“E na Kanga ni Memena Tamneina Iroum n Taainako,” Ibukin Kakorakoraia Kairake, Maati. 2021, 26–29.
Nakomai, Iriirai
Katauraoi bwa E Aonga ni Memena Tamneina Iroum n Taainako
Ibukin katauraora n tau ni butimwaea te toa n te wiiki teuana ma teuana e kona ni buokiira bwa e aonga ni memena Tamneira iroura n taainako.
Ngke 12 au ririki ni maiu, I nako ma au utu ni kawari taabo ibukin rongorongon te Ekaretia i meangin mwakoron New York, USA. N te buakonikai ae tabu, I uringnga ngke I iangoa raoi te Moan Kaotioti ao tabeua kaotioti aika kamiimi ake e noori Iotebwa ao n iango, “Wow! ngke arona bwa e reke kaitiboou ae kamimi n te tamnei ma aomata ma i karawa n aron are e riki nakon Iotebwa, e na buokaki kainnanou ao e na bebete maiu.”
I reiakinaki ngkanne bwa nakon are tii te taneiai n te tamnei ae moan te raoiroi tetaina inanon maiu, I kainnanoa teutana te taneiai n taainako bwa N na teimatoa ni kakorakoraai inanon au koaua ao ni kamanoaki ni kawaiu n oki ni maeka ma Tamara are i Karawa. E ataia Tamara are i Karawa bwa ti kainnanoa kairakira ni katoa bong inanon maiura, ao E katauraoa te kawai ibukira bwa e aonga n reke iroura.
Ibukiia koraki ni kabane ake iai aia onimaki ae tau ibukin Natina n rairinanora ao ni bwabetitoaki, E anga te bwaintituaraoi ae te Tamnei ae Raoiroi. Rinanon te otenanti n toa ni katoa wiiki, E anganiira te kona “bwa e na memena Tamneira [iroura]” ngkana ti uringa te Tia Kamaiu ao ni kawakin Ana tua (Reirei ao Berita aika Tabu 20:77). Aei e anganiira te kona ni karekea ana kairiiri te Tamnei inanon maiura ni katoa bong ngkai ti kabonganai inaomatara ni karaoi babaire ake a na buokiira ni kawain te berita n okira Tamara are i Karawa.
Te Toa ao Tamnei
E ataia Tamara are i Karawa bwa ti kainnanoa kairakira ni katoa bong n ana kairiiri Tamneina, tiaki tii taneiai aika bubura n teuana te tai. Rinanon te Burabeti Iotebwa Timiti, E kaoka te otenanti ibukin te bwabetito man te kateboakii iaan te ran, are e buokiira bwa ti na rangi n itiaki. Ti katauraoira ngkanne bwa ti na karekea ana bwaintituaraoi te Tamnei ae Raoiroi man te kamatoaki, n anganiira te kona ni kairaki iroun te Tamnei ni katoa bong.
E ataia Tamara are i Karawa bwa te riki n itiaki tetaina e bon aki tau bwa ti bon kainnanoa ae ti na ururinga te Tia Kamaiu ao n rangi ni itiaki bwa e aonga ni memena Tamneina iroura. E kaoka te otenanti ibukin te toa ibukin te kantaing anne. Ngkana ti katauraoiraoi ma te karaurau ibukin ao ni kana te toa ni katoa tai, ti berita bwa “e aonga ni mememna Tamneira [iroura] n taai nako” (Reirei ao Berita aika Tabu 20:77; e kairaki ma katuruturuana).
E ngae n anne, ni bon tii irirakin te taromauri ao ni butimwaea te kariki ao n nima te ran e aki anganiira te kariaiakaki bwa ti na karekei ana berita te Uea. Ara katauraoi mai nanora ibukin te otenanti e anganiira te kona ni karekea mwaakan te Tia Kamaiu inanon maiura.
Aki kona n riki ni mwaatai taan takakaro man katokaan aia kaboraoi ke n nakonako nakon te kooti ke te marae n takakaro. A na riai ni kataneiai rabwataia, n ataai kawai; ao ni kataneiai bwa aonga ni mwatai n te takakaro. N ae ti te arona, ti riai n reiakiniira bwa ti na kanga n tauraoi ni butimwaea te toa ma te karinerine ao n ae tau bwa ti aonga ni kona ni karekea te mwaakana are E kona n anganiira.
Teuana te kawai ni katauraoa nanom ao tamneim ni butimwaean te toa bon karaoan am intawiu ae uarereke i bon iroum ni katoa wiiki. I kan kabongana Reirei ao Berita aika Tabu 20:37 n titirakinai. Iai n te kibu bwaai aika a kainnanoaki ibukin te bwabetito are e kaotii te Atua nakon te Burabeti Iotebwa. Iai bwaai aika a kainnanoaki bwa naake a kan bwabetitoaki a riai n reke irouia. I kunea bwa e buokai ni katauraoai ni butimwaea kabouan te berita are e reke rinanon te toa.
Tamnei iroun Getty Images
Kabonganan te koroboki ae tabu anne bwa kairau, aikai titiraki tabeua aika N na titiraknai ngkana I tauraoi ni butimwaea te toa.
I a tia ni kamangorai imatan te Atua?
Te moan bwai ae kainnanoaki e karinanaki n Reirei ao Berita aika Tabu 20:37 ko na kamangoriko imatan te Atua. Ti karaoa aio man butimwaean ao man tauraoi n ira Ana kantaninga n aron are e koreaki ni koroboki aika tabu, n reiakinaki irouia Ana toro, ke ti karekei n ana wirikiriki te tamnei.
I titirakinai ngkana I kaota karaoakin te bwai ae kaitara ana kantaninga te Atua ni maiu ngkai. I eka nako Ana kaetieti? I kakauongo nakon ana reirei Ana toro? Ngkana I aki, I karaoi babaire ni kanakoraoai riki ao ni motinnanoa karaoan ae tamaroa riki ngkai I katauraoi ni buitimwaea te toa. E atai bwai nako te Atua—ngkana I ataia bwa iai ana nonori ni bwaninin maiu, e bebete riki te kamangorai imatana ao ni kakoaua bwa e na kairai nakon ae tamaroa riki.
E reke irou te nano ae uruaki ao te tamnei ae raraoma?
Karekean te nano ae uruaki ao te tamnei ae raraoma e irekereke ma te nanorinano. Nanona bwa te tauraoi n anga ngkoe nakon ana kantaninga te Atua. Bwa te riki n nanorinano nanona bwa ti na raraoma ao ti na kabwarai bure e ngae ngkana e matoatoa ke ngkana ti ataia bwa tabeman a bon karaoa te bwai ae kairua. Ko kona ni kangai,”E tamaroa nanou nakoia aomata ni kabane”? Ko a tia ni kamaraka termanna ae mena iraraikim, ke iai am namakin ae e buakaka ibukin temanna? Ko kainnanoa ae kona bubuti ibukin te kabwarabure?
Ngkana e reke irou te nano ae uruaki ao te tamnei ae raraoma, I a tauraoi ni karaoa au kona ni kaeti bwaai ma te Atua ao naake irarikiu. I kataia ni kanakoi iango aika aki raoiroi ao namakin aika a buakaka ibukiia tabemang. E aki mena inanora te Tamnei ngkana a itabarara ara namakin, ngaia are kanakoan bwaai aikai bon te mwaneka ae e kakawaki ni katauraoara ni butimwaean te berita n te toa.
Iai nanou ni kan riki n itiaki, ao I kona ni kakoaua bwa I a tia n rairananou man au bure ni kabane?
Teuana riki te bwai ae kainnanoaki inanon Reirei ao Berita aika Tabu 20:37 ni bon “rairinanora raoi man ara bure ni kabane.” Ngke ti bwabetitoaki, ti tebokaki ni kaitiakaki man ara bure. Ti karaoa te berita bwa ti na kataia ni kawakin ana tua te Atua ao n rairananora ngkana ti karaoa te kairua.
I titirakinai, “I butimwaea te toa ibukina ngkai I taku bwa I bon riai, ke I tangiria ni manga itiaki riki?” I iangoi au bure ma au kairua man te wiiki anne ao n titirkinai ngkana I tangiria raoi ni kan bitaki ao ni katokii. Ngkai iai nanom ni kan riki n itiaki, ko na ataia, mairoun te Tamnei, bwaai ake ko kainnanoia ni katamaroako iai, ao E na reitinako n anganiko te wirikiriki bwa ko na rairananom ao ni karaoi rinerine aika tamaroa.
Te kaotibure nakon te Uea (ao nakoia tabeman ake ti a tia ni kaikoakiia ke ni kamarakiia ngkana e riai) bon mwakoron ara katauraoi.
Bon titirakiniko, “Iai te bwai ae I riai ni bitia ae I bon tuai ni karaoia? Iai te bwai ae I riai n rairananou mai iai?” Raoiakinan kangaanga rinanon te rairannano ae koaua man te nano e karekea nakoira ae ti tau ni butimwaea te toa.
I tauraoi ni katoka iaou aran Iesu Kristo?
Karaoan berita aika tabu n tatabeua e kaota ara motinnano ni katoka aran Kristo iaora n ae bwanin riki. Ngkana ti bwabetitoaki, ti kaota tauraoira ni katoka iaora aran Iesu Kristo ao ni kawakin ana tua. Ngkana ti karaoi berita aika a raka riki inanon te tembora ke ni butimwaei taian nakoa, ti waaki ni katoka iaora ana mwakuri Kristo ao Ana reirei. Ni kaota tauraoira ni katoka iaora arana bwa mwakoron te toa n te wiiki teuana ma teuana nanona bwa kamatoan ara motinnano nakon taian berita aika a tabu ao ara anganano ake ti a tia ni karaoia ma Ngaia.
Ni ukeukeran au katauraoi ibukin butimwaean te toa, I titirakinai n aron titiraki aikai: “I karaoa ae tamaroa are N na kona n riki bwa te banna ni katooto ibukin Kristo ao Ana reirei? I kawakin ni kabane taian berita ake I karaoi n irekereke ma au berita aika tabu? I taraa ni motinnanoai nakon Kristo ngkai ao au berta Nakoina n aron te bong ake I moan karaoi iai?”
Iai irou te nanomatoa ni kan beku Ibukina ni karokoa te toki?
Ti berita nakon te Uea ngke ti karaoa ara berita n te bwabetito bwa ti na kataia ni kawakin Ana tua. Uoua kabanea ni kakannato n tua bwa ko na tangira te Atua ao kona tangira raom (taraa Mataio 22:36–40). Ti kaota ara tangira nakon te Atua ao aomata man ara beku ibukiia.
I titirakinai, ”E reke au tai ni beku? I aki tauraoi ni karaoa te beku, ke I kukurei ni karaoa te beku?” ”I kataia ni kakorakora nakoau?” Te beku ibukiia tabemang bon te kawai ae e tamaroa ni katauraoi ni butimwaea te toa. N ae e ataaki, ni bon angin te tai ibukin buokakiia aomata ae ti kainnanoa ana kairiiri te Tamnei.
Onimakina ana Berita te Uea
Ngkai ti katauraoi mai inanora n te wiiki teuana ma teuana ao ni kororaoi ni butimwaean te toa, ti bon taubwa e na memena Tamneina iroura n taainako n anainanora ao ni kairii maiura. Anne ana berita te Uea.