Pojak n̄an TAMPEĻ EO
Bwebwenato in ekar bōk jikin ilo Jamaica.
“Ewi wāween aō bōk juon peba in mālim n̄an deļo̧n̄e tampeļ eo?” Ajan ekar kajjitōk.
“Lale bwe kom̧in kōm̧m̧an men ko otemjej ilo tōllo̧ke” (Mormon 9:29).
Ajan ekar ettōn̄ dikdik ke ekar ron̄ ainikien kōkalaļlaļ ilo kōjem̧ eo. Madda (Mama) ekar karuwaineneik rikarejar m̧aan eo aer me ej an baam̧le eo an n̄an jipan̄ kōm̧m̧an juon nokon in jota.
Ekar kōppelļo̧k kōjem̧ eo. “Wah gwaan, Brother Williams!” (“Ejet aolep men?”)
“Aolep men im irie (em̧m̧an)!” Brother Williams ekar ba. (“Aolep men im em̧m̧an!”) Ekar leļo̧k n̄an Ajan juon pāāk in mango ko jān wōjke eo katakan.
Brother Williams ekar jijet ioon jea couch eo. Madda ekar kajjitōk ippān leddik eo jatin Ajan, Dana, bwe en jar.
Ālkin an kar dedeļo̧k an jar, “Iiō in, Ajan enaaj jejjet 12 an iiō. Aolep em ejeļā ke ejaam̧ aorōk iiō n̄an e?
Ļaddik eo jatin Ajan, Tejuan,ekar dipōkpōk ilo an m̧ōņōņō. “Kōnke emaron̄ bōk priesthood eo im ajeje kwojkwoj eo!”
“Ejim̧we!” Brother Williams ekar ba. “Bōtaab ebar wōr juon unin.”
Ekar kōpelļo̧k walōt eo an im kadiwōj tok juon m̧ōttan pepa jidikdik. “En̄in ej juon peba in mālim n̄an deļon̄e tampeļ.”
Ekar leļo̧k n̄an Ajan.
“Em̧m̧an!” Ajan kattōr addin pein ioon pijaan tampeļ gold eo ilo kaat eo. “Ta eo koj kōm̧m̧ane kōn menin?”
“Ij kwaļo̧k n̄an armej eo ej jijet ilo tebōļ eo itum̧aan in tampeļ eo. Ej kwāļo̧k n̄an er bwe ij erreo n̄an deļon̄e tampeļ.
“Ikōņaan loe!” Dana ekar kanōke jān Ajan im ekar lukkuun etale.
“Ewi am̧ ļōmņak kōn en̄jake eļan̄n̄e enaaj wōr juon am̧ make mālim?” Brother Williams ekar kajjitōk.
“Inaaj en̄jake aō aorōk!” Ajan ekar kalimjōke lōn̄ļo̧k jen kaat eo. “Ak ijjab jeļā eļan̄n̄e imaron̄ etal n̄an tampe eo. Eļap jen jon̄an wōņeen n̄an wiaik juon tiket in kelo̧k n̄an ijen.”
“Ijjab maron̄ emakijkij n̄an etal n̄an tampeļ barāinwōt,” Brother Williams ekar ba. “Ak peba in mālim eo aō ej kaeememej eō n̄an pojak aolep iien n̄an deļon̄e tampeļ.”
Ajan ekar ļōmņak jidik. “Ikōņaan bwe in bar pojak,” ekar ba. “Ewi wāween aō bōk juon peba in mālim n̄an deļo̧n̄e tampeļ eo?”
“Kwomaron̄ lolo̧k bisop eo,” Brother Williams ekar ba. “Enaaj kajjitōk ippām̧ jet kajjitōk ko n̄an lale n̄e kwoj pojak.”
“Kōn menin ej āinwōt juon teej!” Ajan ekar kajjitōk, jidik an ikūmkūm.
“Āinwōt juon bwebwenato,” Brother Williams ekar ba. “Bisop eo ej eo m̧ōttam̧, im ekōņaan jipan̄ eok bwe kwon pojak.”
Ajan ekar emajidjid. Ear em̧m̧an ippān Bisop eo.
“Kokōņaan ke lale kajjitōk ko?” Brother Williams ekar leļo̧k n̄an Ajan juon m̧ōttan pepa kōn kajjitōk ko ie. Dana im Tejaun rekar jepooļe bwe ren bar lale.
“Nam̧ba juon,” Ajan ej riit. “‘Ewōr ke am̧ tōmak ilo im juon naan in kam̧ool kōn Anij, Jemād Indeeo, Nejin, Jisōs Kraist; im Jetōb Kwojarjar?’”
Ekar romaakļo̧k. Ear pidodo. “Aaet!”
(E ear riit wōt kajjitōk ko, juon ilo̧k juon. Madda im Brother Williams rekar kōmeļeļeiki ta eo meļeļein jet iaan men ko.
Innem Ajan ear bar riiti juon bar kajjitōk: “Kwoj ke meļeļe im pokake kien Naan in Mālōtlōt?’” Ekar mejān burom̧ōj. “Iien eo D’andre ekar letok n̄an eō dān rum in kadōk tōre eo ikar pād ilo m̧weo im̧ōn,” ekar ba. “Ak ikar jab kōņaan bar idaake n̄an jidik. Ej ke meļeļein ke iban maron̄ bōk juon peba in mālim n̄an deļon̄e tampeļ?”
Kōjparok Naan in Mālōtlōt ej meļeļein jab idaak dān in kadōk, im rum punch ewōr alcohol ie,” Brother Williams ekar ba. “Ak kwonaaj maron̄ aolep iien ukweļo̧k im aikuj erreo n̄an deļon̄e tampeļ.
“Kōn wōt Jisōs!” Tejaun ekar ba.
“Ejejjet!” Brother Williams ekar ba. “Innem peba in mālim eo am̧ n̄an deļon̄e tampeļ emaron̄ kakememej eok n̄an kōjparok im pokake Naan in Mālōtlōt. Im n̄an pojak aolep iien n̄an deļon̄e tampeļ.”
Ajan ekar lukkuun ettōn̄ dikdik. Ekar en̄jake an em̧m̧anļo̧k.
“Ejab to bolen inaaj etal n̄an tampeļ m̧ōttan jidik,” Ajan ekar ba. “Im n̄e inaaj kōm̧m̧ane, Inaaj pojak!”
Kōmeļeļe ko jān Shawna J. C. Tenney