“Elmen Bōk Jetōb Iien Otemjej,” N̄an Kōkajoorļo̧k Jodikdik ro, Maj. 2021, 26–29.
Item Ļoor Eō
Keppopo n̄an Iien Otemjej Bōk Jetōb eo
Keppopo n̄an bōk m̧ōttan kwojkwoj eo kajjojo wiik emaron̄ jipan̄ kōj iien otemjej bōk Jetōb eo ippād.
Ke iaar 12 iiō detta, iaar etal ippān baam̧le eo aō n̄an loļo̧k Church history sites ilo itulōn̄in New York, USA. Ilo Bukwin Wōjke eo, ij keememej aō kōļmenļo̧kjeņ kōn Visōn eo Moktata im visōn ko jet rekabwilōn̄lōn̄ Josep ekar loi im ļōmņaki, “Wow! n̄e in kar lo men ko an jetōb rekabwilōn̄lōn̄ koba armej ro jen lan̄ āinwōt kar Josep, mour eo aō en kar polemen.”
Em̧ōj de aō kar jeļā ke men̄e ioon juon jetōb eļap ilo mour eo aō, ij aikuj eļapļo̧k en̄jake n̄an dāpiji bwe in kajoor ilo naan in kam̧ool eo aō im jokne ilo iaļ in n̄an kapijuknen. Jemedwōj Ilan̄ ejeļā ke jenaaj aikuj emakijkij tōl ilo mour ko ad, im Eaar kepooj juon iaļ n̄an kōj n̄an bōke.
N̄an ro otemjej ro rekar bōk jidik tōmak ilo Nejin n̄an ukwelo̧k im peptaij, Ej letok menin letok eo an Jetōb Kwojarjar. Kōn kain̄i in kwojkwoj eo kajjojo wiik, Ej letok n̄an kōj maron̄ bwe “Jetōb eo An en maron̄ pād [ippād]” iien otemjej eļan̄n̄e jej keememej Rilo̧mo̧o̧r im kōjparok kien ko An (Katak im Bujen Ko 20:77). Ekōm̧m̧an bwe en pidodo n̄an kōj n̄an bōk tōl kajjojo raan jen Jetōb ilo mour ko ad ilo ad kōjerbal anemkwoj in kālet n̄an kōm̧m̧ani kālet ko me renaaj jipan̄ kōj n̄an ro̧o̧ļļo̧k n̄an ippān Jemedwōj Ilan̄.
Kwojkwoj eo im Jetōb
Jemedwōj Ilan̄ ejeļā jenaaj aikuj emakijkij jipan̄ n̄an tōl jen Jetōb eo An, ejjab baj juon wōt ilo en̄jake ko. Kōn Rikanaan Josep Smith, Eaar kōjepļaaktok kain̄i eo an peptaij kōn tulo̧k ilo dān, eo ejipan̄ kōj erom̧ erreeo. Innām jej pojak n̄an bōk menin letok eo an Jetōb Kwojarjar jen kapene, eletok n̄an kōj maron̄ bōk tōl kajjojo raan jen Jetōb.
Jemedwōj Ilan̄ ejeļā bwe erom̧ erreeo jidik ejabwe im bwe jenaaj aikuj in keememej Rilo̧mo̧o̧r im bar erreo bwe Jetōb en pād ippān iien otemjej. Ekar kōjepļaaktok kain̄i eo an kwojkwoj kōn un in. Eļan̄n̄e jej lukkuun keppopo n̄ane im emakijkij bōk m̧ōttan kwojkwoj eo, kar kallim̧uri kōj bwe “Jetōb eo An en maron̄ iien otemjej pād [ippā].”
Ijoke, baj jadetok n̄an Jar im m̧ōn̄ā pilawe im idaak dān eban kōmaron̄ kōj n̄an bōk kallim̧ur eo an Irooj. Ad keppopo n̄an kain̄i ko rej kōmaron̄ kōj n̄an bōk kajoor eo an Rilo̧mo̧o̧r ilo mour ko ad.
Rukkure ro reban m̧ōkade ilo aer baj kōņak uniboom̧ eo ak etetal ilo jikin ukkure eo. Rej aikuj in kamineneik ānbwinier, katak tiknik ko, im kaminene bwe ren maron̄ m̧ōkade ilo aer ikkure. Ejjeļo̧k oktak, jej aikuj in ekkatak kilen pojak n̄an kautiej bōk m̧ōttan kwojkwoj eo im erreeo bwe jen maron̄ bōk kajoor eo me Emaron̄ letok n̄an kōj.
Juon wāween n̄an kepooj būruwōm̧ im jetōb n̄an bōk m̧ōttan kwojkwoj eo ej etale eok make kajjojo wiik. Ikōņaan kōjerbal Katak im Bujen ko 20:37 n̄an etale eō make. Eoon in epād ie men ko kōttōbar ko n̄an peptaij me Anij eaar kwaļo̧ki n̄an Rikanaan Josep Smith. Epād ie men ko rekkar me aolep ro rej kōņaan peptaij maron̄ kōm̧m̧ani. Ij lo ejipan̄ eō kepooj eō make n̄an bōk im kōkāāl kallim̧ur ko repād kōn kwojkwoj eo.
Pija ko jān Getty
Kōjerbal jeje ko rekwojarjar āinwōt aō tōl, erkein jet iaan kajjitōk ko iaar kajjitōkin eō make n̄an lale n̄e iaar pojak in bōk m̧ōttan kwojkwoj eo.
Iaar ke kōttāik eō make im̧aan Anij?
Kōttōbar eo jinoin tata elaajrak ilo Katak im Bujen Ko 20:37 ej n̄an ettā an juon make im̧aan Anij. Jej kōm̧m̧ane menin n̄an bōk im kōņaan ļoor An kilaan āinwōt an kar jeje ilo jeje ko rekwojarjar, kwaļo̧k jen ro rikarejeraņ, ak ej itok n̄an kōj ilo im̧we.
Iaar kajjitōkin eō make n̄e ij jum̧ae Anij kōn jabdewōt ilo mour eo aō kiiō? Ij ke jum̧ae tōl eo An? Ij ke mije katak ko an ro Rikarejeran? N̄e ijjab, ij kōm̧m̧an karōk n̄an em̧m̧anļo̧k im wūjlepļo̧k n̄an kōm̧m̧an em̧m̧anļo̧k ilo aō pojak in bōk m̧ōttan kwojkwoj eo. Anij ejeļā men otemjeļo̧k—n̄e ij kile bwe Emaron̄ lo aolepen mour eo aō, epidodo n̄an kōttāik eō make Im̧aan im leke bwe E enaaj tōl eō n̄an ta eo em̧m̧antata.
Ewōr ke aō bōro e rup im jetōb ettā?
Bōro e rup im jetōb ettā ej ke iokļo̧k ettā. Ej meļeļein m̧ōņōņō in wūjlepļo̧k n̄an ankilaan Anij. N̄an ettā meļeļein jej ba jeo̧rļo̧k ad bōd im jeo̧rļo̧k bōd men̄e epen ak n̄e jej en̄jake n̄e ro jet rekar bōd. Komaron̄ ba, “Būruwō em̧m̧an n̄an aolep”? Konan̄in ke kōmetak ro ipelakūm̧, ak ewōr ke am en̄jake ko renana ņae ro jet? Kwoj ke aikuj kajjitōk n̄an jeo̧rļo̧k bōd?
N̄e ewōr aō bōro e rup im jetōb ettā., im̧ōņōņō in kōm̧m̧an kijejeto n̄an kōm̧m̧ani men ko rejim̧we n̄an Anij im n̄an ro ipeļakū. Ij kajjieon̄ joļo̧k ļōmņak ko renana im en̄jake kōn ro jet. Jetōb ejjab pād ippād n̄e ewōr aō en̄jake in jum̧ae, kōn menin juļo̧ki ej juon bun̄ten ne eo eaorōk n̄an kepooj kōj make n̄an bōk kallim̧ur eo ilo kwojkwoj.
Ij ke kōņaan bar erreeo, im imaron̄ ke kam̧ool bwe em̧ōj aō ukweļo̧k jen jerawiwi ko aō?
Bar juon kōttōbar ilo Katak im Bujen ko 20:37 ej n̄an “m̧oolin ukweļo̧k jen aolepen jerawiwi ko ad.” Ke jaar peptaij, jaar erreeo jen jerawiwi ko ad. Jaar kōm̧m̧ane juon kalliim̧ur n̄an kajjieon̄ kōjparok kien ko an Anij im ukweļo̧k n̄e jej kōm̧m̧an bōd.
Ij kajjitōkin eō make, “Ij ke baj bōk kwojkwoj eo kōnke ij baj aikuj in bōke wōt, ak ij ke kōņaan bar erreeo?” Ij reilikļo̧k kōn jerawiwi im bōd ko aō jān wiik eo im kajjitōkin eō make n̄e ij lukkuun m̧ool in kōņaan oktak im juļo̧ki. Ilo am̧ kōņaan n̄an erom erreeo, kwonaaj loe, kōn Jetōb, men ko kwoj aikuj em̧m̧anļo̧k ie, im Enaaj im̧we eo n̄an ukweļo̧k n̄an kōm̧m̧ani kālet ko rem̧m̧antata.
Kwaļo̧k bōro n̄an Irooj (im n̄an ro jet jaar kōmetak ak kainepata n̄e ekkar) ej m̧ōttan kōppopo eo ad.
Kajjitōkin eok make, “Ewōr ke men ko ij aikuji n̄an oktak me ijjan̄in de? Ewōr ke men ko ij aikuji wōt n̄an ukweļo̧k jeni? Jerbali men ko kōn lukkuun m̧oolin ukweļo̧k emaron̄ kakarbab kōj n̄an erreeo n̄an bōk m̧ōttan kwojkwoj eo.
Ij ke bōk ioō make etan Jisōs Kraist?
Kajjojo bujen jej kōm̧m̧ani ekalikkar juon wūjlepļo̧k n̄an bōk eļapļo̧k etan Kraist iood. Ke jaar peptaij, jej kwaļo̧k ad kōņaan bōk iood make etan Jisōs Kraist im kōjparok kien ko An. N̄e jej kōm̧m̧ani bujen ko jet ilo tampeļ ak būki kūr ko, jej bōk eļapļo̧k iood make etan Kraist im katak ko An. Kwaļo̧k ad kōņaan bōk iood make Etan āinwōt m̧ōttan kwojkwoj eo kajjojo wiik ej bar wūjlepļo̧k n̄an aolep bujen ko im kallim̧ur ko jaar kōm̧m̧ani Ippān.
N̄an etale keppopo eo aō n̄an bōk kwojkwoj eo, ij kajjitōkin eō make āinwōt: “Ij ke kōm̧m̧ane ijo em̧m̧antata imaron̄e n̄an juon waanjon̄ak an Kraist im katak ko An? Ij ke kōjparok aolep kallim̧ur ko iaar kōm̧m̧ani reiokļo̧k bujen ko aō? Ij ke wūjlepļo̧k rainin n̄an Kraist im bujen ko aō Ippān āinwōt iaar kōm̧m̧ani jinoin rainin”
Ewōr ke aō ļōmņak in jerbal n̄an E n̄an jemļo̧kin?
Jaar kallim̧uri Irooj ke jaar kōm̧m̧ane bujen peptaij eo ad ke jenaaj kajjieon̄ kōjparok kien ko An. Kien ko ruo reļļap rej n̄an iakwe Irooj im iakwe ro riturur (lale Matu 22:36–40). Jej kwaļo̧k ad iakwe jim̧or n̄an Anij im armej ro ad ilo jerbal n̄an er.
Iaar kajjitōkin eō make, “Ij ke kōm̧m̧an iien n̄an jerbal? Ij ke m̧akoko in jerbal, ak ij ke m̧ōņōņō in jerbal?” “Ij ke kajjieon̄ in kakūrm̧ool kūr eo aō?” Jerbal n̄an ro jet ej juon wāween eo em̧m̧an n̄an pojak in bōk m̧ōttan kwojkwoj eo. Ilo m̧ool, emakijkij n̄an jerbal n̄an ro jet n̄e jej aikuji tōl eo an Jetōb.
Leke ilo Kallim̧ur ko an Irooj
Ilo ad keppopo kajjojo wiik n̄an erreeo n̄an bōk kwojkwoj eo, jenaaj karbab n̄an bōk Jetōb iien otemjej n̄an im̧we im tōl mour ko ad. En̄in ej juon kallim̧ur jān Irooj.