“Na Sala Me Tiko Ga Kina Kei Keda na Yalo,” Me iSakisaki ni iTabagone, Maji 2021, 26–29.
Lako Mai, Mo Muri Au
Vakavakarau Me Tiko Ga Kina Kei Iko na Yalona
Na vakavakarau me da vakaivotavota ena sakaramede ena bula kilikili ena veimacawa ena rawa ni vukei keda me tiko ga kei keda na Yalo.
Niu se qai yabaki 12, au a lako vata kei na noqu matavuvale me keitou laki sikova na vanua makawa ni Lotu ena vualiku kei Niu Yoka, e Amerika. Ena Veikau Tabu, au nanuma kina na noqu a vakasamataka vakatitobu na iMatai ni Raivotu kei na raivotu veivakurabuitaki tale eso a raica o Josefa, kau a vakasamataka “Isa! kevaka beka meu a sotava e dua na ka vakayalo ka vakasakiti vata kei ira na kai lomalagi me vakataki Josefa, ena qai rawa ni taucoko na noqu bula.”
Au sa vulica mai na gauna o ya ni sega ni gadrevi meu sotava e dua na ka vakayalo cecere, ia sa gadrevi ga na veisotavi lalai vakavuqa meu kaukauwa tiko ena noqu ivakadinadina ka taqomaki tiko ena salatu lesu ki vale. Sa kila tu na Tamada Vakalomalagi ni da na gadreva na veituberi e veigauna ena noda bula, ka sa vakarautaka o Koya na sala meda ciqoma kina.
Vei ira kece e veirauti na nodra vakabauta na Luvena me ra veivutuni ka papitaiso, e solia kina o Koya na isolisoli ni Yalo Tabu. Mai na cakacaka vakalotu ni sakaramede e veimacawa, sa vakarautaka kina o Koya vei keda na sala meda “tiko ga kei [keda] na nona Yalotabu” kevaka eda na nanuma na iVakabula ka muria na Nona ivunau. (Vunau kei na Veiyalayalati 20:77). Oqo ena rawa kina vei keda me da rawata na veidusimaki ena veisiga ni Yalo ena noda bula ni da vakayagataka na noda galala me da vakatulewa kina ka na vukei keda ena salatu lesu vua na Tamada Vakalomalagi.
Na Sakaramede kei na Yalo
Sa kila tu na Tamada Vakalomalagi ni da na gadreva tikoga na veidusimaki ni Yalona, sega walega ni ka cecere e sotavi ga vakadua. Kivua vua na Parofita Josefa Simici, a vakalesuya mai kina o Koya na cakacaka vakalotu ni papitaiso ena tabadromuci, e vukei keda me da savasava kina. Eda sa qai vakarau meda ciqoma na isolisoli ni Yalo Tabu ena veivakadeitaki, ka solia vei keda na noda rawa ni dusimaki ena veisiga mai vua na Yalo.
Sa kila tu na Tamada Vakalomalagi ni noda yaco meda savasava ena imatai ni gauna ena sega ni veirauti ka sa gadrevi kina meda nanuma na iVakabula ka yaco me da savasava tale ka vakadua tale ka veitaravi me rawa ni tiko ga kei keda na Yalo. A vakalesuya mai o Koya na cakacaka vakalotu ni sakaramede me baleta na inaki oya. Kevaka eda vakavakarau vakavinaka ka dau vakaivotavota wasoma ena sakaramede, sa yalataki vei keda “me tiko ga kei keda na nona Yalo Tabu ka sega ni mudu ” (Vunau kei na Veiyalayalati 20:77; vakamatatataki).
Ia, ni da vakaraitaka tiko na Lotu ka kania na madrai ka gunu ena sega ni vakatara na wai me da rawata na yalayala ni Turaga. Na noda vakavakarau vakainaki ki na cakacaka vakalotu e rawa kina vei keda meda ciqoma na kaukauwa ni iVakabula ena noda bula.
O ira na dauqito era sega ni yaco mera kenadau sara ena nodra dara ga na isulu ni qito se taubale yani ki na vanua se na buturara ni qito. E dodonu me ra vakaukauwa yago, vulica na iwalewale ni qito, ka vakatovotovo me rawa ni ra kenadau sara ena nodra qito. Sa vakakina, sa dodonu me da vulica n sala me da vakavakarau me da vakaivotavota ena sakaramede ena vakarokoroko kei na bula kilikili me rawa ni da ciqoma kina na kaukauwa e rawa ni solia o Koya vei keda.
E dua na sala me vakarautaki kina na utomu kei na yalomu mo vakaivotavota ena sakaramede o ya mo vakayacora e dua na veivakatarogi lailai vei iko ga ena veimacawa. Au dau taleitaka meu vakayagataka na Vunau kei na Veiyalayalati 20:37 meu vakatarogi au kina. Na tikina oqo e tiko kina na veika e gadrevi me baleta na papitaiso ka a vakatakila na Kalou vua na Parofita o Josefa. E tiko kina na veika e lavaki vei ira kece era vinakata me ra papitaiso. Au raica ni vukei au meu vakarautaki au meu ciqoma na yalayala vakavoui sa vakarautaki tu ena sakaramede.
iTaba mai na Getty Images
Ni vakayagataki na ivolanikalou oya me noqu idusidusi, oqo eso na taro au sa tarogi au kina meu raica kevaka au sa vakarau tu meu vakaivotavota ena sakaramede.
Au sa yalomalumalumu beka ena mata ni Kalou?
Na imatai ni veika e gadrevi e tiko ena Vunau kei na Veiyalayalati 20:37 sai koya na yalomalumalumu ena mata ni Kalou. Eda cakava oqo ena noda ciqoma ka tu vakarau me da muria na Nona lewa me vaka e volai tu ena ivolanikalou, era vakavulica na Nona italai, se ni sa yaco mai vei keda ena veivakauqeti.
Au a tarogi au keu sa valuta tiko na Kalou ena dua na ka ena noqu bula saraga oqo. Au sa vorata tiko beka na Nona veidusimaki? Au sa dau vakarorogo beka ki na nodra ivakavuvuli na Nona italai? Kevaka e sega, au sa tuva meu vinaka cake ka yalataka meu na vinaka cake niu vakavakarau meu vakayagataka na sakaramede. Na Kalou sa kila na ka kecega—ena gauna au kila kina ni sa rawa me raica o Koya na iyaloyalo levu ena noqu bula, sa rawarawa cake kina meu vakayalomalumalumutaki au Vua ka nuitaka ni na dusimaki au o Koya ki na veika e vinaka duadua.
Au sa yalomalumalumu beka ka yalo raramusumusu.
Na kena tiko na yalomalumalumu kei na yalo raramusumusu sa veiwekani ki na yalomalua. Sa kena ibalebale me da lomasoli me da soli keda ki na loma ni Kalou. Na yalomalumalumu e kena ibalebale me da kaya ni vosoti au ka veivosoti ena gauna e dredre kina se na gauna eda vakila kina eso ni ra cala. E rawa beka ni o kaya, “Sa donu vinaka tu na yaloqu vei ira na tamata kecega”? O sa vakamavoataka beka na yalona e dua e vakavolivoliti iko, se o bau vakila beka ni ko yalocataka tiko e dua? O gadreva beka mo kere veivosoti?
Niu sa yalo raramusumusu kei na yalo sa bibivoro, au sa tu vakarau meu cakava na veika dodonu vua na Kalou kei ira era tiko wavoliti au. Au dau tovolea meu kauta tani na vakanananu tani kei na yalocataki ira eso tale. E sega ni tiko vata kei keda na Yalo ena gauna e veileti tu kina na lomada, ia na kena kau laivi oqo sa dua na ikalawa bibi ni noda vakavakarau meda ciqoma kina na yalayala ni sakaramede.
Au sa gadreva beka meu bula savasava tale, ka rawa beka meu vakadinadinataka niu sa veivutunitaka na noqu ivalavala ca kecega?
E dua tale na ka e gadrevi e tiko ena Vunau kei na Veiyalayalati 20:37 sai koya me da “veivutunitaka vakaidina na noda ivalavala ca.” Ena gauna eda a papitaiso kina, eda sa vakasavasavataki mai na noda ivalavala ca. Eda sa yalataka me da tovolea me da maroroya na ivakaro ni Kalou ka veivutuni ni da caka cala.
Au a tarogi au, “Au dau taura beka na sakaramede baleta niu nanuma ni dodonu, se au vinakata meu bula savasava tale?” Au raica lesu na noqu ivalavala ca kei na cala mai na macawa oya ka tarogi au kevaka au vinakata dina meu veisau ka kauta tani na ca o ya. Ni sa tiko vei kemuni na gagadre mo ni savasava, ko ni na raica, ena Yalo, na veika e gadrevi mo ni vakavinakataka, ka na tomana tikoga na Nona vakauqeti kemuni mo ni veivutuni ka digidigi vinaka cake.
Na vakatutusa vua na Turaga (kei ira tale eso eda na rairai vakamavoataka se vakacudruya ke gadrevi) sa tiki ni noda vakavakarau.
Tarogi iko mada, “E dua beka na ka au gadreva meu veisautaka kau se bera mada ni cakava? E tiko beka e dua na ka e se gadrevi tiko meu veivutunitaka? ” Na kena wali na leqa ena veivutuni vakaidina ena rawa kina vei keda me da vakaivotavota ena bula kilikili ena sakaramede.
Sa lomaqu beka meu na taura na yaca i Jisu Karisito?
Na veiyalayalati yadua eda cakava sa vakaraitaka tiko e dua na yalayala me da taura vakavinaka cake kina na yaca i Karisito. Ni da sa papitaiso, eda sa vakaraitaka tiko na lomada meda taura vei keda na yaca i Jisu Karisito ka muria na Nona ivakaro. Ni da vakayacora na ikuri ni veiyalayalati ena valetabu se ciqoma na veikacivi, eda sa taura tale tikoga na inaki i Karisito kei na Nona veivakavulici. Ni da vakaraitaka na noda lomasoli meda taura na Yacana me tiki ni sakaramede ena veimacawa e kena ibalebale noda veiyalayalati kei na yalayala kece eda sa cakava oti vata kei Koya.
Ena noqu dikeva na noqu vakavakarau meu taura na sakaramede, au tarogi au ena taro vakaoqo: “Au sa cakava tiko beka na noqu vinaka duadua meu ivakaraitaki i Karisito kei na Nona ivakavuvuli? Au sa maroroya tiko beka na yalayala kece au a cakava e sema tiko ki na noqu veiyalayalati? Au sa soli au beka nikua vei Karisito kei na noqu veiyalayalati kei Koya me vaka ena siga au a cakava taumada kina?”
Au sa vakadeitaka beka meu qaravi Koya me yacova na ivakataotioti?
Eda sa yalataka vua na Turaga ni gauna eda vakayacora kina na noda veiyalayalati ni papitaiso eda na tovolea me da muria na Nona ivakaro. Na rua na ivunau cecere duadua sai koya mo lomana na Turaga ka lomana na wekamu (raica na Maciu 22:36–40). Eda vakaraitaka na noda loloma vua na Kalou kei ira na wekada ena noda qaravi ira.
Au dau tarogi au, “Au dau taura beka na gauna meu veiqaravi kina? Au dau lomalomarua beka meu veiqaravi, se au marau beka meu veiqaravi?” “Au sa saga tiko beka meu vakarabailevutaka na noqu veikacivi?” Na qaravi ira na tani sa dua na sala vakasakiti me da vakavakarau kina me da vakaivotavota ena sakaramede. Na ka dina, ni dau vakavuqa ni da qaravi ira na tani eda na gadreva na veidusimaki ni Yalo.
Vakabauta na Yalayala ni Turaga
Ni sa lomada meda vakavakarau ena veimacawa me da taura na sakaramede ena kilikili, sa na rawa kina me tiko ga kei keda na Yalo me vakauqeta ka dusimaka na noda bula. O ya na yalayala mai vua na Turaga!