Kūr eo an Pein Jipan̄ ko

Komaron̄ Jipan̄ Āinwōt Jisōs!

Jān Būreejtōnji eo Eutiej an Būraimere

Sister Joy D. Jones

Sister Lisa L. Harkness

Sister Cristina B. Franco

Ke Jisōs ekar pād ioon laļ in, E ekar jipan̄ aolep ro E ekar lo. E ekar naajdik ro raar kwōle. E ekar kaenōm̧m̧an ro raar būrom̧ōj. E ekar katakin aolep gospel eo An. Jisōs ekar kajjitōk ippād n̄an ļoor E. N̄e jej peptaij, jej kallim̧ur n̄an kajjieon̄ n̄an kōm̧m̧ane ta eo E ekar kōm̧m̧ane.

Rainin elōn̄ armej ro ilo laļ in rej aikuji jipan̄ eo ad. Jet rej ajimakeke. Jet rej kwōle. Jet rej aikuj em̧m̧akūt jān kapijukenen ko aer. Jet rejjan̄in de ron̄ kōn gospel eo. Kajjojo iaad emaron̄ kōm̧m̧ane juon men n̄an jipan̄.

Ta eo Pein Jipan̄ ko Ami Remaron̄ Kōm̧m̧ane

Ajri ro remaron̄ ukōt laļ in kōn būruōn iakwe ko aer im pein jipan̄ ko aer. Enan̄in 100 iiō kok remootļo̧k, ajri in Būraimere ro raar jipan̄ kalōk juon aujpitōļ ilo Salt Lake City, Utah, USA. Aolep wiik, raar ebbōkļo̧k jāān kōba ko n̄an aujpitōl eo ekāāl. Ke ekar peļļo̧k ilo 1922 eo, kar ba etan Primary Children’s Hospital. Ej kōnke ajri ro raar jipan̄ kalōke, jidik kōn jidik.

Ilo am̧ reitok reitak, kwonaaj lo elōn̄ armej ro kom̧ maron̄ jipan̄ er. Komaron̄ kwaļo̧k gospel eo kōn wāween am̧ mour im jerbal n̄an ro jet. Komaron̄ jipan̄ er en̄jake iakwe eo an Jemādwōj Ilan̄.

Juon Kūr n̄an Jipan̄

Iiō in kōmij kajjitōk ippāmi n̄an kōjerbal būruōn iakwe ko ami im pein jipan̄ ko ami n̄an jipan̄ ro jet. En̄jake m̧ōņōņō eo ewōr ippam̧ n̄e kwoj jipan̄ juon ej itok jān Jetōb Kwojarjar. Ej kōm̧m̧an am̧ jeļā bwe Jemedwōj Ilan̄ ej lukkuun m̧ōņōņō kōn kijejeto ko am̧!