“Aara ae Matoatoa,” Ibukin Kakorakoraia Kairake, Maati. 2021, 14–15.
Aara ae Matoatoa
Te Oo ae Tamwarakeaki
Kamataata n te tamnei iroun Alyssa Petersen
Uangaun ataeinnaine aika a tei irarikiu, a tabe n taraa te oo te kai, ae te 16-te buuti. Kakawenakoara bwa ti na buokiia ataeininaine nako bwa a na roko raoi i taubukina ieta. Bwa angiina ataeinnaine, ai bon tibwa aia moan ririki aei n aia kaembwa Ataeinnaine. Ngai ma ataeinnaine ake a ikawai riki bon taan kairiiri ibukiia kairake, ma ti bon tuai man iriira te aekaki ni waaki ni kakukurei n ai aron aei. Ti bane n ongoraa n taian tua ma te kantaninga.
A riai ataeinnaine n tatabemaniia ni karokoia itaubukin te oo. Te tai are e roko temanna iai, e kona neienne n tei iaona ao n ibuobuoki ni katikiia tabeman nako eeta. Ma e ngae n anne, ngkana arona bwa e toko ma aontano, akea kariaiakana n ibuobuoki n tabekiiarake ataeinnaine akana nikirana.
Ti korakai n te moantai, ma n te tai ae aki maan ti a kataia ni kaai ni mwakuri ao ni moanna n tabekiarake ataeinnaine. Tabeman a bon maaku ngke a na tabekakirake n ae rangi n rietaata n aki tabe e ngae ngke iai bwaai ni kamanomano. Tabeman a bon nako nanoia ngke a kabonganai oin korakoria ni karokoia ieta. Ti bon bane ni kataningaaki bwa ti na karikirakea te onimakinaki ao ara boutoka i bon imarenara. N te kabane, ti bon kakoroa raoi nanon kakaewenakoara.
Imwiin ruorikaakin te kabanea n ataeinnaine, ti ikotaki bwa ti na maroroakin mwaitin reirei man te waaki ni kakukurei ae tamwarakean te oo.
Ti bane ni kaitarai bwaai ake a kuri n taraa ni kangaanga totokoaia. Ma, ti aki maroaa. A bane aomata ni mena irarikira n ibuobuoki n tabekirarake ao n anga aia boutoka. Tamara are i Karawa ao Iesu Kristo a mena ikai n anga aia ibuobuoki ao ni kakorakoraira ngkana ti Onimakiniia.
Megan B., Ohio, USA
“I Berita Bwa N na Bon Roko”
I tangiria n taainako bwa N na tibwaua te euangkerio ma tabeman, ma n ririki aika bwakanako akea te nakoraoi ae I karekea. Ni karokoa are I a riki bwa raoraon te ataeinimwaane ae arana Tiago. Ti maeka n uakaan, ngaia are ti kaai n rianna n okiri mweengara imwiin bwaran te reirei ni katoa bong.
Te bong teuana, e a manga kaokoro kawaira are ti toua n okira mweengara ao ti a rirarikin te umwantabu te tabo are I nanako iai n taromauri. I tuangnga ae I kaman kaaina te Ekaretia inanon te tai ae rang ni maan. I tuangnga te bwai ae ti kakoaua ao mwaitira kakabwaiakin ara utu mai iai. I kaoa Tiago nakon te taromauri n te Tabati anne, ao e taku bwa e na roko.
E a roko te Tabati, ao I rangi n ingainga n tataninga rokona n taromauri, ma e aki te roko ni kaoti. Rimwi n te wiiki anne, I a manga kaoa riki. E riki aei inanon uoua ke teniua te namwakaina, ma e a bon rereke naba ana anga n aki roroko. Ma e aki katoka aron au kakao nakoina.
N ingabongin te Tabati teuana, I mena n te bootaki n toa ao n taratara nako ao n noora Tiago n teitei ikekei. I rangi ni miimi ngke I nooria, ma e a roko naba n tekateka irarikiu ao e taku “I berita bwa N na bon roko!”
I kabwarabwara ngaia nakoia mitinare, ao a waaki n reirei ma ngaia. Imwiina, e a bwabetitoaki. Ngkai ti a kaai ni kakatauraoi ni karaoan ara mwakuri ni mitinare. I rangi ni kukurei bwa e aki bwabwara nanou mairouna!
Meiry R., Brazil
Onimakina ana Tai te Atua
E a raure ai tinau ngke e a tia ni bwabetotoaki natina te mwaane ae te ikawai. Ni kateimatoa aron ana reitaki ma tamaia natina, e tangiria ni karekea ana kariaia ibukin bwabetitoakiia natiia ake tabeman. N aki angaraoina, e bon aki anga ana kariaia inanon ririki aika mwaiti.
N te kabane ao e a baireia ai tinau bwa a nang bwabetitoaki ataei e ngae ngke akea ana kariaia tamaia. Ma imwiin aia aki mamatam ma aia tatataro ai tinau ma ai tariu nako ibukin te babaire anne, a karekea te namakin bwa a riai n teimatoa n tataninga.
N te wiiki naba anne, e tuangaki ai tinau iroun tamaia tariu akanne bwa e tangiria natina bwa a na kaitibo ma mitinare ao ni bwabetitoaki. I teimatoa n namakina te kimwareirei ngke e tuangai tinau te rongorongo. I ataia bwa e a tia Tamara are i Karawa ni kakabwaiaia ai tariu imwiin ririki aika mwaiti n tataninga ma te nanorinano.
N taainako ao ti bae n aki ataia bwa nningai are e na kaekai ara tataro te Uea, ma I ataia bwa E na bon kaekai n taainako. I aki ataia bwa bukin tera ngkai Tamara are i Karawa e tangiria bwa a na tataninga ai tariu ibukin bwabetitoakiia, ma I ataia bwa E kakabwaiaia ibukin aia kakaonimaki.
Bre J., Florida, USA