Bok Aorōk eo
“Ej am̧ iien n̄an riit, Baba” Bernice ekar ba. Liin ekar kōpeļļo̧k jeje ko rekwojarjar. M̧am̧a im Baba raar jijet turin liin ioon kauuj eo.
Baba ej riiti eoon eo kein kajuon. “Ijeļā bwe ej iakwe ajri ro nejin.”
“Ijeļā bwe ej iakwe ajri ro nejin,” Bernice ekar āliji.
“Ijo wōt ke,” Baba ekar ba, “Ijjab jeļā meļeļein aolep men.”*
Ijo wōt ke ekar juon naan epen. Bernice ejjan̄in kar maron̄ de riit, im liin ekar jab jeļā ta kar meļeļe in aolep naan ko. Bōtaab liin ekar iakwe āliji naan ko ke baam̧le eo an ej riiti jeje ko rekwojarjar ippān doon.
Raan eo tok juon ilo iien jeje ko rekwojarjar, Baba ekar wōr juon an surprise. “Ewōr juon men ippa aorōk n̄an kwe,” ekar ba. Ekar leļo̧k n̄an Bernice juon bok. Ekar juon pija in armej ro im juon ļoon eo itum̧aan.
“Menin ej n̄an n̄a?” Bernice ekar kajjitōk. Liin ekar atbakwoj bok eo ekilep ilo pein.
“N̄an kwe,” Baba ekar ba. “Lale lowaan.”
Bernice ekar kōpeļļo̧k bok eo. Māj ko mejān raar kilepļo̧k. Ekar kanooj lōn̄ pija ko rōkōļar.
“Etan kar ba?” Bernice ekar kajjitōk.
Baba ekar jitōn̄ļo̧k naan ko ilo kōbar eo. “Bwebwenato ko an Bok in Mormon,” ekar ba.
Bernice ekar anōk kōn pein naan ko ilo kōbar eo. “Bwebwenato ko an Bok in Mormon,” ekar ba.
“Ekar wōr ejja bwebwenato ko wōt jej riiti kaki ilo jeje ko rekwojarjar,” M̧am̧a ekar ba.
Bernice ekar jitōn̄ļo̧k juon iaan pija ko. “Wōn in?” ekar kajjitōk.
“Hmm. Kwoj ke lo lippo̧ņ eo im m̧are ko?” M̧am̧a ekar kajjitōk.
Bernice ekar m̧ōm̧ajidijdik.
“Kwoj ke keememej riiti kōn juon eo me ekar wōr juon an lippo̧ņ ekar būlo̧k?” Baba ekar kajjitōk.
“Nipai?” Bernice ekar ba.
“Aaet, ej Nipai,” Baba ekar ba.
Bernice ekar ettōn̄ dikdik. “Kom̧m̧ool, Baba. Kom̧m̧ool, M̧am̧a. Ij iakwe bok in.”
Kajjojo bon̄, Bernice ej riiti jeje ko rekwojarjar an ippān M̧am̧a im Baba. Liin ekar jitōn̄ļo̧k pija ko. Liin ekar ekkatak n̄an ba jet naan ko reppen. Im liin ekar ekkatak n̄an riiti jet naan ko repidodo kōn e make!
Riiti jeje ko rekwojarjar ekar kōm̧m̧an an en̄jake m̧ōņōņō. Liin ekar lo̧udin̄din̄ ekar maron̄ riiti er ippān M̧am̧a im Baba.
Kōmeļeļe jān Adam Record