Jikuuļ Kāāl, Jera Kāāl
Ekōjkan an Ada maron̄ kōm̧m̧an m̧ōttan ke ejaje kajin China?
“Imijak,” Ada eaar ba. Ekar raan in jikuuļ eo kein kajuon ilo Taiwan. Ak ekar jaje kajin Chinese āinwōt ajri ro jet. Ekōjkan an maron̄ kōm̧m̧an m̧ōttan? Wōn eo emaron̄ ikkure ippān ilo iien kakkije?
M̧am̧a eo an Ada ekar atbakwōje. “Ej em̧m̧an wōt n̄an mijak”
Ada ekar mejān būrom̧ōj. “Ijaje kilen kōm̧m̧an jera kāāl ijin.”
M̧am̧a eo an eaar bar atbakwōje. “N̄e komijak, komaron̄ ļōmņak kon juon al an Būraimere. Men eo enaaj ke jipan̄?”
Ada ekar em̧ajidjid. Innām ekar etal laļļo̧k ippān jinen n̄an kūlaajruum̧ eo an. Rikaki eo an ekar kōttar e. “Ni hao!” rikaki eo an ekar ba. Ada ekar kajjieon̄ mejān ettōn̄dikdik. Ekar jab jeļā ta meļeļein naan ko.
Ada ekar ba goodbye n̄an jinen. Innām ekar loe juon tābōļ im jijet ie.
Ekar kalimjōkļok ajri ro jet. Jet iaer rekar ekōnono n̄an doon. Ro jet rekar jijet im jab keroro āinwōt Ada. Ada ekar ikūm̧kum̧. Ekar en̄jake āinwōt n̄e ewōr lo̧n̄ rej ekāke lowaan lojeen.
Innām Ada ekar loe juon leddik ej jan̄. Ada ekar kōņaan jipan̄e. Ak ekōjkan an maron̄ jipan̄e ke ejaje kajin China? Ta eo n̄e leddik eo ejjab kōņaan jipan̄?
Bōtaab Ada ekar kōm̧m̧ane ta eo jinen eaar ba. Ekar ļōmņak kōn naan ko ilo al in Būraimere eo em̧m̧antata ippān “Iakwe ro jet āinwōt an Jisōs iakwe eok.” Ada ekar jeļā bwe Jetōb Kwojarjar ekar kajjitōk ippān bwe en jipan̄.
Ada ekar jijet tūrin leddik eo. Ekar likūt pein im jepooļ e. Innām ekar boboore likūn āinwōt an jinen kar kōm̧mane ke Ada ekar būrom̧ōj. Leddik eo ekar bōjrak an jan̄! Eaar bar atbokwoje Ada.
Ada ekar jitōn̄ e make. “Ada.”
Leddik eo ekar jitōn̄ e make. “Mei,” ekar ba.
Ada ekar mejān ettōn̄dikdik. Ekar jijet tūrin Mei aolepān raan eo. Men̄e rekar jab kenono juon wōt kajin, rekar limo ippān doon. Rekar m̧ōn̄ā in rāelep ippān doon. Rekar ikkure ippān doon ilo iien kakkije. Im Mei ekar jipan̄ Ada ekkatak naan ko rekāāl ilo kajin China!
Ada ekar kijooror in ba n̄an jinen kōn leddik eo jeran ekāāl. Ekar jeļā bwe n̄e enaaj ļoor waanjon̄ok eo an Jisōs, ejjab aikuj mijak jabdewōt men.
Kōmeļeļe ko jān Shawna J. C. Tenney