“Hat blong Ista,” Blong Ol Yut Oli Kam Strong, Maj 2021, 2–5.
Hat blong Ista: Jisas Kraes we I Stap Laef
Taem yumi stap selebretem Ista, yumi stap glad se Jisas Kraes i stap laef naoia, mo i laef from yumi evriwan.
I kam long wan toktok blong jeneral konfrens blong Epril 2020.
Long Ista taem ia, yumi stap selebretem Jisas Kraes we i stap laef. Wetem wan lav we i stret evriwan, Sevya blong yumi i talem gud: “Wetem mi, bae yufala i save gat pis. Long wol ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis” (Jon 16:33).
Taem yumi stap selebretem Ista, yumi stap glad se Jisas Kraes i stap laef—i no long tetaem ia nomo; i no laef from samfala man nomo, be from yumi evriwan. Hem i bin kam, mo i kam hilim ol hat we oli harem nogud, mekem ol prisena oli kam fri, mekem ae i save luk bakegen, mo mekem olgeta we oli gat kil, oli kam fri (luk long Luk 4:18). Hemia, wanwan long yumi ia. Promes blong Hem we i pemaot man i laef i stap, i nomata laef blong yumi bifo, blong naoia, o wanem yumi save ting abaot fiuja blong yumi.
Hosana mo Aleluia
Long Pam Sandei, Jisas i bin go insaed long Jerusalem, long bak blong wan dongki mo plante pipol “oli tekem ol han blong pamtri, nao oli go blong mitim hem” (Jon 12:12–13; luk tu long Matiu 21:8–9; Mak 11:8–10). Long kastom, ol han blong pamtri oli wan tabu saen blong talemaot glad we oli gat long Lod blong yumi. Olgeta we oli gat bilif mo stap fetful oli bin luksave se, hemia, i wan profesi we i kamtru, mo from oli bin save hemia, oli bin singaot se : “!Hosana* long Laen ya blong King Deved! Hae God, yu blesem man ya we i kam long nem blong yu. Olgeta long heven oli presem nem blong yu.” (Matiu 21:9). Hosana i minim “sevem naoia” (luk long Bible Dictionary, “Hosanna”).
Wan wik afta long Pam Sandei, hem i Ista Sandei. Presiden Russel M. Nelson i stap tijim se Jisas Kraes “i bin kam blong pem wan kaon we i no blong Hem, from se yumi bin gat wan kaon ia we yumi no save pem.”1 I tru, tru long Atonmen blong Kraes, evri pikinini ia blong God, bae “Kraes i sevem [olgeta] taem oli stap obei long ol loa mo olgeta odinens blong Gospel” (Ol Toktok blong Bilif 1:3). Long Ista, yumi singsing aleluia. Aleluia i minim: “yufala i presem Lod Jehova” (luk long Bible Dictionary, “Hallelujah”).
Ol tabu taem bitwin Pam Sandei mo Ista Sandei, oli stori blong hosana mo aleluia. Hosana i strong plis blong yumi blong God i sevem man. Aleluia i talemaot pres blong yumi long Lod from hop ia blong Hem i sevem man mo mekem olgeta oli kam olsem wan god. Long hosana mo aleluia, yumi luksave Jisas Kraes ia we i stap laef olsem stamba o hat blong Ista.
Restoresen mo Laef Bakegen long Ded
Long Ista Sandei, 3 Epril 1836, long ol fas yia blong Restoresen, Jisas Kraes we i stap laef i bin kamkamaot taem oli bin dediketem Ketlan Tempol. Olgeta we oli bin luk Hem oli bin testifae abaot Hem se i olsem tu samting we i agensem tufala, faea mo wota: “Ae blong hem i olsem faea we i laet; hea blong hed blong hem i waet we i waet olsem klin sno; fes blong hem i saen i bitim laet blong san; mo voes blong hem i bigwan olsem noes blong bigfala solwota we i brok long rif, we i voes blong Jehova.” (Doktrin mo Ol Kavenan 110:3; oli ademap italik).
Long tetaem ia, Sevya i bin talem: “Mi mi faswan mo laswan; Mi mi hem ia we i stap laef, mi mi hem we oli bin kilim hem i ded; mi mi loya blong yufala long fored blong Papa.” (Doktrin mo Ol Kavenan 110:4). Bakegen, ol samting we oli agensem tufala—faswan mo laswan, laef mo kilimded. Hem i Alfa mo Omega, stat ia mo en ia (luk long Revelesen 1:8; 3 Nifae 9:18; Doktrin mo Ol Kavenan 19:1; 38:1; 45:7), man we i bin statem mo finisim fet blong yumi (luk long Hibrus 12:2; Moronae 6:4).
Afta we Jisas Kraes i bin kamkamaot, nao Moses, Elaeas, mo Elaeja tu oli bin kam. Tru long tabu daereksen, ol hae profet ia blong bifo oli putumbak ol prishud ki mo atoriti. Olsem ia nao, “Lod i givim ol ki blong dispensesen ia” (Doktrin mo Ol Kavenan 110:16) insaed long Jos Ia blong Hem we Hem i putumbak blong blesem evriwan long ol pikinini blong God.
I impoten blong luk se Buk blong Momon i tokbaot “paoa mo laef bakegen long ded blong Kraes” (Alma 41:2)—stamba blong Ista—olsem we i tufala restoresen.
Faswan, laef bakegen long ded i minim evri pat blong bodi “i kambak long bodi blong hem,” “evri leg, mo han mo joen,” “bae i no gat wan pis hea blong hed we bae i lus” (Alma 40:23). Promes ia i givim hop long olgeta we oli lusum leg o han, we oli nomo save luk, harem, o wokbaot, o ol tingting we oli lus from sik we i no stop, sik long tingting, o ol nara paoa we i go daon. Hem i faenem yumi. Hem i mekem yumi stret evriwan bakegen.
Wan nambatu promes blong Ista mo Atonmen blong Lod blong yumi, i we, long saed blong spirit, “evri samting bae oli putumbak long stret oda blong olgeta” (Alma 41:4). Restoresen ia long saed blong spirit, i soemaot ol wok mo ol samting we hat blong yumi i wantem. Hem i putumbak “wanem we i gud,” wanem we “i stret mo gud,” wanem we “i stret,” mo wanem we “i gat sore” (Alma 41:13). I no from nating we profet Alma i yusum toktok ia: putumbak 22 taem2 taem hem i stap askem strong long yumi blong “mekem stret samting, jaj wetem stret mo gud fasin, mo mekem gud oltaem” (Alma 41:14).
From “God hemwan nomo i pem praes blong ol sin blong wol,” (Alma 42:15), nao Atonmen blong Lod i save putumbak ol samting we oli bin stap, be tu, wanem we i save stap. From se Hem i save ol sobodi, ol hadtaem, ol sik, mo ol eni kaen temtesen blong yumi,” (Alma 7:11), Hem i save, wetem sore, givhan long yumi folem wanem we yumi no strong long hem (luk long Alma 7:12). From se God i “stap stret evriwan, i wan stret God, mo tu, i wan God we i gat sore,” nao plan blong sore ia i save “givim evri samting we jastis i askem” (Alma 42:15). Yumi sakem sin mo mekem evri samting we yumi save mekem. Hem i raonem yumi blong taem we i no save finis wetem “ol han blong lav blong hem” (2 Nifae 1:15).
Singsing long Ol Singsing blong Wan Glad We I No Gat En
Wetem yufala, long Ista taem ia, mi testifae abaot God, Papa blong yumi long Heven mo Pikinini blong Hem we Hem i lavem tumas, Jisas Kraes we i stap laef. Ol man long wol ia, oli bin hangem olgeta long kros mo oli bin laef bakegen long ded afta. Be Jisas Kraes we i stap laef nomo wetem bodi blong Hem we i stret evriwan i stap karem ol mak blong nil long ol han, leg mo saed blong Hem. Hem nomo i save talem: “Mi makem nem blong yufala i stap long han blong mi finis” (Aesea 49:16; 1 Nifae 21:16). Hem nomo i save talem: “Mi ia nao, oli bin leftemap mi. Mi ia nao, mi Jisas we oli bin hangem mi long kros. Mi mi Pikinini blong God” (Doktrin mo Ol Kavenan 45:52).
Long ol taem ia, yumi save lanem plante samting abaot gud fasin blong God mo hamas yumi gat paoa blong letem lav blong God i gro insaed long yumi taem yumi stap lukaotem Hem mo go helpem wanwan long yumi. “Mo bae i kam blong hapen se olgeta we oli stret mo gud bae oli kam wanples aot long medel blong evri nesen, mo bambae oli kam long Saeon, mo oli stap singsing ol singsing blong wan glad we i no gat en” (Doktrin mo Ol Kavenan 45:71). Long taem ia blong hosana mo aleluia, singsing aleluia—!from se bae Hem i rul blong oltaem mo oltaem! Singsing !Hosana long God mo Smol Sipsip!