Bainier ro ilo Aolepān Āne eo
Kappukot eo An Michael Aitok Kitien
Michael ekar ļōmņak kōn kabuns eo em̧ool.
Michael ekar katotoik bāākpāāk eo an iaran. Ekar raan eo jinountata in jikuuļ, im ekar kijooror. E im baam̧le eo an rekar jokwe ilo India. Elōn̄ ajri ro ilo jikin eo an rekar jab maron̄ etal n̄an jikuuļ. Michael ekar m̧ōņōņō bwe ekar wōr an iien em̧m̧an n̄an ekkatak.
Ekar emman ippān ekkatak—eļaptata math. Ekar barāinwōt em̧m̧an ippān riit māākjiin. Ekar āleke peij ko rekōļarļar. Ekar riit kōn menin mour ko reoktak jān doon im jikin ko ipeļaakin laļ in.
Juon raan Michael ekar riiti juon māākjiin oktak. Ekar jān Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ekar em̧m̧an riiti ippān Michael. Ekar kōņaan katak eļapļo̧k.
Em̧ōj an kar Michael etal n̄an kabun̄ ko jet. Em̧m̧an ippān ekkatak kōn Jisōs. Ak jet iien ej pok. Ewi kabun̄ eo em̧ool?
Tokālik, ekar riiti juon bok jidikdik kōn rikanaan Josep Smith. Ekar en̄jake juon men eaorōk ilo an kar riit. Josep Smith ekar barāinwōt etal n̄an kabun̄ ko wōj n̄an kappukot m̧ool eo. Bōlen ij āinwōt Josep Smith, Michael ekar ļōmņak.
Michael ekar kōņaan etal n̄an kabun̄ in ekāāl n̄an lale wāween. Bōtaab ekar ejjeļo̧k kabun̄ eo an Armej ro Rekwojarjar ilo Raan Ko Āliktata ilo India. Michael ekar nana an mour. Ekar wōnm̧aanļok wōt im ekkatak jon̄an eo emaron̄ e. Ekar riiti Bok in Mormon eo im kar jar. Ekar jeļā bwe ekar m̧ool! Ekar kōņaan peptaij. Bōtaab ekar aikuj nej kar kōttar.
Emootļo̧k elōn̄ iiō. Ke Michael ekar 21 an iiō, jet ripālele mijenede rekar itok n̄an India. Āliktata, Michael ekar peptaij! Ejjab to ekar maron̄ etal im jerbale juon an mijen an make ilo Utah, USA.
Emootļo̧k elōn̄ iiō. Juon raan juon m̧ōttan ekar ko̧o̧ļe. Kabun̄ in ej kappok armej n̄an jipan̄ ukook n̄an kweilo̧k eo eļap n̄an armej ro ilo India. Michael ekar m̧okta ikūm̧kūm̧. Ak ekar lukkuun m̧ōņōņō n̄an jipan̄.
Juon ālkin rālep ilo Oktoba Michael ekar ukōt juon katak jān Būreejtōn Nelson ilo kweilo̧k eo eļap. Ekar ron̄ an rikanaan eo kōjjeļāik bwe juon tampeļ enaaj ekkal ilo India! Michael ekar kōņaan lam̧ōj kōn lan̄lōn̄. Ekar kōmjaaļaļ kōn m̧ōņōņō.
Michael ekar lukkuun kam̧m̧olool kōn aolep men ko ekar ekkatak ilo jikin jikuuļ. Ak eļaptata, ekar kam̧m̧oolol bwe ekar ekkatak kōn gospel eo an Jisōs Kraist. Ekar m̧ōņōņō bwe elōn̄ļo̧k armej ilo laļ eo an remaron̄ kiiō ekkatak kōn E!
Ejjab to enaaj wōr juon tampeļ ilo India!
Ewōr elōn̄ļo̧k jān 20 kajin ko ilo India.
Ewōr ruo mijen ko ilo India rainin.
M̧ōn̄ā eo ennotata ippān Michael ej biryani (rice im jālele kar kōm̧m̧ate kōn kāre ko).
Bwebwenato eo an jeje ko rekwojarjar em̧m̧an tata ippān ej kōn Josep eo ilo Kallim̧ur M̧okta
Rainin, Michael ej jipan̄ ukōt kweilo̧k eo eļap n̄an armej ro ilo India.
Kōmeļeļe jān Oriol Vidal