“Te Kabanea ni Kakaawaki ibukin te Itita: Iesu Kristo ae Maiu,” Ibukin Kakorakoraia Kairake, Maati. 2021, 2–5.
Te Kabanea ni Kakaawaki ibukin te Itita: Iesu Kristo ae Maiu
Ni bukamaruan te Itita, ti kimwareirei bwa e maiu ngkai Iesu Kristo ao ibukira ni kabane.
Man te Marooro ni Kabuta n Eberi 2020.
Ni bongin te Itita aei, ti bukumarua Iesu Kristo ae Maiu. Ma te tangira ae kororaoi, ara Tia Kamaiu e karaui nanora: “Kam na karekea te rau mai Rou. Ami b’ai i aon te aba te rawawata: ma kam na kabebetei nanomi; I a ti ni katea ana kai te aba” (Ioane 16:33).
Ni bukamaruan te Itita, ti kimwareirei bwa e maiu Iesu Kristo—tiaki tii n te tai arei, ma ngkai, tiaki tii ibukiia tabeman, ma ibukiia aomata ni kabane. E a tia n roko ao e teimatoa n roko nakoia akana a uruaki nanoia, tuatuangia taenikai te kanakoaki, mataki te manga noraba, ma n tua ririkin akoan te aba.(taraa Ruka 4:18). Anne ngaira n tatabemaniira. Ana berita ni kabooi maiura e kaineti, nakon arora ngkoa, arora ngkai, ke ara tabeaianga ibukin taai aika a na roko.
Otanna ao Areruia
N Tabatin te Bani, e rin Iesu Ierutarem ao e toka iaon te ati te tei ao angiina “aomata … anai banikai aika bam, ao a nako ni butimaia” (Ioane 12:12–13; taraa naba Mataio 21:8–9; Mareko 11:8–10). N aron te katei, te bam bon te kanikina ae tabu bwa kaotan kimwareireira inanon ara Uea. A ataa aei te koraki ake a kakaonimaki bwa kakoroan bukin te taetae ni burabeti n ataakina ngkae a tang, “Otanna ike moan te rietata” (Mataio 21:9). Nanon Otanna “kamaiuaki ngkai” (taraa Bible Dictionary, “Hosanna”).
N te wiiki are imwiin Tabatin te Bani bon Tabatin te Itita. Beretitenti Russell M. Nelson e reirei bwa Iesu Kristo “e roko bwa e na kabwara te tarau are tiaki Ana tarau, ibukina bwa iai ara tarau ae ti aki kona ni kabwaraa.”1 Eng, rinanon Ana Mwakuri ni Kamaiu Kristo, ni kabane natin te Atua “a kona ni kamaiuaki, man te ongeaba nakon taian tua, ao ana otenanti te Euangkerio (Taekan te Onimki 1:3). N te Itita, ti anenea areruia. Nanon areruia “ko neboaki te Uea ae Iehova” (taraa Bible Dictionary, “Hallelujah”).
Bwaai aika riki ake a tabu imarenan Tabatin te Bani ao Tabatin te Itita bon karakinan otanna ao areruia. Otanna bon ara bubuti ibukin ana kamaiu te Atua. Areruia e kaota ara nebonebo ao ara kakaitau nakon te Uea ibukin te kamaiuaki are anga te kantaninga ao te karietataaki. N otanna ao areruia ti kinaa Iesu Kristo ae maiu bwa ngaia te kabanea ni kakaawaki n te Itita.
Kaokan Bwai ao te Mangauti
N Tabatin te Itita, Eberi 3, 1836, ni boong ake ngkoa ni Kaokan Bwai, Iesu Kristo ae maiu e kaoti ngke e katabuaki te Kirtland Tembora. Naake a nooria bwa E mena ikekei a kaota koauana n te taetae ni kabotau iaon te ai ao te ran: “Matana ai aron uran te ai; iran atuna e mainaina n aekan te tinoo; ubuna e oota riki nakon otaan taai; ao bwanaana ai aron butin ran ae korakora, bon bwanaan Iehova” (Reirei ao Berita aika Tabu 110:3; e kairaki ma katuruturuana).
N te tai anne, e katanoata ara Tia Kamaiu “Ngai te Moan ao te Kabanea; Ngai are e maiu, Ngai are e tiringaki; Ngai te tia tei ibukimi nakon te Tama.” (Reirei ao Berita aika Tabu 110:4). Aei naba, taekan kabotau aika kakaokoro—te moan, ao te kabanea, ae maiu ao ae tiringaki. Bon te Areba Ngaia ao te Omeka, te moan ao te kabane (taraa Te Kaotioti 1:8; 3 Nibwaai 9:18; Reirei ao Berita aika Tabu 19:1; 38:1; 45:7), te tia karika ara onimaki ao te tia kakoroa (taraa Ebera 12:2; Moronaai 6:4).
Imwiin kaotin Iesu Kristo, a roko naba Mote, Eriati, ao Eria. Man te kaetieti ae tabu, burabeti aika a korakora aikai a kaoki kiingin ao ana kariaia te nakoanibonga. Ngaia are, “kiingin te mwioko n tararua aei a mena” (Reirei ao Berita aika Tabu 110:16) i nanon Ana Ekaretia ae Kaokaki ni kakabwaiaia ni kabane natin te Atua.
N ae onoti, Ana Boki Moomon e kabwarabwara “mwaakan ao mangautin Kristo” (Alma 41:2) te kabanea ni kakaawaki n te Itita—n aron uoua kaokan bwai.
Te moan, kanoan te mangauti bon kaokakin rabwatara nakon “aroia ni kororaoi”;baai ma wae ma toma nako,” “ao bon akea naba te iranatu teuana ae e na bua” (Aramwa 40:23). Te berita aei e anga te kantaninga nakoia ake a tia ni bua baia ma waeia, ake a tia ni bua aia konabwai n taratara, ni kakauongo, n nakonako, ke naake a bua aia iango ibukin aoraki aika korakora, aorakin te iango, ke aki toamaun rabwataia tabeua. E kuneira. E kamarurungiira.
N te aro n tamnei, te kauoua ni berita n te Itita ao ana Mwakuri ni Kamaiu ara Uea bwa “bwaai ni kabane a na manga kaokaki nakon aroia raoi” (Aramwa 41:4). Kaokakin bwai n te aro n tamnei a tei ibukin ara mwakuri ao nanora. E kaoka “te tamaroa,” “te raoiroi,” “te momotiraoi,” ao “te nanoanga” (Aramwa 41:13). Maroaka ae ngaia te burabeti Aramwa e kabonganaa te taeka ae kaokaki 22 te tai2 ngke e kaumakiira bwa ti na “babaire ma te motiraoi, motikitaeka n ae raoiroi, man reitanako karaoan ae raoiroi” (Aramwa 41:14).
Ibukina bwa “te Atua i bon irouna e karaoa te mwakuri ni kamaiu ibukin buren te aonaba” (Aramwa 42:15), ana Mwakuri ni Kamaiu te Uea e kona ni kaoki tiaki tii ake ngkoa, ma are e kona n reke. Ibukina bwa E atai marakira, karawawatakira, aorakira, kariiriara n aekaia nako” (Aramwa 7:11), E kona, ma te nanoanga, ni buokiira ni kaineti ma mamaarara (taraa Aramwa 7:12). Ibukina bwa te Atua bon “te Atua, ae kororaoi man etieti, ao te Atua ae nanoanga naba,” te babaire n nanoanga “e na rau te nano n tangiran te motiraoi” (Aramwa 42:15). Ti raira nanora ao ti karaoa ara kabanea ni kona. E katobibira n aki toki “ni baina n tangira” (2 Nibwaai 1:15).
Anenean Kuuna ibukin te Kimwareirei ae Akea Tokina
Nakoimi, n tain te Itita aei, I kaota au koaua iroun te Atua, Tamara ae Akea Tokina, ao Natina ae tangiraki, Iesu Kristo ae Maiu. Mwaane iaon te aba a tauria n te kaibangaki ni kammarakia ao imwiina e a mangauti. Ma bon tii Iesu Kristo ae Maiu n arona ae kororaoi ni mangautina e teimatoa n iai mwaake inanon Baina, ao i rarikina. Bon tii Ngaia ae kona ni kangai, “I a tia ni korea aram i nanoni baiu” (Itaia 49:16; 1 Nibwaai 21:16). Bon tii Ngaia ae kona n taekina aei: “Boni ngai are I tabekaki rake. Ngai Iesu are e tauraki. Ngai natin te Atua” (Reirei ao Berita aika Tabu 45:52).
N taai aikai, ti kona n nora raoiroin te Atua ae bati ao ara konabwai ae tabu ibukin ana tangira te Atua bwa e rikirake inanora ngkae ti ukoukoria ao ti ibuobuoki imarenara.“ Ao e na koro bukina bwa a na ikotaki naake a raoiroi mai buakoia botanaomata ni kabane, ao n nako nakon Tion, n anenea anenen te kimwareirei ae akea tokina” (Reirei ao Berita aika Tabu 45:71). Ni bongin otanna ao areruia, anenea areruia—ibukina bwa E na tautaeka n aki toki! Takaruaea Otanna, nakon te Atua ao te Tiibutetei!