Ciqomi ni iVakatakila Yadua

Lotu e Vuravura Raraba me baleti ira na iTabagone Qase Cake

Mai vei Quentin L. Cook

Ena Kuoramu ni iApositolo Le Tinikarua

Sigatabu, 19 ni Noveba, 2023

Vinaka vakalevu, Elder kei Sister Gilbert, ena nomudrau ivakasala totoka.

Na iotioti ni taro e vakaivunau ka bibi. Au vakalougatataki vakacava ena ivakatakila yadua kei na veidusimaki vaka parofita

Na raivotu cecere ka tukuni taumada ena iVola i Momani oya na tadra vakaparofisai i Liai baleta na vunikau ni bula.¹ Na raivotu oqo e vakaraitaki vakamatata na bolei ni vakabauta ena noda gauna kei na tawase levu ka tiko ena kedra maliwa o ira era lomana, sokalou, ka vakila nira na saumi taro vua na Kalou kei ira ena sega. E vakamacalataka o Liai eso na itovonibula ka dau vakamalumalumutaka na vakabauta. E so era qaciqacia, dokadokai ira, ka lialia. Era malele ga ki na veika ka vakatokai me “vuku vakavuravura.”² Eso era malele vakalailai ga vua na Kalou ka mai yali ena kabu butobuto ni vuravura kei na ivalavala ca.³ Eso era sa tovolea oti na loloma ni Kalou kei na Nona vosa ia era madua baleta ira era vakalialiai ira tiko mai ka mani lutu tani ki na veisala vakatabui.⁴

Eda kila ni tiko eso na lewenilotu era malele vakalailai ga ka sega sara ni yalodina ki na so na ivakavuvuli ni iVakabula. Sa neitou gagadre vei ira na lewenilotu oqo mera yadra ki na vakabauta ka toroya cake na nodra vakaitavi mai, na yalodina, kei na sasaga me rawata na ivakatakila yadua. Na Kalou e lomani ira taucoko na Luvena. E vinakati ira kece mera lesu tale vei Koya. O Koya e gadreva na tamata kecega meda duavata ena vakabauta. Na Veisorovaki ni iVakabula sa iloloma ki na tamata kecega. Na ivakatakila yadudua sa vakarautaki ki na tamata kecega.

Na itukutuku, na veiqaravi, kei na Veisorovaki i Jisu Karisito, na noda iVakabula, e lewe ni vuli bibi ki na noda ciqoma na ivakatakila yadua. E sega ni dua na ivolanikalou e vakaraitaka vakavinaka na ivakarau dodonu ni vakasaqara [vakavinaka cake] na vakabauta me vakataka na 2 Nifai 25:26: “Ia eda sa veivosakitaki Karisito, eda reki ena vukui Karisito, eda vunautaki Karisito, ka eda volavola me vaka na noda parofisai, me rawa nira kila kina na noda kawa na ivurevure me rai kina me bokoci na nodrai ivalavala ca.”

Na iVola i Momani e bibi sara na kena yavu.⁵ E tiko na nona itavi bibi ena ciqomi ni ivakatakila yadua. Ia ena dau tiko ga o ira era beca na bibi se vakawalena sara ga na ivola vakatabui oqo. Eso era veiwalitaka. Ni bera niu lai kaulotu, a cavuvosataka e dua na parofesa ni univesiti na vosa nei Mark Twain ni kevaka mo kauta tani na “Ka sa yaco” mai na iVola i Momani, sa na “vaka ga edua na ivola tikidua.”⁶

Ni oti e vica na vula, niu kaulotu tiko mai Lodoni, edua na parofesa rogo ena Univesiti e Lodoni ka vuli mai Okosivote Igiladi, ka dua o koya na kenadau ena veivosa ena Tokalu e Loma, a wilika na iVola i Momani, veitaratara kei na Peresitedi ni Lotu ena gauna oya, o David O. McKay, ka sota talega kei ira na kaulotu. E tukuna vei ira ni vakadeitaka ni iVola i Momani e ivakadewa dina ni nodra kilaka na Jiu kei na nodra vosa na kai Ijipita, ena itabagauna ka vakamacalataki tiko ena iVola i momani.⁷ E dua vei ira na ivakaraitaki e vuqa a vakayagataka o koya oya na malanivosa veisemati “ka sa yaco,” ka tukuna o koya ni tautauvata kei na sala ena vakadewataka kina na malanivosa ka dau vakayagataki ena volavola makawa ena Tokalau e Loma.⁸ A tukuni vua na parofesa oqo ni dina ga ni vukei koya na kila vakavuku ka yavutaki mai na nona cakacaka, ia e se bibi tiko ga me taukeni e dua na ivakadinadina vakayalo. Ena vuli kei na masu a taukena kina o koya edua na ivakadinadina vakayalo ka mani papitaiso sara. Na ka a raica edua na dauvakalasalasa rogo me ka ni veivakalialiai, a raica kina edua na tamata vuku me ivakadinadina bibi ni dina ni iVola i Momani, ka vakadeitaki mai vua na Yalo.

Na ivakavuvuli bibi ni galala ni digidigi e gadrevi kina ni dodomu me vakayavutaki ena vakabauta na ivakadinadina baleta na kosipeli vakalesui ka sega ena ivakadinadina ga mai taudaku se mai na vakadidike. O koya gona, na ivakasala nei Moronai meda wilika ka vakasamataka vakatitobu ka qai kerea vua na Kalou ena vu ni yalomu taucoko, ena gagadre dina, me vakadeitaki kina na dina ena ivakadinadina ni Yalotabu sa kena isau.⁹ E matata kina, ni laini ka tawasei ira era rogoca na ivakatagi ni vakabauta kei ira era sega ni rogoca se sega ni tiuni donu, sa ikoya na dauvulici ni ivolanikalou ka muria na nona ivakasala na parofita ni Turaga.

Na ivakatakila yadua sai koya na veivakalougatataki uasivi ka ciqomi ni oti na papitaiso ni da sa “vakatabui ena isolisoli ni Yalo Tabu.”¹⁰ Na Yalo Tabu e dauvakatakila ka dauvakadinadinataka na ka dina kecega, vakabibi me baleta na iVakabula. Ena noda siga, e gadrevi kina na ivakatakila ni veidusimaki. A vakavulica o Peresitedi Nelson, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.”¹¹

Yalovinaka moni kila ni vakabauta na Turaga o Jisu Karisito kei na maroroi ni Nona ivakaro oya ga na digiddigi ena veisautaka na bula ena bula vakayago. Na ka bibi duadua, e dodonu meda kila yadua oya ni dua e didivara kina ivakatagi ni vakabauta, o koya ena sega ni duavata kei na Yalo Tabu. Me vaka a vakavulica na parofita o Nifai, “Drau sa dau rogoca na domona; …ka sa vosa vei kemudrau ena domo malumu lailai, ia drau sa yalovatu ka sega kina ni drau vakila na nona vosa.”¹² Na ivolanikalou e vakamatatataka ni Yalo Tabu e rawa ni veitaratara ena sala e vuqa. So na gauna o Koya ena vakaceguya na nomu vakasama.¹³ So na gauna o Koya ena ena cakacaka ena nomu vakasama se na vakanananu me vakaosota na nomu vakasama.¹⁴ So na gauna o Koya ena vakararamataka na nomu vakasama.¹⁵ So na gauna o Koya ena vakasinaita na yalomuena marau.¹⁶

Au vakavinavinakataka na vakasama eso e volai ena noqu vola ena sala ni vakau itukutuku raraba me baleta eda na ciqoma vakacava na ivakatakila. Edua e vola ni gadrevi meda yalomalumalumu ka ciqoma na veivakauqeti vakayalo eda ciqoma. Meda vakamuria na veivakauqeti me kua ena sala vakavuravura.

O Peresitedi Russell M. Nelson e vakavulica, “E sega ni dodonu mo vakasamataka vakabalavu na veika dina. E sega ni dodonu mo lecava o cei mo vakabauta dina. Mai na ivakatakila vakai iko, o rawa ni ciqoma kina nomu ivakadinadina vakataki iko ni Vola i Momani e vosa ni Kalou, o Josefa Simici e dua na parofita, ka ni sai koya oqo na Lotu ni Turaga.”¹⁷

E matata na noda ivakavuvuli; e dodonu meda dauraica na yasana vinaka ka marau. Au taleitaka nio Peresitedi Dallin H. Oaks kei Sisita Kristen M. Oaks erau a vakabibitaka na yalomarau ena lotu kaburaki vakasakiti e vuravura raraba ena vula o Me sa oti. Eda dau vakabibitaka na noda vakabauta, ka sega ni noda rere. Eda rekitaka na veivakadeitaki ni Turaga ni na tu e yasada ka solia vei keda na veituberi kei na veidusimaki.¹⁸ Na Yalo Tabu e dau vakadinadinataka ki yaloda ni tiko e dua na Tamada Vakalomalagi dauloloma ka na yaco vakaidina na Nona ituvatuva loloma ni veivueti ni noda vakabulai ena veitikina kece sara ena vuku ni veisorovaki ni solibula i Jisu Karisito.