Ittiņo ko im Kabwilōn̄ ko
Rijeje eo ej jokwe ilo Iowa, USA
Ekar ke jim̧we n̄an dāpij ittiņo?
“Jetōb in Kraist em̧ōj leļo̧k e n̄an aolep armej, bwe en maron̄ jeļā em̧m̧an jān nana” (Moronai 7:16).
“A, lale!” Kate ekar kotak lōn̄ļo̧k juon to̧ļe peba enukjōkjōk jān būļoor eo ilo m̧ōn wia eo. “En̄eo, likūt ilo bōjo̧ eo am̧.”
“Kwoj kōņaan ke bwe in bōke?” Maddy ekar kajjitōk.
“M̧ōn wia eo ejjab maron̄ wia kake,” Kate ekar ba. “Rekar joļo̧ke ilowaan jokbej eo. Menin ej juon mijen in lo̧mo̧o̧ren. Jenaaj kōjparok to̧ļe in!”
Kate ekar ettōn̄ dikdik n̄an Maddy. Maddy ekar bar ettōn̄ dikdikļo̧k n̄an e.
“EM̧M̧AN.” Maddy ekar pāinļo̧k to̧ļe peba eo n̄an lowaan bōjo̧ eo an. Ekar en̄jake en̄jake āinjuon bwe emaron̄ pād ilo juon mijen in lo̧mo̧o̧ren!
Ekab wōt, ke raar diwōjļo̧k jā m̧ōn̄ wia eo, to̧ļe peba eo kar en̄jake an eddo āinwōt juon dekā ilo bōjo̧ eo an. Ej ke ta eo juon jerbal in lo̧mo̧o̧r ekar aikuj in en̄jake in?
Ke raar ro̧o̧l n̄an m̧ōn Maddy, Kate ekar kōkm̧anm̧an an tepe im kōjeprak to̧ļe peba eo jon̄an eo em̧m̧an tata emaron̄ in kar.
“Ta kain nuknuk ko ij aikuj in kōm̧m̧an n̄an e?” liin ekar kajjitōk, bōk juon kein kōļar. “Akō juon bo̧o̧ļ gown aiboojoj?”
Maddy ekar em̧ajidjid ilo kijooror. “Innām jemaron̄ kwaļo̧k n̄an m̧am̧a!”
“Jaab! Jejjab maron̄ ba n̄an n̄an jabdewōt,” Kate ekar ba. “Jaab ļo̧k wōt n̄an jidik. Ej juon ad menin ittiņo, EM̧M̧AN? Kallim̧ur n̄an eō kwoban ba.”
“O … EM̧M̧AN. Ij kallim̧ur,” Maddy ekar ba. “Bōtaab etke jejjab maron̄ bal?”
“Eļan̄n̄e kwoj ba, jinōm̧ enaaj illu, im emaron̄ in jab kōtļo̧k arro ikkure ippān doon ļo̧k wōt n̄an jidik.”
“Etke enaaj illu?” Maddy ekar kajjitōk. Lo̧jien liin ekar en̄jake an m̧ōm̧akūtkūt im ikūm̧kūm̧.
Kate ej door laļļo̧k kein kōļar eo. “Eļan̄n̄e kwoban ba, Inaaj kōtļo̧k am bōk to̧ļe eo im aolep nuknuk ko ikar jin̄aik n̄an e.”
Kiiō Maddy ekar jeļā etke ekar en̄jake lukkuun in ikūm̧kūm̧. “Kōj … jaar ko̧o̧te, jaar ke?” liin ekar unoojdikdik.
“A, kwe eo kwar pāinļo̧k lowaan bōjo̧ eo am̧ im kar diwōjļo̧k jān m̧ōn wia eo.”
“Kōnke kwar jiron̄ eo n̄an kōm̧m̧ane!”
“Ikar jab!” Kate ekar ba. “Ij ro̧o̧l n̄an m̧weo m̧okta jān am̧ kōm̧m̧an bwe in pād ilo jorrāān.” Liin ekar jutak im ettōr nam̧ōjļo̧k.
Ilo iien eo wōt me M̧am̧a ekar itok n̄an ruum̧ eo. “Ekte Kate ekar diwōjļo̧k ilo an ekairir?” Liin ekar lo to̧ļe peba eo ilo pein Maddy. “Im ia in ekar itok jān e?”
Maddy ekar kūj tien. Liin ekar jab em̧m̧an an en̄jake kōn dāpij wōt juon men ittiņo jān M̧am̧a. Bōtaab ta eļan̄n̄e Kate ekar jim̧we im M̧am̧a ekar illu?
En̄jake in ikūm̧kūm̧ eo ilo lo̧jien ekar kab jako. Liin ekar bōk kūtuwōn im kar ba ilo ejjeļo̧k kōlaborbor aolepān bwebwenato eo.
“Kate ekar jiron̄ eō n̄an kallim̧ur n̄an dāpij wōt juon men ittiņo,” liin ekar ba. “Bōtaab ekar juon en̄jake ebōd.”
M̧am̧a ekar jijet turin ioon jikin kiki eo an. “Enan̄in aolep men ittiņo rebōd. Eļap tata eļan̄n̄e kar jiron̄ eok n̄an jab wōt n̄an jidik jiron̄ jabdewōt. Ilo bar juon wāween, juon menin kabwilōn̄, āinwōt juon menin leļo̧k ak badre, emaron̄ in juon men em̧m̧an. Ej juon men n̄an kam̧ōņōņō n̄an aolep.”
Maddy ekar em̧ajidjid. “Kom̧m̧ool kōn am̧ jab illu ippa,” liin ekar ba. “Kate ekar ba kwonaaj kar.”
M̧am̧a ekar kanooj atbakwoj e. “Ij lukkuun utiej būruō kōn kwe kōn am̧ ron̄jake Jetōb Kwojarjar eo im jiron̄ eō m̧ool eo.”
“Kwonaaj ke ettōrļo̧k kake eō n̄an m̧ōn wia eo n̄an kōro̧o̧lļo̧k to̧ļe eo?” Maddy ekar kajjitōk.
“Aaet!” Jinen eaar ettōn̄ dikdik. “Im ke kōm kar bar jepeļaakļo̧k, komaron̄ ke jipan̄ eō kōm̧m̧ane juon keek n̄an kabwilōn̄ Baba.”
Maddy ekar ettōn̄. “Kiiō ej juon men eo imaron̄ en̄jake em̧m̧an kake”
Kōmeļeļe ko jān Devin McSherry