Juon Bwebwenato ippān Xiomara kōn An Kāāl ilo Doulul eo an Jiron̄ ro
Xiomara (kilen ba etan she-o-MA-ra) ej jān Chiapas, juon jikin kweilo̧k ilo southern Mexico. Kiiō epaak liin ekar em̧m̧akūtļo̧k n̄an Doulul eo an Jiron̄ ro.
M̧oktata, jej kōņaan jeļā kajjiōm̧.
Ta eo kwoj kōm̧m̧ane n̄an kalimomo?
Baajkōļ ilo baajkōļ eo waaō, ikkure soccer, im kōmat. Men eo em̧m̧an tata ippa n̄an kōmat ej quesdalillas!
Kōļar ta eo em̧m̧an tata ippam̧?
Iaļļo.
Ta eo kwaar ļōmņak kake eļap tata kōn em̧m̧akūt jān Būraimere n̄an Doulul eo an Jiron̄ ro?
Ikar lukkuun m̧ōņōņō n̄an etal n̄an tampeļ im kōm̧m̧ani peptaij ko.
Ekōjkan am̧ kar en̄jake kōn etal n̄an Doulul eo an Jiron̄ ro iien eo jinoin tata?
Ilo jinoin ekar pen. Ikar inepata kōn ta eo leddik ro rōrūttļo̧k renaaj kar ļōmņak kōn n̄a. Ikar ikūm̧kūm̧ jidik m̧ae iien eo kōm aolep kar etal ippān doonļo̧k n̄an tampeļ. Ej iien eo jej erom m̧ōttā ro rem̧m̧an.
Ekōjkan an kar etal n̄an tampeļ eo ilo iien eo jinoin tata?
Ekar lukkuun in āinjuon. Etal n̄an lowaan tampeļ eo an Irooj ekar juon jetōb in en̄jake. Ikar aolep iien kōņaan etal n̄an tampeļ. Ilo Būraimere kōm kar al, “I love to see the temple. I’m going there someday.” Kiiō imaron̄ ba, “Ikōņaan etal n̄an tampeļ eo.”
Ilo iien eo jinoin tata ilo tampeļ, ikar peptaij kōn juon iaan kōrā ro naaj jinō, jet nukun būbū (jinen m̧am̧a), im armej ro jet ikar jab jeļā kajjier. Tampeļ eo im menmenbwij an baam̧le rej m̧ōttan naan in kam̧ool eo aō.
Ta jet iaan m̧akūtkūt ko rekalimomo kwar kōm̧m̧ani ippān kumi in Doulul eo an Jiron̄ ro am̧?
Kōm̧mani kukiij ko! Kōm kar kōm̧m̧ane 150 kukiij ko. Innām kōm kar ajiji n̄an armej ro jet. M̧akūtkūt ko an Doulul eo an Jiron̄ ro rekalimomo. Rej obrak kōn katak ko rem̧m̧an, kōllowetak, im tōl n̄an jipan̄ kōm erom mijenede ro ilju jekļaj.
Ebar wōr ke leddik ro jet dettam̧ ilo ward eo am̧?
N̄a wōt. Ij barāinwōt membōr eo de eo an Kabun̄ in ilo kūlaaj eo aō ilo jikuuļ.
Epen ke n̄an make wōt membōr in Kabun̄ ilo jikuuļ?
Jaab. Ro m̧ōtta aolep rejeļā bwe ij ļoor juon kabun̄ eoktak jān er, bōtaab rejjab kōm̧m̧an n̄an eoktakļo̧k.
Ta eo em̧m̧an tata ippam̧ kōn pād ilo Doulul eo an Jiron̄ ro?
Ij kōņaan ekkatak eļapļo̧k kōn Rilo̧mo̧o̧r eo im karōk in lo̧mo̧o̧r eo. Ej juon kōjeraam̧m̧an kileplep n̄an kōm̧m̧ane jerbal in menmenbwij an baam̧le. Em̧m̧an ippa kōm̧m̧ani peptaij ko n̄an leļo̧k kōjatdikdik n̄an ro nukud me em̧ōj aer ilo̧k jān laļ in.
Em̧m̧an ippa pād ilo būrookraam̧ eo an Doulul eo an Jiron̄ ro!
Kōmeļeļe ko jān Alyssa Tallent