Raan eo Jinoin an Jaechan
Ekar ke iaļ eo ejim̧we in? Jaechan ekar en̄jake eļap tarpok.
“Ikar pukot e Irooj, im ekar ron̄ ainikiō” (Sam ko 34:4). Bwebwenato in ej bōk jikin ilo Gyeonggi-do, South Korea.
Al in m̧ōņōņō eo ekar jan̄ ke Jaechan im Jinen rekar jutak jān jikin jijōt ko aer ilo gym eo an jikuuļ. Bwijin bujāān̄ ko remeram raar etoto idipinm̧weo ilo an ajri ro jet im ro jinier ekōnono ilo aer lo̧udin̄din̄.
Ilju ekar raan eo im̧aantata in jikuuļ, im ilo South Korea rijikuuļ kāāl ro aolep iien raar etal n̄an juon būrookraam̧ ejenolo̧k n̄an kam̧ōņōņōik jinoin jikuuļ. Ke ekar ron̄jake al ko im jipikōr ko Jaechan ekar en̄jake lo̧udin̄din̄. Ejjab maron̄ in kar kōttar n̄an jino ekkatak!
Ālkin būrookraam̧ eo, Jinen im Jaechan raar etetal ilo im̧ōņ jikuuļ eo. Ke rekar tōbar kūlaaj ruum̧ eo, Jaechan ekar ioon rūkaki eo an. Liin ekar āinwōt lukkuun em̧m̧an.
Tokālik Jinen im Jaechan raar diwōjļo̧k n̄an okmāņāān in meram in aļ in jibriin̄ eo. Aaet aļ im mejatoto eo raar āinwōt m̧ōņōņō kōn ijjino an jikuuļ.
Jibbon̄ōn eo tok juon, Jinen ekar etetal ippān Jaechan n̄an oror eo an jikuuļ. Eaar lukkun atbokwoje. “Ij iakwe eok,” ekar ba. “En juon raan in jino eo em̧m̧an.”
“Inij,” Jaechan ekar ba. “Ij bar iakwe eok!” Ekar kōjelle pein bar iakwe im kar oktaklo̧k n̄an etal n̄an kūlaaj ruum̧ eo an, ejja āinwōt aer kar kōmālmel.
Ilo an Jaechan kar etetalļo̧k ilo m̧weo, ekar jino inepata. Ej ke iaļ eo ejim̧we in? Jaechan ekar bōjrak im kar reitok reitak. Ekar oktakļo̧k im etal ilo juon em̧ eoktak. Ejjab to aolep men raar kapokpok.
Jaechan ekar kanooj bōk kūtuwōn. Ekar jeļā ekar pād ilo m̧wiin inne. Ekar etetal wōt im etal ilo ruo kōjām ko reļļap.
Bōtaab Jaechan ekar jab loe kūlaaj ruum̧ eo an, ippān tebōl ko im ro jeran im rūkaki eo an em̧m̧an. Ekar loe gym eo. Im kiiō ekar ejjeļo̧k juon armej ak bujāān̄ ko. Ekar juon ruum̧ eo ejjeļo̧k kobban.
Dān in kōmejaaļaļ ekar kobrak mejān Jaechan. Ekar kajjieon̄ in jab kor, bōtaab ekar mijak. Ekar jab jeļā wāween an kappukōt kūlaaj ruum̧ eo an. Ekar bukwelōlō n̄an jar. “Jemedwōj Ilan̄, Ijōbwābwe. Jouj jipan̄ Jinō bwe en itok im lo eō im jipan̄ eō bōkļo̧k n̄an kūlaaj eo aō.”
Jaechan ekar jerkak lōn̄ļo̧k. Ekar bōk jet alen an bōk kūtuwōn. Innām ekar kōttar.
Ālkin jejjo minit ko tokālik, Jinen ekar itok ilo kona eo. “Jaechan!” Liin ekar ettōrļo̧k n̄an ippān im keeņļo̧k n̄an ippān. “Ta eo ear waļo̧k?”
Jaechan ear kajju jan̄. Elukkuun kar em̧m̧an an mour ke ej loe Jinen. “Ikar jab maron̄ loe kūlaaj ruum̧ eo aō,” ekar ba. “Im ikar jar bwe kwon maron̄ itok im pukōt eō.”
Jinen ekar irļo̧k dān in kōjemaaļaļ ko jān jepān. “Ij m̧ōņōņō kwaar kōm̧m̧ane juon jar,” liin ekar ba. “Ikar pād ilo iaļ eo aō n̄an m̧weo. Innām ekar wōr juon aō en̄jake bwe ij aikuj bar ro̧o̧l liktak im kanooj lale kwaar lo ke kūlaaj ruum̧ eo am̧. Ke kwokar jab pād ie, ikar pukot eok aolep jikin. Innām ikar loe eok!”
Jaechan ekar jibwe pein Jinen ke raar etetal ilo hallway eo ejim̧we. Jaechan ekar bōjrak an jan̄. Ekar jeļā bwe Jemedwōj Ilan̄ ekar uwaake jar eo an, im aolep men raar EMMAN. Ke raar tōparļo̧k kūlaaj ruum̧ eo, ekar ron̄ an ajri ro jet ilowaan ettōn̄ im limo.
“Jaechan! Kōm kanooj in m̧ōņōņō in lo eok,” rūkaki eo an Jaechan ekar ba ke ekar deļo̧n̄ļo̧k.
“Kom̧m̧ool,” Jaechan ekar ba kōn juon badikdik edik. Ekar leļo̧k n̄an Jinen bar juon atbakwōj. Enaaj juon raan eo kein kajuon in jikuuļ em̧m̧an ālkin men otemjej.
Meļeļe ko jān Shane Clester