ការរៀបចំខ្លួនចូល និងថ្វាយបង្គំក្នុងព្រះវិហារបរិសុទ្ធ
ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ
ថ្ងៃ អាទិត្យ ទី ១៨ ខែ កុម្ភៈ ឆ្នាំ ២០២៤
អែលឌើរ អូលីសេស សូរ៉េស ៖យើងបានទទួលសំណួរល្អៗជាច្រើនទាក់ទងនឹងប្រធានបទដែលប្រធាន រ័សុល អិម ណិលសុន ចូលចិត្តបំផុតគឺ ៖ « ការរៀបចំខ្លួនដើម្បីចូល និងថ្វាយបង្គំនៅក្នុងព្រះវិហារបរិសុទ្ធ » ។
បងប្រុស និងបងស្រី វិប តើប្អូនអាចចែកចាយគំនិតអំពីប្រធានបទនេះផងបានទេ បន្ទាប់ពីស្តាប់សំណួរដែលបានថតទុកទាំងនេះ ?
កាណាដា ទីក្រុងអេដម៉នតុន – សំណួរទី ១
អែលឌើរ សូរ៉េស សំណួររបស់ខ្ញុំគឺថា តើខ្ញុំអាចរៀបចំខ្លួនដើម្បីទៅព្រះវិហារបរិសុទ្ធជាលើកដំបូង និងទទួលពិធីបរិសុទ្ធដោយរបៀបណា ?
កាណាដា ទីក្រុងអេដម៉នតុន – សំណួរទី ២
អែលឌើរ សូរ៉េស តើខ្ញុំដឹងថាខ្លួនត្រៀមខ្លួនរួចរាល់ ដើម្បីទទួលអំណោយទានពិសិដ្ឋដោយរបៀបណា ?
ស៊ីលី ទីក្រុងខនសេបភី – សំណួរទី ២
ជម្រាបសួរ អែលឌើរ សូរ៉េស ។ ខ្ញុំមានសំណួរមួយ ។ តើខ្ញុំអាចធ្វើឲ្យការចូលរួមក្នុងព្រះវិហារបរិសុទ្ធកាន់តែចាំបាច់ និងសំខាន់ក្នុងជីវិតខ្ញុំដោយរបៀបណា ?
បងប្រុស ឆាដ អេច វិប ៖នោះជាសំណួរដ៏អស្ចារ្យ និងសំខាន់ ។
ដំបូន្មានដំបូងដែលខ្ញុំចង់ណែនាំនោះគឺ រៀបចំខាងវិញ្ញាណ ។ រៀនស្តាប់ព្រះសូរសៀងរបស់ព្រះអម្ចាស់ ហើយឆ្លើយតបទៅនឹងការបំផុសគំនិត ។ សូមព្យាយាមឲ្យស្អាតស្អំខាងសីលធម៌ ហើយចៀសវាងរឿងទាំងឡាយរារាំងព្រះវិញ្ញាណក្នុងជីវិតរបស់អ្នក ។ បើអ្នកធ្វើខុស ចូរប្រែចិត្ត ហើយមានភាពស័ក្ដិសមដើម្បីទៅក្នុងដំណាក់របស់ព្រះអម្ចាស់ ។ មិនថាអ្នកធ្លាប់ធ្វើអ្វីក្នុងជីវិត ដង្វាយធួននៃព្រះយេស៊ូវគ្រីស្ទមានមកលើអ្នក ។ ដោយសារទ្រង់ អ្នកអាចមានភាពស័ក្ដិសម ។ ទ្រង់នឹងជួយអ្នក ។
បងស្រី គ្រីស្ទី វិប: ដំបូន្មានមួយទៀតដែលខ្ញុំចង់ផ្ដល់យោបល់គឺត្រូវនិយាយអំពីព្រះវិហារបរិសុទ្ធជាមួយនឹងសមាជិកគ្រួសារ ថ្នាក់ដឹកនាំ ឬមិត្តភក្ដិដែលទុកចិត្ត ។ ព្រះវិហារបរិសុទ្ធគឺពិសិដ្ឋ ប៉ុន្តែពុំមែនអ្វីៗទាក់ទងនឹងព្រះវិហារបរិសុទ្ធសុទ្ធតែជាការសម្ងាត់នោះទេ ពេលខ្លះយើងអាចនិយាយច្រើនអំពីព្រះវិហារបរិសុទ្ធជាងពេលផ្សេង ។ ហើយខ្ញុំគិតថាវាអាចមានអត្ថប្រយោជន៍ ទាំងពីមុន និងក្រោយពេលដែលអ្នកទៅចូលរួមជាលើកដំបូង ។ វាល្អណាស់ដែលមានសំណួរ នោះហើយជារបៀបដែលយើងរៀន ដូច្នេះសូមសួរទៅកាន់បុគ្គលដែលអ្នកទុកចិត្ត ដែលស្រឡាញ់ព្រះវិហារបរិសុទ្ធ ហើយចាត់ទុកថាព្រះវិហារបរិសុទ្ធគឺពិសិដ្ឋ ។ សំខាន់បំផុត សូមទូលថ្វាយសួរទៅកាន់ព្រះអម្ចាស់ ។ ការមានសំណួរគឺជាវិធីដ៏ល្អដើម្បីព្រះអម្ចាស់បង្រៀនយើងតាមរយៈវិវរណៈ ។ បើអ្នកចូលរួមព្រះវិហារបរិសុទ្ធកាន់តែច្រើន នោះទ្រង់នឹងបង្រៀនអ្នកកាន់តែច្រើន ។
Brother Webb: ដំបូន្មានចុងក្រោយនោះគឺ ការសិក្សា ។ សូមស្វែងយល់ពីព្រះវិហារបរិសុទ្ធឲ្យអស់ពីលទ្ធភាពរបស់អ្នក ។ កន្លែងដ៏ល្អមួយដើម្បីរៀននោះគឺនៅលើគេហទំព័រ ChurchofJesusChrist.org/temples ជាកន្លែងដែលអ្នកអាចស្វែងយល់បន្ថែមអំពីអំណោយទានពិសិដ្ឋ សម្លៀកបំពាក់ព្រះវិហារបរិសុទ្ធ ហើយជាពិសេសរៀនអំពីសេចក្ដីសញ្ញានីមួយៗដែលអ្នកនឹងធ្វើនៅក្នុងព្រះវិហារបរិសុទ្ធ ។ គេហទំព័រនោះមានអត្ថប្រយោជន៍ណាស់ ។
ដោយជាផ្នែកមួយនៃការសិក្សារបស់អ្នក សូមរៀនឲ្យអស់ពីសមត្ថភាពអំពីនិមិត្តរូបនៃព្រះវិហារបរិសុទ្ធ ។ សម្រាប់ខ្ញុំ វិធីដ៏ល្អបំផុតមួយក្នុងការរៀបចំដើម្បីយល់អំពីព្រះវិហារបរិសុទ្ធ គឺរៀនអំពីរោងឧបោសថពីបុរាណ ដែលបានពិពណ៌នានៅក្នុងគម្ពីរសញ្ញាចាស់ ។ និមិត្តសញ្ញានៅក្នុងព្រះវិហារបរិសុទ្ធសម័យទំនើបគឺខុសពីសម័យបុរាណ ប៉ុន្តែគោលការណ៍ និងគោលបំណងគឺស្រដៀងគ្នាណាស់ ហើយវាអាចជួយយើងរៀបចំខ្លួនសម្រាប់បទពិសោធន៍ព្រះវិហារបរិសុទ្ធរបស់យើងផ្ទាល់ ។
អស់អ្នកចូលទៅក្នុងរោងឧបោសថពីបុរាណដំបូងបានចូលទៅជិតអាសនៈមួយ ជាកន្លែងដែលពួកគេថ្វាយយញ្ញបូជាដូចដង្វាយធួនរបស់ព្រះអង្គសង្គ្រោះ ។ ពួកគេត្រូវបានលាងសម្អាតនៅក្នុងចានក្លាំ និងលាបប្រេងតាំង ហើយបានផ្តល់សម្លៀកបំពាក់ពិសិដ្ឋ។ នៅក្នុងរោងឧបោសថក៏មានត្រសាលមួយដែលគេហៅថា ទីបរិសុទ្ធ ជាកន្លែងដែលពួកគេកាន់ជើងទៀន ដែលតំណាងឲ្យការរស់នៅជាមួយនឹងព្រះវិញ្ញាណ ឬពន្លឺនៃព្រះ ។ តុនំប៉័ង និងស្រា ដែលជានិមិត្តសញ្ញាស្រដៀងនឹងសាក្រាម៉ង់ ។ វាក៏មានអាសនាគ្រឿងក្រអូបតំណាងឲ្យការអធិស្ឋានផងដែរ ។ ផ្នែកចុងក្រោយនៃរោងឧបោសថគឺជាទីបរិសុទ្ធបំផុត ដែលកាន់ហិបនៃសេចក្តីសញ្ញា និងទីសន្តោសប្រោស ។ មានតែសង្ឃជាន់ខ្ពស់ប៉ុណ្ណោះដែលអាចឆ្លងកាត់វាំងនននេះ ហើយចូលទៅក្នុងទីដ៏បរិសុទ្ធ ហើយនោះមានតែមួយថ្ងៃក្នុងមួយឆ្នាំ គឺនៅថ្ងៃនៃដង្វាយធួន ។ ទីធ្លាខាងក្រៅតំណាងឲ្យនគរទេឡេស្ទាល ទីបរិសុទ្ធ នគរទេរេសទ្រាល និងទីដ៏បរិសុទ្ធ នគរសេឡេស្ទាល ។ ការរីកចម្រើននេះតាមរយៈរោងឧបោសថដែលបានបង្រៀនសាសន៍អ៊ីស្រាអែលពីបុរាណអំពីដំណើររបស់ពួកគេតាមរយៈជីវិតរមែងស្លាប់ ដោយមានគោលបំណងចុងក្រោយដើម្បីចូលទៅក្នុងទីវត្តមានរបស់ព្រះ ។
តាមគំនិតខ្ញុំវាគឺជានិមិត្តសញ្ញាដ៏អស្ចារ្យមួយនៅក្នុងប្រវត្តិសាស្ត្រពិភពលោក នៅពេលដែលព្រះយេស៊ូវត្រូវបានឆ្កាង មានការរញ្ជួយដី ហើយវាំងនននៃព្រះវិហាររបស់ហេរ៉ូឌ បានរហែកពាក់កណ្តាល ដែលជានិមិត្តរូបថា ឥឡូវនេះ ដង្វាយធួនត្រូវបានបំពេញ មនុស្សទាំងអស់គ្នាមានឱកាសដើម្បីចូលទៅក្នុងនគរសេឡេស្ទាល ឬវត្តមានរបស់ព្រះ ។
សូម្បីតែពណ៌ទាំងឡាយនៅក្នុងរោងឧបោសថ—ពណ៌ខៀវ ស្វាយ ក្រហម និងស—អាចមានន័យជានិមិត្តរូប។ ជាញឹកញាប់ ពណ៌ខៀវត្រូវបានគិតថាជាតំណាងស្ថានសួគ៌ ពណ៌ស្វាយគឺជានិមិត្តសញ្ញាបុរាណនៃរាជវង្ស ពណ៌ក្រហមរំឭកយើងអំពីព្រះលោហិតរបស់ព្រះយេស៊ូវគ្រីស្ទ ហើយជាញឹកញាប់ពណ៌-ស ត្រូវបានប្រើជានិមិត្តសញ្ញានៃភាពបរិសុទ្ធ ។ ការដាក់វាំងននរោងឧបោសថ និងអាវផាយចូលគ្នារបស់សង្ឃ នោះវាអាចដឹកនាំគំនិតរបស់យើងទៅកាន់គំនិតដែលថា វាគឺតាមរយៈព្រះលោហិតរបស់ស្តេចស្ថានសួគ៌ ដែលយើងត្រូវបានធ្វើឲ្យបរិសុទ្ធ ។
ហេតុដូច្នេះហើយបានជាយើងទៅព្រះវិហារបរិសុទ្ធ—ដើម្បីរៀនពីរបៀបដើម្បីទទួលបានអំណាចពេញលេញនៃយញ្ញបូជាដ៏ធួនរបស់ព្រះយេស៊ូវគ្រីស្ទក្នុងជីវិតរបស់យើង ។ យើងរៀនថា តាមរយៈសេចក្ដីសញ្ញា និងពិធីបរិសុទ្ធនៃព្រះវិហារបរិសុទ្ធ និងតាមរយៈព្រះអង្គសង្គ្រោះ នោះយើងអាចរៀបចំខ្លួនត្រឡប់ទៅកាន់ទីវត្តមាននៃព្រះ ដោយស្អាតស្អំ និងបរិសុទ្ធ ។ នៅក្នុងព្រះវិហារបរិសុទ្ធ យើងរៀនអំពីលោកអ័ដាម និងនាងអេវ៉ា និងពីរបៀបដែលពួកលោកត្រូវបានបណ្ដេញចេញពីវត្តមានរបស់ព្រះ និងពីរបៀបដែលពួកគេរៀបចំដើម្បីត្រឡប់ទៅរកទ្រង់វិញ ។ តាមរយៈដំណើររឿងរបស់ពួកលោក យើងរៀនពីរបៀបដែលយើងអាចរៀបចំខ្លួនសម្រាប់ថ្ងៃដ៏អស្ចារ្យនោះ ។ ប្រធាន ដេវីឌ អូ ម៉ាក់ខេ បានមានប្រសាសន៍ថា ព្រះវិហារបរិសុទ្ធ « គឺជាការឡើងមួយជំហានម្តងៗទៅកាន់ទីវត្តមានដ៏អស់កល្បជានិច្ច ។ បើយុវជនរបស់យើងអាចគ្រាន់តែបានយល់ដឹង ពីព្រះវិហារបរិសុទ្ធ នោះវានឹងជាកម្លាំងចិត្តខាងវិញ្ញាណដ៏មានឥទ្ធិពលបំផុតក្នុងជីវិតពួកគេ » ។
ដូច្នេះ ពេលអ្នកទៅព្រះវិហារបរិសុទ្ធ សូមរកមើលព្រះយេស៊ូវគ្រីស្ទ ហើយរកមើលអ្វីដែលអ្នកកំពុងរៀនអំពីការរៀបចំខ្លួនដើម្បីត្រឡប់ទៅក្នុងទីវត្តមានរបស់ព្រះវរបិតាសួគ៌ នោះអ្នកនឹងមានបទពិសោធន៍ដ៏អស្ចារ្យ ។
ស៊ីស្ទើរ វិប ៖តើខ្ញុំអាចឆ្លើយតបនឹងសំណួរ « តើខ្ញុំដឹងថាខ្ញុំត្រៀមខ្លួនជាស្រេចដើម្បីទទួលអំណោយទានរបស់ខ្ញុំ »ដោយរបៀបណាបានទេ ?
ដោយហេតុផលខ្លះ សំណួរនេះបានធ្វើឲ្យខ្ញុំគិតអំពីព្យាការីអ័ប្រាហាំ ។ មានពេលមួយនៅក្នុងជីវិតរបស់អ័ប្រាហាំ នៅពេលដែលលោកមានអារម្មណ៍ថាមានបំណងប្រាថ្នាដ៏បំផុសគំនិតសម្រាប់ពន្លឺ និងចំណេះដឹងខាងវិញ្ញាណបន្ថែមទៀត។ លោកចង់បានទំនាក់ទំនងកាន់តែជិតស្និទ្ធជាមួយនឹងព្រះ ហើយមានសមត្ថភាពកាន់តែខ្លាំងដើម្បីបម្រើទ្រង់ ។ នៅក្នុងអ័ប្រាហាំ ១:២ លោកមានប្រសាសន៍ថា ៖ « ហើយដោយឃើញថាមានសុភមង្គល និងសេចក្ដីសុខសាន្ត និងសេចក្ដីសម្រាកដ៏ធំជាងចំពោះខ្ញុំ ទើបខ្ញុំស្វែងរកព្រះពរទាំងឡាយខាងពួកអយ្យកោ » ។ អ័ប្រាហាំ បានពិពណ៌នាខ្លួនលោកថាជា « អ្នកដើរតាមសេចក្ដីសុចរិត ដោយ ព្រមទាំងមានប្រាថ្នាចង់ធ្វើជាអ្នកដែលមានចំណេះដ៏ធំ ហើយចង់ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង ហើយចង់បានចំណេះដ៏ធំ … ហើយមានប្រាថ្នាចង់ទទួលការបង្គាប់ទាំងឡាយ ហើយចង់កាន់តាមព្រះបញ្ញត្តិទាំងឡាយនៃព្រះ » ។
នេះជារបៀបដែលខ្ញុំបានទទួលអារម្មណ៍ពេលខ្ញុំចាប់ផ្ដើមគិតអំពីការទៅព្រះវិហារបរិសុទ្ធដើម្បីទទួលអំណោយទានពិសិដ្ឋរបស់ខ្ញុំ ។ ខ្ញុំបានចូលរួមយ៉ាងពេញលេញក្នុងការរស់នៅតាមដំណឹងល្អរួចទៅហើយ ។ ខ្ញុំបានរៀនច្រើនណាស់ពីការសិក្សាព្រះគម្ពីររបស់ខ្ញុំ ហើយខ្ញុំបានរីកចម្រើន ហើយបម្រើដោយរីករាយក្នុងវួដរបស់ខ្ញុំ ។ ប៉ុន្តែខ្ញុំមានអារម្មណ៍ស្រេកឃ្លានដើម្បីរៀនបន្ថែមទៀតអំពីព្រះវរបិតាសួគ៌ និងផែនការរបស់ទ្រង់សម្រាប់ខ្ញុំ ។ ការណ៍នេះគឺលើសពីការចង់ដឹងចង់ឃើញ ខ្ញុំមានអារម្មណ៍ចង់រៀនពីរបៀបខិតកាន់តែជិតព្រះ ហើយក្លាយជាសិស្សដ៏ខ្ជាប់ខ្ជួនរបស់ព្រះយេស៊ូវគ្រីស្ទ ។ ខ្ញុំពិតជាចង់ឲ្យព្រះឈ្នះកាន់តែច្រើនក្នុងជីវិតរបស់ខ្ញុំ ។ មិត្តភក្តិជិតស្និទ្ធរបស់ខ្ញុំ និងប៊ីស្សពរបស់ខ្ញុំបានទទួលស្គាល់ថា ខ្ញុំបានត្រៀមខ្លួនដើម្បីចុះសេចក្ដីសញ្ញាក្នុងព្រះវិហារបរិសុទ្ធរួចរាល់ហើយ ហើយបានជួយខ្ញុំក្នុងការរៀបចំខ្លួនដើម្បីទទួលអំណោយទានពិសិដ្ឋផ្ទាល់របស់ខ្ញុំ ។
អែលឌើរ សូរ៉េស ៖ ពិតជាល្អខ្លាំងណាស់ សូមអរគុណយ៉ាងខ្លាំងចំពោះយោបល់ដ៏អស្ចារ្យរបស់ប្អូនប្រុស និងប្អូនស្រី វិប ។ មិត្តសម្លាញ់របស់ខ្ញុំអើយ ដូចជាប្រធាន ណិលសុន បានបង្រៀនថា « ភាពស័ក្ដិសមផ្ទាល់ខ្លួនដើម្បីចូលក្នុងដំណាក់របស់ព្រះអម្ចាស់តម្រូវឲ្យមានការរៀបចំច្រើនខាងវិញ្ញាណផ្ទាល់ខ្លួនម្នាក់ៗ ។… ភាពស័ក្ដិសមផ្ទាល់ខ្លួនរបស់បុគ្គលម្នាក់ៗតម្រូវឲ្យមានការផ្លាស់ប្រែចិត្តជឿទាំងស្រុងទាំងក្នុងគំនិត និងដួងចិត្តដើម្បីប្រែក្លាយកាន់តែដូចជាព្រះអម្ចាស់ … ជាគំរូល្អប្រសើរ និងជាមនុស្សកាន់តែបរិសុទ្ធ » ។ ដូច្នេះ បើយើងផ្ដោតដោយសុចរិតលើការរៀបចំខ្លួនរបស់យើងដើម្បីចូលព្រះវិហារបរិសុទ្ធ នោះយើងនឹងផ្លាស់ប្ដូរបទពិសោធន៍របស់យើងនៅក្នុងព្រះវិហារបរិសុទ្ធ ដែលនឹងផ្លាស់ប្តូរជីវិតរបស់យើងនៅខាងក្រៅព្រះវិហារបរិសុទ្ធផងដែរ ។