“Fakafehokotakí,” Ki Hono Fakamālohia ʻo e Toʻu Tupú,Māʻasi 2021, takafi muʻa ki lotó.
Fakafehokotakí
Liah T.
16, Luisiana, USA
ʻOku hoko ʻa e hivá ko ha konga lahi ʻo ʻeku mouí. ‘Okú ou manako ʻi he tā vālingí mo e violá. ‘I heʻeku kei si‘í, naʻe uiuiʻi ʻeku fa‘eé ke akoʻi ‘a e hivá ʻi he Palaimelí. Na‘á ne akoʻi au ke u manako ʻi he ngaahi hiva ‘i he Tohi Hiva ʻa e Fānaú, pea ʻoku ou ongoʻi ‘a e Laumālié ʻi he taimi ‘oku ou tā ai ʻa e ngaahi hiva ko ení.
ʻOku ou tauʻolunga foki ki he kau faiva Louisiana Vintage Dancers mo tā valivali ‘a e fakatātā maʻa ‘eku ongomātuʻá mo hoku ‘apí. ʻOku ou maʻu ‘a e loto hounga‘ia lahi mo e fakamālō ki he kakai ʻoku nau tuku taimi ki hono tā valivali ʻo e fakatātā ‘oku tau mamata ai ʻi he lotú. ‘Oku ou tui ʻoku fakaofo he ko e tā valivalí ko ha toe founga pē ia ‘e taha ʻe lava ke vahevahe ai ‘e he kakaí ʻa ‘enau ngaahi ongó fekauʻaki mo e ongoongoleleí.
Na‘e fakaʻaonga‘i ʻe ‘Eletā Keleti W. Kongi ʻo e Kōlomu ‘o e Kau ʻAposetolo ‘e Toko Hongofulu Mā Uá ʻi he konifelenisi lahi ‘o ʻOkatopa 2018, ha tā valivali ‘o e tō ʻa e la‘aá ʻi mui ‘i ha vao ʻakau. Naʻe fakaʻofoʻofa ʻaupito ia! ‘Oku fakamanatu mai kiate au ʻe he tā valivalí ‘e hopo mai maʻu pē ʻa e la‘aá ʻi he hili ʻa e pō fakapoʻulí.
Ko ʻeku moʻuí ʻa e ongoongoleleí! ‘Oku ou saiʻia ʻi hono fakafehokotaki ʻeku manako ʻi he tā fakatātaá ki he ongoongoleleí. Taimi ‘e niʻihi ‘oku ʻikai ke pehē kuo pau pē ko ha tā valivali fakalotu ka u toki ongo‘i ʻa e ‘ofa ʻa e ‘Otuá. Naʻá ku mamata ‘i he ngaahi tā valivali ʻo e fanga manupuná kimuʻa peá u fakakaukau, “‘Oi, naʻe fakatupu ʻe he ‘Otuá ʻa e fo‘i manupuna ko ʻená maʻaku.”