Lig-on nga mga Pundasyon

Usa ka Bong-bong nga Katkatun

Paghulagway ni Alyssa Petersen

Baynte ka mga batan-ong babaye nagbarug tupad nako, nga nagtan-aw sa kahoy, 16-pye nga bong-bong. Ang atong hagit mao ang pagtabang sa matag batang babaye nga makaabut sa ibabaw. Kadaghanan sa mga batang babaye, mao pa kini ilang unang tuig sa Young Women camp. Ang mga mas magulang nga babaye ug ako mga lider sa kabatan-onan, apan wala pa gayud makaapil og kalihokan nga sama niini. Kaming tanan naminaw sa mga lagda inubanan sa kamalaumon.

Ang matag batan-ong babaye kinahanglan nga makaabut sa ibabaw sa bongbong. Sa higayon nga aduna nay makahimo niini, makabarug siya sa tablado ug motabang og bira sa uban pataas. Hinoon, kon siya mihikap sa yuta, dili na siya tugutan sa pagtabang og alsa sa nahabilin nga mga batang babaye.

Naglisud mi sa sinugdanan, apan sa wala madugay nakahimo ra kami sa pagtinabangay ug misugod sa pagtuboy sa mga batang babaye. Ang uban nangahadlok nga matuboy og taas kaayo bisan pa man sa mga luwas nga proteksyon. Ang uban gikulbaan mogamit sa ilang kaugalingon nga kusog aron makaabut sa ibabaw. Nagkinahanglan kini namong tanan sa pagdugang pa sa among pagsalig ug pagsuporta sa usag usa. Sa katapusan, nagmalampuson kaming mitapos sa hagit.

Samtang ang katapusang batan-ong mga babaye mikanaug, nagpundok kami aron hisgutan ang daghang mga leksyon gikan sa mga kalihokan diha sa bong-bong.

Kitang tanan mag atubang og mga butang nga ingon og imposibling mabuntog. Apan, wala kita mag-inusara. Ang mga tawo nagpalibut kanatong tanan aron sa pagtabang sa pagtuboy ug paghatag og suporta. Ang langitnong Amahan ug si Jesukristo anaa aron sa paghatag og tabang ug kalig-on kon kita moduol ngadto Kanila.

Megan B., Ohio, USA

“Isip mga babaye ug mga lalaki nga tigsunod sa pakigsaad, kinahanglan kitang mobayaw ug motabang sa usag usa nga mahimong mga tawo nga gusto sa Ginoo nga kita mahimo.”

Sister Linda K. Burton, kanhi Kinatibuk-ang Presidente sa Relief Society, Abr. 2015 kinatibuk-ang komperensya ( Liahona, Mayo 2015, 30).

Unsaon sa Pagtuboy sa Uban

1. Mag-ampo alang sa pamilya o mga higala kinsa nagkinahanglan og tabang.

2. Pahiyum! Makapalipay kini sa adlaw sa usa ka tawo.

3. Paggamit og mabinationg mga pulong kon maghisgot o mahitungod sa uban.

4. Mosulti og, “salamat!” Ang pagkamapasalamaton usa ka talagsaong paagi sa pagbayaw sa uban.

5. Paminaw kon ang inyong mga higala nasakitan.

“Misaad Ko nga Moabut Ko”

Sa kanunay gusto ko nga mopaambit sa ebanghelyo sa uban, apan sulod sa daghang katuigan wala ko magmalampuson. Hangtud nga nakahigala ko sa usa ka batang lalaki nga ginganlan og Tiago. Duol ra ang among gipuy-an sa usag usa, mao nga magdungan mi sa pagpanglakaw inig pauli sa balay human sa eskwela sa matag adlaw.

Usa ka adlaw, miagi kami og lahi nga rota sa pagpamauli ug milabay sa chapel diin didto ko mosimba. Gisultihan nako siya nga ako namiyembro sa Simbahan sulod sa dugay na nga panahon. Gisultihan nako siya unsay among gituohan ug sa unsang paagi ang akong pamilya napanalanginan og maayo pinaagi niini. Akong gidapit si Tiago sa simbahan nianang Dominggo, ug miingon siya nga moadto siya.

Miabut ang Dominggo, ug madasigon ko nga mihulat kaniya sa simbahan, apan wala siya moabut. Sa kaulahian nianang semanaha, gidapit nako siya pag-usab. Nahitabo kini sulod sa duha o tulo ka bulan, apan kanunay siya nga adunay rason nga dili moadto. Apan wala ko mohunong sa pagdapit kaniya.

Usa ka Dominggo sa buntag, diha ko sa miting sa sakramento ug mitan-aw sa unahan nakakita ni Tiago nga nagbarug didto. Nasurprisa ko sa pagkakita niya, apan siya miabut ug milingkod tupad nako ug miingon, “Misaad ko nga moanhi!”

Ako siyang gipaila-ila sa mga misyonaryo, ug misugod sila sa pagtudlo kaniya. Sa kadugayan, siya nabunyagan. Karon kaming duha nangandam sa pag-adto og mga misyon. Nalipay kaayo ko nga wala ko mohunong sa pagdapit niya!

Meiry R., Brazil

Salig sa Tukmang Panahon sa Dios

Ang akong iyaan misinati og usa ka pagdeborsyo sa dihang ang iya lang kinamagulangang anak nga lalaki ang nabunyagan. Aron mapadayon ang usa ka malinawon nga relasyon uban sa iyang mga anak sa ilang amahan, gusto siya nga makakuha sa iyang pagtugot aron ang ilang uban nga mga anak mabunyagan. Subo lang, wala siya mohatag og pagtugot sulod sa daghang katuigan.

Ang akong iyaan sa katapusan nakahukom nga gusto niyang mabunyagan ang mga anak bisan walay pagtugot sa ilang papa. Apan human nagpuasa ug nag-ampo ang akong iyaan ug mga ig-agaw mahitungod sa desisyon, ang tanan nakadawat og pagbati nga mopadayon sila sa paghulat.

Nianang semanaha, ang amahan sa akong mga ig-agaw misulti sa akong iyaan nga gusto siya nga makigkita ang mga bata sa mga misyonaryo ug magpabunyag. Mahinumduman gihapon nako ang kalipay nga akong gibati sa dihang gisultihan ko sa akong mama sa balita. Nasayud ko nga ang Langitnong Amahan mipanalangin sa akong mga ig-agaw human sa daghang katuigan sa mapailubon nga paghulat.

Mahimong dili kita kanunay nga masayud kon ang Ginoo motubag ba sa atong mga pag-ampo, apan nasayud ko nga Siya kanunayng motubag. Wala ko masayud nganong gusto sa Langitnong Amahan nga mabunyagan ang akong mga ig-agaw, apan nasayud ko nga Siya mipanalangin kanila tungod sa ilang kamatinud-anon.

Bre J., Florida, USA