Tii ke Man̄ko Juuj?
Rijeje eo ej jokwe ilo California, USA.
Bwebwenato in ekar bōk jikin ilo Taiwan.
“Etke kwojjab kōņaan tii?” Jiro ekar kajjitōk.
”Stand for the right” (Children’s Songbook, 159).
Chung ekar etetal laļ ilo iaļ eo epoub ilo Taiwan. Eo m̧ōttan Jiro ekar epaake turin. Armej rekar pād aolep jikin! Rikaikukjuj ro raar lali nuknk ko rej wōtlo̧k kaki, ajri ro raar ikkure ikkure ko, im armej ro raar ekairir kōn aer kōnono ilo talboon ko aer. Chung ekar kanooj dāpij pāāk in jikuuļ eo an n̄an kanooj lale bwe ej jab kotļo̧ke.
“Ijjab tōmak iiō in jikuuļ eo enan̄in de jem̧lo̧k!” Chung ekar koļap an ba bwe Jiro en maron̄ ron̄.
“Ijeļā! Ikijooror bwe en dedeļo̧k kūlaaj ko aō,” Jiro ekar ba.
Chung im Jiro raar eļļāļo̧k jān juon jikin wia me ekar wia kake aolep kain m̧ōn̄ā ko. Dragon leen wōjke ko im strawberry ko. Ainikien dumpling ko rej kōmat. Peanut ice-cream roll ko., Nām eo ekar enno aolep jikin! Bōtaab men eo de eo Chung emaron̄ kar ļōmņake ekar ewi jon̄an bwil im eddāp ekar en̄jake.
“Aō en̄jake ej āinwōt ij pād ilo juon um̧!” Chung ekar ba.
“Bar n̄a,” Jiro ekar ba. “Jen tōn wia jet nimed dān ko.”
Raar jibadōkļo̧k juon jikin wia erōōjļo̧k kōn kōļar in dān ko an.
Jiro ekar rebōjo̧iktok jet jāān. “Ruo boba tii, jouj.”
Chung ekar jeļā bwe tii ekar ņae Naan in Mālōtlōt. “Lo m̧oo, imaron̄ ke bōk juon man̄ko juuj?” ekar kajjitōk.
Jiro ekar oktakļo̧k im kalimjōk Chung. Lo̧jien Chung ekar ikūm̧kūm̧ Jiro ekar ļōmņak ekar kōjak kōn an jab wia tii?
Kōrā eo ekar leļo̧k boba tii m̧ōļo eo n̄an Jiro im juon man̄ko juuj n̄an Chung. Innām ļaddik ro raar bar etetalļo̧k n̄an iaļ eo n̄an m̧ōko im̧wer.
Jiro ekar kōm̧m̧an ainikien an idaak. “Etke kwojjab kōņaan tii? Ekanooj in em̧m̧an!”
Chung ekar kij tien. “U, ijjab idaak tii.”
“Etke kwojjab”
Chung ekar ļōmņak kōn ekōjkan an uwaake kajjitōk eo. Mijenedd ro raar katakin e kōn Naan in mālōtlōt. Ilo Būraimere kūlaaj ekar ekkatak bwe kōjparok Naan in Mālōtlōt ekar jipan̄ e bōk Jetōb Kwojarjar eo ippān.
“Ij tōmak ilo Anij, im E ekōņaan bwe in kōjparok ānbwinū. E ej kajjitōk bwe in jab idaak tii ak kope ak kadōk,” Chung ekar ba.
“Ekōjkan am̧ jeļā?” Jiro ekar kajjitōk.
“Ikar ekkatak kake ilo m̧ōn jar eo.”
Jiro ekar bar bōk juon kōlo̧k in dān eo nimen. “Āinwōt ekōjak. Ti wōt menņe! Eban kōmetak eok.”
Lo̧jien Chung ekar āinwōt eobrak kōn būro̧k ko rej ekkāke. Ekōjkan an maron̄ kar jipan̄ Jiro meļeļe? Bōlen juon ilo m̧ōn jar eo emaron̄ kar jipan̄ e kōmeļeļeik n̄an Jiro.
“Kwoj kōņaan ke itok n̄an m̧ōn jar eo ippa juon iien? Ij etal n̄an Kabun̄ eo an Jisōs Kraist im Armej ro Rekwojarjar ilo RaanKo Āliktata Kwoj maron̄ ekkatak kōn Anij im Jisōs Kraist.”
Jiro ekar ļōmņak ium̧win jidik iien. “Ijjab ļōmņak imaron̄.”
“EM̧M̧AN,” Chung ekar ba. Ekar en̄jake jidik būrom̧ōj bwe Jiro ekar jab kōņaan etal n̄an m̧ōn jar eo ippān. Bōtaab eļakkar wōt m̧ōņōņō ekar kwaļo̧k naan in kam̧ool eo an.
Tokālik ilo week eo ilo jikuuļ, rūkaki eo an Chung, Mr. Lin, ekar kūr bwe ren reilo̧k. “Ilju ej raan eo āliktata in kūlaaj. Kōnke aolep rekar buuļ jerbal ilo iiō in, ewōr juon aō kein kabwilōn̄. Jenaaj aolep idaak boba tii!”
Aolepān kūlaaj eo rej em̧ōņōņō. Aolep ijello̧kin wōt Chung. Ekar pir laļļo̧k ilo jea eo an. Jiron̄ rūkaki eo an bwe ejjab idaak tii enaaj kar em̧ool penļo̧k wōt jān jiron̄ Jiro! Aolep renaaj kar ļōmņak bwe ekar kōjak, ejja āinwōt kar Jiro.
Jiro ekar kajutak pein. “Mr. Lin? Chung ejjab idaak tii. Ej juon kakien ilo kabun̄ eņ an. Emaron̄ ke idaak juon man̄ko juuj ijello̧kin?
Mr. Lin ekar oktakļo̧k n̄an Chung. “Ej ke m̧ool, Chung?”
Chung ekar em̧ajidjid.
Mr. Lin ekar ettōn̄ dikdik. “EM̧M̧AN. Inaaj wōrtare juuj eo nim̧ōm̧ ijello̧k.”
Ālkin jikuuļ, Chung im Jiro rekar etetal laļļo̧k n̄an mōko im̧wer ippān doon. “Kom̧m̧ool kōn an kar kōm̧m̧ane men eo,” Chung ekar ba.
Jiro ekar ettōn̄ dikdik. “Kwoj m̧ōtta. Eļan̄n̄e juon ej aorōk n̄an kwe, innām ej aorōk n̄an n̄a.”
Pija ko jān Melissa Manwill