iTokani Vou
E vakaitikotiko mai Utah, Amerika, o koya e vola.
E sega ni kila o Brigit na vosa vaka-Sipeni. Ena sotava vakacava e dua?
“Au a vulagi, ka ni a kauti au ki vale” (Maciu 25:35).
E sarasara o Brigit mai na katubaleka ni motoka ni ratou draiva vakavuvale yani ena gaunisala qiqo e Caracas, Venezuela. Era serau mai na veivale roka ramase kei na veiulunivanua lelevu drokadroka. Sa dua dina na vanua totoka. Erau kaya o Na kei Ta ni bula eke ena dua na cakacaka qaqa vou.
Ia a lomaleqa tikoga o Brigit. Nikua sa imatai tiko ni gauna me ratou laki lotu ena nodratou matanitu vou.
A vuki o Na vei Brigit. “O vinaka tiko, lewa?” a taroga. “E rairai vaka o sega tiko ni bula vinaka.”
A qilia o Brigit na ligana. “Au rere. Au sega ni rawa ni vosa vaka-Sipeni. Meu na veitokani vakacava?”
A taura yani o Na na ligai Brigit. “Au kila ni o lomaleqa. Ia ena vinaka na ka kecega. Mo cegu mada vakatitobu.”
A raica sobu o Brigit na ligana. E vakilai kina na batabata, dina ga ni katakata tu e tuba. A totolo sara na pamu ni utona, ka veilecayaki na ketena ni sa yacova yani na motoka na ikelekele ni motoka ni lotu. Ena vakacava beka na lotu? Ena kila beka o koya e dua na ka?
Ni curu yani ki valenilotu, a vakila o Brigit ni vaka e dua na vulagi. A raici ira wavoki na veimatavuvale eso, ni ra vosa kece tiko vaka-Sipeni. Qai raici rau sara e rua na goneyalewa rau vakatoka na nona yabaki ni bula.
Ena gauna ga erau raici Brigit kina na goneyalewa, rau sa cici yani vua. Rau a vosa vakatotolo ena mamarau, ka matadredredre vakalevu.
Ia a sega ni kila rawa e dua na ka erau kaya. Rau na lako tani beka ni rau sa kila niu sega ni vosa vaka-Sipeni? a vakasamataka.
A cegu levu sara o Brigit. “No hablo español,”a kaya, ka kurea na uluna. “Au sega ni vosa vaka-Sipeni.” Sa tekivu tonawanawa na matana.
Rau a vakatutaba ka matadredredre vakararama cake sara. A dusi koya e dua na goneyalewa ka kaya, “Dayana.” A qai dusi koya na goneyalewa kadua ka kaya, “Andrea.”
Sa tekivu me waicala yani na lomaleqa nei Brigit. A matadredredre vei rau na goneyalewa ka dusi koya. “Brigit.”
Rau a qai dabe tikivi Brigit o Dayana kei Andrea. Rau a vakavulica vua na ivakarau me cavuta kina na “ivolanikalou” ena vosa vaka-Sipeni kei na vica tale na vosa. Ni sa tekivu na soqoni ni sakaramede, a vakila na yaloi Brigit na katakata vinaka kei na vakacegu.
Ni oti na Lalai, eratou a laki dabe toka ena veico ena taudaku ni lotu o Brigit kei rau na nona itokani vou ni ratou veitalanoa tiko na nodratou itubutubu. Rau a vakavulica o Dayana kei Andrea vei Brigit eso tale na vosa vaka-Sipeni. Qai dusia o Dayana e dua na vunikau ka taroga, “¿Inglés?”
A matadredredre o Brigit ka dusi talega. “Vunikau,” a kaya. A ramase na matana ka dusia na veika tale eso, ka cavuta na vosa vaka-Valagi. Rau a tokaruataka o Dayana kei Andrea na vosa Vakavalagi. Rau a qai vakavulici Brigit me cavuta vakacava ena vosa vaka-Sipeni. A vulica o Brigit na veimataqali vosa veivukei kece, me vaka na libro (ivola) casa (vale), kei na coche (motoka). Na kena e uasivi duadua, rau a vakavulica koya me cavuta na amigos (itokani).
Sa voleka sara na gauna ni lesu i vale. A yaloyalo ka vakamoce o Brigit vei Dayana kei Andrea.
“A vakacava na imatai ni nomu siga e valenilotu e Venezuela?” A taroga o Tamana.
A matadredredre o Brigit. “A totoka dina! Au a vakaitokani. Ka rau sa vakavulici au tiko ena vosa vaka-Sipeni!”
“Totoka qori! Au marau ni a siga vinaka vei iko.”
A vakasamataka o Brigit na nodrau a kidavaki koya o Dayana kei Andrea. Sa sega tale vakadua ni vakila ni vulagi. E kila o koya ni Tamada Vakalomalagi a vukei koya tiko me vakaitokani. Ka sa sega ni rawa ni wawa me raica na cava ena kauta mai na vo ni nona gauna mai Caracas!
Droini maivei Julia Castaño