iTokani ki na iTokani
Vakila na Vakacegu
Mai na veivakatarogi vata kei Lucy Stevenson Ewell.
Ena dua na mataka niu se qai yabaki 11, au yadra cake ka rogoca na veivosaki ena loma ni vale. E sega ni dua a lako mai me vakayadrati au meu laki vuli me vaka era dau cakava. Niu sa gole yani meu raica na cava e yaco tiko, au qai kila ni sa mate o tamaqu.
Ni ratou sa veivosaki tiko na noqu matavuvale ena loma ni vale, au a lako ki na neitou iteitei. E ka levu na neitou iteitei, au dau cakacakavata kei tamaqu meu vukea na kena qaravi. Au a dabe sobu ena idabedabe ena ruku ni vunikau ka tagi. Au rarawa dina ka veilecayaki.
Ni oti e vica na miniti, au raici noqu qasenivuli ni Lalai ni dolava na matamata. A lako mai ka mai dabe e yasaqu ena idabedabe ka kaya, “Joni, o nanuma tiko beka na noda lesoni ni Sigatabu sa oti me baleta na ituvatuva ni veivakabulai?” A vakamacalataka tale vei au o noqu qasenivuli ni keda ituvaki sa buli me dua na yalo kei na yago. A kaya ni yaloi tamaqu e sa tiko ena dua na vanua vinaka, ka dua na siga ena tucaketale o koya. Dua na siga au na raici koya tale.
E dina ga niu se rarawa tikoga, au vakila na vakacegu. Au nanuma na vakacegu o ya ena veigauna au vakasamataka kina na ka au sotava o ya. Ena nona veiqaravi na noqu qasenivuli ni Lalai, a vakacegui au na Yalo Tabu. E vukea me tarai cake na noqu ivakadinadina me baleta na loloma ni Tamada Vakalomalagi kei na ituvatuva ni veivakabulai.
Se cava ga na ka o lako curuma tiko, e kauwaitaki iko na Kalou. E sega ni gadrevi mo dua na uabula mo vakila kina na Yalo me tukuna ni na vinaka na veika kece. E rawa ni o tara cake e dua na ivakadinadina ni ituvatuva nei Tamada Vakalomalagi. E rawa ni o vakila na vakacegu.
Droinitaka o Arthur Lin