Ukōtļo̧k Būrwōd n̄an Ainikien eo an Jetōb
Linda K. Burton
Būreejtōn eo Eutiej an Doulul eo an Kōrā ro
Nokon eo an CES n̄an Rūm̧m̧an Ded ro • M̧aaj 2, 2014 • Brigham Young University–Idaho
Ej juon jeram̧m̧an bwe imaron̄ pād ippāmi ilo nokon in. Iaar jar bwe Irooj enaaj kōjeram̧m̧an kom̧ n̄an ron̄jake jet men ko renaaj jipan̄ kōļapļo̧k ami maron̄ kile ainikien eo an Jetōb. Emōj ami kadede kar bōk juon ennaan kom̧ kar en̄jake kar n̄an kom̧ ilo al eo eaiboojoj jaar ron̄jake.
Enan̄in 41 iiō rem̧ootļo̧k, iaar m̧akoko in etal n̄an juon nokon an rūm̧m̧an ded ro eo eaar kōm̧m̧an ilo Temple Square. Ļan̄in sno in eļap kōm̧ ar ioone jotenin nokon eo eaar idajon̄jon̄e tōmak eo aō. Ak kōnke kar kajjitōk ippa n̄an bōk koņaaō ilo juon wāween, iaar etal n̄an kakūrm̧ool eddo eo aō. Iaar katak ium̧win iiō ko menin Būreejtōn Eyring eaar kwaļo̧k im em̧ool: “Kwoban maron̄ bōk juon pilawe n̄e kwaar jab leļo̧k juon ļoob.”1 Ļeo pāleeō em̧m̧an ej “ļoob” eo iaar bōke n̄an “pilawe” eo kijō jen aō kar bōk koņaaō! Iaar ioon e ilo kar nokon eo. Eaar al ilo kuwaer eo im kar itok im kwaļo̧k kadkadin n̄an n̄a jem̧ļo̧kin kweilo̧k eo. Ewi jon̄an kam̧oolol in aō kōn eddo in iaar en̄jake n̄an etal joten eo im bwe Jemedwōj Ilan̄ eo etiriam̧o eaar bōk jerbal in m̧akoko in aō n̄an pād ijo ij aikuj in kar pād ie.
Ij kam̧oolol bwe jet iaan ajri ro jibum̧ im leddik eo jibūm̧ erūtto tata epād ijin ippād jotenin. McKaela ej kōjan̄jan̄ viola. Eaar jino kūlaaj in viola ko ke ej 3 iiō dettan, im kiiō, ej 16 iiō, ej juon rikōjan̄jan̄ eo etōļan. Im imaron̄ ba bwe kōnke ij jibūn, im jibūn ej jab riab! Eaar menin itok limo n̄an alooje an eddōkļo̧k bun̄tōn ņae bun̄tōn, katak n̄an kōjerbale kein kōjan̄jan̄ in wōt an n̄an kōjeram̧m̧an jab mour eo an ak barāinwōt mour ko elōn̄ ro jet. Eaar katak wāween ukōtļo̧k kein kōjan̄jan̄ eo an, aorōk in tiljek ekkatak aolep iien, im lan̄lōn̄ eo jān ikkure im kobaik kein kōjan̄jan̄ eo an ippān ro jet.
Ke iaar jerbale juon mijen ippān ļeo ippa jejjo iiō ko, iaar katak n̄an riit kōkkaļļe ko im ba ainikien ko ilo alphabet ko ilo Korea. Iaar katak jen naan in iakiakwe ko repidodo, ruo naan ko, im jet naan in ko̧jpeļ ko, im imaron̄ kwaļo̧k eļan̄n̄e ej kajin Korea jen Kajin ko jet. iaar kakilōkōk jet al ko rem̧m̧an ippa im al ko an Būraimere ilo Korea. Ak eaar lukkuun jabwe ilo aō maron̄ n̄an kōnono ak meļeļe aolepān kajin in eaiboojoj.
Etke ij kwaļo̧k waanjon̄ak kein rāinjuon ippāmi? Kōnke jotenin ikōņaan bwe jen kōnono kōn ekkatak kajin eo an Jetōb eo—ewi wāween Ej kōnono n̄an kōj. Āinwōt katak juon kein kōjan̄jan̄ ak juon kajin ej juon wāween jerbal, katak kajin eo an Jetōb ej barāinwōt juon wāween jerbal, juon men ej lukkuun aorōk n̄an kōj n̄an katak, men̄e jej ro rej kab peptaij ak jej membōr ro eto aer membōr in Kabun̄ in.
Rilo̧mo̧o̧r eo eaar katakin ilo Bok in Mormon eo bwe Rileman ro “kar baptais kōn kijeek im kōn Jetōb Kwojarjar, im rej jab jeļā kake.”2Ej kōņaan eo aō em̧wilaļ bwe jenaaj kōļapļo̧k ilo ad maron̄ n̄an ron̄jake im meļeļe im̧we ko an Jetōb eo im m̧akūtkūt ioon im̧we ko bwe jen būki jān Jetōb Kwojarjar eo. Bwe jen maron̄ kōm̧m̧ane menin, jej aikuj m̧okta katak n̄an kile ainikien eo An.
Jen bōke juon minit n̄an etale en̄jake eo ad. Kiiō, kōnke jarlepju eo ad ijin ekilep im jej barāinwōt koba ippān rūm̧m̧an ded aolepān laļ in, ikōņaan karuwaineneik eok n̄an kōm̧m̧ane juon men. Jab kwaļo̧k lukkuun būruwōm̧, komaron̄ ke kwaļo̧k jet iaan en̄jake ko n̄an ļoor kajjitōk ko ippān doon ilo Twitter? N̄e ewōr am̧ iien, “tweet” uwaak eo am̧ n̄an #cesdevo.
En̄in kajjitōk eo am̧. Ewi wāween ad jeļā eļan̄n̄e jaar ron̄jake ainikien eo an Jetōb?
Jemaron̄ kajjitikin kōj make jejjo bar kajjitōk ilo ad kejōkļo̧kjeņ kōn uwaak in:
-
Emōj ke aō ioon en̄jake ko kōn iakwe, lan̄lōn̄, aenōm̧m̧an, kijenmej, meanwōr, ļojokmen, tōmak, kōjatdikdik, im kainōm̧m̧an?
-
Emōj ke an itok ļōmņak ko n̄an koļmenļo̧kjeņ eo aō, ak en̄jake ko n̄an būruwō, ko ijeļā rej jān Irooj im rej jab jān n̄a?
-
Emōj ke aō ron̄ ainikieō ej kōnono m̧ool ilo kar jab karōk ta eo in kar ba?
-
Emōj ke aō en̄jake juon ļapļo̧k in kapāāl ko aō make im aō maron̄?
-
Emōj ke aō kar en̄jake tōl im kōjparok jān naan riab?
-
Emōj ke aō kile jerawiwi ilo mour eo aō im kar kile ikdelel n̄an kajim̧we?
-
Emōj ke aō kar en̄jake Jetōb ej kaiboojoj im kwaļo̧k kōn Anij Jemān im Jisōs Kraist?3
Eļan̄n̄e kwoj uwaak “aaet” n̄an aolep kajjitōk kein, kwaar en̄jake Jetōb an Irooj ilo jet iien ilo mour eo am̧. Ak kajjitōk eo elukkuun aorōk jotenin ej “Kom̧ maron̄ ke en̄jake kiiō?”4
Rikanaan Mormon eaar kapilōk kōn Meram in Kraist emaron̄ jipan̄ kōj jeļā wāween n̄an bōk Jetōb Kwojarjar eo. Mormon eaar ba:
“Bwe lo, Jetōn in Kraist em̧ōj leļo̧k e n̄an aolep armej, bwe en maron̄ jeļā em̧m̧an jān nana; kōn menin, ij kwaļo̧k wāween eo n̄an ekajet; bwe men otemjejļo̧k ej karuwainene n̄an kōm̧m̧an em̧m̧an, im n̄an kareel n̄an tōmak ilo Kraist, kar jilkinļo̧k e jān kajoor eo im men in leļo̧k eo an Kraist; kōn menin kom̧ maron̄ jeļā kōn juon jeļāļo̧kjeņ eweppān e ej jān Anij.
“A jabdewōt men ej kareel armej n̄an kōm̧m̧an nana, im jab tōmak ilo Kraist, im karmejete E, im jab jerbal n̄an Anij, innām kom̧ naaj jeļā kōn juon jeļāļo̧kjeņ eweppān men in ej jān devil; bwe iļo̧kan wāween in devil ej kōm̧m̧an jerbal enana, bwe e ej kareel ejjeļo̧k armej n̄an kōm̧m̧an em̧m̧an, jaab, jab juon, jaab enjeļ ro an, im jar er ro raar wūjlepeļo̧k er n̄an E.”5
Būreejtōn Gordon B. Hinckley eaar ba: “Mālijjon̄ eo ņe, n̄e aolep men ej ba im kōm̧m̧ane. Ej ke kareel juon n̄an kōm̧m̧an em̧m̧an, n̄an jutak, n̄an jutak peran, n̄an kōm̧m̧ane men eo ejim̧we, n̄an jouj, n̄an meanwōd? Innām ej jen Jetōb an Anij.”6
Etke epen kile unoojdikdik ko an Jetōb? Juon un bōlen ej bwe Jetōb ej kōnono jim̧or n̄an koļmenļo̧kjeņ ko ad im n̄an būruwōd. Ilo katak kajin eo an Jetōb, jet iien jej tarpok kōn ļōmņak ko ad make im en̄jake ko ad makeippān im̧we ko an Jetōb. Bar juon un ej bwe kile Jetōb ej juon menin letok an Jetōb. Āinwōt katak juon kajin ej pidodo n̄an jet im pen n̄an ro jet, barāinwōt n̄an maron̄ meļeļe unoojdikdik ko an Jetōb. Ekkā an waļo̧k, katak juon kein kōjan̄jan̄ ak kajin ebōk juon kijejeto eļap, ekoba kamminene im jet iien kōm̧m̧an bōd ko. Barāinwōt ilo katak kajin eo an Jetōb.
Enaaj ke jipan̄ eok n̄an jeļā bwe revelesōn an juon make ej ļain im bar ļain, katak im bar katak wāween jerbal in aaet barāinwōt rikanaan ro, rilolo ro, im rikwaļo̧k revelesōn ro raar aikuj katak n̄an meļeļe? Laajrak in ej juon waanjon̄ak jān mour eo an Elder Jeffrey R. Holland.
“Ewōr iien ko n̄e wāween eo de eo n̄an etal jān A n̄an C ej jen wāween eo an B.
“Kar rūttoļo̧k ilo tuiiōn̄ in Utah im lan̄lōn̄ kōn aolep kabwilōn̄lōn̄ ko im aiboojoj ko an tuiiōn̄ in Utah im turear in Arizona, ikōņaan in kwaļo̧k kadkadin ļaddik eo nejū n̄an menin im ikōņaan in kwaļo̧k n̄an e jikin ko iaar loi im lan̄lōn̄ kaki ke iaar jon̄an wōt e. Innām, jinen ekar kitim jidik kōrālep n̄an kōm̧ im kōm̧ ar bōk pākaab eo waan jim̧aan im ettōrļo̧k n̄an tuiiōn̄ ilo ijo jej ņaetan Arizona Strip eo etto.
“Al enaaj tulo̧k ejjab etto kōm̧ ar pepe bwe kōmij aikuj bar ro̧o̧l tok. Kōm̧ ar ro̧o̧ltok ioon juon jikin ej kōjpel ruo jikin ko ilo iaļ eo, jikin eo wōt ej kallikar iaļ eo eaar jab lukkuun alikkar. Iaar kajjitōk ippān ļaddik eo nejū n̄an jar lale ewi wōt iaļ eo n̄an bōke im eaar en̄jake bwe kōm̧ij aikuj etal ilo iaļ eo ituanbwij maron̄, im iaar ļoor e barāinwōt. Im kōm̧ ar etal ilo tuanbwij maron̄ im, iaļ eo eaar ejjeļo̧k jem̧ļo̧kin. Kōm̧ ar etal wōt emān ak ļalem ak jijino būkwi yard ko im eaar ejjeļo̧k jem̧ļo̧kin, lukkuun alikkar bwe iaļ eo ebōd.
“Oktak, bar ro̧o̧l ļo̧k, bōk iaļ eo juon. Im kar alikkar iaļ eo tuanmiin̄ eaar iaļ eo ejim̧we.
“Ilo iaļ eo am̧ ļo̧k, Matt eaar ba, ‘Baba, etke jej en̄jake, ālkin ad jar kake, bwe iaļ eo ejim̧we eaar eo ejejjet n̄an bōke, eo ejim̧we n̄an bōke, im ekar bōd?” Im iaar uwaak, “Ij ļōmņak bwe Irooj, Ekōņaan bwe jen pād ijeņ im uwaak eo An n̄an jar eo ad kar n̄an bōk kōj ilo iaļ eo ejim̧we jon̄an wōt maron̄ kōn jet men ko rej kapene, ippān jet meļeļe ko bwe kōm̧ ar pād ilo iaļ eo ejim̧we im kōm̧ ar jab aikuj inepata kake. Ilo wāween in, iaļ eo ejim̧we n̄an bōke eaar kōm̧m̧an am̧ etal 400 yard ko ak 500 yard ko ilo iaļ eo ebōd im kōm̧ ar m̧ōkaj im jeļā ilo ejjeļo̧k pere bwe ekar bōd iaļ eo im kōn menin, kōn juon wōt meļeļe, kōn juon kam̧ool bwe eo juon ekar iaļ eo ejim̧we.'
“Eaar wōr aō jeļāļo̧kjeņ em̧ool, jeļāļo̧kjeņ ewāppen bwe Anij ej iakwe kōj. E em̧m̧an. Ej Jemād im Ej kōtmāne bwe jen jar im leke im tōmak im jab ebbeer im mijak im jab etal jen im jab keļo̧k n̄e juon men ej etal ilo jim̧we. Jen pād wōt ie, jen jerbal wōt, jen dāpij tōmak eo, leke wōt, ļoor ejja iaļ eo wōt im jenaaj mour pād ilubwiden Pein im en̄jake An iakwe im ron̄jake An ba, “Ij jiron̄ eok enaaj em̧m̧an, iaar ba enaaj em̧m̧an.’”7
Ejjab em̧m̧an ke? Ewōr aō juon en̄jake ejja en̄jake in an Elder Holland ke iaar kōbpopo n̄an kōnono jotenin. Iaar jino ilo juon iaļ, kappukōt im jeje ļōmņak ko kōn juon unin kōnono kom̧ kake, kar en̄jake aō jar errā kake. Iaar en̄jake bwe ebar wōr juon men ij aikuj kōnono kake. Innām iaar keememej juon en̄jake iaar ione ruo iiō ko rem̧ootļo̧k. Ke iaar jino kūr n̄an jerbal āinwōt juon būreejtōn eļap an Doulul eo an Kōrā ro, eaar jab bwe aō kiki ilo jet bon̄. Ilo juon ian bon̄ ko rellōn̄, ļōmņak ko raar ibebtok n̄an ļōmņak eo aō im make kar koņ tok iburwō. Iaar jei innām kakkoņi, jab bar keememeji m̧ae iien jet wiik rem̧ootļo̧k, abņōņō kein kōn unin kōnono eo kein kajuon eaar jino kainebata eō. Jemedwōj Ilan̄ eaar kōm̧m̧an bwe etal lo iaļ eo juon ium̧win jet iien, ak Eaar bar kōro̧o̧l eō n̄an iaļ in jen juon en̄jake em̧m̧an ilo būruwō im juon kakeememej ilo ļōmņak eo aō jen menin letok eo an Jetōb Kwojarjar.
Ta jemaron̄ kōm̧m̧ane em̧m̧anļo̧k oktakļo̧k n̄an ainikien eo an Jetōb? Jemaron̄ jino jen kile bwe Jemād ilo Lan̄ ekōņaan in kōnono ippād. Jejeļā menin kōnke aolep rikaan ro raan kein raar katakin katak ko kōn revelesōn an juon make. Ļōmņak kōn elōn̄ kōjeram̧m̧an ko jet Irooj eaar litok n̄an kōj bwe jen maron̄ kōnono Ippān im bōk naan ko An: jeje ko rekwojarjar, kōjeram̧m̧an ko an petriak, jar ko, kain̄i ko, ritōl ro reim̧we im ro jinen im jemān, im menin letok eo an Jetōb Kwojarjar.
Ia eo jej jino ie ilo kajjitōk eo ad n̄an kepaakļo̧k Anij im n̄an ron̄jake ainikien An kōnono n̄an kōj? Jej jino ippān ko repidodo. Jej kōm̧m̧ane men ko reddik im ļawaan ko rej kōmeļeļeik bwe E ej jinoin mour ko ad im bwe jekōņaan bōk revelesōn jān E. Ke iaar loļo̧k West Africa, iaar katak juon naan em̧m̧an ippa eo ej jerbal n̄an wāween an juon make bōk revelesōn: “Jab ium̧, jidik kōn jidik.” Ta jet iaan men kein “Jab ium̧, jidik kōn jidik” men ko jemaron̄ kōm̧m̧ane?
Nōm̧ba 1: M̧ool im ettā ilo jar.
Būruwōn jinō eaar m̧weiur ium̧win iiō ke iaar lale an ajri ro nejū make im ro jibū kōjerbal tōmak jen kajjitōk ilo ettā im jar em̧ool n̄an jipan̄ eo an Irooj kōn jorrāān ko aer reļam̧ waan. Juon ememļo̧kjeņ ilo baam̧le eo am̧ ej kōmeļeļeik menin.
Ļaddik in nejūm̧ ej ajri ro erūtto tata ilo baam̧le eo am̧. Ewōr ļalem jatin leddik ro im ejjeļo̧k jein ak jatin ļaddik. M̧okta jen an ļotak leddik eo nejūm̧ kein kajilu, ļeo pāleeō eaar kalim̧m̧uri ļaddik eo nejūm̧ kōn juon nejin kidu eļan̄n̄e nin̄nin̄ in enaaj bar juon leddik. Ke leddik in nejūm̧ eaar ļotak, ļeen pāleeō em̧m̧an eaar kōjparok kalim̧m̧ur eo an. Kidu eo eaar erom eo jeran ļaddik eo nejūm̧. Elukkuun iakwe kidu in. Ak juon raan, kidu eo eaar jako. Kōm̧ ar pukōte im pukōte, ak eaar ejjeļo̧k mirokōn. Kōm̧ ar kūrļo̧k opiija eo ej lale menin mour. Im eaar jab letok n̄an kōm̧ eļap kōjatdikdik, kōnke kōm̧ ar jokwe epaake ļo̧k freeway eo. Opiija eo eaar en̄jake an bwe iien am̧ kar pukōte kōn menin eaar wōr juon kōjatdikdik em̧m̧an bwe kidu eo emaron̄ kar etal n̄an freeway eo im juon wa eaar maron̄ kar dibbōje.
Kōm̧ ar pukōt kilen kainōm̧m̧an ļaddik eo nejūm̧ ke kōm̧ ar kwaļo̧k ta eo kōm̧ ar ron̄, ak eaar lukkuun nana tammin. Ij keememej aō kajjitōk ippān n̄an jar n̄an Jemedwōj Ilan̄ kōn kainōm̧m̧an. Ļaddik in nejūm̧ ejitōn bōro eaar reitok kōn mejān im ba, “Emōj aō jar im bar jar, M̧am̧a.”
Jejjo raan eļļā ļo̧k. Juon jibbon̄ eaar wōr juon kōļļaļļaļ ilo kōjem eo am. Juon iaan ajri ro eaar uwaake kōjam̧ eo im kar ettōr tok im pukōt eō. Iaar inepata ke ij kile juon wa ej baak iturin iaļ eo ej eddāp naan kein “Animal Control” ej jeje ikiin wa eo. Em̧m̧aan eo ilo wa eo eaar reitok n̄an n̄a im ba, “Mrs. Burton, ij ļōmņak ewōr juon men ilo wa eo waaō ej an ļaddik eo nejūm̧.”
Būruwō eaar peļļo̧k. Ij keememej aō inepata n̄e eaar bōke kidu eo nejūm̧ im kidu eo emaron̄ mej ak elukkuun jorrāān. N̄an m̧ōņōņō eo aō eļap, tulikin wa eo eaar kidu eo nejūm̧—emour, em̧m̧an an pād, im epojak in diwōj jen wa eo im itok n̄an pein ļaddik eo nejūm̧ eddik.
Iaar kajjitōk ippān opiija eo ej lale menin mour ijo eaar loe kidu eo nejūm̧ ie. Eaar ba: “Juon men ekabwilōn̄lōn̄ eaar waļo̧k jibbon̄ in ke iaar em̧m̧akūt jen m̧weo. Ijeņ, inamōj in m̧weo imō, juon kidu eo ejejjet n̄an meļeļe ko kwaar letok n̄an eō ke jej kōnono ilo taļboon. Kidu eo eaar uwaak ke ij kūr etan. Kōn menin iaar ļōmņak in bōktok n̄an m̧iin imōn im jipan̄ ļaddik eo nejūm̧ jab inepata m̧okta jen an etal im jikuuļ.”
Ijeļā bwe Irooj ej uwaake jar ko rem̧ool, remera, an ajri. Jemedwōj Ilan̄ ekōņaanbwe ajri ro ren jeļā bwe Ej pād ijeņ ilo jinoin mour ko aer bwe ren wōnm̧aanļo̧k im leke ilo E ilo aer eddōkļo̧k n̄an kekemo̧o̧j. Kōnke ajri ro rej obrak kōn ettā bōro, rej ekkar n̄an bōk kalim̧m̧ur eo an Jemedwōj Ilan̄ āinwōt letok ilo Doctrine and Covenants: eļan̄n̄e jej ettā bōro; Enaaj tōlļo̧k kōj kōn Pein im letok n̄an kōj uwaak n̄an jar ko ad.8
Ilo aō kwaļo̧k laajrak in kajjitōk kein Būreejtōn Spencer W. Kimball eaar kajjitōk n̄an juon kumi ejjeļo̧k āinwōt in, ļōmņak kōn am̧ mak ettā bōro im m̧ool jar ko am̧ make. Einwōt in, Kout: “Kwoj kōņaan ke tōl? Emōj ke am̧ jar n̄an Irooj kōn im̧we? Kokōņaan ke kōm̧m̧ane men eo ejim̧we ak kokōņaan ke kōm̧m̧ane ta eo kokōņaan mekarta ejim̧we ak jaab? Kokōņaan ke kōm̧m̧ane ta eo em̧m̧an n̄an kwe ilo juon iien aitok ak ta eo eļapļo̧k an kareel eok ilo tōre in? Emōj ke am jar? Ewi jon̄an am̧ jar? Ewi wāween am̧ jar? Emōj ke am̧ jar āinwōt Rilo̧mo̧o̧r eo eaar kōm̧m̧ane … ak kwaar ke kajjitōk kōn ta eo kokōņaan mekarta ej jejjet?”
Būreejtōn Kimball eaar wōnm̧aanļo̧k. “Kwoj ke ba ilo jar eo am̧: ‘Ankilaam̧ enaaj dedeļo̧k’? Kwoj ke ba, ‘Jemedwōj Ilan̄, eļan̄n̄e kwonaaj im̧we eō im kabwilōn̄ eō kōn men eo ejim̧we, inaaj kōm̧m̧ane men eo ejim̧we? Ak, kwaar ke jar, ‘Jemād ilo Lan̄, ij iakwe eok, ij tōmak ilo Kwe, ijeļā Kwoj māletlet. Ij m̧ool. Ij m̧ool im kōņaan kōm̧m̧ane men eo ejim̧we. Ijeļā Komaron̄ loe jem̧ļo̧kin jān jinoin. Kwoj loe ilju im jekļaj. Kwoj maron̄ kile eļan̄n̄e ium̧win jekjek in ij kwaļo̧ke, inaaj bōk aenōm̧m̧an ak pok, lem̧ōņōņō ak būromōj, jeram̧m̧an ak jerata. Jiron̄ eō, jouj, Jemedwōj Ilan̄ eo eakwe, im ij kalim̧m̧ur n̄an kōm̧m̧ane ta eo kwoj jiron̄ eō n̄an kōm̧m̧ane.’ Emōj ke am̧ jar ilo wāween in? Kwoj ļōmņak ej ke juon men emāletlet? Kwoperan ke n̄an am̧ jar kain jar in?”9
Juon wāween n̄an m̧ool ilo jar ej n̄an katak n̄an ļōmņak kōn kajjitōk ko rem̧ool im bun̄ bōro kaki im ettā im būki n̄an Irooj. Ļōmņak kōn kajjitōk kein an Joseph Smith: “Ta eo eaikuj dedeļo̧k? Won iaan bade kein rejim̧we; ak, rej ke aolep bōd ippān doon? Eļan̄n̄e juon iaer ejim̧we, ewi wōt in, im ewi wāween an jeļā?”10Kōn māletlet, eaar ālōkļo̧k n̄an jeje ko rekwojarjar, juon iaan m̧ool ko rekwojarjar, eo eaar kōm̧m̧an an kejōkļo̧kjeņ im kōm̧m̧an bwe en kajjitōk ippān Anij:”11 tōmak bwe jar eo an enaaj uwaak.
N̄an m̧ool ilo jar ej meļeļein jej karōk n̄an m̧akūtkūt ekkar n̄an uwaak eo jej bōke. Jen jar eo em̧ool ilo Bukwin Wōjke eo, Joseph eaar kōmeļeļeiki bwe kōttōpar eo an n̄an kajjitōk ippān Irooj ekar n̄an jeļā ewi wōt iaan kabun̄ ko rejim̧we, bwe en maron̄ jeļā ewi eo n̄an kobaļo̧k ie.12 Elukkuun in alikkar bwe Joseph eaar karōk n̄an m̧akūtkūt ekkar n̄an jabdewōt men Irooj eaar kālet n̄an kwaļo̧k n̄an e. Kōn menin, m̧okta jen an kar kajjitōk kajjitōk eo an epidodo, eaar bōk eļap jān jon̄an eo eaar kōjatdikdik kake. Kar leļo̧k n̄an e jeram̧m̧an eo ekabwilōn̄lōn̄ n̄an lo Jemād ilo Lan̄ im Nejin Jitōn Bōro, Jisōs Kraist! Ij lan̄lōn̄ ilo uwaak in eaiboojoj n̄an juon im m̧ool n̄an jeļāļo̧kjeņ eo jen rikanaan eo, Joseph Smith!
Nōm̧ba 2: M̧akūtkūt eo Eium̧ kōn im̧we ko an jetōb.
Juon waļo̧k eļap jān mour eo an rikanaan eo ad ejitōn bōro, Būreejtōn Thomas S. Monson, ej kōmeļeļeik aorōk eo kōn uwaak eo eium̧ n̄an im̧we ko jān Jetōb.
“[Rikōnono:] Ilo an Bisop Monson kekemo̧o̧j ilo eddo ko an, eaar katak elōn̄ katak ko, ilubwilijier ej aorōk eo n̄an ļoor Jetōb eo im leke ilo Irooj.
“Juon bon̄ ilo juon kweilo̧k an ritōl an priesthood ilo stake eo, eaar wōr juon an im̧we bwe ej aikuj em̧m̧akūt jen kweilo̧k eo iien eo emōkajtata im kattōr ļo̧k n̄an veteran aujpitōl eo ilo jekjen eo epād tuiiōn̄ turear in Salt Lake City. M̧okta jen an ro̧o̧l bon̄ōn eo, kar kūrtok e ilo taļboon ba n̄ane bwe juon membōr erūtto ilo ward eo an eaar nan̄inmej im emōj kadeļo̧n̄e ilo aujipitōļ eo n̄an taktōki. Bisop in emaron̄ ke, armej eo eaar kajjitōk, loe juon iien n̄an etal n̄an aujipitōļ im leļo̧k juon kōjeram̧m̧an? Bisop in eboub eaar kōmeļeļeiki bwe ej etal wōt ilo iaļ eo an n̄an kweilo̧k eo ak enaaj etal n̄an aujipitōļ eo n̄e emōj. Kiiō im̧we eo eaar kajoorļo̧k jen m̧okta: “Etal jen kweilo̧k eo im jibadekļo̧k aujipitōļ eo juon wōt kōttan.”
“Bisop Monson eaar reilo̧k n̄an pulpit eo. Stake būreejtōn eo eaar kōnono! Eaar jab maron̄ loe bwe emaron̄ jutak ioļapļap in kōnono eo an im kōm̧m̧an iaļen an etal aolep row eo ibūļōn em̧m̧aan ro. Men̄e ekkabōņōņōiki, eaar kōttar m̧ae iien jem̧ļo̧kin ennaan eo an stake būreejtōn eo innām etetal kakairur n̄an kōjem eo m̧okta jen aer kar kōjjeļāik jar in ikkilōk eo. Ettōr ilo aolep ettōņaak eo eaitok ilo piļoor emān ilo aujipitōļ eo, bisop in edik eaar loe juon ibeb in armej inamōj in ruum̧ eo kar kwaļo̧ke.
“Juon nōōj eaar kabōjrake im ba, ‘Kwoj ke Bisop Monson?’
“Aaet,” eaar uwaak.
“Joļo̧k aō bōd,” eaar ba. “Rinan̄inmej eo eaar kūr etam̧ m̧okta jen an kar mej.”
“Kajjieon̄ in jab jan̄, Bisop Monson eaar bar ro̧o̧l bon̄ōn eo. Eaar kalim̧m̧ur ilo iien eo bwe ej jamin likjab n̄an m̧akūtkūt ekkar n̄an juon im̧we jān Irooj. Enaaj mōkaj ļoor im̧we ko an Jetōb eo jabdewōt jikin ej tōl ļo̧k e ļo̧k.”
“[Elder Jeffrey R. Holland:] Ejjeļo̧k juon emaron̄ meļeļe Būreejtōn Thomas S. Monson eo ej jab meļeļe an emakijkij, ālij in kain im̧we kein ilo jetōb ilo mour eo an im an m̧ool ilo uwaaki.”13
Nōm̧ba 3: Pukōt jeje ko rekwojarjar aolep iien.
Elder Robert D. Hales eaar katakin: “N̄e jekōņaan kōnono n̄an Anij jej jar. Im n̄e jekōņaan bwe En kōnono n̄an kōj, jej pukōt jeje ko rekwojarjar; bwe naan ko An rej kōnono jen rikanaan ro An.”14
Ke eaar 20 iiō rūttoō, iaar en̄taan kōn juon jokālet epen im kar jab maron̄ in bōk juon uwaak n̄an jar ko aō. Juon bon̄, jema eaar rumij an ro̧o̧ltok jān juon kweilo̧k an Kabun̄ in im kar kile bwe ruum̧ eo aō eaar ebbōļ. Eaar jijet m̧aan peet eo aō im kajjitōk n̄e emaron̄ kar jipan̄, en̄jake aō en̄taan. Iaar kwaļo̧k būruwō n̄an e. Eaar ba bwe in ālekļo̧k n̄an jeje ko rekwojarjar n̄an tōl jokālet eo aō, letok jejjo eoon ko me imaron̄ kejōkļo̧kjeņ im jar kaki. Iaar ļoor kapilōk eo an eim̧we im pukōt jeje ko rekwojarjar. Ālkin jet iien im kar wōnm̧aanļo̧k ilo kijejeto eo em̧ool, iaar jeram̧m̧an kōn juon uwaak ejjab bōd n̄an uwaak eo aō. Iaar leļo̧k ļōmņak eo aō em̧m̧an im aō jokālet n̄an Irooj im m̧ool kajjitōk kōn juon kapen n̄an jokālet in im kar en̄jake juon kam̧ool einem̧m̧an im meļak em̧wilaļ ilo būruwō.
Jej katak ilo jeje ko rekwojarjar bwe ļaddik ro rejim̧we nejin Hilamōn, Liai im Nipai, kar bōk “lōn̄ revelesōn raan otemjej.”15Ilo ad kwojkwoj ioon naan ko an Kraist ilo jeje ko rekwojarjar im kejōkļo̧kjeņ kōn men ko jej riiti, jemaron̄ barāinwōt en̄jake revelesōn aolep iien jen menin letok eo an Jetōb Kwojarjar, eļap tata ilo ad tiljek reko̧o̧ti ļōmņak ko im en̄jake ko jej būki.
Nōm̧ba 4: Mour kōn kien jitlo̧k.
Bwe jen kōļapļo̧k ad maron̄ n̄an ron̄jake ainikien eo an Jetōb eo, enaaj em̧m̧an ad aolep pād n̄an jitlo̧k ium̧win 24 awa ko kajjojo Jabōt in jitlo̧k im m̧ōņōņō in leļo̧k jortak in jitlo̧k n̄an jipan̄ ro repād ilo aikuj. Būreejtōn Harold B. Lee eaar kapilōk: “Irooj eaar ba n̄an Aiseia, bwe ro rej jitlo̧k im leļo̧k pilawe eo kijeer n̄an eo ekwōle, maron̄ kūr im Irooj enaaj uwaak, maron̄ jan̄ im Irooj enaaj ba, ‘N̄a e ije [lale Aiseia 58:6–9.]En̄in juon wāween n̄an kōnono naan ko ippān Irooj. Kajjieon̄ menin iiō in. Mour tiljek kōn kien jitlo̧k.”16
Ilo bok in Alma, jej katak bwe ļaddik ro nejin Mosaia “raar leļo̧k er n̄an eļap jar, im jitlo̧k; kōn menin ippāer eaar wōr jitōbōn kanaan, im jitōbōn revelesōn, im ke raar katakin, rar katakin kōn kajoor im maron̄ an Anij.”17Naan in “raar leļo̧k er” ej juon ļōmņak n̄an kejōkļo̧kjeņ ilo ad etale kijejeto ko ad n̄an m̧ool ilo jitlo̧k.
Nōm̧ba 5: Kwon erreo im kabun̄jar ilo tampeļ eo.
Ekkar n̄an Būreejtōn George Albert Smith eaar katakin, “Kōj kajjojo ej bōk mālim n̄an im̧we eo jen Irooj ilo kōmlet n̄an m̧wil eo jej mour juon mour kwojarjar.”18Jouj im jeļā bwe Eaar jab ba bwe jej aikuj in wāppen n̄an bōk im̧we. Ak jej aikuj in leļo̧k kijejeto ko rem̧m̧an tata n̄an mour erreo.
Keememej im katak jān waanjon̄ak eo enana an armej ro an Kiin̄ Limhi ilo Bok in Mormon eo: “Irooj eaar rum̧wij n̄an ron̄ kūr eo aer kōnke jerawiwi ko aer.”19
Erreo emaron̄ āinwōt juon wōnāān edik n̄an kōļļā bwe en maron̄ peļļo̧k wintō ko an lan̄. Ilo ad kōjparok bujen ko ad im erreo bōk m̧ōttan kwojkwoj eo, jej kalim̧m̧ur bwe Jetōb eo enaaj aolep iien pād ippād.20Ak menin ej itok ālkin jej kalim̧m̧ur n̄an kōjparok bujen eo bwe jenaaj aolep iienkeememej Rilo̧mo̧o̧r eo! N̄an kakkobaba, pedped wōt ioon im mour erreo n̄an deļo̧n̄e tampeļ eo, im emakijkij kōm̧m̧ane ilo an jekjek ko ad kōtļo̧k, kōm̧aron̄e kōj n̄an eddōkļo̧k ilo Irooj, im bōk juon tarlep in Jetōb Kwojarjar eo.21
Nōm̧ba 6: Kwaļo̧k Kautiej kōn men ko rekwojarjar.22
Kile bwe revelesōn jān Irooj ej juon leke ekwojarjar. Elder Richard G. Scott eaar katakin bwe, “tiljek reko̧o̧te im̧we ko ej kwaļo̧k n̄an Anij bwe kōnono ko An rej kwojarjar n̄an kōj. … Āinwōt reko̧o̧ti … ej aikuj kōjparok jān jako ak an ro jet deļo̧n̄e.”23
Kein karuo kam̧ool n̄an katakin ej itok jān en̄jake eo an Būreejtōn Harold B. Lee, eo eaar ba: “Jet iien ilo likwoļpen bon̄ōn eo iaar ruj im pen aō maron̄ kiki m̧ae iien iaar waļo̧k jen peet im je ilo ioon juon peba men eo iaar ire ippān. Ak ebōk eļap peran n̄an m̧akūtkūt n̄e letok āinwōt juon uwaak n̄an jar ko.”24
Nōm̧ba 7: M̧aanjebpopo n̄an wōnm̧aanļo̧k ilo tōmak.
Ke ļeo pāleeō im n̄a kar ļōmņak in m̧are, eaar aitok am̧ ekōnono kōn ilju im jekļaj eo am ippān doon. Ta eo jej aikuj kōm̧m̧ane kōn jikuuļ? N̄āāt enaaj wōr nejid ajri? Ta jerbal eo enaaj kake n̄an aikuj ko an baam̧le eo ad im kōtļo̧k ad jerbal ilo Kabun̄ in? Kōnke kōm̧ ar tōmak ilo kapilōk eo letok jen juon rikanaan eo eaar katakin bwe kōm̧ maron̄ neji iien eo kōmij jikuuļ im jerbal ilo ejja iien eo wōt, kōm̧ ar wōnm̧aanļo̧k wōt ilo tōmak.
Eaar jab pidodo. Ļeo pāleeō eaar jujen jerbal jilu part-time jerbal ko tōre eo eaar etal n̄an jikuuļ im kōtļo̧k aō jino jerbal eo aō āinwōt juon m̧am̧a im rikōkaajriri. Kooj eo eaar oktak karōkan n̄an wāween ļōmņak an laļ, em̧ool ilo tōre eo. Reilikļo̧k, kōm̧ij kiiō loe ewi wāween bōk bun̄tōn kein kōn tōmak eaar tōprak in kōjeram̧m̧an ko an indeeo, kōjeram̧m̧an ko kōm̧ maron̄ to̧rto̧ri m̧aanļo̧k n̄e kōm̧ ar jab eo̧ron̄ ainikien Jetōb eo jen rikanaan eo kālete an Irooj.
N̄an kōmeļeļeik eļapļo̧k, ļōmņak kōn en̄jake in an Elder Robert D. Hales. Eaar ijjitōn̄ n̄an erom kampānion eo edik m̧ōttan Būreejtōn Ezra Taft Benson ilo juon kweilo̧k eļap an stake an juon stake būreejtōn kūr. Eaar keidi wāween in: “Ālkin am̧ jar, intōrpiu, katak im bar jar, Elder Benson eaar kajjitōk n̄e ijeļā wōn enaaj būreejtōn eo ekāāl. Iaar ba ij jan̄in bōk im̧we in. Eaar reitok n̄an n̄a ium̧win juon iien aitok im uwaak bar e ej jan̄in. Kōn menin, kōm̧ ar im̧we n̄an jar n̄an kajjitōk kōn jilu rikabwijer priesthood ro jilu n̄an kōnono ilo m̧wen̄an eo an jotenin Jādede eo an kweilo̧k eo. Iien eo ālkin an rikōnono eo kein kajilu kar jinoe, Jetōb eo eaar im̧we eō bwe ej aikuj erom stake būreejtōn eo ekāāl. Iaar reilo̧k n̄an Būreejtōn Benson im lo dān in kōmjaļaaļ ej wanlaļļo̧k iturin mejān. Revelesōn eaar itok n̄an kōm̧ro jim̧or—ak jen wōt am̧ro wōnm̧aanļo̧k n̄an pukōt ankilaan Jemedwōj Ilan̄ ilo am̧ wōnm̧aanļo̧k ilo tōmak.”25
Nōm̧ba 8: Jen Kōtļo̧k an Irooj peektok meļeļe ko kōn ta eo Ej kālete n̄an kwaļo̧k im n̄āāt Ej kālet n̄an kwaļo̧ke.
Ekkatak eo an rijeje Corrie Ten Boom eaar jerbal ijin. “Aolep en̄jake Anij ej letok n̄an kōj, aolep armej Ej likūt im̧aad ilo mour ko ad, ej m̧aanjebpopo ejim̧we n̄an juon ilju im jekļaj eo E wōt emaron̄ loe.”26
Bōlen jet iaami ewōr juon an en̄jake āinwōt in eo me ajri ro nejūm̧ jiljino raar ioon ilo aer kar pukōt kampānion eo aer erreo n̄an indeeo. Kōnke jej aikuj jeļā kālet eo ejim̧we, remaron̄ kiiō loe bwe er kajjojo rej aikuj n̄an bōk jejjo en̄jake ko bwe ren maron̄ kile pein Irooj ej tōlļo̧k er n̄an kampānion eo aer n̄an indeeo. Jet iaan en̄jake kein rebōk iiō in kijenmej im wōnm̧aanļo̧k ilo tōmak. Ilo iien ko lan̄ ko eaar epaake er ke rej jar. N̄e iien an Irooj ej idabtōk ippān ikdelel ko ad make, leke bwe emaron̄ lōn̄ jet en̄jake in m̧aanjebpopo ko Irooj ej aikuji ad būki m̧okta an jar ko ad uwaak.
Elder Dallin H. Oaks katakin:
“Jej aikuj in kile bwe Irooj enaaj kōnono n̄an kōj jen Jetōb eo ilo iien eo An make im ilo wāween eo An make. Elōn̄ armej rej jab meļeļe pedped in katak in. Rej tōmak bwe n̄e rej pojak im n̄e ej jejjet n̄an er, rej kūr ioon Irooj im Enaaj mōkaj uwaak, aaet ilo wāween eo ejjejet raar kōmeļeļeik. Revelesōn ej jab itok ilo wāween in. …
“… Jej jab maron̄ kiel men ko an jetōb.”27
Enan̄in 15 iiō rem̧ootļo̧k jinō eaar pilo. Eaar kate ium̧win allōn̄ kōn mālijjon̄ in epen. Eaar loe kainōm̧m̧an ke eaar jar ilo m̧ool n̄an meļeļe ilo juon boem eaar erom men eo em̧m̧antata. Eaar kout jen Būreejtōn Monson.
Ijeļā ej jab jen kain kōl āinjuon,
Ak ijeļā menin, Anij ej uwaak jar eo.
Ijeļa bwe E eaar letok An Naan.
Eo ej jiron̄ eō jar ej aolep iien eo̧ron̄.
Im naaj uwaake, ejjab etto ak rum̧ij.
Ijjab jeļā n̄e kōjeram̧m̧an eo pukōte
Ijjab jeļā n̄e kōjeram̧m̧an eo pukōte
Enaaj itok ilo wāween eo ij ļōmņake;
Ak likūt jar ko aō Ippān E make,
Won enaaj māletlet jen n̄a make,
Kalim̧m̧ur bwe Enaaj letok kajjitōk eo aō,
Ak jilkinļo̧k jet uwaak ko renaaj kōjeram̧m̧an ko reļļapļo̧k.28
Āinļo̧k wōt kōj aolep, jinō ej pukōt wōt n̄an likūt an leke ilo Ankilaan im An iien. Ilo ad kōm̧mane barāinwōt, jej aikuj keememej katakin in jān Elder Richard G. Scott: “Ta eo kwoj kōm̧mane n̄e kwaar tiljek ilo kōbpopo, kar jar ilo m̧ool, kōttar juon iien ekkar n̄an juon uwaak, im jan̄in de en̄jake juon uwaak? Kwomaron̄ kōņaan kwaļo̧k kam̧oolol n̄e ej waļo̧k, bwe ej juon kam̧ool an [Jemedwōj Ilan̄] leke. N̄e kwoj mour erreo im am̧ kālet ej jejjet ippān katakin ko an Rilo̧mo̧o̧r eo im kwoj aikuj in m̧akūtkūt, wōnm̧aanļo̧k kōn leke. Ilo am̧ meļeļe im̧we ko an Jetōb eo, juon iaan ruo men ko renaaj m̧ool waļo̧k ilo iien eo ekkar:jim̧or jab wānōk enaaj itok, kwaļo̧k juon kālet ebōd, ak aenōm̧m̧an ak til ilo lo̧je naaj en̄jake, kapen bwe kalet eo am eaar jejjet. N̄e kwoj mour jim̧we im m̧akūtkūt kōn leke, Anij ej jamin kōtļo̧k am̧ etal wōt ijjelo̧kin juon kakkōļ eim̧we n̄e kwaar kōm̧m̧ane kālet eo ebōd.”29
Kakkōļ in an ainikien eo an Jetōb jet iien ej itok jen ainikien eo an rikarejar ro an Irooj kar kāleti, ro rej bōktok n̄an kōj iaļ eo juon:
Nōm̧ba 9: Eo̧ron̄ kanaan in kakkōļ ko.
Lukkuun ļōmņak kōn jejjo kanaan in kakkōļ ko kar letok ilo raan eo ad. M̧oktata, jān Būreejtōn Boyd K. Packer.
“Kiiō juon kakkōļ! Jet al rej kauwōtata ilo jetōb. … Tempo eo, ainikien ko, im wāween mour an ro rej kōm̧m̧ane ej jum̧ae Jetōb eo. Eļapļo̧k an kauwōtata jān am̧ maron̄ kōtmāne, bwe emaron̄ bōbrae en̄jake ko am̧ ilo jetōb.”
Bar juon kakkōļ:
“Emaron̄ kiel n̄an kapein revelation ko, im̧we ko jān devil eo, kapo! …
“N̄e kwaar bōk juon im̧we n̄an kōm̧m̧ane juon men eo ej kōm̧m̧an am̧ abōņōņō, juon men eo kwojeļā iloļōmņak eo am̧ bwe ebōd im m̧ool eo eoktak jen pedped in katak ko an wānōk, jab uwaake!”
Im en̄in ej bar juon: “Eļan̄n̄e ej erom en̄jake eo epen im edebdeb, Jetōb eo enaaj mwijkōk.”30
Im rikanaan eo ad ejitōn bōro, Būreejtōn Monson, eaar kotak juon ainikien kakkōļ ke eaar ba, “Pepojakjak n̄an jabdewōt men enaaj ko̧o̧te kōjeram̧man ko am̧ an indeeo.”31
Etke ukōtļo̧k būruwōd n̄an ainikien eo an Jetōb? Ta kōjeram̧m̧an ko rej itok n̄e jej kōm̧mane?
Iaar ro̧o̧l jān Philippines, ijo iaar loe m̧akūtkūt eo eaar waļo̧k an taibuun eo ekajoor Haiyan. Iaar ron̄ en̄jake ko kōn ro jeid im jatid rejitōn bōro ilo Philippines ke rej kam̧ool kōn tōl an Jetōb ilo iien eo emenin aikuj bwe raar jeļā ta n̄an kōm̧m̧ane im ijo n̄an etal. Iaar ron̄ aer kwaļo̧k an tōmak wōnm̧aanļo̧k ilo iien ko n̄e iaļ eo ejjab alikkar. Iaar ron̄jake bwebwenato ko an mijenede ro reddik, sister im elder barāinwōt, laajrak in im̧we ko me raar tōl er n̄an lo̧mo̧o̧r ilo ānbwin ilo ilubwilijin an juon laļ wōtlo̧k aolepān m̧ōttan ipeļaakier. Ewi jon̄an aō kam̧oolol kōn menin letok eo ejejuwaan an Jetōb Kwojarjar eo,”32eo ej kakkōļ, tōl, kainōm̧m̧an, tōl jabdewōt ro rej pukōt n̄an mour erreo.
Jen aolep menin letok ko an Jemedwōj Ilan̄ emaron̄ kar kālet n̄an letok ioon ļaddik im leddik ro Nejin ilo ad etal jen dān in peptaij. Eaar kālet n̄an letok n̄an kōj menin letok eo an Jetōb Kwojarjar.
“Jetōb Kwojarjar eo ej jerbal jejjet ippān Jemedwōj Ilan̄ im Jisōs Kraist. …
“E ej ‘kam̧ool eo an Jemān im Nejin’ (2 Nipai 31:18)im kwaļo̧k im katakin ‘m̧ool otemjeļo̧k.’(Moronai 10:5).Jej maron̄ bōk juon naan in kam̧ool em̧ool kōn Jemedwōj Ilan̄ im Jisōs Kraist jen wōt kajoor eo an Jetōb Kwojarjar. An ekōnono n̄an jetōb eo ad ej bōkļo̧k eļapļo̧k m̧ool jen jabdewōt ekōnono jemaron̄ bōk jen en̄jake ko ad jen laļ.”33
Ro jeiū im jatū, āinwōt amiwōj lukkuun jeļā, m̧weo ekilep im em̧m̧an eobrak kōn ro rej kajirere im kabwebwe im jitōn̄ tok kōn pā kajejtokjen aolep ro ipeļaakid. Anikien eo an laļ eļļaaj, ejjab bōjrak, ekarelel, im kajoor. M̧ae iien jej katak n̄an ukōtļo̧k būruwōd n̄an ainikien eo an Jetōb im bar kōm̧anm̧ane maron̄ eo ad n̄an kappukōt, bōk, im m̧akūtkūt kōn revelesōn eo an juon make, jej pād ioon laļ ilo em̧m̧an tata. Jej aikuji ainikien eo an Jetōb eo n̄an tōl kōj ļo̧k jen aolep men eo ettonoon, bwebwe, jaje m̧anit, kōmetak, miin, im jerawiwi. Jej aikuji Jetōb Kwojarjar eo jab wōt n̄an tōlļo̧k kōj n̄an men otemjej eo ej “mol, joij, im kōmōn emōn im rekamōnōnō.”34ak n̄an jipan̄ kōj ejaake juon ikdeleel n̄an men otemjej n̄an maron̄ jum̧ae kareel eo an laļ in.
Juon iaan kōjeram̧m̧an ko jemaron̄ būki ilo ad katak n̄an ron̄jake ainikien eo an Jetōb ej maron̄ eo n̄an loe kōj make āinwōt n̄e jej loe jen Jemād ilo lan̄ im, “Jab mōkaj, jidik kōn jidik,” erom̧ em̧m̧an tata.
Lōmņak kōn kout in eaiboojoj jān juon rijilōk ilo raan-āliktata: “Menin letok eo an Jetōb Kwojarjar … ekōmakaj aolep ro remāletlet, kōļapļo̧k, kaklepļo̧k, kadbakbadļo̧k im kareeoikļo̧k aolep en̄jake ko rekajoor im jelet ko an laļ; im ukukōte er, jen menin letok eo an māletlet, n̄an jejjet in kōjerbale. Ej im̧we, kalōk, ejaak im kakekemo̧o̧jļo̧k aolep meļeļe ko rem̧m̧an, lan̄lōn̄, nām, en̄jake ko rekalimomo, im jelet ko jen laļ. Ej im̧we wānōk, jouj, em̧m̧an, kea, ļojokmen, im iakwe em̧ool. Ej kalōk aiboojoj an armej, jekjek im pija ko. Ej leļo̧k n̄an ājmour, kajoor, lābōļ in kajoor, im en̄jake in iiaio. Ej kōkajoorļo̧k aolep rūkaki ro an ānbwin im armej emāletlet. Ej kōkajoorļo̧k, im leļo̧k ainikien n̄an eke ko. Ilo tukadu, ej, āinwōt eaar, ōōn n̄an dii, lan̄lōn̄ n̄an bōro, meram n̄an māj ko, al n̄an lo̧jiln̄ii, im mour n̄an aolepān ānbwin eo.”35
Jetōb Kwojarjar emaron̄ kōm̧m̧ane n̄an kōj ilo ānbwin, jetōb, en̄jake, koļmenļo̧kjeņ im māletlet eo me ejjeļo̧k armej emaron̄ jino bar kōm̧m̧ane.
Kwonaaj ke errā bwe mour wānōk kōn kōjeram̧m̧an kein ej wōrtokjen jekdo̧o̧n ta ej jelm̧ae, men̄e ej aikuji juon kaarmejete eo em̧m̧an? Ej “ļoob” eo jej bōke n̄an ad keidi “pilawe” in kijejeto. Ij karuwaineneik kōj aolep n̄an jino jotenin n̄an ukōtļo̧k būruwōd n̄an ainikien eo an Jetōb Kwojarjar.
Ej jab jide bwe Irooj eaar kōkkaajririik Būreejtōn Thomas S. Monson āinwōt An rikanaan emour n̄an tōl kōj ilo raan-kein. Būreejtōn Monson ej juon eo eaar em̧m̧an an katak n̄an eo̧ron̄ im uwaake im̧we ko an Jetōb eo. Enaaj em̧m̧an ad kōm̧m̧ane n̄an ļoor waanjon̄ak eo an.
Ij kam̧ool bwe ej rikōnono eo kōn Irooj ilo raan in ad. Ij barāinwōt kam̧ool bwe Jemād ilo Lan̄ ekōņaan bwe jen ro̧o̧lļo̧k n̄an im̧aan Mejān im Eaar kōpooj jeram̧m̧an ko n̄an kōj jen letok Nejin Jitōn̄ Bōro im menin letok eo an Jetōb Kwojarjar. Ij kam̧ool bwe ej aorōk aolep kijejeto ilo ijo kuņaad n̄an bōk im dāpij menin letok in ejejuwaan, ilo etan Jisōs Kraist, amen.
© 2014 jen Intellectual Reserve, Inc. Aolep Jim̧we rej pād Ippān. Kōmālim ilo Kajin English: 1/14. Kōmālim an Ukook: 1/14. Ukook eo an Tuning Our Hearts to the Voice of the Spirit. Language. PD10050686 874