Krismes long Mali
Hem we i raet i stap long Teksas, YSA.
Judith i no save wet long taem we bae hem i selebretem dei we Jisas i bon long hem wetem branj blong hem.
“Angels we have heard on high sweetly singing o’er the plains” (Hymns, no. 203).
Hem i Krismes Dei. Judith i saonem singsing ia taem hem i stap wokbaot i go long Jos. Hem mo ol brata mo sista blong hem oli stap go long Krismes pati long branj blong olgeta.
Sista blong hem, Esther, i smael. “?Hemia ‘Angels We Have Heard on High?’”
“!Yes! Hemia i fevret blong mi. Mi hop se yumi singsing long hemia tedei.” Judith i smael.
“!Mi laekem singsing ia!” Brata blong hem Désiré, i joenem. Hem i singsing laod, “!Gl-o-o-o-ria!”
Olgeta evriwan i laf. Judith i no save wet blong selebret wetem branj blong hem. I no plante pipol long Mali oli selebretem Krismes. Long pat ia blong Afrika, plante pipol oli no save abaot Jisas. Krismes i wan nomol dei nomo long olgeta.
Ol strit i fulap long ol pipol. Ol bisnis man oli salem ol grin melen. Ol yang pipol mo ol olfala oli karem ol jag blong wota long hed blong olgeta. Wan yangfala boe i lidim wan dongki we i stap pulum wan kat. Judith i lukluk i go antap long longfala bunbun taoa blong wan haos blong prea blong ol Muslim. I wan naesfala bilding we plante long ol Muslim neba blong olgeta, oli stap wosip long hem.
Judith, Esther, mo Désiré oli bin stap go long jos blong Papa. Be long las sama, oli bin joenem Jos Ia blong Jisas Kraes blong Ol Lata-dei Sent. Naoia olgeta tri oli stap wokbaot tugeta i go long jos evri wik. Judith i laekem blong stap lanem abaot Jisas long Praemeri.
Naoia oli kasem ples blong pati. Plante long ol famli long branj oli stap finis long ples ia. Wan projekta i stap soem ol Krismes vidio long wol blong japel. Judith i wajem Josef i lidim Meri i go tru long Betlehem long wan dongki. Ol rod we oli bisi mo fulap long das, i mekem hem i tingbaot !Mali!
Afta we vidio i finis, wan taksi i stop. Sista Valerie, Rilif Sosaeti presiden i kamaot.
Hem i singaot, “!Mi karem ol kaekae!”
Evriwan i help blong karem ol kaekae i go aotsaed long fored blong bilding. !Hemia i wan lafet! Poteto salad, ol karot, ol grin bin, yelo raes, jikin we oli fraenem … !evriwan i naes tumas!
“!Tangkyu tumas, Sista Valerie!” Judith i talem.
Afta, wanwan long ol pikinini oli kasem wan balong, wan doli o wan pleiplei trak. I no gat inaf presen blong Judith i kasem wan, be hem i no wari. Hem i laekem blong luk ol smosmol pikinini oli smael.
Pati i en wetem ol singsing. Judith i smael taem oli singsing “Angels We Have Heard on High.”
Evriwan long branj oli singsing tugeta. !I bin naes tumas! !I tru, Jisas i bin bon long plante yia ia we i pas finis! Judith i glad tumas se hem, Désiré, mo Esther oli bin save abaot Hem. Hem i hapi tumas blong selebretem taem we Hem i bon long hem.
Esther, Judith, mo De̍sire̍ long fored blong jos bilding blong olgeta.
Ol pikja droing oli kam long Steph Marshall