Tiim ko im Tōļan ko

Jen Alelie Coronel-Camitan

(Pedped ioon juon bwebwenato em̧ool)

Tiim ko em̧m̧antata rej jerbal ippen doon im jipan̄ doon n̄an em̧m̧an an kakajoor doon.

“Ettōr, Jillian, ettōr!” Jemen ekar lam̧ōj. Jemen Jillian ekar kooj eo an tiim in football eo an. Rej buuļ kōmmelmel bwe ren pojak n̄an lale wōn eo ebōk tūb eo. Ekar lukkuun ļap an bwil, ak Jillian ekar jab bōjrak in ettōr.

Āliktata jemen ekar uk wejōļ. “EMMAN, jen bōjrak jidik.”

Jillian ekar bōk bato in aebōj eo nemin im jijet laļļo̧k ilo wōrwōr eo ippen ļaddik ro. Ekar e wōt leddik ilo tiim eo, ak ekar ļōmņak kea kake. Rekar aolep jerbal ippen doon im jipan̄ doon em̧m̧anļo̧k. Mekarta ekar lukkuun mōk im menokadu, ekar m̧ōņōņō in ikkure ippen tiim eo an.

“Baba, ejet ad kar ikkure rainin?” ekar kajjitōk.

Jemen ekar ettōn̄ dikdik. “Lukkun Em̧m̧an! Ij ļōmņak bwe tiim in epojak n̄an ikkure.”

Jillian ekar ettōn̄ dikdikļo̧k. Jerbal ko aer aolep rekar wōrtokjeer!

Iaļ eo an n̄an m̧weo im̧ōn jen jikin kōmelmel, Jillian ekar loe leddik eo jeran Mei. Rekar pād ilo juon wōt kūlaaj in Būraimere. Ak Mei ejjan̄in itok n̄an Būraimere ium̧win juon iien eaitok.

Jillian ekar ettōn̄ dikdikļo̧k n̄an Mei. “Iakwe, Mei! Ij jan̄in bar loe eok ilo Būraimere. Em̧m̧an ke jabdewōt?”

Mei ekar reilaļļo̧k n̄an juuj ko an. “Jinō ejjab kōņaan etal im jar.”

“Ebajet?”

“Ijjab jeļa.” Mei ekar lelōn̄ļo̧k bōran “Ekwe, ij aikuj etal.”

Jillian ekar baebae kōn pein im lale an Mei etal. Ewi waween an jipan̄ Mei? Ekar ļōmņak.

Ke Jillian ekar tōbar m̧weo im̧ōn, ekar kōjan̄ jet al in Būraimere kōn ukwelele eo nejin. Innem ekar kajjitōk ippen ļaddik eo jein bwe en al. Rekar al m̧ae iien eo Jineer ekar kūr er bwe ren tōn m̧ōn̄a.

“Ij iten loļo̧k Sister Aurea ilju,” Jinen ekar ba.

“Sister Aurea ej jinen Mei, ejim̧we ke?” Jillian ekar kajjitōk. “Imaron̄ ke iwōj ippam̧? Mei ejjan̄in itok n̄an Būraimere. Im ke ikar loe e rainin, einwōt einepata.”

“Em̧m̧an, komaron̄ itok,” Jinen ekar ba.

“Inej bōktok uklele e nejū! Imaron̄ kōjan̄ al in Būraimere ko. Ijela bwe ekōņaan bar al kaki,” Jillian ekar ba.

Ke rekar tōparļo̧k m̧weo im̧ōn Mei raan eo juon, Jillian ekar bakwij Mei. Ke jineer rekar bwebwenato, leddik rein diwōj nam̧ōjļo̧k. Jillian ekar kōjan̄ uklele eo nejin, im Mei ekar kalet al ko. Rekar ettōn̄ im limo im al ippen doon m̧ae iien eo ekar iien an Jillian rool.

“Elukkuun em̧m̧an bwe ibar loe eok,” Jillian ekar ba. “Ij jan̄in bar loe eok ilo Būraimere.”

“Aaet, ikōņaan kar iwōj. Bōlen inej bar kajjitōk ippen mama.”

Jabōt eo juon, Mei ekar ped ilo m̧ōnjar eo. Jillian ekar jijet iturin. “Ilukkuun in m̧ōņōņō bwe komaron̄ kar itok,” ekar ba.

Mei ekar ettōn̄. “Bar n̄a.”

Jet raan tokalik ekar jejjet iien ikkure football eo eļap. Jillian ekar kajjitōk ippen tiim eo bwe ren jar m̧okta jen ikkure. Innem ekar iien n̄an jinoe. Jillian ekar ettōr m̧ōkaj jon̄an wōt an maron̄. Ekar jerbal ippen tiim eo an bōk ball eo im kōm̧m̧an jet poin ko. Tiim eo an rekar wiini ikkure eo!

Bon̄ōn̄ eo ke ej babu ilo peet eo, Jillian ekar ļōmņak kōn Mei im tiim in football eo an. Ekar m̧ōņōņō in kar bōk koņaan, einwōt an kar m̧ōņōņō in ped ilo Būraimere. Rekar aolep jipan̄ doon. Jillian ekar m̧ōņōņō bwe ekar maron̄ jipan̄ ro jeran, mekarta ilo m̧ōnjar eo ak ilo meļaaj in ikkure eo.