Sotava na iBolebole ni Bula kei na Vakabauta

Na Lotu e Vuravura Raraba ni iTabagone Qasecake vata kei Elder kei Sister Cook

Elder Quentin L. Cook kei Sister Mary Cook

Sigatabu, 19 ni Noveba, 2023

Elder Quentin L. Cook: Niu mai raica vata kei Mary na taro ni kena sotavi na iboleboile ni bula kei na vakabauta, keirau raica ni veitabatamata yadua era sotava na veituvaki e rawa ni muataki ira ki na nodra ibolebole ni vakabauta. Ni keirau vakadikeva na ivolanikalou ka raica na lewa ni Kalou vei ira na Luvena, a matata kina e rua na i usutu.

iMatai, baleta ga ni saqati na veika kecega ke tiko o vunimeca e sega ni vinakata meda na vakabauta na Kalou, na veitabatamata yadua ena gadrevi me kunea ka rawata na nodra dui kila kei na vakadinadina baleta na Kalou.

iKarua, ena gadrevi ki na itabatamata yadua mera kila vinaka o cei o ira kei na nodra ivakatakilakila tawamudu. Oi rau ruarua oqo e dredre me kilai baleta o vunimeca e gadreva mo kua ni kila vakamatata na Kalou, na Tamada, kei Jisu Karisito kei na Nodrau ituvatuva ni bula marau baleti iko kei cei o iko kivei Rau.

Ena veiyabaki ni 1960, o au kei Mary keirau se itabagone qasecake kina. Au a qeretueti mai Stanford Law School ka tekivu meu sa cakacaka ena tabani lawa A laki cakacaka vakaqeretueti o Mary e Stanford ni se tinani gone vou tiko. Na ibolebole ni bula kei na vakabauta kei na veivakataotaki raraba a duidui ia e tautauvata toka ena kena era sotava na itabagone qasecake nikua.

Mary, na cava eso na ibolebole a yaco tu ena gauna o ya?

Sister Mary Cook: E dua na bula raraba ena waigaga a marautaki tu, vakabibi ena vanua e San Francisco Bay keirau a tiko kina. A yaco vakalevu na tiko veivala kei na levu ni kudruvaki ni veika ca raraba. A sega tu ni kilai vakalevu na ivalu mai Vietnam. Na nodra kudru na gonevuli a vakamalumalumutaka na veiunivesiti. Ena noqu raica na veika oqo, a sega ni yaco na ivakatagi taumada ni marau mera veiraici mata na veiwatini ena danisi, sa veisau na ivakatagi. Sa vadugu sara ka rogo levu—ka ra sa duidui danisi na tamata.

E vuravura raraba, eso na ibolebole oqo ka vuqa tale sa vakayagataki vakawasoma me saqata na lotu raraba kei na vakabauta na Kalou.

Elder Cook: Enai ka 8 ni Epereli, 1966, na Time Magazine, a wiliki vakalevu ena gauna o ya, a digitaka me vola ena waqana e liu na ulutaga veivakacudrui ka veibeci oqo: “Sa Mate Beka na Kalou?”

Ena ivola taumada nei koya a tabaka na mekasini, a vakaraitaka ni vakasama oqo a vu mai na kena sa “tubucake tiko na kauwai vei ira na italatala baleta na Kalou vata kei na vuravura oqo ena loma ni 1960.”¹ Na lewe ni itukutuku a baleta taumada na veika ni vuravura ka a sega ni kovuta na lotu se vakabauta ena sala e matau.²

E dina, na taro baleta na vakabauta a sega walega ni yaco ena 1960 se nikua, era sa dau tu ga. Ena gauna a sikovi Aceni kina o Paula na iApositolo, a tovolea me vakavulica kina na Veisorovaki i Jisu Karisito. Eda wilika na nona sasaga ena Cakacaka, “Ni sa sega na ka tani era sa daukitaka ko ira kecega na kai Aceni kei ira na vulagi era sa tiko kina, me ra veitukutukunitaka ga se rogoca, e dua na ka vou.”³

E sega beka ni rorogo me vaka na veitukutuku raraba kei vuravura nikua?

Ena gauna era sa kila kina na tamata ni rawarawa tu ga na ituvaki yavu vakalotu ni itukutuku nei Paula, ni sega ni ka vou, era a bese ni rogoca.

Me ikuri ni kena vakabauti na Kalou, na maqusa baleta na keda ivakadinadina dina sa mai bolei talega ena itukutuku ni veigauna kecega. Eda sega ni gadreva meda walia na veileqa kecega me baleta na keda ivakadinadina e vuravura nikua. Ia na kena isau sa dau tautauvata tikoga. Eda sa luvena vakayalo kecega na Tamada Vakalomalagi dauloloma. A vosa kina vakaukauwa o Peresitedi Russell M. Nelson baleta na ka oqo. A vakamatatataka e tolu na ilesilesi gugumatua sara: “luve ni Kalou,” “luve ni veiyalayalati,” kei na “tisaipeli i Jisu Karisito.”⁴

A vakayaloqaqataki keda talega meda kakua ni beci keda se beca eso tale. E vuqa na leqa eda sotava e rawa ni wali kevaka eda kilai keda tiko ni da sa luvena na Tamada Vakalomalagi dauloloma.

O ira era saga mera vakarusa na vakabauta era sa dau kaya vakaukauwa ni vakabauta sa sega tale ni yaga. E cala na nodra vinakata na nodra dui gagadre, ki na veika raraba ni veisiga, me sosomitaka na ivakatakila kei na ivakaro e solia na Kalou. Era vakabauta ka tukuna vakaukauwa ni vuqa na tamata e tautauvata na nodra digidigi ni veimaliwai raraba ka sa sega tale ni lewenilotu yalodina.

Mo ni kila tiko, o ira na itabagone kei na itabagone qasecake era sega ni luluqa vakalotu se sa biuta na Lotu vakalewelevu me vaka e liu me vaka sa tukuni raraba tiko. Na kedra iwiliwili na daukaulotu sa kacivi mera kaulotu sa tubu cake sara. Na pasede ni vakaitavi ena Lotu me baleti ira na itabatamata e tarava sa vakaraitaka tiko na kena sa toso cake tikoga.⁵ Vakabibi, na kedra iwiliwili na itabagone qase era tiko ena inisitute sa tubu cake tale tikoga.

Yalovinaka me kilai tiko niu sega ni vakacacani ira era vakatitiqa tiko; ia, au tukuna tiko na sala mo ni sotava kina e ka bibi. Na iwali ki na ibolebole oqo sa ikoya na kosipeli i Jisu Karisito. Au yalataka vei kemuni: Kevaka mo wilika na ivolanikalou ena yalodina, masu, ka bula vakalotu na nomu bula, ena rawa, ena kena gauna, mo kunea na isau ni nomu taro ka walia na vakatitiqa e rawa ni basika mai ena veigauna kece.

Dua vei ira na itukutuku ena ivolanikalou au taleitaka e tiko ena kosipeli i Marika me baleta na tama a gadreva me vakabulai o luvena tagane mai na yalo velavela. Ena itukutuku ena ivolanikalou a taroga vagumatua na iVaklabula vei tamani gone ke sa vakabauta ni na vakabulai o luvena. A tuturu na wai ni matai tamani gone, ka kaya, “Kemuni na Turaga, au sa vakabauta; vukea na noqu tawa-vakabauta.”⁶ A vakadonuya oqo na Turaga, sa qai vunauca na yalo velavela ka vakabula na gonetagane.

Na lesoni sai koya me kakua ni vakatarai na vakatitiqa se tawa-vakabauta me uabaleta na noda vakabauta. Na vulici vagumatua ni ivolanikalou, masu ena yalodina, na bula savasava vakalotu, kei na muria na ivakasala ni parofita ni Turaga ena yaco vei iko mo uabaleta na veibolebole ni vakabauta.