Kena Levu E Veirauti
E sega ni vinakata o Trina me duatani.
“O sa rui lailai dina!” A kaya o Sasha. “E dodonu me keimami kacivi iko ena Trina Lailai.”
A tovolea o Trina me mata dredredre. O ira na vo ni gone e koronivuli era vakatanini koya vakalevu ni sa lailai dina. A sucu lailai mai o koya, ka sega ni tubu totolo me vakataki ira na vo ni gone. Ia a sega ni taleitaka na yaca na Trina Lailai. E sega ni vinakata o koya me duatani.
“O sa lailai dina ka rairai o na sega ni tubu,” a kaya o Max ni rau lako ki tautuba me vakacagicagi.
“Au kila niu lailai,” a kaya o Trina. “Ia e sega ni dua na ka au rawa ni cakava kina. Daru lai qito.”
A cici o Trina me laki qito soka vata kei ira na vo ni gone. Era a caqeta na polo vaka ka vaka. Era a veilasamaki vata kece tiko.
Ia sega ni dede sa oca sara ga o Trina. A gole tani vakamalua mai na qito ka dabe sobu ena co.
Sega ni dede sa lako mai na nona itokani o Josie. O Josie e tiko talega ena nona kalasi ni Lalai ena lotu.
“O vinaka tiko?” A taroga o Josie.
“Io,” a kaya o Trina. “Au gadreva meu cegu mada. E dau oca na noqu yatevuso niu veiciciyaki vakalevu. Erau sega soti ni kaukauwa sara.”
A dabe tikivi Trina o Josie. Erau tomi co, ka caka mama kina kei na qato. Erau veitalanoataka na vuli kei na itokani kei na vuli e vale.
“Au rogoca na ka a tukuna o Sasha,” a kaya o Josie. “Au sega ni taleitaka nona kacivi iko ena Trina Lailai.”
A deguvacu ga o Trina.
“Ia au nanuma ni sa veirauti vinaka na kemui levu!” A kaya o Josie.
A matadredredre o Trina. A solia vei Josie na itaube co sa cakava oti.
Ena Sigatabu ka tarava, sa vakarau o Trina ki lotu. A daramaka na nonai vinivo ka seruta na uluna. Sa qai rai ena mataruburubu ki na nona ivava somidi e loma ni kovate. E kila o koya ni sega tale ni dua ena nona kalasi ni Lalai e daramaka na ivava lalai vakaoqo.
A yarataka na yavana o Trina ni taubale yani ena olo ni valenilotu. Ni yaco ki na nona rumu ni kalasi ni Lalai, sa wawa tu e tuba o Josie.
“Keitou via vakurabuitaki iko!” A kaya o Josie. “Mai raica!”
Ni curu yani ki na rumu o Trina, o ira na vo ni gone kei na nodratou qasenivuli, o Sisita Bott, eratou a dusi tiko ki na dua na papa ukutaki vakamatau. Era a vakabiri tu kina e levu na uto. Era volai tu ena uto eso na itukutuku ka vaka, “E dua na matadredre levu e tiko vei Trina! E tiko vei Trina e dua na uto vakaitamera!”
“O taleitaka beka?” a taroga o Josie. “A vukei keitou o Sisita Bott me keitou cakava.”
“Au taleitaka!” a kaya o Trina. “Vinaka vakalevu.”
“Keitou vinakata me vakananuma vei iko e dua na dina levu,” a kaya o Sisita Bott. “Na Tamada Vakalomalagi e lomani keda vakayadua sara. Lekaleka. Balavu. Levu. Lailai. E sega ni dua na ka oqori vei Koya. Eda sa Luvena kece, ka lomani keda vakayadua o Koya.”
A rai cake o Trina ki na veiuto ena papa ka matadredredre—vakalevu.
Droini mai vei Olga Lee