“Olsem Wanem blong Oltaem Gat Spirit Ia,” Blong Ol Yut Oli Kam Strong Maj 2021, 26–29.
Kam Folem Mi
Stap Rere blong Oltaem Gat Spiritblong Hem
Taem yumi stap rere blong stap klin inaf blong tekem mo kakae sakramen evri wik, i save helpem yumi blong oltaem gat Spirit i stap wetem yumi.
Taem mi bin gat 12 yia, mi bin go wetem famli blong mi blong visitim ol ples blong Jos histri long apstet blong Niu Yok, YSA. Insaed long Tabu Bus, mi tingbaot se mi bin stap tingting hevi abaot Fas Visen ia mo ol nara gudfala visen we Josef i bin luk, mo tingting long miwan: “!Wao! Sapos mi tu mi gat wan visit olsem long saed blong spirit wetem sam long olgeta long heven semmak olsem Josef, bae evri samting long laef blong mi bae i stret nomo.”
Stat long tetaem ia, mi bin lanem se mi no nidim wan bigfala samting i hapen long saed blong spirit insaed long laef blong mi, be mi nidim ol smol eksperiens we oli kam oltaem blong kipim mi mi strong long testemoni blong mi, mo blong mi sef long rod ia i gobak hom. Papa long Heven i bin save se bae yumi nidim moa daereksen insaed long laef blong yumi, mo Hem i bin rere long wan rod blong yumi kasem daereksen ia.
Long olgeta evriwan we oli gat inaf fet long Pikinini blong Hem blong oli sakem sin, mo kasem baptaes, Hem i givim presen ia we i Tabu Spirit. Tru long odinens we i hapen evri wik, Hem i givim yumi rod blong “oltaem gat Spirit i stap wetem [yumi]” sapos yumi tingbaot Sevya mo kipim ol komanmen blong Hem (Doktrin mo Ol Kavenan 20:77). Hemia i mekem se i posibol blong yumi save yusum evri dei daereksen blong Spirit insaed long laef blong yumi taem yumi stap yusum fridom ia blong mekem joes blong save mekem ol desisen we bae oli helpem yumi folem rod ia i gobak long Papa long Heven.
Sakramen mo Spirit
Papa long Heven i bin save se bae yumi nidim oltaem blong save yusum daereksen blong Spirit blong Hem, i no jes long wan taem eksperiens nomo, be oltaem. Tru long Profet Josef Smit, Lod i putumbak odinens blong baptaes andanit long wota, we i helpem yumi blong kam klin. Afta long hemia, yumi rere blong kasem presen we i Tabu Spirit tru long konfemesen, we i givim yumi rod ia blong save kasem evri dei daereksen we i kam long Spirit.
Papa long Heven i bin save se blong kam klin wan taem nomo, bae i no inaf, mo bae yumi nidim blong tingbaot Sevya mo kam klin bakegen mo bakegen, blong save kipim Spirit i stap wetem yumi oltaem. Hem i putumbak odinens blong sakramen from stamba tingting ia nao. Sapos yumi lukaotgud blong stap rere, mo sapos yumi oltaem tekem mo kakae sakramen, yumi gat promes ia se “bae oltaem yumi gat Spirit blong hem i stap wetem [yumi]” (Doktrin mo Ol Kavenan 20:77; oli ademap italik).
Be, blong jes kamkamaot long Jos mo kakae bred mo dring wota, bae i no letem yumi blong yusum promes ia blong Lod. Taem yumi stap minim blong stap rere from odinens ia, i mekem se yumi save kasem paoa ia blong Sevya insaed long laef blong yumi.
Ol atlet (man blong resis) oli no kam topman taem oli jes werem yunifom o stap wokbaot i go long stad o ples blong ron. Oli mas trenem bodi blong olgeta, oli mas lanem ol teknik, mo praktis blong save kam topman long spot blong olgeta. Semmak, yumi mas lanem olsem wanem blong rere blong tekem mo kakae sakramen wetem respek fasin, mo stap klin inaf; long wei ia bae yumi save kasem paoa ia we Hem i save givim long yumi.
Wan wei blong stap mekem hat mo spirit i rere blong tekem mo kakae sakramen, hem i blong gat wan smol intaviu wetem yuwan, evri wik. Mi laekem blong yumi Doktrin mo Ol Kavenan 20:37 blong intaviu miwan wetem. Insaed long ves ia, i gat ol samting we wan i mas mekem blong save kwalifae blong kasem baptaes. Ol samting ia, God i bin talemaot tru long revelesen i go long Profet Josef. Hem i tekem insaed ol kwalifikesen we evriwan we oli wantem baptaes oli mas gat. Mi faenem se hem i helpem mi blong mekem miwan mi rere blong kasem bakegen ol promes ia tru long sakramen.
Foto i kam long Getty Images
Taem mi stap yusum skripja ia olsem gaed blong mi, hemia samfala kwestin we mi stap askem miwan blong luk sapos mi mi rere o no blong tekem mo kakae sakramen.
?Mi mi putum tingting blong miwan i stap daon long fes blong God?
Fasfala samting blong mekem we i stap long Doktrin mo Ol Kavenan 20:37, hem i blong putum tingting blong yu i stap daon taem yu stanap long fes blong God. Yumi stap mekem hemia taem yumi stap akseptem mo yumi glad blong folem tingting blong Hem olsem we oli raetem long ol skripja, olsem we ol wokman blong Hem oli tijim, o olsem we i kam long yumi tru long ol kwaet toktok blong Spirit.
Mi askem miwan sapos mi mi stap faet agensem God long eni samting insaed long laef blong mi naoia. ?Mi mi no stap folem daereksen blong Hem? ?Mi mi lisingud long ol tijing blong ol wokman blong Hem? Sapos mi no mekem, mi mi mekem ol plan blong kam antap mo mi mi stap komitim mi blong mekem i gud moa taem mi stap rere blong tekem mo kakae sakramen. God i save evri samting—taem we mi luksave se Hem i save luk bigfala pikja ia long laef blong mi, hem i isi moa blong putum tingting blong mi i stap daon long fes blong Hem mo trastem se bambae Hem i lidim mi long wanem we i bes long mi.
?Mi mi gat wan hat we i fulap wetem sore mo wan spirit we i wantem blong sakem sin?
Blong gat wan hat we i fulap wetem sore mo wan spirit we i wantem blong sakem sin, hem i go wetem fasin blong putum tingting i stap daon. Hem i minim blong stap glad o agri blong folem tingting blong God. Blong putum tingting i stap daon i minim blong talem se yumi sore, mo blong yumi fogivim man iven taem we i had blong mekem, o taem we yumi filim se ol narawan nao oli rong. ?Yu yu save talem: “Hat blong mi i stret wetem evriwan”? ?Yu yu mekem wan raon long yu i harem nogud, o yu yu gat ol nogud filing abaot wan? ?Yu yu nid blong askem fogivnes?
Taem mi gat wan hat we i fulap wetem sore mo wan spirit we i wantem blong sakem sin, mi mi glad blong mekem wan efot blong stretem ol samting wetem God mo olgeta raon long mi. Mi traem blong sakemaot ol nogud tingting mo filing we mi gat long ol narafala man. Spirit i no stastap wetem yumi taem we yumi gat ol filing blong raorao, mekem se, blong sakemaot ol kaen filing ia, i wan impoten step blong stap mekem yumiwan i rere blong kasem promes blong sakramen.
?Mi mi wantem blong kam klin bakegen, mo mi mi save witnes se mi mi bin sakem evriwan long ol sin blong mi?
Wan narafala samting blong kasem long Doktrin mo Ol Kavenan 20:37, hem i we “i tru se [yumi] bin sakem evri sin blong [yumi].” Taem yumi bin baptaes, oli wasem yumi kam klin long ol sin blong yumi. Yumi bin mekem wan promes blong traem kipim ol komanmen blong God mo sakem sin taem we yumi mekem ol mistek.
Mi askem miwan: “Mi mi stap tekem sakramen from se mi ting se mi sapos blong tekem nomo, o mi mi rili wantem kam klin bakegen?” Mi lukluk i gobak long ol sin blong mi insaed long wik ia, mo mi askem miwan sapos i tru se mi wantem blong jenisim fasin blong mi mo sakem ol sin ia. Taem we yu yu gat hat blong wantem kam klin, bambae yu luk, tru long Spirit, ol samting ia we yu nidim blong kam antap long hem, mo bambae Hem i gohed blong pusum yu blong sakem sin, mo mekem ol joes we oli gud moa.
Blong konfes i go long Lod (mo ol narawan we maet yumi givim kil long olgeta, mekem se oli harem nogud) i pat blong fasin blong yumi stap rere.
Askem yuwan: “?I gat eni samting we mi mi nidim blong jenisim, be mi no mekem yet? ?I gat eni samting we mi mi nid blong sakem sin from yet?” Blong stretem ol samting tru long fasin blong sakem sin i save mekem yumi kwalifae blong stap klin inaf blong save tekem mo kakae sakramen.
?Mi mi wantem mo agri blong tekem long miwan nem blong Jisas Kraes?
Wanwan kavenan we yumi stap mekem, i minim se yumi mekem wan komitmen blong tekem nem blong Kraes moa fulwan long yumi. Taem we yumi kasem baptaes, yumi soem se yumi wantem mo agri blong tekem long yumi nem blong Jisas Kraes, mo blong obei ol komanmen blong Hem. Taem we yumi mekem moa kavenan insaed long tempol, o akseptem ol koling, yumi tekem wok ia mo ol tijing blong Kraes i go moa. Blong soem se yumi wantem o agri blong tekem long yumiwan nem blong Hem olsem pat blong sakramen evri wik, i minim blong komitim yumi bakegen long evriwan long ol kavenan mo komitmen we yumi bin mekem finis wetem Hem.
Taem mi stap skelem se mi rere gud o no blong tekem sakramen, mi askem miwan ol kwestin olsem: “Mi mi stap mekem bes we mi save mekem blong stap olsem wan eksampol blong Kraes mo ol tijing blong Hem? ?Mi mi stap kipim evri promes we mi bin mekem we i go wetem ol kavenan blong mi? ?Mi mi komitim mi tedei i go long Kraes mo i go long ol kavenan we mi bin mekem wetem hem, semmak olsem long fasfala dei ia we mi bin mekem olgeta kavenan ia?
?Mi mi gat wan strong tingting blong givim seves o wok blong Hem kasem en?
Yumi bin promesem Lod, taem yumi bin mekem ol kavenan blong baptaes, se bambae yumi traehad blong obei ol komanmen blong Hem. Tufala komanmen we oli hae olgeta, oli blong lavem Lod mo blong lavem neba blong yu (luk long Matiu 22:36–40). Yumi soem lav blong yumi long tugeta, God mo ol narafala man, taem yumi givim seves long olgeta.
Mi askem miwan: “?Mi mi putum sam taem blong givim seves? ?Mi mi no glad blong givim seves, o mi mi hapi blong givim seves?” “?Mi mi traem blong wok strong long koling blong mi o nogat? Blong givim seves long ol narafala man, hem i wan gudfala wei blong rere blong tekem mo kaekae sakramen. Wanem i tru, i we, taem yumi stap givim seves long ol narawan nao yumi nidim Spirit blong i soem rod blong yumi.
Trastem Ol Promes blong Lod
Taem we yumi minim blong stap rere, evri wik, blong stap klin inaf blong tekem mo kakae sakramen, bambae yumi kwalifae blong oltaem gat Spirit ia blong lidim tingting mo gaedem yumi long laef blong yumi. Hemia i wan promes we i kam long Lod.