“Na Yalo ni Siganimate: O Jisu Karisito Sa Bula Tiko,” Me iSakisaki ni iTabagone, Maji 2021, 2–5.
Na Yalo ni Siganimate: O Jisu Karisito Sa Bula Tiko
Ni da marautaka na Siganimate, eda reki ni bula tiko o Jisu Karisito ena gauna oqo ka sa baleti keda kece sara.
Mai na dua na vosa ena koniferedi raraba ni Epereli 2020.
Ena gauna ni Siganimate oqo, eda marautaka ni sa bula tiko o Jisu Karisito. Ena loloma uasivi sara, sa vakadeitaka vei keda na iVakabula: “A veika oqo kau sa tukuna vei kemudou, mo dou rawata na vakacegu ena vukuqu. Dou na kunea e vuravura na rarawa: ia mo dou vakacegu; au sa vakamalumalumutaki vuravura” (Joni 16:33
Ni da marautaka na Siganimate, eda reki ni bula tiko o Jisu Karisito — sega walega ena gauna o ya, ia ena gauna oqo; sega ni baleti ira walega eso, ia vei ira kece na tamata. A lako mai o Koya me vakabulai ira na yalo rarawa, sereki ira na bobula, dolava na matadra na mataboko, ka vueti ira era sa mavoa (raica na Luke 4:18). O ya oi keda vakayadua. Na Nona yalayala ni veivueti sa yaga, se cava sara na noda bula taumada, se nikua, se cava ga eda nanuma baleta na noda veisiga ni mataka.
Osana kei na Aleluya
Ena Sigatabu ni Curu Vakatui, a curu yani ki Jerusalemi o Jisu ena nona vodoka yani e dua na meule ka vuqa na “tamata … era sa kauta na drau ni niu, a ra sa lako yani me veitavaki kaya ”(Joni 12:12 – 13; raica talega na Maciu 21:8 – 9; Marika 11:8 – 10). Sa kena ivakarau vakavanua, ni drau ni niu sa ivakatakarakara tabu ni kena vakaraitaki na reki vua na Turaga. O ira na yalodina era raica oqo ni sa yaco na ka sa parofisaitaki ka kailavaka ni sa dina, “Osana ki cake sara” (Maciu 21:9). Na Osana sa kena ibalebale “veivakabulai nikua” (raica na Bible Dictionary, “Hosanna”).
Na macawa e tarava na Siga Tabu ni Curu Vakatui sa Siga Tabu ni Siga ni Mate. E vakavulica o Peresitedi Russell M. Nelson ni o Jisu Karisito “a lako mai me mai sauma na dinau a sega ni Nona baleta ni da sa sega ni sauma rawa na noda dinau.”1 Sa dina sara, ena Veisorovaki i Karisito, o ira kece na luve ni Kalou era na vakabulai “kevaka eda sa talairawarawa ki na lawa kei na cakacaka vakalotu ni Kosipeli.” (Yavu ni Vakabauta 1:3). Ena Siga ni Mate, eda na laga aleluya. Na Aleluya e kena ibalebale “mo vakacaucautaka na Turaga ko Jiova” (raica na Bible Dictionary, “Hallelujah”).
Na veisoqo tabu ena tadrua ni Siga Tabu ni Curu Vakatui kei na Siga Tabu ni Siganimate era sa italanoa ni osana kei na aleluya. Na osana sa noda vakamamasu vua na Kalou me veivakabulai. Na aleluya sa vakaraitaka tiko noda vakacaucau kei na vakavinavinaka vua na Turaga ena inuinui ni da sa vakabulai ka bula vakacerecerei. Ena osana kei na aleluya eda sa kila kina ni o Jisu Karisito sa bula tiko sa uto ni Siganimate.
Veivakalesuimai kei na Tucaketale
Ena Siga Tabu ni Siganimate, ni 3 ni Epereli, 1836, ni se qai tekivu walega na Vakalesuimai, a rairai o Jisu Karisito sa bula tiko ena gauna sa vakatabui oti tiko kina na Valetabu e Kirtland. O ira era a raici Koya e kea era a vakadinadinataki Koya ena veidutaitaki vinaka ni bukawaqa kei na wai: “A sa vaka na yameyame ni bukawaqa; na yaloka ni matana; sa vulavula sara na drau ni uluna me vaka na uca cevata; ia na serau ni kena rairai sa uasivi cake mai na rarama ni matanisiga; a rorogo ni domona sa vaka na vadugu ni wailevu, io na domo i Jiova” (Vunau kei na Veiyalayalati 110:3; vakuri ena vosakala).
E kea, a kaya na noda iVakabula, “Koi au na kena ivakatekivu kei na kena ivakataotioti; sai Au sa bula, sai Au talega sa vakamatei; raica koi Au na nomudou dautataro vei Tamada” (Vunau kei na Veiyalayalati 110:4). Vakadua tale, na veiduitaki vinaka—na ivakatekivu kei na ivakataotioti, sa bula tiko ka sa vakamatei. Sai koya na Alifa kei na Omeka, na ivakatekivu kei na ivakataotioti (raica na Ai Vakatakila 1:8; 3 Nifai 9:18; Vunau kei na Veiyalayalati 19:1; 38:1; 45:7), sa vakatekivuna ka sauma talega na noda vakabauta (raica Iperiu 12:2; Moronai 6:4).
Ni oti na nona rairai mai o Jisu Karisito, e ratou a tadu talega mai o Mosese, Ilaisa, kei Ilaija. Ena veidusimaki vakalou, e ratou a vakalesua mai na parofita cecere oqo na idola kei na lewa ni matabete Sa yaco kina, me “soli kina na idola ni itabagauna” (Vunau kei na Veiyalayalati 110:16) ena loma ni Nona Lotu sa vakalesui mai me vakalougatataki ira na luve ni Kalou.
Sa ka bibi sara, ena kena vakamacalataki ena iVola i Momani “na kaukauwa kei na tucaketale i Karisito” (Alama 41:2)—na usutu ni Siganimate—ena rua na veivakalesuimai.
iMatai, na tucaketale e oka kina na vakalesuimai ni noda “veika kece ki na kedra itutu dina”; “na veisema ni yago kecega,” “ena sega ni yali kina e dua mada ga na drauniulu.” (Alama 40:23). Na yalayala oqo sa solia na inuinui vei ira sa yali na ligadra kei na yavadra, o ira sa sega tu ni rai rawa,ni rai rogo, se lako, se o ira era yali ena vukuni tauvimate dredre, tauvimate ni vakasama se na yali mai ki na veivakaocai rawa ni veivakalailaitaki. Sa kunei keda o Koya. Sa vakataucokotaki keda.
Na karua ni yalayala ni Siganimate kei na Veisorovaki ni noda Turaga o ya, vakayalo ena “vakalesui tale kina na veika kece ki na kena itutu dina.” (Alama 41:4). Na veivakalesuimai vakayalo oqo e vakaraitaka na noda cakacaka kei na gagadre. E vakalesua mai “na ka e vinaka,” “na dodonu,” “na lewa dodonu,” kei na “yalololoma” (Alama 41:13). E sega ni kurabuitaki na nona a vakayagataka o parofita Alama na vosa vakalesui vaka 22 na gauna2 ena nona kerei keda meda “caka dodonu, vakataulewa vakadodonu, io mo daucaka vinaka tiko ga.” (Alama 41:14
Ena vuku ga ni “mai sorovaka kina na Kalou vakataki koya na ivalavala ca ni kai vuravura,” (Alama 42:15), na Veisorovaki ni Turaga sa rawa me vakataucokotaka tale mai sega walega na ka sa yaco, ia na veika ga e rawa. Baleta ni kila tu o Koya na noda mosi, na veivakararawataki, na tauvimate, na noda “veivakatovolei kecega,” (Alama 7:11), sa rawa kina Vua, ena yalololoma cecere, ena vukei keda me vaka na noda malumalumu (raica na Alama 7:12). Ena vuku ga ni Kalou sa “Kalou e vinaka sara, e Kalou dodonu, e Kalou dauloloma talega,” na ituvatuva ni loloma vakalou ena “rogoci kina na tagi ni lewa dodonu.” (Alama 42:15). Eda sa veivutuni ka cakava na veika kece eda rawata. Ena Nona, sa ovici keda tawamudu tu “ena liga ni nona loloma.” (2 Nifai 1:15).
Lagati ni Sere ni Reki Tawayalani
Vata kei kemuni, ena gauna ni Siganimate oqo, au vakadinadinataka na Kalou, na Tamada Tawamudu, kei na Luvena lomani, o Jisu Karisito sa bula tiko. O ira na tamata vakayago era a rube mate vakaloloma ia era a qai tucaketale. Ia o Jisu Karisito ga sa bula tiko ena kena ituvaki uasivi ni tucaketale se tu ga vua na mawe ni rube e kauveilatai e ligana, yavana, kei na sarisarina. O Koya duadua ga sa rawa ni kaya, “Raica kau sa ceuti iko ena qeteqete ni ligaqu” (Aisea 49:16; 1 Nifai 21:16). O Koya duadua ga sa rawa ni kaya: “Raica sai au ga sa laveti cake. Ko i Au ko Jisu ka a lauvako ki na kauveilatai. Raica koi au na luve ni Kalou “(Vunau kei na Veiyalayalati 45:52).
Ena veigauna oqo, eda rawa ni vulica kina e vuqa na veika vinaka ni Kalou kei na noda rawata vakalou me baleta na loloma ni Kalou me tubu vei keda ni da vakasaqarai Koya ka dolele yani ki liu.“ Ka na qai yaco ni ra na vakasoqoni tani mai na veimatanitu kecega o ira na buladodonu, ka ra na lako mai ki Saioni, ka lagata voli na sere ni reki tawavakaiyalayala.” (Vunau kei na Veiyalayalati 45:71). Ena gauna oqo ni osana kei na aleluya, lagata na aleluya—ni na veiliutaki o Koya me tawamudu ka tawayalani! Kailavaka na osana, ki vua na Kalou kei na Lami!