Bainier ro ilo Aolepān Āne eo
Harriet Ej Ekkatak Ippān Mijinede ro
Enaaj ke bar maron̄ ioon Papa bar juon alen?
Harriet ekar kalimjōke pijaan Papa ilo kiin m̧weo. Ruwalitōk kio allōn̄ jān ke ekar mej. Ekar kōļmenļo̧kijeņ enaaj ke bar loe jemen juon alen. Elikkuun ļap an on̄ kake.
Kōļaļļaļ, kōļaļļaļ, kōļaļļaļ.
Harriet ekar kōpeļļo̧k kōjem in apartment jidikdik eo an. Ruo likao rej jutak ilo nam̧ōj.
“Guten Tag! Iakwe! Kōmij uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata. Kōmij m̧ōņōņō in ekōnono ippān baam̧le eo am̧ kōn Jisōs Kraist.
Harriet ekar mejen ettōn̄dikdik. Juon men kōn ta eo rekar ba ekar kōm̧m̧an bwe en em̧m̧an an en̄jake itulowa. “Inaaj kajjitōk ippān Mutti (Mam̧a).”
Harriet Harriet ekar loe Mutti. “Mijinede ro re ilo kōjem e,” ekar ba. “Rekōņaan ekōnono n̄an kōj kōn Jisōs Kraist.”
Mutti ekar kajememe. “Ba n̄an er ejjeļo̧k ad iien.”
“Ako enoot relikkuun em̧m̧an,” Harriet ekar ba. “Eban bōk juon iien aitok.”
Mutti ekar kalimjōk awa eo. “Aolep men rem̧m̧an. Ilo jejjo minit ko.”
Mijinede ro rekar deļo̧n̄ im ekōnono ippān Mutti, Harriet, im sister eo an Harriet, Carmen. Rekar ba n̄an er kōn Jisōs im juon bok ņae etan das Buch Mormon, Book in Mormon. Rekar leļo̧k juon kape in n̄an baam̧le eo an Harriet n̄an riiti.
“Ij ļōmņak kōm maron̄ riiti jejjo peij ko,” Mutti ekar ba, ke ej kōpeļļo̧ke bok eo. Ilo raan ko tok jet Mutti ekar wōnm̧aanļo̧k ilo an riit im bar riit. Ekar riit n̄an Harriet im Carmen.
Ikōņaan bwe baba enkar riiti menin. Enkar em̧m̧an ippān, Harriet ekar ļōmņak.
Ke mijinede ro rekar bar jepļaaktok, rekar katakin kōn karōk eo an Anij. “Jekar mour ippān Anij m̧okta jān ad kar ļotak. Jaar Itok n̄an Laļin n̄an ekkatak im erom̧ āinwōt E. N̄e jej mej, jemaron̄ in pād Ippān juon alen.”
Akō Papa? Harriet ekar ļōmņak.
Mijinede eo ekar kalimjōk Harriet. “Kōnke Jisōs ekar mej im bar mour, jemaron̄ pād ippen baam̧le ko ad n̄an indeeo. Em̧ool aaet bar ippān ro jej iakwe er im remej.”
Harriet ekar en̄jake juon kōjatdikdik. Emaron̄ bar pād ippān Papa bar juon alen! Mutti ekar bar ļap an mejen ettōn̄—ejjan̄in kar bar ettōn̄ ilo juon iien eo aitok kitien.
Harriet, Mutti, im Carmen rekar wōnm̧aanļo̧k wōt im ekkatak ippān mijinede ro. Rekar etal im jar. Harriet ekar jinoe m̧ōttā ippān juon ļaddik em̧m̧an etan in Dieter.
Kiiō jikin jokwe eo an Harriet ekar wōr juon meram ilo aolep kajjojo ruum̧ ko ie. Ejjab to Harriet im baam̧le eo an rekar kāālet n̄an peptaij.
Bon̄ eo m̧okta jān iien peptaij eo aer, Harriet ekar juubke ippān Mutti im Carmen n̄an jar. “Jemedwōj Ilan̄,” Harriet ekar ba, “kōmij kam̧m̧oolol kōn mijinede ro, gospel in, im baam̧le eo ad. Kōm likkuun kijoror in peptaij.”
Ke Harriet ekar kōpeļļo̧k mejen, ekar kalimjōk pijaan Papa im ettōn̄dikdik. Elikkuun kijooror in loe bar juon iien.
Ewōr ruo tam̧peļ ko ilo Germany.
Juon m̧ōttan jilu in Germany ekalibobo kōn mar in wōjke.
Germany ej jeere juon border ippān ruatimjuon jikin ko reļļap jet.
Ke Harriet ekar rūttoļo̧k, ekar m̧arreiki ļaddik eo em̧m̧an etan Dieter.
Dieter ej kiiō juon iaan Rijilōk ro—Elder Dieter F. Uchtdorf!
Elder Uchtdorf ekar ba Harriet ej “ej meran in mour eo [an].”
Kōmeļeļe ko jān Giovanni Abeille