Painia ena Veivanua Kecega
Olga Šnederfler
iMatai ni Metereni ni Valetabu mai Czechoslovakia
Sa kila tu o Olga ni na lako ki na valetabu ena dua na siga.
A vakasarava o Olga na iyaloyalo ni valetabu ni lili tu e lalaga. A cegulevu. Kevaka walega me lako ki na valetabu na nona matavuvale! Ia e sega ni dua na valetabu e voleka e kea, ka sa rui dredre me biuta na nona vanua.
A papitaiso o Olga ena vica na yabaki yani ki liu. Ia era sa vakasaurarataki na daukaulotu ena gauna o ya me ra biuta na vanua. Sa sega tale ni vakatarai vei ira na lewe ni Lotu me ra lako tale ki lotu. Era sega mada ga ni rawa ni vosa vei ira na tamata me baleta na nodra vakabauta.
Se bulataka tikoga o Olga na kosipeli. Sa vakatalega kina o Jirí na watina. Ratou masu ka wilika na ivolanikalou. Eratou lotu vakamatavuvale ka vakavulici iratou na luvedrau. Ena vei-Sigatabu, eratou dau soqoni ni sakaramede ena nodratou itikotiko lailai. Eratou dau vakaliliga e cake e vuqa na iyaloyalo ni valetabu.
Ia ni ratou sa galili o Olga kei na nona matavuvale, eratou dau nanuma sara ni udolu vakaudolu na lewe ni Lotu e vuravura raraba.
Dua na siga a yaco e dua na ka taleitaki. A gole mai ki na nodratou vanua o Peresitedi Russell M. Nelson, na Peresitedi Raraba ni Matawilivola ni Sigatabu. A matadredredre o Olga ni lululu vata kei Peresitedi Nelson. Sa qai yalataka vua e dua na yalayala talei. “Sisita, ena dua na siga o na lako mai ki na valetabu.”
A loma vinaka kina o Olga. “Vinaka vakalevu!” a kaya yani vakamalua.
Sa sivi yani e vica na vula. Ka vakayabaki. E vakaraica tu ga ena gagadre o Olga na iyaloyalo ni valetabu e lili tu e lalaga. Sa vaka me dredre na lako ki na valetabu!
Ni oti e va na yabaki, erau a sureti o Olga kei Jirí me rau gole ki na koniferedi raraba e Salt Lake City, Utah, Amerika. A lomaleqa o Olga ni rau na sega ni rawa ni lako. E se dredre tikoga na veika ena nodra vanua. Ena taura e levu sara na veika vakaivola me rawa na lako. Ia a qai mani rawa na veika kece. A vakila o Olga ni sa kidakida na ketena ni sa vuka yani na nodratou waqavuka ki Amerika. O ya e cakamana!
Rau a gole o Olga kei Jirí ki na koniferedi ka vakarorogo vua na parofita. Rau a laki raica sara na Lomanibai ni Valetabu ka gole ki na nodra vale na vulagi. Ia na ka uasivi duadua o ya na lako e loma ni valetabu!
Ni vakaisulu vulavula tu, a vakila o Olga ni tiko mai lomalagi ena nona yalataka vua na Kalou na veika bibi eso. A rawa talega me sa vauci sara vei Jirí. Sa yaco dina na yalayala nei Peresitedi Nelson!
Erau sa lesu mai ki vale o Olga kei Jirí. Ni toso tiko na gauna, sa vinaka cake mai na veika ena nodra vanua. Oti sa qai rawa me ratou lako ki lotu, ka rawa ni rau veivakavulici tale na daukaulotu.
Dua na siga a taqiri na talevoni. Sa qiri mai o Peresitedi Thomas S. Monson. Sa kacivi Olga me sa metereni ni Valetabu e Freiberg Jamani. Ka yaco o Jirí me sa peresitedi ni valetabu.
E matadredredre o Olga ni tucake tu ena nona isulu balavu, vulavula ena loma ni Valetabu e Freiberg. Na valetabu a vaka me yawa tu ena dua na gauna. Ia oqo sa rawa ni vakamareqeta e veisiga! Sa dua na tadra totoka sa yaco dina.
Na vanua a vakaitikotiko kina o Olga a qai yaco me tiki ni Czech Republic.
E drau vakacaca na valevatu cere e Czech Republic.
Na metereni ni valetabu e iliuliu yalewa ena valetabu.
E sivia e 20 na iyaloyalo ni valetabu era tiko ena itikotiko nei Olga.
O koya kei Jirí e dua na luvedrau tagane kei na dua na yalewa.
E maroroya voli o koya e dua na ivola ni itaba e tiko kina na kedrau iyaloyalo na daukaulotu a vakavulici koya.
Droinitaka o Shawna J. C. Tenney