Bon te Abwaki ae Tau
E aki tangiria Trina bwa e na taraa ni kaokoro.
“Ko bon rangi n uarereke!” E taku Sasha. “Ti riai n araniko bwa Trina te Uarereke.”
E kataia ni moangare Trina . Tabeman ataei n te reirei a bwainingareia ngkai e katua uarereke. E rangi ni uarereke ngke e bungiaki, ao e aki rangi ni waekoa n ikawairake n aroia ataei ake tabeman. Ma e aki tangira arana ae Trina te Uarereke. E aki tangiria Trina bwa e na taraa ni kaokoro.
“Ko bon rangi ni katua uarereke ao ko na bon aki kona n ikawai,” E taku Max ngke a otinako n tain te motirawa.
“I ataia bwa I katua uarereke,” e taku Trina. “Ma akea te bwai ae N na kona ni karaoia iai. Ti a nako n takakaro.”
E biri Trina bwa e na nako n takakaro n te butibooro ma ataei ake tabeman. A orea te booro ni kaokia ao ni manga kanakoa. A rangi n unga ni kabane.
Ma n te tai ae aki maan ao e a rangi ni kua Trina. E karaurau n rianna n nako man te takakaro ao n tekateka iaon te uteute.
N te tai ae aki man ao e a roko raraona ae Josie. Bon kaain naba ana kiraati Josie n te Moanrinan n tain te taromauri.
“Akea am kangaanga?” E titiraki Josie.
“Eng,” e taku Trina. “I tii kainnanoa motirawau teutana. E kua maamaau ngkana I kabatiaa te biri. A aki rangi ni korakora.”
E tekateka Josie irarikin Trina. A kouta te uteute ao a karaoa aia mwamwa ao aia burenibai mai iai. A maroroakina taekan te reirei ao raraoia ao aia bwai n reirei.
“I ongo te bwai are e taekinna Sasha,” e taku Josie. “I kabwarabure bwa e weteiko bwa Trina te Uarereke.”
E katoua atuuna Trina.
“Ma I taku bwa e tau abwakim anne!” E taku Josie.
E moangare Trina. E angan Josie te burenibwai are e karaoia man te uteute.
N te Tabati are imwiina, e a tauraoi Trina n iri n taromauri. E karina kunnikaina ao ni koomwa irana. Ngkanne e kabubuakai matana nakon ana kau aika a rangi uarereke inanon te ruu ni bwai. E kakoaua raoi bwa akea temanna n te Moanrinan ae kabonganai kaau aika a rangi ni uarereke n aron akanne.
E aeaei waena Trina ngke e nakonako n te kawai n rin nakon te tabo n taromauri. Ngke e a roko n ana kiraatiruum n te Moanrinan, e tabe n tataninga Josie itinaniku.
“Iai ara kakubanako ibukim!” E taku Josie. “Nakomai nooria!”
Ngke e nakonako Trina nako nanon te ruu, tabeman ataei ma aia tia reirei, Titita Bott, a kotea te burakibooti ae bane otana man katamaroaaki. Iai taian aati aika a kanimwaki mangaia. Iai taeka aika a koreaki iaon te aati ae kangai, “E korakora moangaren Trina! E akoi man tituraoi Trina!”
“Ko tangiria?” e titiraki Josie. “E buokiira Titita Bott ni karaoia.”
“I tangiria!” e taku Trina. Ko rabwa!”
“Ti kan kauringko te koaua ae bubura,” e taku Titita Bott. “Tamara are i Karawa e tangiriira n tatabemaniira nako. Katua uarereke. Ananau. Bubura. Uarereke. E aki akaaka anne Irouna. Ngaira natina ni kabane, ao E tangiriia aomata ni kabane.”
E tararake Trina n taraa te aati are iaon te burakibooti ao ni moangare—e bubura.
Kamataata n te tamnei iroun Olga Lee