Dua Tale na Veivuke Lailai
Na sui ni dainaso e ka ni lasa cake mai na vuli vosa.
“Alex, sa gauna mo gole kina ki na vuli vosa,” a kaya o Miss Jenkins.
A vakacuvara na uluna o Alex. Na vuli vosa e dua na kalasi digitaki a dau gole kina. E dau dredre vua me cavuta eso na vosa kei na i rorogo. Ka dau laki vakatovotovotaka kina ena kalasi ni vuli vosa vaka vica ena dua na macawa. Ena veigauna kece e dau biuta kina nona kalasi tudei, e dau madua vakalevu!
A raici nona qasenivuli cake. “E rawa beka niu levea?” a vakasolokakanataka. “Me nikua ga?”
Nikua, ena gole mai kina o Mr. Timmons ki na kalasi nei Alex me vosa baleta na dainaso. A cakacaka o Mr. Timmons ena dua na valeniyaya makawa ka levu kina na sui totoka ni dainaso. Ena kauta tiko mai o koya e dua na sui ka sa udolu na yabaki na kena dede! A sega ni via calata o Alex.
A matadredre o Miss Jenkins. “O na gadrevi tikoga mo gole ki na nomu kalasi ni vuli vosa. Ia o na rawa ni lesu totolo mai mo donuya na iotioti ni tiki ni vosa nei Mr. Timmons.”
A tovolea o Alex me matadredredre lesu, ia a sega ni rawa. A taubale vakamalua ki na rumu ni vuli vosa. Ena kalasi era vakatovotovotaka nodra tukuna e dua tikoga na rorogo. Na vulica baleta na dainaso ena rairai lasa vakalevu cake.
“Au cata ni cavuta tiko na rorogo lialia oqo,” a tukuna vua na nona qasenivuli ni vuli vosa. “Au sa vaka e dua na gonelailai.”
“O sega ni gonelailai,” a kaya o koya. “Eda gadreva kece eso na ikuri ni veivuke lailai ena so na gauna. O kila niu a vuli vosa niu se yabaki vata kei iko?”
Oqori a vakavuna me vinaka cake vakalailai o Alex. A cakacaka vakaukauwa ena vo ni gauna ni kalasi me vakatovotovotaka na nona rorogo.
Ni sa lesu tale o Alex ki na rumu ni kalasi nei Miss Jenkins, a raici nona itokani o Courtney ni sa biubiu.
“O lako kivei?” a taroga.
A rai sobu o Courtney. “Au sotava tiko na dredre ena wilivola. Sa dodonu meu gole ki na dua na kalasi digitaki ni wilivola.” A laurai vei Courtney na madua.
“Ei, e sega ni dua na ka,” a kaya o Alex. “Au se qai lesu ga mai na noqu kalasi ni vuli vosa. Au a vakayagataka na gauna taucoko o ya meu cavuta tikoga kina e dua na rorogo.” E a sokidi cake na ucuna.
“O a cakava dina?”
E a deguvacu. “Sa oti oqo e rua na yabaki na noqu vuli vosa tiko.”
“Na cava au a sega ni kila kina?” a taroga.
A vakaribataba ga o Alex. “Au a sega ni tukuna vua e dua. Au a rere de ra qai vakalialiai au.”
“Au na sega ni vakalialiai iko,” a kaya o Courtney. “Au marau ni ko totolo mai mo mai raica na sui ni dainaso. Sa totoka dina!” A yaloyalo mai. “Sa dodonu meu lako. Qai sota tale.”
Sega ni dede a qai kila o Alex ni sega ni o irau ga kei Courtney erau lako tiko ki na veikalasi tale eso. O Tommy e lako ki na dua na kalasi me vukei koya me vulica na kila maqosa ni veimaliwai vakavinaka cake. Ka cakacaka vata o Bekah kei na dua na qasenivuli digitaki me vukea na ligana me kaukauwa cake ni oti nona vakamavoataka.
Ia oqo sa sega soti ni ca sara o Alex baleta na nona kalasi ni vosa. E vinakata me vukei ira talega na vo ni gone me ra logalogavinaka talega. A vakatovotovo wilivola vata kei Courtney ka vosa vei Tommy ena gauna ni vakasigalevu. O keda kece eda gadreva tu vakalailai na veivuke ena so na gauna, ka daumaka o ya!
Au sa rawata tiko eso tale na veivuke ena wilivola.
Au sa rawata tiko eso tale na veivuke ena kila maqosa ni veimaliwai.
Au sa rawata tiko eso tale na veivuke ena ligaqu.
Droini mai vei Mark Robison