Yavu Tudei

E Dua na Lalaga Me Kabai

era kaba lalaga na goneyalewa

Droini mai vei Alyssa Petersen

E ratou a duri tu e yasaqu e ruasagavulu na goneyalewa, ka dagava cake tu e dua na lalaga kau e 16 na fute. Sa neimami bolebole me keimami vukei ira na goneyalewa yadua me ra kabata rawa na delana. Vei ira e vuqa na goneyalewa, oqo na imatai ni nodra yabaki ena keba ni Goneyalewa. Oi au kei ira na goneyalewa qase cake keimami a nodra iliuliu na itabagone, ia keimami a se bera mada ni cakava e dua na itaviqaravi vakaoqo. Keimami a vakarorogo maqusa kece ki na kena lawa.

Na goneyalewa yadua me na kabata yani na lalaga. Ni dua sa cakava rawa, sa na tucake o koya ena vatavata ka vukei ira na kena vo me dreti ira cake. Ia, kevaka e tara na qele, sa sega tale ni vakatarai me veivuke ena nodra laveti cake na goneyalewa.

A tekivu dredre toka vei keimami, ia a sega ni bera na neimami cakacaka vata mera laveti cake mai na goneyalewa. Eso era a rere me ra laveti cake sara ka dina ga ni ra sa taqomaki tiko. Eso era rere ni vakayagataka na nodra kaukauwa vakaiira mera yaco e cake. E gadrevi kina vei keimami kece me keimami veivakabauti ka veitokoni vakalevu cake vakai keimami yadua. A kena itinitini, keimami a qai vakacavara vakavinaka na ibolebole o ya.

Ni ra sa siro sobu mai na iotioti ni goneyalewa, keimami a soqoni vata ka veitalanoataka na levu ni lesoni mai na itaviqaravi ni lalaga.

Eda sotava kece na veika e rairai dredre me valuti rawa. Ia, eda sega ni tiko duadua. Era tu wavoliti keda na tamata mera veivuke ena veilaveti ka vakarautaka na veitokoni. Sa tiko kina na Tamada Vakalomalagi kei Jisu Karisito me solia na veivukei kei na kaukauwa meda lesu rawa vei Rau.

Megan B., Ohio, Amerika

“Ni da sa yalewa kei na tagane daumaroroya na veiyalayalati, sa dodonu sara meda veilaveti cake ka veivukei vakai keda meda tamata yaco e sa vinakata vei keda na Turaga meda vakakina.”

Sister Linda K. Burton, Peresitedi Raraba vakacegu ni iSoqosoqo ni Veivukei, koniferedi raraba ni Epe. 2015 (Ensign se Liaona, Me 2015, 29).

Na Sala Mera Laveti Cake Kina Eso

1. Masulaki ira na matavuvale se itokani era gadreva na veivuke.

2. Mo Dredre! Ena yaco me marautaka kina e dua na nona siga.

3. Vakayagataka na vosa yalovinaka ni ko vosa vua e dua se baleti ira eso.

4. Kaya, “Vinaka vakalevu!” Na vakavinavinaka sa dua na sala cecere me da laveti ira cake kina eso.

5. Rogoca na mosi ni yalodra na nomu itokani.

“Au Yalataka Niu Na Lako Yani”

ira na cauravou

Au dau vinakata tu ga meu wasea na kosipeli vei ira eso, ia e vuqa na yabaki au dau guce tu ga kina. Me yacova niu sa veitokani vata kei na dua na cauravou na yacana o Tiago. Keirau vakaitikotiko veivolekati, keirau sa qai dau taubale vata yani ki vale ni oti na vuli e veisiga.

Ena dua na siga, keirau a muria e dua na sala vou ki vale ka lako sivita na valenilotu au lotu tiko kina. Au a tukuna vua niu a sa lewe ni Lotu makawa sara tu mai. Au a tukuna vua na veika keimami vakabauta kei na levu ni veivakalougatataki sa yaco ki na noqu matavuvale. Au a sureti Tiago ki lotu ena Sigatabu oya, ka kaya ni na lako mai.

A yaco mai na Sigatabu, kau sa namaki koya tiko mai na lotu, ia a sega ni lako mai. Ena mua ni macawa oya, au a sureti koya tale. A yaco tiko oqo me rua se tolu na vula, ia sa dau vakaulubale o koya ni sega ni yaco mai. Ia au a sega ni cegu na sureti koya.

Ena dua na mataka ni Sigatabu, au a tiko ena soqoni ni sakaramede kau raivuki ka raici Tiago ni tucake tu e kea. Au a kurabui niu raici koya, ia a lako mai ka mai dabe vata kei au ka kaya, “Au a yalataka niu na lako mai!”

Au a vakaveikilaitaki koya vei rau na daukaulotu, ka ratou sa tekivu vakavulici koya. E muri, a qai papitaiso o koya. Ena gauna oqo keirau sa vakavakarau tiko me keirau laki kaulotu. Au sa marau dina niu a sega ni biuti koya!

Meiry R., Brazil

Vakararavi ki Na Nona Gauna na Kalou

A veibiu ka sere o noqu nei ni se qai papitaiso walega o luvena tagane ulumatua. Ena kena gadrevi me tomani tikoga na nodra veimaliwai vinaka na luvena kei tamadratou dina, a gadreva me vakadonuya mai o tamadratou vei iratou na luvena mera papitaiso. E ka ni rarawa, a sega ni vakadonuya o koya me vuqa na yabaki.

Sa qai lewa o nei ni sa vinakata me ra papitaiso na gone dina ga ni sega ni vakadonuya o tamadratou. Ia ni oti na nodratou lolo ka masumasu o noqu nei kei iratou na luvena me baleta na vakatulewa, e ratou sa ciqoma yadua na veivakauqeti me ratou wawa tikoga.

Ena macawa vata oya, sa qai kaya o tamadratou dina na tavalequ vei noqu nei ni sa vinakata me ratou veivosaki na gone kei rau na daukaulotu ka papitaiso Au se nanuma tikoga na reki au a vakila ni sa tukuna vei au o tinaqu na itukutuku. Au kila ni Tamada Vakalomalagi a vakalougatataki iratou na tavalequ ni oti e vuqa na yabaki ni wawa ena vosota.

Eda na sega beka ni kila na gauna ena sauma mai kina na Turaga na noda masu, ia au kila ni na dau cakava ga o Koya. Au sega ni kila na vuna e vinakata kina na Tamada Vakalomalagi me ra waraka na tavalequ me ratou papitaiso, ia au kila ni a vakalougatataki ira o Koya ena vuku ni nodratou yalodina.

Bre J., Florida, Amerika