Liah T.

16 yia, Lusiana, YSA

Miusik i wan bigfala pat blong laef blong mi. Mi laekem tumas blong plei vaeolin mo vaeola. Taem we mi mi yang, oli singaotem mama blong mi blong i tijim miusik long Praemeri. Hem i bin tijim mi blong lavem ol singsing insaed long Children’s Songbook, mo mi filim Spirit eni taem we mi plei long ol singsing ia.

Mi stap danis tu insaed long grup ia, Louisiana Vintage Dancers, mo mi stap pentem sam art long kanvas (spesel kaliko blong pentem pikja); mi peint blong papa mo mama blong mi, mo tu, blong putum long hom blong mi. Mi mi talem tangkyu tumas mo stap glad tumas long ol pipol we oli stap spendem taem blong pentem ol peinting we yumi stap luk long jos. Mi ting se i gud tumas se, peinting, i moa bitim wan wei ia we ol pipol oli save serem ol filing blong olgeta abaot gospel.

Long Jeneral Konfrens blong Oktoba 2018, Elda Gerrit W. Gong blong Kworom blong Olgeta Twelef Aposol, i tokbaot wan peinting blong san we i draon biaen long wan bigfala dak bus. !I naes tumas! Peinting i mekem mi mi tingbaot se, oltaem, bae san i kam afta long naet we i tudak.

!Gospel hem i laef blong mi! Mi lavem blong konektem lav blong mi long saed blong art i go long gospel. Samtaem, i no nid blong gat wan peinting abaot relijin blong mi filim lav blong God. Samtaem bifo, mi bin stap lukluk long sam peinting blong ol pijin, mo tingting long miwan: “O, God i krietem pijin ia blong mi.”