Bainier ro ilo Aolepān Āne eo
Tom im Nan̄inmej in Flu eo Enana
Tom ekar jeļā bwe Irooj enaaj jipan er
“Eo, Tamā (Baba),” Tom ekar mera an ba. Jemen Tom ekar jidik wōt an jerkak im jijet ioon jaki in kiki eo an. Tom ekar jipan̄ e draake juon ni ekāāl.
Tamā im aolepen baam̧le eo an Tom rekar nan̄inmej ilo elōn̄ raan ko. Eiten aolep ilo bukon eo an rekar bar nan̄inmej. Juon nan̄inmej ajeeded ekar itok n̄an āne eo—Spanish flu.
Tom ekar etetal namōj. Ekar m̧ōttan armej ro wōt em̧m̧an aer mour n̄an lale ro jet. Im elōn̄ baam̧le ko rekar aikuj jipan̄.
Ij aikuj elōn̄ļo̧k ni, Tom ekar ļōmņak. Ekar tallōn̄ e juon ni aitok. Ke ekar tōpar lōn̄tata, ekar tim̧i jet ni im joļo̧k n̄an ilaļ.
Ke ekar to, Tom ekar ļōmņak kōn armej ro ilo bukon eo an. Ekar kamijak n̄an loe elōn̄ iaer aer nan̄inmej.
Juon iiō m̧oktaļo̧k, ļaddik jidikdik eo jatin Tom, Ailama, ekar nan̄inmej. Men eo ekar bar kamijak. Tom im baam̧le eo an rekar jar bwe en maron̄ em̧m̧anļo̧k an mour.
Innem Tamā ekar ettōņak e juon ettōņak aurōk. Ettōņak eo ekar kwaļo̧k n̄an e wāween eo n̄an jipan̄ Ailama ājmour—jān an noik kilin juon wōjke wiliwili n̄an kōm̧m̧an uno in draak. Tom ekar jipan̄e Tamā lale Ailama, im rekar leļo̧k nimen uno jān wōjke eo. Im ekar em̧m̧anļo̧k an Ailama mour!
Tom ekar jeļā bwe Anij ekar jipan̄ er jem̧aan. Im ejeļā bwe Anij enkar bar jipan̄ er kiiō.
Tom ekar m̧wijit ni ko im kōpeļļo̧ki. Bwin tōn̄al in drenin ni eo ekar kōm̧m̧an bwe en em̧m̧anļo̧k an mour. Ekar etetalļo̧k itūin juon em̧ ilo bukon eo im leļo̧k jejjo ni ko n̄an ro ritūrin. Innem ekar etal n̄an m̧weo tok juon. Im eo tok juon.
Wiik ko rekar mootļo̧k. Kajjojo raan Tom ekar kate jerbal n̄an lale aolep. Ekar kabao bwe en maron̄ kōm̧m̧an soup ko remeneen n̄an ajeeji. Ekar kotak bōkaj in dren ko jān reba ko n̄an keidraak armej.
Jet iaan armej ro ilo bukwōn eo rekar mej. Tamā ekar bar mej. Ekar kanooj ben n̄an Tom. Aolepen bukon eo rekar būrom̧ōj. Bōtaab ilo aolep men, Tom ekar kemeemej bwe Irooj ej iakwe e im enaaj jipan̄ e.
Tom ekar jab bōjrak an jipan̄ armej. Im jidik iien tok ālik, jet armej rekar em̧m̧anļo̧k aer mour!
Ejjab to ajeeded in flu eo ekar jem̧ļo̧k. Armej ekar bojrak aer nan̄inmej. Tom im Ailama rekar bar maron̄ jepļaak im bar jikuuļ. Tom ekar iien otemjej missi Tamā. Bōtaab ekar jeļā bwe juon iien enaaj bar loe jemān. Im ekar jeļā bwe Jemedwōj Ilan̄ enaaj kar baj wōt pād n̄an jipan̄ e.
Samoa ej juon kurup in āne ko ilo Pacific Ocean.
Rainin ewōr juon tampeļ ilo Samoa.
Juon em̧ kōm̧m̧an in Samoa, ņae etan fale, ejjeļo̧k kiin.
Spanish flu eo ajeeded ekar tōpar Samoa ilo 1918.
Tom ekar 12 wōt an iiō ke ajeeded in nan̄inmej eo ekar ijjinoe.
Bukon eo an Tom, Sauniatu, kar ejaake jān juon kurup in Armej ro Rekwojarjar ilo Raan Ko Āliktata.
Kōmeļeļe ko jān Corey Egbert