katak rekar oktak im jako.
Kōn un in kab ko jet, laajrak in ekkal in ej kwaļo̧k ke rijilōk ro kab rikanaan ro rej ejaakin pedped eo an kabun̄ eo an Kraist. Kwojeļā ke kōn jabdewōt oktak in laajrak in ilo kallim̧ur ekāāl, jabdewōt revelesōn kar kōm̧anm̧an ļo̧k laajrak in ekkal eo im kwaļo̧k bwe Rijilōk ro ejemļo̧k bar aikuji er? N̄a ijjab jeļā. Eļan̄n̄e jōkjōk eo in, innām Kabun̄ eo em̧ool an Kraist rainin ej aikuij in wōr rijilōk im rikanaan einwōt pedped eo an.
N̄an am maron̄ jipan̄ Rilo̧mo̧o̧r im rijilōk ro an kwaļo̧k kōn ko̧jpel eo n̄an laļin, Rilo̧mo̧o̧r eo ej kelet bar jet em̧m̧aan ro, kūr jijlimjuōnn̄oul ro, n̄an kōpooj iaļ eo. Jej katak kōn Doulul in Jiljilimjuonn̄oul rein ilo Luk, jepta 10. . Kwojeļā ke kabun̄ ta rainin einwōt laajrak in ekaal in rainin?
Laajrak in ekkal in jen kalim̧ur ekāāl ej kwaļo̧k opiija ro im rej kalōk m̧ōttan doulul in kabun̄ eo an Kraist: bijop (lale 1 Timote 3; Taitōs 1:7); eltōr ro (lale Jerbal 14:23; Taitōs 1:5); Tikōn (see Pilippai 1:1); evangelists (lale Epesōs 4:11), melele in patriarch ro1; im rikaki ro (lale Epesōs 4:11), melele in em̧man rein rej bijop im būrejtōn n̄an sake ro im rej tōl ioon jarlepju in armej. 2
Laajrak in tōmak jiljino an Kabun̄ in rej jipan̄ kalikkar laajrak in ekkal in: “Kimij Tōmak ilo ejja lajrak in karōk eo an kar kabun̄ eo mokta, errein, dri jilik ro, dri kanaan ro, pastor ro, dri kaki ro, evanjel ro, im ko jet” (Lajrak in tōmak ko 1:6; kobaiktok italic ko). Ilo bar juon naan, kōmij tōmak bwe Kabun̄ eo an Jisōs Kraist rainin ej aikuij in pād ejja doulul eo an kabun̄ eo ilo kar Kabun̄ eo an Kraist make, im pedped wōt ioon oktak ko jen madenļo̧k ko. Kōn menin, aolep ra kein rej pād ilo Kabun̄ in ad rainin.
Ewi wāween an kar rijilōk ro an Kraist kab opija ro jet kar kelet? Rilo̧mo̧o̧r eo ekar ke etal n̄an jikuuļ in baibōļ eo em̧m̧an tata im kelet rijikuuļ ro em̧m̧an tata katak ko aer? Ekar jab. Ijelo̧kin, laajrak in ekkal in ej kwaļo̧k ke ekar kelet Piter, juon rieon̄ōd, im Matu, juon ribbok eowōj, innām tok ālik Paul, eo im ekar wujlepļo̧k an. Kajjojo iaer kar kelet jen ijo ej pad ie kab uwaan doulul eo—ilo m̧ool ekar juōn jerbal eo kar karōke. Rainin Kabun̄ in elōn̄ juōn doulul an Rijilōk ro jon̄oulruo, ro im rej bok er jen jerbal ko aer kab ijo rej pād ie. Juōn emaron̄ in rikaki in jikuuļ, juōn engineer, bar juōn attorney, im ko eierļo̧k wōt.
Rijilōk ro kab opija ro jet an Kraist rekar ke kanne aer apllication nan jerbal eo? Rekar jab. Laajrak in ekkal in ej kwalok wāween an Kraist kar Kālet opija ro An: “Kom̧ ar jab kāālōt Eō, a N̄a iar kaalōt kom̧, im kapit kom̧” (Jon 15:16;kobaiktok italic). Ke Kraist ekar kapit rijilōk ro an, ta eo ekar leļo̧k n̄an er im Matu im Luk rekar jeik uwaak eo. “Ekar leļo̧k n̄an er kajoor” (Matu 10:1; bar lale Luk 9:1)—kajoor eo an priesthood eo n̄an jerbal ilo etan im kōm̧m̧ane jerbal ko an. En̄in unin an laajrak in ekkal in ba n̄an kōj “Eo nejin m̧aan… ej leļo̧k maron̄ n̄an ro rikajrejeran” (Mark 13:34). Etke? Bwe ren maron̄ jerbal ilo etan kōn mālim eo an. Aolep em̧m̧an ro rej kabwijer priesthood eo an Anij ilo kabun̄ in remaron̄ etale likļo̧k ļain in priesthood eo aer likļo̧k n̄an n̄e retōpar Jisōs Kraist, eo im ej un jen aolep mālim im kajoor, bwe en, einwōt, ej bar balōk mālim eo an Kraist—jitaam in kōmālim eo an—āinwōt an aikuj jen meļeļe ko ilo laajrak in ekkal eo.
Kar etan kabun̄ eo kar kajutak jen Kraist? Elan̄e jej peptaij ilo etan Kraist, eļan̄n̄e jej jar ilo etan Kraist, eļan̄n̄e jej lo̧mo̧o̧ren ilo etan Kraist, im eļan̄n̄e E eo ekar kajutak im ej deka in jabōn em an Kabun̄ eo An, enaaj etan Kabun̄ eo An ilo am̧ ļōmņak?—Kabun̄ eo an Jisōs Kraist. Rilo̧mo̧o̧r eo, ke ekar kōnono n̄an armej ro ilo Bok in Mormon, ekar katakin kōn aorōkin etke Kabun̄ eo ej aikuij in bōk etan: “Im enaaj ekojkan kabun̄ eo Ao ijjelokin wot n̄e ej etonake eta? Bwe eļan̄n̄e juon kabun̄ ņa etan ilo etan Moses innām ej an Moses kabun̄; ak eļan̄n̄e enaaj etōņake etan armej innām ej kabun̄ eo an armej; ak eļan̄n̄e e ej etōņake Eta innām e ej kabun̄ eo Aō, eļan̄n̄e raar ekkal ioon gospel eo Aō” (3 Nipai 27:8; kobaiktok italic ko).
Ekar kōn unin in bwe Paul ekar luuk jet iaan membōr ro an Kabun̄ ilo tōre eo—kōnke rekar ņa etaer alikin jet iaan rikaloor ro, ijelokin alikin etan Kraist. Ilo melele in, Paul ekar jeiki:
“Kiiō ij ba men in, bwe jabdewōt iaami ej ba, “N̄a doon Paul,” im “N̄a doon Apollō,” im “N̄a doon Sipas,” “N̄a doon Kraist.”
“E jepel ke Kraist? Ar debwāāl Paul kōn kom̧ ke? Ak em̧ōj peptaij kom̧ ilo etan Paul ke?” (1 Korint 1:12–13).
Ilo bar juon wāween, jejjab bōk iood jabdewōt et ijjelo̧kin Jisōs Kraist.
Ilo wāween in, laajrak in ekkal in ej katakin kōj bwe Kabun̄ eo an Kraist ej aikuj etņake Etan. Eaar aolep iien kabwilōn̄ eō bwe Bar Ekkal in eaar waļo̧k ium̧win 300 iiō ko m̧okta jen tōre eo an Joseph Smith im ejjeļo̧k juon eaar ļōmņak in likūt etan kabun̄ eo an ālkin Jisōs Kraist. Aaet, jen tōre eo an Joseph Smith, ro jet raar ļoor wāween in, ak ilo jet wāween ekabwilōn̄lōn̄ Irooj eaar kōjparoke n̄an kōjerbale Etan m̧ae tōre eo an Joseph Smith im Jepļaaktok eo an Kabun̄ eo an Kraist.
Kiiō, jen elōk ļo̧k n̄an peij eo kein karuo in laajrak in ekkal eo. Ta kar katak ko an Kabun̄ eo an Kraist? Jen etali jet iaer:
Anij ej ke Jetōb ak ewōr ke Anbwinnin kanniōk im bōtōktōk? Ta eo laajrak in ekkal eo ej katakin kōj kake?
Alkin jerkakpeje eo an Kraist, Ekar waļo̧kļo̧k n̄an rijilōk ro An ro rekar bōd im ļōmņak ekar juon Jetōb (lale Luk 24:37). N̄an kajim̧we bwilōn̄ eo aer ekar bōd, ekar ba, “Kom̧win lale peiō im neiō, bwe N̄a make: kom̧win likūt peōmi ioō im lo ; bwe jetōb ejjeļo̧k kanniōkin im diin, āinwōt kom̧ij lo Ippa ” (Luk 24:39; kobaiktok italic ko).
N̄an joļo̧k jabdewōt pere kōn lukkuun ānbwinnin ke ekar jerkakpeje, eaar kajjitōk ippān rijilōk ro an, “Ewōr ke m̧ōttan kijemi ippemi?” (Luk 24:41). Innām jeje ko rej kwalok:
“Im rej lelok nan E mottan ek komat, im mottan honeycomb.
“Im Ej boke im mona imaan mejeir” (Luk 24:42–43).
Kōn ānbwin eo eaiboojoj em̧ōj an jerkakpeje, Kraist eaar weaak ļo̧k n̄an lan̄ (lale Jerbal 1:9),3 ijo ej jijet itu anbwijmaron̄ in pein Anij Jemen im ej bōk “im āinwōt E ilo aolep wāween” (Hibru 1:3). En̄in ej lukkuun m̧ool eo kar katakin jen Joseph Smith āinwōt m̧ōttan Jepļaaktok eo an Kabun̄ eo an Kraist ke e (Joseph Smith eaar ba bwe Jemān im Nejin ewōr ānbwinnin kanniōk im dii āinwōt maron̄ jibwi āinwōt armej (lale D&C 130:22).
Anij im nejin Jisōs Kraist rej ke juon wōt ilo Armej, āinwōt ak elōn̄ rikūrijin ilo laļ in, ak ruo Armej rejenolo̧k? Ta laajrak in ekkal eo ej ba?
Elōn̄ meļeļe n̄an jipan̄ ilo Baibōļ kōn oktak in kadkad in im jerbal an Jemān im nejin im eļap aer jipan̄ jab tōmak ilo wāween in. Ilo jikin kallib Gethsemane, ilo an kile metak eo eļap me ekar pojak in bōke, Rilo̧mo̧o̧r eo ekar ba, “En jab ankil Aō ak Am wōt (Luk 22:42). En̄in ej wujlepļo̧k eo emake wōt im ļap laļ in ekar jeļā kake. Ak en kar wujlepļo̧k rot en kar kōm̧m̧ane eļan̄n̄e ejjeļo̧k bar armej en kar kajjitōk ļo̧k ippān—eļan̄n̄e E im Jemān ren kar juon wōt ānbwin? Etke Rilo̧mo̧o̧r eo ekar jar n̄an Jemān ak lamōj im ba “Aō Anij, Aō Anij, etke kwaar ilo̧k jen Eō? (Mark 15:34). Ewi wāween an kar make iaan eļan̄n̄e ekar bar ejjeļo̧k armej n̄an ilo̧k jen e? Ewi wāween an Stephen lo an Jisōs jutak ituanbwijmaron̄ in pein Anij eļan̄n̄e rej jab ruo armej roktak (lale Jerbal 7:55–56)?
Ke Joseph Smith ekar diwōj tok jen buļon wōjke ko, e eaar katak ippān make m̧ool eo. Ekar lo Anij Jemān im Nejin Jisōs Kraist, rekar jutak iturin doon; ekar ron̄ an Jemān ba kōn eo juōn ke ej “Nejin Jitōnbōro” (Joseph Smith—History 1:17). Ilo raan eo ekar aiboojoj ekar lukkuun kariap tōmak eo waļo̧k jen armej kōn wāween Anij im kwaļo̧k im kapen m̧ool in āinwōt an lukkuun kwaļo̧k ilo laajrak in ekkal eo ke Anij Jemān im Nejin Jisōs, ke ewōr ippāer juōn wōt kōtōpar im jem̧ļo̧k ak rej oktak jen doon ilo nememein.
Ta eo laajrak in ekkal in ej ba kōn ro rej jan̄in kar lōn̄ aer iien n̄an ron̄ kōn ko̧jpeļ eo an Jisōs Kraist ke rekar pād ioon laļ in? Renej ke mej? Jejjeļā ke kōn jekjek in mour in jetōb eo aer?
Menin ej juōn kajjitōk eo elukkuun in ļap im ejelet mour an bilien armej. Ilo m̧ool Anij ekar kōnono kōn menin. Laajrak in ekkal in epād uwaak eo ie.
Piter ekar jeiki: “Bwe n̄an men in em̧ōj kwaļo̧k gospel n̄an ro im re mej, bwe en ekajet er āinwōt armej ilo kanniōk, a bwe ren mour ekkar n̄an Anij ilo Jetōb” (1 Piter 4:6). Katak in ekar jako ilo Bun̄jen Tōmak eo ālkin mej eo an Rijilōk ro an Kraist, ak ekar jepļaaktok jen Rikanaan Joseph Smith.
Elōn̄ ke jilu jikin ko ilan̄ ke juōn? Ium̧win elōn̄ iiō ko rikūrijin rekar katakin ewōr juōn lan̄ im juōn Hell, ak ta eo laajrak in ekkal eo ej katakin kake?
Paul ekar katakin “Juon aiboojoj an aļ, bar juon aiboojoj an allōn̄, im bar juon aiboojoj an iju kaņ” (1 Korint 15:41). Paul ekar lukkuun kapen kōn m̧ool in laļ kein jilu ilo aer elaajrak kōn aiboojoj ke ekar bar kwaļo̧k visiōn eo an em̧m̧an eo ekar “kotaklōn̄ļo̧k ļein n̄an lan̄ kein ka jilju” (2 Korint 12:2). Enej ke lōn̄ laļ kein kajilu eļan̄n̄e ejjeļo̧k laļ kein karuo ak kajuon? Bar juon alen katak kein rekar jepļaaktok jen rikanaan Joseph Smith rej lukkuun jokkin wōt juōn ippān laajrak in ekkal in.
M̧are ej ke wōnm̧aanļo̧k n̄an indeeo ak bōjrak ilo mej? Laajrak in ekkal in ej kwaļo̧k uwaak eo.
Ilo jokkin wōt juōn ippān kajoor eo leļo̧k n̄an Rijilōk ro bwe jabdewōt men eo kom̧ naaj liāpe ioon laļ, naaj liape i lan̄ (lale Matu 18:18), Paul ekar kwaļo̧k, “Ijoke kōrā e jab anemkwōj jān m̧aan, ak m̧aan anemkwōj jān kōrā, ilo Irooj” (1 Korint 11:11), meļeļe in ke ļōmņak eo ej n̄an an em̧m̧aan im kōrā liāpe ippān doon n̄an indeeo im̧aan Anij. Juōn bar kam̧ool kar kwaļo̧k jen Piter. N̄an ļeo im lieo pālele, ekar kwaļo̧k bwe rej aikuj in “rijolet ippami kon jouj in mour” (1 Piter 3:7)—ejjab jenolo̧k, ejjab juōn make, ak ippān doon im etetal ilo iaļ eo āinwōt rijolet e mour indeeo. En̄in ej katak eo ej katakin jen laajrak in ekkal in; im en̄in ej katak eo ej katakin ilo Kabun̄ eo an Kraist rainin.
Pija eo kein kajilu ilo laajrak in ekkal eo ej riit, “Kain̄i ko ilo Kabun̄ eo an Kraist.” Laajrak in ekkal in elukkuun polel ilo an kwaļo̧k men in. N̄an waanjon̄ok, jej kōjeram̧m̧an ke peptaij nin̄nin̄ im ajri jiddik ro? Ta eo laajrak in ekkal eo ej katakin?
Rilo̧mo̧o̧r eo ekar kwaļo̧k waanjon̄ok eo n̄an kōj bwe jen ļoore. Kōņaan kōn ajri jiddik ro, jeje ko rekwojarjar rej riit, “Ej jiburlep er, im likūt pein ioer, im jar kōn er ”(Mark 10:16;kobaiktok italic ko). Matu ekar kalikkar kōn ajri jiddik ro, Rilo̧mo̧o̧r eo “Ej likūt pein ioer” (Matu 19:15). Laajrak in ekkal eo ej katakin bwe nin̄nin̄ ko im ajri jiddik ro rej kōjeram̧m̧an, jab peptaij. Ilo m̧ool, ejjeļo̧k juōn bwebwenato in an kar juōn nin̄nin̄ peptaij ej waļo̧k jabdewōt jikin ilo aolep kalim̧m̧ur ekāāl. Etke? Kōnke ekar jab kain̄i ilo Kabun̄ eo an Kraist. Juōn eo im ej pukōt Kabun̄ eo an Kraist rainin enaaj pukōt kabun̄ eo ej kōjeram̧m̧an nin̄nin̄ ko im jab peptaiji er.
Peptaij ej ke men in aorōk n̄an ļomo̧o̧r? Ta eo laajrak in ekkal eo ej katakin kake?
Ālkin an Kraist kar kōm̧m̧ane waanjon̄ok eo ilo an kar peptaij, Eaar kalikkar ilo juon naan epidodo meļeļe kake, “Eļan̄n̄e armej e jab ļotak jān dān im Jetōb, e jab maron̄ deļo̧n̄ ilo aelōn̄ in Anij” (Jon 3:5;koabiktok italic ko). Piter ekar bar kwaļo̧k ejja einwōt in: “Kom̧ otemjej kom̧win ukweļo̧k ippemi, im peptaij ilo etan Jisōs Kraist kōn An juļo̧k jero̧wiwi ko ami, im kom̧ naaj bōk men in letok eo, Jetōb Kwojarjar” (Jerbal 2:38;kobaiktok italic ko). Ta eo ekar katakin ilo laajrak in ekkal ejja baj wāween an katakin ilo Kabun̄ eo an Kraist rainin.
Peptaij ej kōm̧m̧an ilo wūtdikdik, tulo̧k dān ak tulo̧k? Laajrak in ekkal in ej letok emān kam̧oolol ko ke peptaij ej kōm̧m̧ane ilo an tulo̧k:
Mokta, Rilo̧mo̧o̧r eo, waanjon̄ok eo ad em̧m̧an tata, ekar “waļo̧ktok jen dān eo” (Matu 3:16), ej kwaļo̧k ke ej aikuj in kar m̧okta etal laļ ļo̧k n̄an dān eo.
Kein karuo, Jon Ripeptaij eo “ej peptaij ilo Aenon e paake Selim, bwe eļap dān ijo; im rej itok im peptaij” (Jon 3:23;kobaiktok italic ko). Etke ekar etal n̄an ijo “eļap dān ie” eļan̄n̄e wūtidikdik im lutok in dān ekar wāween ko erra kaki wāween peptaij?
Kein kajilu Paul ekar jiron̄ kōj bwe peptaij ej kwaļo̧k kadkad in mej, kallip, im jerkakpeje eo an Jisos Kraist (lale Rom, 6:3–5). Ilo an ro rekaal jutak ilo dān in peptaij, ej bōk jikin armej eo m̧okta ej pojak in mej ļo̧k. Ilo an tulok ilo dān eo, jerawwiwi ko an rej “kallip” im jeorlok in bōd jen kajoor in kareeo eo an dān eo. Innām ilo an jutak tok jen dān eo, ej jutak einwōt eo ej bōk jikin armej eo ekāāl em̧ōj an jerkakpeje ilo Jisōs Kraist. Aolepān meļeļe ko rejim̧we kōn peptaij rej lukkuun jejjōt kōn peptaij ilo ad tulo̧k, ak kiō rej jabwabwe-lukkuun in jabwābwe- kōn wūtidikdik im lutōk tok dān.
Im kein kemen, naan in Greek eo im naan in peptaij ej itok jen e ej meļeļe innām rum̧ļo̧k ak tulo̧k ilo dān eo.
Will Durant, juon eo e bunbun im ej katak kōn bwebwenato in laļ in, ekar jeļā kōn laajrak in ekkal eo kar kwaļo̧k im ekar etale “Ilo ruatimjuon-noul wāween an rikūrijin ro peptaij ilo tulo̧k ilo dān em̧ōj an kar bok jikin kōn … wūtdikdik kōnke edik an kauwatata ilo jikin ko ituion.”4
Ej aikuj in ejjeļo̧k bwilōn̄ kake bwe Joseph Smith ekar bōk juon m̧adenļo̧k kōn wāween eo im peptaij ej aikuj in kōm̧m̧an im ej lukkuun jejjōt ippān laajrak in ekkal eo an Kraist (lale D&C 20:73:–74 ).
Peptaij kōn ro remej ej ke kar kain̄i ilo kar Kabun̄ eo an Kraist? Ekar.
Membōr ro an Kabun̄ eo ilo Korint rekar bōk koņaer ilo kain̄i eo ejim̧we im jej jeļā kake ej peptaij kōn ro remej. Armej rein, mekarta, kar pere kōn m̧ool eo an jerkakpeje. Ilo an kar en̄jake jabikbik in ta eo rekar kōm̧m̧ane keidi ippān ta eo rekar tomak, Paul ekar kōjerbal iien eo em̧m̧an ilo aer kar bōk koņaaer ilo kain̄i in ejim̧we an peptaij kōn ro remej n̄an kwaļo̧k kadkad in jim̧we in katak eo kōn jerkakpeje: “Eļan̄n̄e āinjuon ren et ro em̧ōj peptaij er kōn ro re mej? Eļan̄n̄e ro re mej re jab jerkakpeje n̄an jidik, etke rej peptaij kōn er?” (1 Korint 15:29).
Eļan̄n̄e jabdewōt enaaj kijoone bridge in katak eo im jeļā bwe peptaij ej men in aorōk n̄an lo̧mo̧o̧r (eo im ej lukkuun), innām ilo jejjōt in em̧ōj tole e n̄an tōmak ilo peptaij kōn ro remej—ejjeļo̧k iaļ en roļo̧k jen e. Innām eļan̄n̄e ejjab, ewi wāween an juon uwaak e kajjitōk in epen “Ak ro im rekar mej ilo an kar ejjeļo̧k aer iien em̧m̧an n̄an peptaij? Ro rej jelm̧ae kajjitōk in ewōr emān uwaak ko im rej aikuj in kelet jen i”
Kein kajuon, em̧m̧aan im kōrā ro rekar jab peptaij renaaj mej im etal n̄an hell. Āinwōt an uwaak, mekarta, ej jokkin wōt juon ippān m̧ool ko an jeje ko rekwojarjar bwe Anij ejjab kalijekļo̧k” (Jerbal 10:34) im bwe ej ikdeel bwe “aolep armej ren bōk lo̧mo̧o̧r” (1 Timote 2:4).
Kein karuo, bōlen Anij ejjab lukkuun kam̧ool naan ko ej ba─bolen peptaij ejjab lukkuun aorōk n̄an lo̧mo̧o̧r. Ak men in ejjab m̧ool kōnke Anij aolep iien ej kajejjete ta ko ej ba. Irooj eaar ba bwe E jab kariab E make kōn ta eo Eaar kōnono kake” (lale D&C 1:38; bar laleMosaia 2:24).
Kein kajilu, jet rej tōmak ke jekjek eo ņa etan “peptaij kōn ikdelel” maron̄ bar ba peptaij kōn dān. Ilo bar juon naan, eļan̄n̄e jabdewōt ej ikdelel n̄an ļoor Jisōs ak ekar jab wōr an iien em̧m̧an n̄an peptaij ilo mour in kanniōk in, innām ikdelel eo an ewānōk ej erom juon men in pinej jenkwan peptaij ilo mour in kanniōk, innām ikdelel eo an ewanōk ej rom juon men in pijen jenkwan ijjelo̧kin dān in peptaij. Apan̄ eo an men in ej bwe ejjeļo̧k an rejtak ilo Jetōb. Jeje ko rekwojarjar rej jab ba, “Eļan̄n̄e armej rej jab ļotak jen ikdelel, ak ijjelo̧kin ej ba “Eļan̄n̄e armej e jab ļotak jān dān im Jetōb, e jab maron̄ deļo̧n̄ ilo aelōn̄ in Anij.” (Jon 3:5;kobaiktok italic ko).
Kein kemen ej bwe Anij ej lukkuun m̧ool ilo men ko ej ba ke ekar ba im kakien aolep armej n̄an peptaij, im kōn men in ekar tūriam̧o im kōpooj juon iaļ n̄an an aolep armej peptaij jekdoon n̄e ejjeļo̧k iien kōm̧m̧ane ilo mour in kanniok in. En̄in ej peptaij ko kōn ro remej. En̄in ej jekjek eo ej jokkin wōt juon ippān laajrak in ekkal in.
Ta eo laajrak in ekkal eo ej ba kake kōn wāween eo im men in letok eo─ejjab waļo̧k eo an jidik iien ak menin letok eo em̧ool─eo an Jetob Kwōjarjar ej letok alkin an juōn peptaij? Ej ke kajju wōtlo̧k ioon juōn eo im ej peptaij ālkin wōt an peptaij? Ej ke itok einwōt likorkor ilo kōto, ej ke juōn kain̄i eo ekwōjarjar, ej k laajrak in kien ekwōjarjar me ej aikuj in ļoor n̄an bōk menin letok in? Laajrak in ekkal in ej letok uwaak eo.
Ālkin an Phillip peptaiji jet membōr kāāl ilo Samaria, Piter im Jon rekar itok. Jeje ko rekwojarjar rej kwaļo̧k jekjek in ilo an kain̄i in maron̄ kōm̧m̧an: “Innem [Piter im Jon] Innem rejro likut peier ioer, im rej bok jetob kwojarjar” (Jerbal 8:17;kabaiktok italic ko).
Jokjok in ekar ba waļo̧k alkin an Paul peptaij membōr ro rekaal ilo Epesōs:
“Ke rekar ron̄ menin, rekar peptaij ilo etan Irooj Jisos.
“Im ke emōj an Paul likūt pein ioer, Jetōb Kwojarjar ej itok ioer” (Jerbal 19:5–6;kobaiktok italic ko).
Bar juon alen laajrak in ekkal in im Kabun̄ eo an Kraist im emōj an jepļaaktok rej jokkin wot juon.
Peij eo tok alik ilo laajrak in ekkal in maron̄ riit āinwōt in: Leen ko leen Kabun̄ eo an Kraist.” Rilo̧mo̧o̧r eo ekar letok idajon̄jon̄ n̄an m̧ool eo: “Innam kom naak jeļā kajjer kōn leier” ( Matu 7:20). Ta ko kar leen ko an Kabun̄ eo an Kraist im jej kam̧ooli ilo laajrak in ekkal in?
Juon, rej jet armej ro relukkuun ājmour. Paul ekar katakin bwe ānbwin kein ad rej “tampol” eo im ej im̧weo n̄an jetōb, im kōn menin, rej aikuj in kōm̧m̧ane n̄an i āinwōt rekwojarjar. “Kom jab jeļā ke bwe kom tempel an Anij, im Jetōb an Anij ej jokwe ilo kom?” (1 Korint 3:16; bar lale 1 Korint 6:19). Kōn men in ro uwaan Kabun̄ eo an Kraist ekar ewōr jet kakien ikijen ājmour rekar pokake, einwōt an lōn̄ jet mo ilo idaak wain loe ilo Epesōs 5 im1 Timote 3. Bwe en jokkin wōt juon ippān kien in eaorōk n̄an kōjparok anbwinnid einwōt tampeļ, Joseph Smith ekar bok juon kakien ikijen ājmour jen Irooj n̄an ro uwaan Kabun̄ eo an Kriast, einwōt ad jeļā kake ej naan in meletlet. Toprak ko an mour kōn kien in ājmour in, elōn̄ ekkatak ko rej kam̧ool bwe Armej in Kabun̄ in membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata rej pād ilubujin armej ro rejmour ilo laļ in. En̄in ej juon iaan leen ko jen ad mour kōn kien eo an Kraist kōn ājmour.
Leen eo kein karuo an Kabun̄ eo an Kraist ej kōn kabwilōn̄lōn̄ im men in letok eo an Jetōb Kwojarjar. Rej jeje ilo peij ālkin peij ilo kalim̧m̧ur ekāāļ. Rekar kein kam̧ool bwe kajoor eo an Anij ej pād ilo Kabun̄ eo an Kraist (lale Hibru 2:4). Bōtaab kabūrom̧ōjm̧ōj eo kōn waļo̧k eo an bun̄ jān tōmak eo, kabwilōn̄lōn̄ kein rekar jako—rikatak kōn bwebwenato ro rej riit kake im kam̧oole e, im ro rej jerbal rot in rekar kwaļo̧k m̧ool kake. Paul Johnson, juon rikatak kōn bwebwenato in etto eo etijem̧ļo̧k ekar ba “Em̧ōj an juon kattōn jen iien ko an [Constantine] bwe iien ko n̄an menin bulōn̄ ko rekar jem̧ļo̧k, ilo en̄jake in ke ritōl ro an rikūrijin ro rekar jab maron̄ in jake to jake tak ko̧jpeļ, āinwōt kar rijilōk ro, kōn jipan̄ eo an kajoor eo.” 5
Etke ien eo ekar itok bwe ekar ejelok menin būlōn̄ kab menin letok ko an Jetōb? Kōnke wojke eo me ekar jebar leen, ņa etan Kabun̄ eo an Kraist, ekar jako ioon laļ in im tomak eo an armej ro ekar makunļo̧k. John Wesley ekar kalikkar jako eo an menin letok ko an Jetōb jen kabun̄ ko ilo raan ko an: “Ejjab alikkar ke menin letok kein rem̧m̧an an Jetōb Kwōjarjar rej pad ippān Kabun̄ iumwin ruo ak jilu epepen ko.” 6
Bwe en maron̄ bwe ilo aō ba, imaron̄ kam̧ool, āinwōt elōn̄ iami, bwe rainin ej iien menin letok ko an jetōb ilo Kabun̄ eo an Kraist emōj an jepļaaktok, āinwōt an kar pād ilo Kabun̄ eo m̧okta.
Ewor leen eo kein kajilu—laajrak in ekkal in an Kabun̄ eo an Kraist ej kwaļo̧k elōn̄ bwebwenato in enjeļ ro kab visiōn ko. Jet armej rej lo im jab tōmak rainin ilo jabdewōt kabun̄ ko rej ba ke rej elo enjeļ kab visiōn ko, ak ilo wāween in rej meļo̧kļo̧k ke enjeļ kab visiōn ko rekar lukkuun iolapān kar Kabun̄ eo an Kraist: enjeļ eo ekar kwaļo̧k kōn ļotak eo an Kraist n̄an Mary, Enjeļ eo ekar itok n̄an Piter, Jemes im Jon ioon toļ eo ekar walōn̄ ļo̧k ie; enjeļ eo ekar kōroļo̧k Piter im Jon jen kalbuuj; enjeļ eo ekar kōnono n̄an Konelious; enjeļ eo ekar kakkol Paul kōn wa eo enaaj itaak; enjeļ eo ekar itok n̄an Jon rilolo eo; Visiōn eo an Stephen kōn Jemen im nejin; visiōn eo an Jon kōn raan eo āliktata; im ebar lōn̄. Kajjitok eo ejjab aikuij in “Ewi wāween an Kabun̄ eo an Jisōs Kraist im Armej Rekwojarjar ilo Raan-ko Āliktata maron̄ in m̧ool kōn aer ba lo an enjeļ n̄an er kab visiōn ko?“ Botaab kajjitōk eo ej aikuj in “Ewi wāween an jabdewōt Kabun̄ likūt er Kabun̄ eo an Kraist eļan̄n̄e ejjeļo̧k enjeļ kab visiōn ko—āinwōt an kar waļo̧k ilo Kabun̄ eo an kar Kraist, anwōt an kwaļo̧k ilo laajrak in ekkal in an?”
Elōn̄ leen ko rej jokkin wōt juon ippān Kabun̄ eo m̧okta an Kraist.
Kar kabun̄ in leto letak ko̧jpeļ—Rijilōk ro rekar kakien “kom̧win ilo̧k, im kwaļo̧k n̄an aolepān laļ (Matu 28:19). Rainin ewōr elōn̄ jen 80,000 mijenede ro rej kam̧ool kake im kwaļo̧k leen ko rem̧m̧an.
Ekar juon Kabun̄ ioon laļ in—laajrak in ekkal in ej katakin kōj bwe membōr ro ilo Kabun̄ eo an Kraist m̧okta n̄an kakien er n̄an nuknuk ilo paaktok eo em̧m̧an im jab po ilo pālele waan. Jete kabun̄ ko rejjab kwalok wōt neen mour kake kakien in ak rej bar enwōt mour kake?
Kabun̄ eo an Kraist m̧okta ekar pedped ioon baam̧le. Ļōmaro pālele rekar kakien n̄an iakwe im m̧ool n̄an limaro pāleer (lale Epesōs 5:23–25), ajri ro rekar kakien n̄an pokake ro jineer im jemeer (lale Epesōs 6:1), im bishop ro rekar kakien n̄an tōl em̧m̧an ļo̧k eo an m̧weo imwer make (lale 1 Timote 3:4–5). Rainin Kabun̄ in ad, āinwōt kar Kabun̄ eo an Kraist m̧okta, rej kile ke kabun̄ in pedped ioon baam̧le. Leen ko an Kabun̄ eo an Kraist rej lukkuun waļo̧k ilo baibōļ, im kōn leen ko n̄an leen kein rej jejjet ippān Kabun̄ eo an Kraist em̧ōj an jepļaaktok rainin.
Kraist ekar kajutak Kabun̄ eo An ioon lalin, ak peij eo āliktata ilo laajrak in ekkal in ej kwaļo̧k juon ekkejel ippān lan̄—eo ņae etan, revelesōn ko rekwojarjar. Ilo an nej jako menin ekkejel in an Kabun̄ eo enaaj ejelok oktak jen doulul ko rej kojbwebweik jen unin ko aer make.Rikanaan eo Amos ekar ba, “Emol Irooj Anij ejamin kōm̧m̧ane jabdewōt, ijelokin ne ej kwaļo̧k an enaan n̄an lo rikarejeran rikanaan ro” (Amos 3:7). Paul ekar kwaļo̧k ke revelesōn ej m̧ōttan eo eaorōk tata an Kabun̄ eo im ekar baj bwe en wōnm̧aanļo̧k wōt, bwe ekar make ba: “Inaaj itok nan vision ko im revelesōn ko an Irooj” (2 Korint 12:1; bar laleJerbal 1:2).
Jokkin wot juon ippān katak kein m̧oktata, Kabun̄ eo an Kraist rainin ej ekkejelļo̧k ippān lan̄ kōn revelesōn ko rejjab jem̧ļo̧k. Laajrak in tomak ko an Kabun̄ in menin, āinwōt ad jeļā ej laajrak in tōmak ruatimjuon, ej riit ānwōt in: “Kimij tōmak ilo aolep men ko Anij ear kwaloki mokta, im bar enwot aolep men ko ej kwaloki kio, im kimij tomak bwe enaj bar kwalok elon men ko relap im lap tokjeer nan aelōn̄ in kiin̄ eo an Anij.”
Eļan̄n̄e juon ar itōn keidi laajrak in ekkal an Kabun̄ eo m̧okta an Kraist ippān aolep kabun̄ ilo laļ in rainin, enaaj kar loe meļeļe n̄an meļeļe, doulul n̄an doulul, katakin n̄an katakin, kain̄i n̄an kain̄i, leen n̄an leen, im revelesōn n̄an revelesōn, enaaj jejjet n̄an juon wōt—Kabun̄ eo an Jisōs Kraist im Armej ro Rekwojarjar ilo Raan-ko Āliktata.
Eļan̄n̄e juon enaaj kaarmejjete Kabun̄ in ālkin an katak kōn laajrak in ekkal eo, innām enaaj kaabņōņōik e ilo kabun̄ ko jet kōnke eļap an jeļā. Enaaj āinwōt Piter, eo Rilo̧mo̧o̧r eo ekar kajjitōk ippān, “Kwonaaj bar ilo̧k ke?” (Jon 6:67). Piter eaar uwaak kōn juon uwaak eo ej aikuj in jeje ilo aolep bōro im pād ilo aolep em: “Kom naaj ilo̧k n̄an wōn? Ippām naan ko naan in mour indeeo” (Jon 6:68).
Eļan̄n̄e jabdewōt ej ilo̧k jen Kabun̄ in, ia eo enaaj ilo̧k n̄ane im katak kōn m̧ool eo emōj an jepļaaktok kōn nememein Anij āinwōt an kar kwaļo̧k ilo bukwōn wōjke ko, lukkuun dipieo in Pinmuur eo an Kraist āinwōt an katakin ilo Bok in Mormon, ia eo enaaj ilo̧k bwe kōrā eo im ajri ro ren liāp n̄an e n̄an indeeo? Ia eo enaaj ilo̧k n̄an e eļan̄n̄e ekōņaan kōjeram̧m̧an priesthood eo n̄an kaenōm̧m̧an ak kōmour juon uwaan baam̧le eo? Ia eo enaaj ilo̧k im lo rikanaan an Anij? Enaaj ilo̧k ilo ejjeļo̧k tōprak n̄an katak kein im kain̄i kein im kajoor kein im rikanaan rein, āinwōt aer jej im elōn̄ wōt ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata.
Juon ejjab maron̄ bok katak kein im kain̄i kein kar kōjepļaaktok kōn rikanaan Joseph Smith eļan̄n̄e ejjab tōmak ilo Joseph Smith im bwebwenato eo ej un jen walok kein. Rejjamin jokad jen doon. Rej ilo̧k ippān doon. Kwojjab maron̄ in ba enno leen wojke eo ak enana wojke eo. Rilo̧mo̧o̧r eakr katakin m̧ool in elōn̄ ien ko remootlok: “Wojke emman e ban jebar im e nana leen, barainwot wojke e nana e ban jebar im emman leen” (Matu 7:18). Ekkar n̄an melele in, elane katak in jekar konono kake jotenin emman, innem wojke eo im ej jabar jene—Joseph Smith ippān tok bwebwenato in m̧ool kein rekar waļo̧k—rej bar āinwōt em̧m̧an. Kwojjab maron̄ bok juon jen juon.
Ilo juon iaan kōnono ko ilo juon iaan kweilo̧k eo eļap, B. H. Roberts ekar kōnono kōn tōprak ko an Joseph Smith, innām, ekar kōnono n̄an rijum̧ae ro an Joseph, ekar ba “Keidi, ij ba, ak kōn peim ilo tiōm̧ im jab keroro eļan̄n̄e etan ej waļo̧k.” 7
Menin kabbojrak ko jen etto kab ko jej loi ilubujid me remaron pād ippen jet iaad, lokabokbok ko rej itok jen ekatak ko an science—men kein rej itok nan kopoj kōj, men eo earok iolap in katak ko, kain̄i ko, kajoor oe an priesthood eo, im leen ko jet an kabun, elon iaer emoj ad konono kaki jotenin. Ak jet remaron ba, “Ij tomak aolepen men kein, ak ewi waween ao uwaak nan ro rej jumae im kajjitok ko aer?”
Juon lawyer ejeļā ke n̄e juon Prosecutor ej bōktok rikam̧ool en an eaorōktata, case eo nae defendant eo enaaj wotlo̧k n̄an ijo ekauwatata tata.Juon eo etijmelo̧k ilo ekajet ilo jokjok in emaron̄ ba defendant eo emoj wor ruon kadede, ak innem elon men ko kwojjab tomak kaki rej walok ilo court room eo. Eo ej bōbrae ej kōm̧m̧ane etale eo ippen ejja rikam̧ool in wōt, innām men kein tok alik rej waļo̧k: Uwaak ko an ribōbrae eo nan rikamool eo rej jino makunlok iumwin ien ko reppen in etale eo an. Rikamool eo ekar jade in bōktok jemļo̧k eo kio ewor jet men rejjab jokkin wot juon bōtaab eļapļo̧k an ettal ilo an kwalok makutkut ko an. Bwebwenato in me en kar pen an rikamool in ej jino kōk im wotlok kon kajjitōk kein rekaal rej iok lok e. Rikammol eo ekar emman an madmod e kajjitok ko repidodo an ribōbrae eo ak ke ekar itok kajjitōk ko reppen, ejjab maron̄ in jutak nai men kein ak jelmae ilo dipieo i er. Ke etale eo aliktata ej dedelok rikamool eo emoj an kakkure pojak eo. Ro rej etale rekar pojak in kōm̧m̧an jemlok ak kiō ribōbrae eo ej lo juon ej kio oktak im emman nan e im leo ej kio ejelok ruon.
Ejja anwōt in, jet jumae rej letok juon kajjitok nae Kabun̄ in im ikdelel in likut Kabun̄ in ilo jokjok eo enana tata. Ak kajjitok kein rej ilok ippān doon .8 Rikam̧ool eo an rikinaakļo̧k eo rejjab maron jutak nae kajjitok in etale kein, im bar āinwōt rijumae ro an Kabun̄ in. Ijjanin lo juon rijumae eo enaaj letok n̄an eo juon uwaak enaaj po lomen kōn kajjitok in etale an kajjitok ko lal rej ellaajrak:
Mokta, ewi wāween an Joseph Smith jeļā n̄an kōjeplaaktok katak ko im kain̄i ko ilo Baibōļ, anwōt katak eo kōn mour eo mokta, lukkuun piktokin Anij, kojpel eo ej kwalok nan ro remej, peptaij ko ro remej, im ebar lōn̄ kar kōnono kaki jotenin, eļan̄n̄e katak kein im kain̄i kein rekar jab kwalok jen kabun ko jet ilo tore eo an? Etke Joseph wot ekar loi im kojeplaaki tok? Jekdoon ne rekar likut e rimeletlet lo katak kōn baibōļ, ekar bar ejelok rimeletlet ilo 1,800 iio ko alkin kar iien kwaļo̧k ko an Kraist wōn ekar maron̄ bar āinwōt?
Kein karuo, eļan̄n̄e Kabun̄ in ejjab Kabun̄ eo an Kraist, innām etke Kabun̄ in ewōr ippān leen ko āinwōt kar ilo Kabun̄ eo an Kraist, āinwōt, menin bwilōn̄ ko im menin letok ko an jetōb, madenlok ko raan kein jen rijilok ro kab rikanaan ro, angel ro kab visiōn ko, armej ro rejmour, armej ro rorreo, armej ro rej kōm̧m̧ane jerbal in mijinede ko aer, im armej ro rej lukkuun tōmak ilo baam̧le? Rilo̧mo̧o̧r eo ekar jab make ba “jen le ko leer kom maron jeļā kajjer” (Matu 7:20).
Ilo m̧ool, elōn̄ bar kajjitok ko nan kajjitok in etale emaron kajjitok. Elon jet kajjitok ko, mekarta, rellap im tar jen jonan—ilo aorok in rej boktok lokapokpok nan men kien. Bwe en melele, jet kajjitok relukkuun iddik im aorok jen jet ilo ad loe m̧ool eo. Eļan̄n̄e kwonaaj itok nan am jela ke Joseph Smith emoj an kojeplaaktok katak ko ilo baibol eo im kain̄i ko ba kaki lak ilon, elane kwonaaj itok nan am jela ke kabun eo an Jisōs Kraist im armej ro rkwojarjar ilo raan kein ebar ejja leen ko wot an kabun eo an Kraist mokta, ak elane kwoj itok nan am jela ke Bok in Mormon eo ej lukkuun jerbal ekwojarjar, innem kwojela ke Joseph Smith ej rikanaan. Im elane Joseph Smith ekar rikanaan, innem enin ej Kabun̄ eo emake wot im m̧ool im ej mour rainin imejen aolepān lalin—aolepen kajjitok kein jet rej atōrtōr wōt n̄an keidi. Enwōt ne Supreme Court eo ej kojbwebweik juon ien lowaan court. Ilo jokjok in, aolep jemlok ko an court ko ļo̧k lal rej ekkeijol wot ippen, aolep kajjitok an rijumae eo, ilo jabdwot wāween pukot m̧ool ak kakobaba ak kalimomo rej maron, rejjab men ko raorōk ilo jerbale m̧ool eo. Etke? Kōnke emōj am uwaak e kajjitok-ko relukkuun pen- eaorok ko im rej joor ko raoroktata n̄an jeļā kōn m̧ool eo.
Bwe en lukkuun melele, imaron mour kon jet likjab an armej, jonan ilubujin rikanaan ro an Anij— menin ej jela emaron walok ilo mour in kanniōk in. Imaron̄ mour kon jet melele ko rej jet ekatak ko im rejjab jejjot ippān Bok in Mormon eo; iien enaaj kajimwe men kein. Im imaron mour kon jet bwebwenato ko jejjab kōtmani renaaj kar walok; rejjab men dikdik n̄an aneo m̧ool. Ak ijjab maron mour kon m̧ool in katak ko im kain̄i ko kojeplaaktok jen Joseph Smith, ijjab maron mour kon ejelok Priesthood an Anij nan kojeramman baam̧le eo aō, ijjab maron mour ilo ao jab jela ne kora eo ippa im ajri ro neju rej liāp n̄an n̄a indeeo. En̄in ej kelet eo jej jelmae—jet kajjitok ko rejjanin uwaak ilo juon nae bōnjen m̧ool in katak im kajoor an Anij ilo eo juon. Im n̄an n̄a, im ij kōjatdikdik kōn kom̧, kelet eo ej juon eo epidodo im jokne.
Ij kwaļo̧k aō kam̧ool ke Kabun̄ eo kwonaaj juon ien tol e epād etan Kraist ie kōnke epād mālim eo an doulul eo. Katak ko an, Kain̄i ko an, kajoor ko an, leen ko an, im revelesōn ko an rejjab jemļo̧k, aolepān men kein rej pad ilo laajrak in ekkal eo An. Jen lolokijen ilo jetōb n̄an lo toprak kein kotaan laajrak in ekkal in im Kabun̄ eo an Kraist emoj an jeplaaktok rainin, bwe ej Juon Anij eo im ej letok kam̧ool nan koj. Kon menin ij lukkuun kwaļo̧k aō kam̧ool im jar ilo etan Jisos Kraist Amen.
© 2014 jen Intellectual Reserve, Inc. Aolep Jim̧we rej pād Ippān. Kōmālim ilo Kajin English: 9/13. Kōmālim an ukook: 9/13. Ukook eo an What Is the Blueprint of Christ’s Church? Marshallese. PD50051805 874