“Ol Olsem Wan Windo I Go long Sol blong Yu we Oli No Save Muv,” Blong Ol Yut Oli Kam Strong Maj 2021, 6–8.
Olsem Wan Windo I Go long Sol blong Yu
Taem we oli bin singsing wetem wod kwaea blong olgeta long wan kombaen fet festivol, olgeta yangfala ia oli bin lanem plante abaot wei we miusik i save tekem evriwan we oli bilif oli kam tugeta.
Megan C., Ethan M., mo Romy C. oli gat wan semmak samting we oli serem: Olgetatri oli lavem kwaet miusik. Oli lavem wei we hem i leftemap mo i givim insperesen long olgeta, mo wei we i mekem olgeta oli filim. Mo oli lavem blong luk olsem wanem hem i leftemap mo givim insperesen long ol narawan.
Megan, 18; Ethan, 19; mo Romy, 17, oli gat wan nara semmak samting we oli serem: Olgeta evriwan oli singsing insaed long wod kwaea blong olgeta long Florida, YSA. Mo i no longtaem i pas, kwaea ia i bin givim olgeta wan bigfala janis blong oli serem lav blong olgeta long miusik taem oli tekpat long wan kombaen fet Miusik Festivol.
“Komuniti blong mifala i gat wan kombaen fet yuniti we i mekem plante samting blong tekem ol pipol blong ol defren fet oli kam tugeta,” Ethan i eksplenem. Eksampol: grup i holem wan toktok storian raon long wan Iftar kaekae (naet kaekae we Ol Muslim oli kakae blong endem evri dei fast blong olgeta long tabu manis blong Ramadan), oli oganaesem plante seves projek olsem blong rere long ol skul bag blong ol pikinini we oli stap long nid, mo oli holem ol fri kaekae; long ol taem ia ol pipol we oli no bin save olgeta oli sidaon saedsaed long sem tebol mo oli tokbaot ol kaekae, ol kastom, mo ol bilif we wanwan i gat long kalja blong olgeta.
Ol memba blong kwaea oli laekem blong kakae sapa mo givim seves tugeta wetem olgeta we oli gat ol nara bilif.
Yufala I Kam Yumi Kam Fren
I tru, yuniti gol ia i blong helpem ol pipol we oli gat ol defren laef situesen blong oli kam ol fren.
“I gat wan famli blong Teki we mi luk olgeta oltaem long ol kombaen fet sapa, mo oli ron kam long mi mo talem: ‘!Mifala i hapi tumas blong luk yu bakegen!’” Romy i talem. “Long wan wol we i gat tumas fasin blong mekem nogud long man from relijin mo bilif, hem i gud tumas blong mifala evriwan i save kam tugeta mo jes toktok long wanwan long mifala.” Long taem blong wan long ol seves projek ia, “ol woman long wan nara jos, oli bin swit tumas,” hem i talem. “Oli no kea long relijin blong eniwan. Oli bin stap ia blong givim help blong olgeta nomo. Hem i bin wan gud taem we i helpem tingting.”
Megan i talem: “Bae yumi save gat ol defren bilif, be oltaem mi bin respektem ol bilif blong ol nara pipol, mo i bin naes blong konek wetem olgeta long kaen situesen olsem we, mifala evriwan i bin wantem blong lanem wan samting abaot wanwan long mifala.”
“Jos blong mifala i wan long ol niu memba insaed long yuniti grup ia,” Ethan i talem. “Mekem se mi glad tumas se oli gat kaen fasin wetem mifala mo oli bin akseptem mifala. Mi save se long samfala ples, ol pipol oli no andastanem gud Jos. Mekem se mi talem tangkyu oltaem taem we ol pipol oli save akseptem wanem i defren long ol narawan, mo oli lukluk long wanem we yumi gat we i semmak.
We Yumi Wan
Mo wan long ol samting we evri grup blong fet oli gat we i semmak, hem i miusik. Kombaen Fet Miusik Festivol bae i wan gudfala janis blong olgeta we oli bilif, blong oli kam wan blong stap presem God. Wod kwaea bae i wan blong samples sikis grup we oli ripresentem ol kongregesen raon long siti.
Megan i eksplenem: “I gat wan bel kwaea, tu we tufala i singsing, wan bigfala kwaea, wan smol kwaea, tu we wan i plei flut mo narawan piano, i go i go olsem. Evri grup ia, oli askem olgeta blong plei tu namba, o tu singsing.”
Megan i gohed: “Mifala i wantem mekemsua se wanem we mifala i singsing bae i letem ol pipol oli save se mifala i biliv long Jisas Kraes, mo tu, mifala i biliv long Papa long Heven. Mifala i wantem krietem wan filing blong wosip.”
Kwaea i disaed long tu singsing we oli bin plei long hem finis, “Great Things and Small Things,” we i kam long Steven Kapp Perry, mo “Sacraments and Symbols,” we i kam long Janice Kapp Perry, Steven Kapp Perry, mo Lynne Perry Christofferson.
“Fas singsing ia i wan apbit. Hem i givim stret save ia se tru long God, yu save mekem eni samting, i nomata se i smol o i impoten tumas,” Ethan i talem. “Nambatu singsing i gat bigfala respek long hem mo i kwaet. Hem i olsem wan singsing we oli singsing be i no gat miusik, mo i mekem se wan i filim wan filing blong wosip.”
Praktis, Praktis, Praktis
Taem we oli stap rere blong singsing, Ethan i bin yusum wan teknik we hem i bin yusum finis bifo. “Fas samting we mi traem blong mekem i blong draon insaed long singsing,” hem i talem. “Mi faenem se taem mi save luklukgud long mining blong singsing ia, mi save stap glad moa long hem. Yes i tru, mi meksua se mi save singsing gud long hem, be mi faenem se i moa isi blong mekem hemia taem we tingting blong mi i go wetem mesej ia we mi stap traem blong pasem i go. Mi laekem blong poenemaot gud fasin blong rere long saed blong spirit.”
“Mifala i stil mas singsing long sakramen miting mo praktis blong sam nara samting tu,” Megan i talem. “Be mifala i bin save se kombaen fet festivol ia i impoten, mekem se mifala i meksua se miusik blong mifala i rere gud. Mifala i bin wok had long ol singsing ia.”
Long nambatu namba, ful kwaea blong 14 memba ia, i kam daon long tu grup blong fo. “Bae mifala i praktis long ol Tiusdei, bifo klas blong Ol Yang Man mo Ol Yang Woman,” Megan i talem. “I mekem se mi tingting long singsing ia blong wan ful wik, blong wan ful manis. Mi talem tru ia. Mi no stap mekem hemia oltaem, be mi bin faenem singsing ia long You Tube mo mi wokem plei singsing ia bakegen mo bakegen. Mi wantem blong kam gud moa long hem. Mi wantem se bae mifala evriwan i mas singsing gud long hem, mekem se bae mifala i tajem hat blong ol nara pipol.”
Ethan, Megan mo Romy, oli agri se, blong praktis plante, bae i mekem taem ia i gud moa. Romy i talem: “Taem yu ripitim singsing bakegen mo bakegen, ol mesej blong singsing oli stap long maen blong yu, mo insaed long hat blong yu.”
Kwaea i bin singsing long Kombaen Fet Miusik Festivol.
Insaed long Maen, Insaed long Hat
Wanem i stap insaed long maen mo hat blong olgeta, i bin kamaot klia taem we ol memba blong kwaea oli bin singsing. “Tugeta singsing i jes naes tumas,” Romy i talem. “Olgeta we oli kam lisin, oli go kwaet mo evriwan i bin filim Spirit taem oli bin singsing long tufala singsing ia. Mifala evriwan i filim se mifala i yunaet, i joen wan ples.”
Megan i talem: “Fas singsing, olsem i bin wan hapi singsing long mi. Mi filim se i tajem gud ol pipol long festivol ia. Mi gat wan gud taem blong singsing long hem mo mi hop se evriwan i bin laekem tu. Mo long nambatu singsing, ol voes ia oli miks gud we i naes blong harem. Mi ting se evriwan we i bin lisin i bin filim wan spirit blong respek mo sapraes long God.”
Megan i gohed i talem: “Long en blong naet ia, mifala i bin save toktok long olgeta we oli tekpat mo ol pipol we oli bin kam lisin. Mi save se sam pipol oli stap askem kwaea daerekta blong mifala abaot ol singsing we mifala i bin singsing long hem—‘?hemia wanem kaen miusik ia? O ?yu faenem kaen miusik miks ia wea?’ Mifala i bin save toktok wetem wanwan long mifala mo tokbaot miusik ia we mifala evriwan i bin serem. Mi bin filim se mi bin save andastanem olgeta moa tru long ol singsing blong olgeta, mo olgeta tu, oli bin andastanem mifala gud moa from miusik blong mifala. Miusik i olsem windo we i open i go long sol blong yu.”