Te Boki ae Onoti
“Am tai ni wareware, Papa,” e taku Bernice. E kauki booki aika tabu. A tekateka Maman ao Papa irarikina iaon te couch.
E wareka te moan kibu Papa. “I ataia ae e tangiriia natina”
“I ataia ae e tangiriia natina,” e kaokia riki Bernice.
“Ma,” e taku Papa, “I aki atai nanon bwaai ni kabane.”*
Ma bon te taeka ae matoatoa. E tuai kona ni wareware raoi Bernice, ao e aki ataia bwa tera nanon taian taeka ni kabane. Ma e tangiria ni kaokioki taian taeka ngkana a bane ni wareware ana utu ni booki aika tabu.
Te bong are imwiina n tain warekan booki aika tabu, iai ana kakubanako Papa. “Iai au bwai ae onoti ibukimi,” e taku. Eangan Bernice te boki. Iai tamneia aomata ao te booti mai moa.
“Aio ibukiu?” E titiraki Bernice. E rabwata te boki ae bubura inanoaan baina.
“Bon ibukim,” e taku Papa. “Kaukia nooria.”
E kauka te boki Bernice. A tokatoka kanoan matana. A mwaiti tamnei aika a kirimatamata inanona.
“Terana arana?” E titiraki Bernice.
E kotei taian taeka Papa ake iaon kunin te boki. Karaki man Ana Boki Moomon,” e taku.
E rimwiin taian taeka ake a mwakoro iaon kunin te boki Bernice. Karaki man Ana Boki Moomon,” e taku.
“Bon aekakin naba te karaki are ti wareka rongorongona ni booki aika tabu,” e taku Maman.
Bernice e kotea teuana mai buakon taian tamnei. “Antai anne?”e titiraki.
“Hmm. Ko noora te kainikatebe ao taian kanoa?” E titiraki Maman.
E katoua atuuna Bernice.
“Ko uringnga warekan rongorongon temanna are e uruaki ana kainikatebeke?” E titiraki Papa.
“Nibwaai?” E taku Bernice.
“Eng, bon Nibwaai,” e taku Papa.
E moangare Bernice. “Ko rabwa, Papa. Ko rabwa, Maman. I tangira te boki aio.”
Ni katoa tairiki, e wareka ana boki ae tabu Bernice ma Maman ao Papa. E kotei taian tamnei. E reireinna n atong taeka aika a matoatoa. Ao e reiakinaki bwa e na wareki tabeua taeka aika a bebete i bon irouna!
E namakina te kukurei ni wawarekan booki aika tabu. E kukurei bwa e kona ni wareki ma Maman ao Papa!
Kamataata n te tamnei iroun Adam Koford