Bainier ro ilo Aolep Āne
Geoffroy Koussemou
Mijenede eo m̧oktata jān Benin
Géoffrey ekar jeļā bwe Anij ekar m̧ōņōņō in kōm̧m̧ane ijo koņaan.
Géoffrey ekar diwōjļo̧k jān kūlaaj eo an ipāān eo jeran Théodore. Ļaddik rein aolep ekar 16 iiō dettaer, im raar pād ilo Benin, juon laļ in Africa. Rekar etal n̄an juon jikuuļ kāāl im katak kōn ekkat. Ekar juon de kōttan aer jokwe ilo ijoko ettoļo̧k jān baam̧le ko aer. Rekar aikuj in jipan̄ im jerbal awa ro re aitok aolep raan.
Geoffrey ekar kōņake backpack eo an n̄an ioon airan. “Ij ļōmņak imaron̄ joļo̧k aō kūlaaj. Elukkuun pen kūlaaj kein.”
“Jaab!” Théodore ekar ba. “Jab joļo̧k am̧ kūlaaj. Kwoj aikuj likūt am̧ tōmak ioon Anij. N̄e kwonaaj, kwonaaj wōnm̧aanļo̧k.”
Naan ko an Theodore rekar pād wōt ippān Geoffrey n̄an jem̧ļo̧k in raan eo. Geoffrey ekar dik im rūttoļo̧k juon Christian, ak ejan̄in lōke Anij. Ekar bukwelōlō ioon laļ im kar jino jar. Ekar mijak. Ak n̄e enkar jab bōk an jipan̄ jān juon jikin, eban kar maron̄ pass e kūlaaj ko an. Geoffrey ekar jino jilo̧k bōran.
“Jema Ilan̄, ekar ba, “jouj im kwaļo̧k tok wāween aō lōke eok. Komaron̄ ke jouj im jipan̄ eō pass e kūlaaj kein aō? Ij kallim̧ur bwe in jerbal n̄an eok jon̄an wōt aō maron̄ n̄an jem̧ļo̧k in mour in aō.”
Jān ien eo, Geoffrey ekar en̄jake an kajoorļo̧k im ekar lukkuun kōņaan wōnm̧aanļo̧k. Ekar pen wōt kūlaaj ko, ak ekar jeļā ke Anij ekar m̧ōņōņō in jipan̄ e n̄e enkar kōm̧m̧ane ijo kunaan. Geoffrey ekar likūt aolep an mijak im buuļ jerbal.
Ekar em̧m̧an an jikuuļ. Jon̄oul ruwalitōk allōn̄ ko tokālik, lein ekar āliktata pojak n̄an kadiwōjļo̧k. Ekar tobrak!
Elikin an etal jen jikuul, Géoffrey ekar buul jerbal wōt. Innem ekar make wōr an jikin kallip.
Innem juon raan ekar loe juon mōttan im ekar uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata. Eo jeran ekar leļo̧k juon Bok in Mormon. Geoffrey ekar riiti Bok in Mormon eo im kar jar. Ekar en̄jake māņāān im aenōm̧m̧an tu lowa im jeļā ke m̧ōnjar eo ekar m̧ool.
Ekar jeļā ta eo en bar kōm̧m̧ane. Ekar jerbal, jar, im lōke Anij. Jinoin ekar peptaij. Innām̧ ļein ekar kwaļo̧k naan in kam̧ool eo an ippān ro ipeļaakin. Jet iaan ro m̧ōttan rekar bar peptaij. Ta eo ekar jino āinwōt juon group jidikdik in membōr ro ekar erom̧ juon group eo eļap. Ekar jipan̄ m̧ōnjar eo eddōkļo̧k ilo Benin!
Geoffrey ekar kōņaan etal ilo juon mijen. Ekar jabwe jāān ippān, im ekar wia kake jikin kallip eo an. Ālkin jet allōn̄ ko tokālik, ekar bōk juon call in mijen n̄an Ivory Coast. Ekar mijenede eo jinoin tata jān Benin im ekar bōk call in mijen!
Niknik eo an ekar jipan̄ e elōn̄ iiō ko. Kōn tōmak eo an, im an membōr ro jet, elōn̄ļo̧k armej rekar peptaij. Branch eo an ekar erom̧ juon ward. Ward eo an ej kiiō m̧ōttan juon stake ilo Benin!
Geoffrey Koussemou ej etal wōt ilo an buuļ jerbal im lōke Anij. Ejeļā ke elōn̄ men ko rem̧m̧an remaron̄ waļo̧k kōn jipan̄ eo an Anij. ●
Kōmeļeļe ko jān Isabel Muñoz