iTaviqaravi ni Lako Mai, Mo Muri Au

Me baleta na lotu vakamatavuvale se vuli ivolanikalou—se ka ni lasa ga!

Julai 1–7

Cakacaka ni liga ni iTuvatuva ni Bula Marau

Baleta na Alama 17–22

iBulibuli ni liga ni gone ena pepa musuki

Rau a vakavulica ruarua o Eroni kei Amoni na ituvatuva ni bula marau ni Tamada Vakalomalagi. Era vakatoka me ituvatuva ni veivueti (raica na Alama 18:36–39 kei na Alama 22). Cega na tabana e 12 mo cakava kina na nomu ituvatuva ni cakacaka ni marau.

Me baleti ira na gone sobu: Vakaraica e dua na iyaloyalo ni luvemu ni se gonelailai. Dusia na sala eso era sa tubu kina ni ra se gone! Qai veivosakitaka na sala eda tiko kina e vuravura meda tubu me tiki ni ituvatuva nei Tamada Vakalomalagi.

Julai 8–14

iYaya ni Cakacaka ena Liga ni Kalou

Baleta na Alama 23–29

Era caka iyaya ni caka e vale na gone

A kaya o Amoni vei iratou na tuakana, “Sa soli vei keitou na iyaya ni cakacaka ena liga ni Kalou me vakayacori kina na cakacaka levu oqo” (Alama 26:3). Sokumuna na iyaya eso o rawa ni vakayagataka mo caka sereivakatagi kina. Qai cakava eso na itautau kei na sere. Me vaka ga ni da vakayagataka na iyaya ni vakatagi, e rawa ni vakayagataki keda na Kalou me vukea na kena tarai cake na Lotu i Jisu Karisito.

Me baleti ira na gone sobu: Cakava e dua na ivakatao rawarawa. Vakatovotovotaka na lako curuma! Qai kauta laivi na ivakatao ka tovolea tale. Vakamacalataka na sala a kautani kina na nodra ivakatao na Tui ni Leimanaiti ena gauna e vinakata kina o Amoni kei iratou na tuakana me ratou vakavulica na kosipeli ena nona vanua (Alama 23:3).

Julai 15–21

iDabedabe Tagi Veivakananumi

Baleta na Alama 30–31

Era taubale wavoki ena idabedabe na gonelalai

E vakavuvulitaka na parofita o Alama, “A ka kecega oqo sa vakadinadinataka ni sa bula tiko na Kalou” (Alama 30:44). Sa kena ibalebale oqo ni veika kece sa bulia na Kalou e rawa ni vakananumi keda me baleti Koya. Tuva na idabedabe ena dua na iwirini ka veirauti na idabedabe vei keda kece ia e dua ga na tamata. Me dua e vakatagitaka ka digitaka na gauna e cegu kina. Ni sa cegu na sereivakatagi, era na dabe kece tale ena dua na idabedabe. Na tamata e sega na nona idabedabe e wasea e dua na ka e vakananuma vei ira me baleta na Kalou. Toso tikoga me yacova ni ra sa gole kece.

Me baleti ira na gone sobu: Taubale wavoki ena nomu itikotiko se tautuba. Vakaraica na veika ena vukei iko mo vakila na marau ka vakananuma vei iko na Tamada Vakalomalagi.

Julai 22–28

Vakatubura Nomu iVakadinadina

Baleta na Alama 32–35

Droinitaka e dua na gone e dua na iyaloyalo

E vakavuvulitaka o Alama ni gauna o vakarorogo kina ki na vosa ni Kalou ka cakava na veika me vakaraitaka nomu vakabauta, ena tubu na nomu ivakadinadina, me vaka e dua na vunikau (raica na Alama 32:37). Droinitaka na veika o rawa ni cakava mo vukea kina na tubu ni dua na vunikau, me vaka na kena soli na wai kei na matanisiga. Qai droinitaka na veika e rawa ni o cakava me vukea na tubu ni nomu ivakadinadina, me vaka na lako ki lotu kei na masu.

Me baleti ira na gone sobu: Lagata na “Vakabauta” (Nodra iVolanisere na Lalai, 50). Ni o lagasere tiko, cakava na cakacaka mo vakaraitaka kina e dua na sorenikau e tubu levu ka balavu. Veivosakitaka na tubu ni nomu ivakadinadina.

Talanoa ena PDF

Droini mai vei Katy Dockrill