សេចក្តីផ្តើម
ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ
ថ្ងៃ អាទិត្យ ទី ១៨ ខែ កុម្ភៈ ឆ្នាំ ២០២៤
យុវមជ្ឈិមវ័យជាទីស្រឡាញ់នៅទូទាំងពិភពលោក ឱ !នេះជាពរជ័យដ៏អស្ចារ្យ និងជាឯកសិទ្ធិមួយសម្រាប់យើងទាំងពីរដើម្បីជួបនឹងក្មួយៗ ក្នុងកម្មវិធីប្រជុំធម្មនិដ្ឋាន ស៊ី. អ៊ី. អេស ទូទាំងពិភពលោកនេះ ។ ពួកយើងក៏រីករាយដោយមានវត្តមានរបស់បងប្រុស ឆាត វិប ដែលអមដំណើរដោយភរិយាជាទីស្រឡាញ់របស់លោកគឺ គ្រីស្ទី នារាត្រីនេះ ។ បងប្រុស និងបងស្រី វិប គឺជាសិស្សដ៏ស្មោះត្រង់របស់ព្រះគ្រីស្ទ និងជាគំរូដ៏អស្ចារ្យនៃការលះបង់ និងសេចក្តីស្រឡាញ់ក្នុងគ្រប់ទិដ្ឋភាពក្នុងជីវិតពួកលោក ។
យើងរំភើបជាខ្លាំងចំពោះវត្តមានរបស់ក្មួយៗ នៅក្នុងការប្រជុំ ថ្ងៃនេះ ។ ការចូលរួមរបស់ក្មួយៗបង្ហាញអំពីជំនឿរបស់ក្មួយៗទៅលើព្រះ និងព្រះយេស៊ូវគ្រីស្ទ និងបំណងប្រាថ្នាក្នុងការទទួលអារម្មណ៍នៃសេចក្ដីស្រឡាញ់ទ្រង់ ហើយធ្វើតាមទ្រង់ទាំងទ្វេ ។ កាលក្មួយៗ សម្រេចចិត្តធ្វើតាម ហើយថ្វាយបង្គំទ្រង់ នោះជីវិតក្មួយអាចកាន់តែរឹងមាំ និងរឹងប៉ឹងខាងវិញ្ញាណ ដែលក្មួយត្រូវការចាំបាច់នៅក្នុងដំណើរជាសិស្សរបស់ទ្រង់ក្នុងជំនាន់យើងនេះ ។ ពួកយើងស្រឡាញ់ក្មួយៗណាស់ !
ខ្ញុំសូមពាំនាំមកកាន់ក្មួយៗនូវការគំនាប់ និងក្ដីស្រឡាញ់ពីព្យាការីជាទីស្រឡាញ់របស់យើង គឺ ប្រធាន រ័សុល អិម ណិលសុន និងទីប្រឹក្សារបស់លោកនៅក្នុងគណៈប្រធានទីមួយ និងកូរ៉ុមនៃសាវកដប់ពីរនាក់ ។ ពួកលោកពិតជាស្រឡាញ់ និងយកចិត្តទុកដាក់ចំពោះក្មួយៗ ហើយអធិស្ឋានសម្រាប់សុខុមាលភាពរបស់ក្មួយៗជានិច្ច ។ ខ្ញុំសង្ឃឹមថាក្មួយៗនឹងទទួលអារម្មណ៏ពីសេចក្តីស្រឡាញ់របស់ព្រះ និងព្រះគ្រីស្ទក្នុងអំឡុងពេលនៃការប្រជុំធម្មនិដ្ឋាននាថ្ងៃនេះ ។
ខ្ញុំពិតជារីករាយនឹងបទចម្រៀងដ៏បំផុសគំនិតដែលបានច្រៀងកាលពីមួយនាទីមុននេះ ។ ទំនុកច្រៀងដ៏បំផុសគំនិតនៃទំនុកតម្កើងដ៏ជាទីស្រឡាញ់នេះ ពិតជាត្រូវនឹងការប្រជុំធម្មនិដ្ឋាន នារាត្រីនេះ ហើយវាផ្តល់ចម្លើយដល់ការទូលអង្វរដ៏ក្រៀមក្រំចេញពីដួងចិត្តឈឺចាប់បំផុតថា « ខ្ញុំរកក្តីសុខឯណា ? »
« ពេលខ្ញុំត្រូវការដឹងថាខ្ញុំគួរទៅណា ? »
«ឯណាទៅការលួងលោមបន្ធូរការតានតឹង ? »
« តើមាននរណាអាចយល់ ?
« មានតែទ្រង់ទេ » ។
« ក្តីល្អទ្រង់មិនផ្លាស់ប្តូរ »
នៅកន្លែងទទួលភ្ញៀវនៃអគារការិយាល័យសាសនាចក្រក្នុងទីក្រុង សលត៍ លេក មានគំនូរដ៏ស្រស់ស្អាតរបស់ព្រះយេស៊ូវគ្រីស្ទ លាតព្រះហស្ដសន្ធឹងក្នុងចំណោមសិស្សរបស់ទ្រង់ ។ ព្រះអង្គសង្គ្រោះបានប្រើពេលក្នុងព្រះជន្មនៅលើផែនដីទ្រង់អញ្ជើញ មនុស្សឲ្យ មករកទ្រង់ ហើយទ្រង់ធានាដល់ពួកគេដោយ ក្តីមេត្តាថានៅពេលពួកគេមកទ្រង់ នោះពួកគេអាច « នឹងបានសេចក្តីសម្រាកដល់ព្រលឹង [ ពួកគេ ] » ។
ព្រះយេស៊ូវគ្រីស្ទគង់នៅច្រកទ្វារនៃជីវិតប្រចាំថ្ងៃរបស់យើងទាំងបើកព្រះហស្ត ហើយទ្រង់បក់ព្រះហស្តហៅយើងដោយមានព្រះបន្ទូលថា « យើងនឹងឱបក្រសោបអ្នកដោយពាហុនៃសេចក្ដីស្រឡាញ់របស់យើង » ។ ទោះជាយើងជំពប់ដួល ឬងឿងឆ្ងល់ក្តីក៏យើងអាច ទៅក្នុងព្រះហស្តទ្រង់ ដឹងពីក្តីស្រឡាញ់ដ៏ឥតខ្ចោះរបស់ទ្រង់ ហើយដឹងថាគម្លាតនៃព្រះហស្តទ្រង់ត្រូវបានឧទ្ទិសតាមរយៈសេចក្តីស្រឡាញ់និង ពលិកម្មដ៏ធួនរបស់ទ្រង់សម្រាប់យើង ។ ឱ !នេះជារបៀបដ៏អស្ចារ្យមួយក្នុងការស្វែងរកភាពសុខសាន្តនៅក្នុងពិភពលោកដ៏លំបាកនេះ ។
នៅក្នុងស្មារតីនៃការស្វែងរកភាពសុខសាន្តតាមរយៈព្រះអង្គសង្គ្រោះ យើងបានអញ្ជើញសិស្សថ្នាក់វិទ្យាស្ថាននៅទូទាំងពិភពលោកឲ្យចែកចាយពីកង្វល់ និងសំណួរសំខាន់ៗរបស់ពួកគេជាមួយយើង ។ ពួកគេបានថតសំណួរក្នុងឃ្លីបវីដេអូខ្លី មួយផ្ញើមកកាន់យើង ។ យើងស្ងើចសរសើរ និងស្ញប់ស្ញែងចំពោះសេចក្តីល្អស្មោះសរ ដែលបានបង្ហាញតាមរយៈសំណួរទាំងនេះ ។ យើងអាចដឹងពីបំណងប្រាថ្នារបស់ក្មួយដើម្បីខិតកាន់តែជិតព្រះអង្គសង្គ្រោះ ហើយក្លាយជាសិស្សដ៏ស្មោះត្រង់របស់ទ្រង់ ។
យើងបានកាត់វីដេអូខ្លីៗតាមក្រុមយោងលើប្រធានបទដូចខាងក្រោម ៖ ( ១ ) ការពង្រឹងទីបន្ទាល់របស់យើង ( ២ ) ស៊ូទ្រាំនឹងការសាកល្បង ( ៣ ) ធ្វើតាមផែនការរបស់ព្រះសម្រាប់យើង ( ៤ ) ការរៀបចំដើម្បីចូល និងថ្វាយបង្គំនៅក្នុងព្រះវិហារបរិសុទ្ធ និង ( ៥ ) ការផ្តោតជីវិតរបស់យើងលើព្រះយេស៊ូវគ្រីស្ទ ។
យើងនឹងបង្ហាញវីដេអូជម្រើសចេញពីវីដេអូសំណួររបស់ក្មួយៗដើម្បីផ្តល់នូវបរិបទមួយចំនួន និងជាសេចក្តីណែនាំអំពីប្រធានបទនីមួយៗនៅក្នុងការពិភាក្សារបស់យើងនាយប់នេះ ។ បងប្រុស និងបងស្រី វិប នឹងចូលរួមនឹងយើង នៅពេលយើងពិភាក្សាអំពីប្រធានបទមួយចំនួនទាំងនេះ ដោយចែកចាយចំណេះដឹង និងទីបន្ទាល់ដ៏អស្ចារ្យរបស់ពួកលោក អំពីដំណឹងល្អនៃព្រះយេស៊ូវគ្រីស្ទ ។
អរគុណច្រើន ។ យើងស្រឡាញ់ក្មួយៗ ហើយសំណួរដែលក្មួយបានផ្ញើមកប្រាប់យើងថាតើ ក្មួយៗស្រឡាញ់ព្រះសង្គ្រោះព្រះយេស៊ូវគ្រីស្ទរបស់យើងប៉ុណ្ណា ។