Bainier ro ilo Aolep Āne
Vaha’i Tonga
Waanjon̄ak ilo Tonga
Rijeje eo ej jokwe ilo Waikato, New Zealand, im Utah, USA.
Vaha’i ekar jar wōt, im juon raan ekar oktak.
Vaha’i ekar bukwelōlō turin jikin kiki eo an im ba jar ko an. Ekar bon̄ōn eo an jino in tata ilo jikuuļ eo, im ekar jere juon ruum̧ ippān elōn̄ bar jet ļaddik. Ejjeļo̧k iaer raar membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata, āinwōt kar e.
“Jemedwōj Ilan̄ Jitōnbōro …” Vaha’i ekar jino jar eo an ilo būruwōn. Ak ekar jab pidodo. Ļaddik ro jet raar ekōnono im koļap aer ettōn̄.
“A, lale!” juon iaan ro ro rej jokwe ilo ruum̧ an, Akau, ekar ekkeļo̧k. “Ej jar!”
Vaha’i ekar jab em̧m̧an an en̄jake. Ekar jeļā Akau ekar kōm̧m̧an kōjak kake e. Bōtaab ekar etan ke ejjab ron̄jake e. Eļakkar jar wōt.
Ke Vaha’i ilo jino ekar ekkatak kōn gospel eo, ro jibūn im jim̧m̧an ekar ļap aer bar dike Kabun̄ in. Vaha’i ekar etal n̄an Būraimere ippān ļeo wulipen ak ro m̧ōttan.
Ke ekar tōpar 12 ekar jokāālet n̄an peptaij. Ro jibūn im jim̧m̧a raar jab kanooj m̧ōņōņō ilo jino in. Innām būbū ekar ba, “Jān kiiō m̧aanļo̧k, kwoj juon membōr in m̧ōn jar jab eņ. Kōm kōņaan bwe kwon pād wōt ilo tiljek.”
Kiiō ke Vaha’i ekar pād ettoļo̧k ilo jikuuļ, ekar jōk ippān n̄an kōm̧m̧an āindein. Kōn menin ekar jar wōt. Jekdo̧o̧n n̄e ro ļaddik ro jet raar kōm̧m̧an kōjak kōn e.
Juon bon̄ ke Vaha’i ekar bukwelōlō, ekar ron̄ juon men eoktak.
“A, jab keroro! Vaha’i ej jar,” juon ekar ba.
Vaha’i ekar kadedeļo̧k jar eo an im kar kōpeļļo̧k mejān.
Akau ekar jijet ioon jikin kiki eo an. “Ej lukkuun aorōk n̄an kwe, ej ke?”
Vaha’i ekar em̧ajidjid. “Aaet, ej.”
Ālkin men eo, ļaddik ro raar ikōn̄ jabdewōt iien Vaha’i ekar jar. Ejjab to Akau ekar jino bukwelōlō ippān. Ļaddik ro jet raar kobaļo̧k barāinwōt. Āliktata, aolepān ļaddik ro ilo ruum̧ eo raar bukwelōlō n̄an jar ippān Vaha’i kajjojo bon̄.
Vaha’i ekar en̄jake m̧ōņōņō. Ejjan̄in kar kōm̧m̧an jar an baam̧le ilo m̧weo im̧ōn. Bōtaab kiiō emaron̄ kōm̧m̧an jar an baam̧le ippān rijikuuļ ro m̧ōttan!
Juon raan Vaha’i ekar wōr juon an ļōmņak. Juon kweilo̧k eļap an Kabun̄ in ej pojān kōm̧m̧an. Emaron̄kar kaurwaineneik ro m̧ōttan!
Ālkin jar, Vaha’i ekar juon ro aolep kōn kweilo̧k eo. “Ekar ņa etan kweilo̧k eo eļap an district,” ekar ba. “Armej ro rej itok n̄an ekkatak kōn Jisōs. Kom̧ maron̄ aolep itok, eļan̄n̄e kom̧ij kōņaan!”
Kōn aer naaj kar ilo̧k jān jikuuļ eo n̄an etal n̄an kweilo̧k eo, kajjojo ļaddik ro raar aikuj jaini juon peba n̄an bōk mālim. Vaha’i ekar ļo̧kjeņ an ke ekar lo peba eo. Ekar wōr 77 āt ko ilo laajrak eo!
Būruwōn Vaha’i ekar okmāāņeņ ke ekar jijet ippān rijikuuļ ro m̧ōttan ilo jea ko im kar ron̄jake ekōnono ko ilo kweilo̧k eo eļap. Akau im jet iaan ro jet kar en̄jake okmāāņeņ itulowa barāinwōt. Ilo jem̧lo̧k in kweilo̧k eo eļap, jiljilimjuon iaer raar kōņaan peptaij.
Bon̄ōn eo ālkin jar eo ippān ro m̧ōttan, Vaha’i ekar kōm̧m̧ane juon jar an make. “Kom̧m̧ool kōn kōjeraam̧m̧an eō kōn ro m̧ōtta rem̧m̧an,” ekar jiron̄ Jemedwōj Ilan̄., “Im kōn jipan̄ eō erom juon waanjon̄ak em̧m̧an.”
Tonga ej ejaak in enan̄in 170 āne ko ilo Lom̧ao in Pacific.
Rainin, jiljin in 10 armej in Tonga rej membōr in Kabun̄ in.
Tonga kar jeļā kake āinwōt “Āne ko Rejouj.”
Vaha’i im lio pāleen, Sela, raar ripālele ro m̧oktata n̄an kar liāp ilo Hamilton New Zealand Tampeļ eo.
Ekar jerbal āinwōt būreejtōņ eo an Nuku’alofa Tonga Tampeļ eo.
Ekar juon rūkaki ilo Liahona College eo, juon high school ilo Tonga an Kabun̄ in.
Naan in kōmeļeļe ko jān Susan Keeter