Veidusimaki Vakaparofita

Lotu e Vuravura Raraba me baleti ira na iTabagone Qase Cake

Mai vei Quentin L. Cook

Ena Kuoramu ni iApositolo Le Tinikarua

Sigatabu, 19 ni Noveba, 2023

Ni golevi na veidusimaki vakaparofita, au vakadinadinataka nio Russell M. Nelson e parofita digitaki mai vua na Turaga me dusimaka na Nona Lotu nikua. Au a tukuna voli na noqu dau lomana ka vakavinavinakataki koya ena vuqa na gauna.¹

Ena nona vosa ni veidusimaki vakaparofita o Peresitedi Spencer W. Kimball, a kaya kina: “Mai na veika kece … meda na vakavinavinaka [kina] … oya ni lomalagi sa tadola dina tu kei na Lotu vakalesuimai i Jisu Karisito e yavutaki ena vatu ni ivakatakila. Na ivakatakila e soli tiko ga mai sai koya na dra bula ni nona kosipeli na Turaga bula ka iVakabula, ko Jisu Karisito.”²

Na parofita o Inoki a raica taumada na veisiga eda bula tiko kina oqo. A raica na ivalavala ca levu ena yaco ka parofisaitaka na “veivakararawataki levu” ena yaco kina. Ia, sa yalataka na Turaga, “ia au na taqomaki ira ga era sa noqu; Kau na tala sobu mai lomalagi na ka dodonu; ka tala yani mai vuravura na dina, me vakadinadinataki koya na noqu Le Duabau ga.”³ Na kena tadu mai na iVola i Momani sa veivakadeitaki ni nona itukutuku o Inoki.

A ciqoma na Parofita o Josefa Simici na ivakatakila ena ivakatakila. E vuqa era sa maroroi tu mai ena vukuda ena Vunau kei na Veiyalayalati. Na ivolanikalou kece ni Lotu sa tu kina na nanuma kei na loma ni Turaga me baleti keda ena iotioti ni tabagauna oqo.⁴

Me ikuri ni ivolanikalou yavutaki cecere oqo, eda sa vakalougatataki ena ivakatakila tomani tiko kivei ira na parofita bula. O ira na parofita era sa “vakailesilesi lumuti ni Turaga, era sa vakadonui mera vosa ena Vukuna.”⁵

Au dau tukuna vakalevu, au vakadinadinataka ena yalomalua ni tomani tiko ga na kena ciqomi na ivakatakila ka ciqomi ena sala sa vakarautaka na Turaga.

Au veiqaravi tale ga vaka Apositolo ena ruku ni veidusimaki ni tolu na parofita: Peresitedi Gordon B. Hinckley, Thomas S. Monson kei Russell M. Nelson. Au vakadinadinataka ni ratou ciqoma tiko na ivakatakila baleta na noda siga nikua.

Au vakadeitaka vei kemuni ni veidusimaki vakaivakatakila e rawa nida ciqoma yadua nida cakacaka ena were ni vaini ni Turaga. E vuqa na noda dusimaki e lako mai vua na Yalo Tabu. Ena so na gauna kei na so na inaki, e dau lako vakadodonu mai vua na Turaga. Au vakadinadinataka vakai au ni dina na ka oqo. Na veidusimaki baleta na Lotu, vaka raraba, e dau lako ga vua na Peresitedi ka parofita ni Lotu.

Au cavuta taumada na ka a kaya o Wilford Woodruff me baleta na Parofita o Josefa Simici; ni dina vakakina vei Peresitedi Russell M. Nelson. Au raica “na cakacaka ni yalo ni Kalou vata kei koya, kei na ivakatakila i Jisu Karisito ki vua, kei na kena vakayacori na ivakatakila oqori.”⁶ O koya na parofita ni Turaga.

Me vaka niu dua na Apositolo ni Turaga o Jisu Karisito, au wasea na noqu vakadinadina dei ena ilesilesi vakalou ni iVakabula kei na dina ni Nona Veisorovaki. O Koya na noda iVakabula ka Dauveivueti. Ena yacai Jisu Karisito, emeni.