“Ol Strong Fandesen we Oli No Save Muv,” Blong Ol Yut Oli Kam Strong Maj 2021, 14–15.
Ol Strong Fandesenwe Oli No Save Muv
Wan Wol blong Klaem long Hem
Ol droing oli kam long Alyssa Petersen
Twante yang woman oli stanap long saed blong mi, ae blong olgeta i fas long wan wol we i kolosap faef mita hae. Jalenj blong mifala i blong helpem evri gel blong kasem top blong wol ia. Plante long ol gel ia, hem i bin fas yia blong olgeta blong tekpat long Yang Woman Kamp. Ol gel we oli bigwan moa, wetem mi, mifala i ol yut lida, be mifala i neva bin tekpat long wan aktiviti olsem ia. Mifala evriwan i lisin long ol rul, wetem filing blong wantem tekpat.
Wanwan long ol yang woman i mas go ova long wol. Taem wan i kasem, bae hem i save stanap antap long wan flat ples antap long wol ia, mo help blong pulum ol narawan oli go antap. Be, sapos hem i tajem graon, bae hem i nomo gat raet blong help blong leftemap ol nara gel we oli stap.
Mifala i gat hadtaem smol long fas taem, be i no longtaem afta, mifala i bin save wok tugeta, mo stat blong leftemap ol nara gel oli kam antap. Sam oli bin fraet se bae oli leftemap olgeta i go hae antap olsem, i nomata ol sefti step we oli stap. Sam narawan oli no trastem olgetawan blong save yusum paoa blong olgeta nomo blong kasem top blong wol. I bin nid blong mifala evriwan i gat moa tras mo sapot long wanwan long mifala. Long en, mifala i winim jalenj ia.
Taem ol las yang woman oli klaem i go daon, mifala i kam tugeta blong toktok raon long ol plante lesen we mifala i gat tru long wol aktiviti ia.
Yumi evriwan i fesem ol situesen we yumi luk se i no posibol blong yumi winim. Be, yumi no stap yumiwan. Ol pipol oli stap evri ples raon long yumi blong help blong leftemap yumi mo givim sapot. Papa long Heven mo Jisas Kraes, Tufala i stap ia blong givim help mo givim paoa taem we yumi tanem yumi i go long Tufala.
Megan B., Ohaeo, YSA
“Mi Bin Promes se Bae Mi Mi Kam”
Oltaem nomo mi wantem blong serem gospel wetem ol narawan, be blong plante yia, mi no gat sakses. Kasem taem we mi kam fren wetem wan boe we nem blong hem Tiago. Haos blong mitufala i klosklosap long mitufala, mekem se mitufala i stap wokbaot i gobak hom tugeta afta long skul evri dei.
Wan dei, mifala i tekem wan defren rod mo pas long fored blong japel we mi mi stap go long jos long hem. Mi talem long hem se mi mi wan memba blong Jos blong wan longfala taem nao. Mi talem long hem wanem nao mifala i biliv long hem mo hamas nao famli blong mi i bin gat blesing from hemia. Mi bin invaetem Tiago blong kam long jos wetem mi long Sandei ia, mo hem i talem se bae hem i kam.
Sandei i kam, mo mi glad tumas mo wet long hem long jos, be hem i no kam. Samtaem afta long wik ia, mi bin invaetem hem bakegen. Hemia i hapen olsem blong tu o tri manis olsem, be oltaem hem i gat wan eskius blong hem i no kam. Be mi no stop blong stap invaetem hem.
Wan Sandei moning, mi bin stap long sakramen miting mo mi lukluk i go mo luk Tiago i stanap ia. Mi sapraes blong luk hem, be hem i kam mo i sidaon long saed blong mi mo talem: “!Mi bin promes se bae mi mi kam!”
Mi presentem hem long ol misinari, mo oli stat blong tijim hem. Sam taem afta, hem i bin baptaes. Naoia, mitufala tugeta i stap rere blong go long ol misin. !Mi mi glad tumas we mi mi no givap long hem!
Meiry R., Brasil
Trastem Taem blong God
Anti blong mi i go tru long wan divos taem we bigfala boe blong hem i bin baptaes. Blong ol pikinini blong hem oli holemtaet wan gud rilesensip wetem stret papa blong olgeta, hem i bin wantem kasem raet long hem blong ol nara pikinini blong hem oli kasem baptaes. Be sore tumas, papa ia i no wantem givim raet blong plante yia.
Long en, anti blong mi i disaed se hem i wantem blong ol pikinini blong hem oli baptaes, i nomata se papa blong olgeta i no agri wetem. Be afta we anti blong mi mo ol kasen blong mi oli bin livim kaekae mo prea abaot desisen ia, evriwan i bin filim se bae oli gohed blong wet.
Long semfala wik ia, stret papa blong ol kasen blong mi i talem long anti blong mi se hem i wantem blong ol pikinini oli mit wetem ol misinari mo oli kasem baptaes. Mi stap tingbaot yet glad ia we mi filim taem mama blong mi i talem ol nius ia long mi. Mi bin save se Papa long Heven i bin blesem ol kasen blong mi afta we oli bin save wet blong wan longfala taem we i plante yia.
Yumi no save oltaem wetaem bae Lod i ansarem ol prea blong yumi, be mi mi save se, oltaem bae Hem i ansarem. Mi no bin save se from wanem Papa long Heven i bin wantem ol kasen blong mi blong oli wet blong kasem baptaes, be mi mi save se Hem i bin blesem olgeta from se oli bin fetful.
Bre J., Florida, YSA