“Sa Unsang Paagi nga Kanunay nga Makabaton sa Espiritu,” Alang sa Kalig-on sa mga Kabatan-onan, Mar. 2021, 26–29.
Dali, Sunod Kanako
Pagpangandam aron Kanunay nga Makabaton sa Espiritu
Ang pagpangandam aron takus nga moambit sa sakramento sa matag semana makatabang kanato aron kanunay nga makabaton sa Espiritu uban kanato.
Sa dihang ako 12 anyos pa, mikuyog ko sa akong pamilya sa pagbisita sa mga dapit sa kasaysayan sa Simbahan sa upstate New York, USA. Sa Sagradong Kakahoyan, nakahinumdom ko nga namalandong kabahin sa Unang Panan-awon ug sa uban pang katingalahan nga mga panan-awon nga nakita ni Joseph ug naghunahuna, “Wow! kon makaangkon ko og talagsaong espiritwal nga kasinatian uban sa langitnong mga binuhat sama ni Joseph, ang akong kinabuhi mahimutang na.”
Akong nakat-unan sukad niana nga imbis usa ka dakong espiritwal nga kasinatian nga kausa lang mahitabo sa akong kinabuhi, nagkinahanglan ko og ginagmay nga mga kasinatian nga sagad makapalig-on kanako sa akong pagpamatuod ug luwas diha sa dalan sa pagpauli. Nasayud ang Langitnong Amahan nga kita magkinahanglan og regular nga giya diha sa atong mga kinabuhi, ug Siya miandam og paagi alang kanato aron sa pagdawat niini.
Alang sa tanan niadtong adunay igong pagtuo sa Iyang Anak aron makahinulsol ug magpabunyag, Siya naghatag sa gasa sa Espiritu Santo. Pinaagi sa sinemana nga ordinansa sa sakramento, naghatag Siya kanato sa posibilidad nga “sa kanunay makabaton sa iyang Espiritu uban [kanato]” kon kita mohinumdom sa Manluluwas ug motuman sa Iyang mga sugo (Doktrina ug mga Pakigsaad 20: 77). Nahimo na kining posible alang kanato aron atong magamit ang inadlaw-adlaw nga paggiya sa Espiritu diha sa atong kinabuhi samtang mogamit kita sa atong kabubut-on sa paghimo og mga desisyon nga makatabang kanato subay sa dalan balik sa Langitnong Amahan.
Ang Sakramento ug ang Espiritu
Ang Langitnong Amahan nasayud nga kita magkinahanglan sa kanunayng paggamit sa giya sa Iyang Espiritu, dili lang sa dagkong mga kasinatian sa usa ka higayon. Pinaagi ni Propeta Joseph Smith, Siya mipahiuli sa ordinansa sa bunyag pinaagi sa pagpaunlod, diin makatabang kanato nga mahimong limpyo. Dayon maandam kita sa pagdawat sa gasa sa Espiritu Santo pinaagi sa kumpirmasyon, naghatag kanato sa posibilidad sa inadlaw-adlaw nga paggiya sa Espiritu.
Ang Langitnong Amahan nasayud nga ang pagkahimong limpyo sa kausa ka higayon dili igo ug nga kita nagkinahanglan nga mohinumdom sa Manluluwas ug balik-balik nga mahimong limpyo aron kanunayng makabaton sa Espiritu nga magauban kanato. Siya mipahiuli sa ordinansa sa sakramento alang niana nga katuyoan. Kon atong ayuhon sa pagpangandam ug kanunayng moambit sa sakramento, kita gisaaran nga kita “mahimong sa kanunay makabaton sa iyang Espiritu uban [kanato]” (Doktrina ug mga Pakigsaad 20: 77).
Hinoon, ang basta lang nga pagpakita ngadto sa Simbahan ug mokaon sa pan ug moinom sa tubig dili makahatag nato og pagtugot sa paggamit sa saad sa Ginoo. Ang atong tinuyo nga pagpangandam alang sa mga ordinansa makapahimo nato nga makadawat sa gahum sa Manluluwas sa atong kinabuhi.
Ang mga atleta dili mamahimong hanas pinaagi lang sa pagsul-ob og uniporme o mosulod ngadto sa korte o sa luna nga dulaanan. Kinahanglan gayud nilang bansayon ang ilang mga lawas, magkat-on og mga pamaagi, ug magpraktis aron mahimong hanas sa ilang sport. Sa samang paagi, kita kinahanglang makat-on kon unsaon sa pagpangandam sa pag-ambit sa sakramento nga may balaang pagtahud ug may katakus aron nga kita makadawat sa gahum nga Iyang mahatag kanato.
Usa ka paagi aron maandam ang inyong kasingkasing ug espiritu sa pag-ambit sa sakramento mao ang pagpahigayon og gamay nga pakighinabi sa inyong kaugalingon sa matag semana. Ganahan ko mogamit sa Doktrina ug mga Pakigsaad 20:37 sa pag-interbyu sa akong kaugalingon. Kini nga bersikulo naglakip sa mga kinahanglanon alang sa bunyag nga gipadayag sa Dios ngadto ni Propeta Joseph. Naglangkob kini sa mga kwalipikasyon nga gikinahanglan gayud matuman sa tanang gusto nga mabunyagan. Akong nasuta nga nakatabang kini nako sa pag-andam sa akong kaugalingon sa pagdawat sa makapabag-o nga saad nga anaa pinaagi sa sakramento.
Litrato gikan sa Getty Images
Gamit nianang kasulatan isip akong giya, ania ang pipila sa mga pangutana nga akong ipangutana sa akong kaugalingon aron makita kon ako andam na sa pag-ambit sa sakramento.
Gipaubos ba nako ang akong kaugalingon atubangan sa Dios?
Ang unang kinahanglanon nga nalista diha sa Doktrina ug mga Pakigsaad 20:37 mao ang pagpaubos sa kaugalingon atubangan sa Dios. Kita mohimo niini pinaagi sa pagdawat ug pagkaandam sa pagsunod sa Iyang kabubut-on sumala sa nahisulat diha sa mga kasulatan, gitudlo sa Iyang mga sulugoon, o kon kini moabut kanato agig mga pag-aghat.
Mangutana ko sa akong kaugalingon kon ako ba nakigbatok sa Dios bahin sa bisan unsang butang sa akong kinabuhi karon. Gisupak ba nako ang Iyang direksyon? Maminaw ba ko ngadto sa mga pagtulun-an sa Iyang mga sulugoon? Kon wala ko maminaw, mohimo ko og mga plano aron molambo ug mopasalig sa paghimo og mas maayo samtang ako mangandam sa pag-ambit sa sakramento. Ang Dios nasayud sa tanan—kon ako moila nga Siya adunay dakong panglantaw sa akong kinabuhi, mas sayon ang pagpaubos sa akong kaugalingon diha sa Iyang atubangan ug mosalig nga Siya mogiya kanako sa unsay labing maayo.
Ako aduna bay masulob-on nga kasingkasing ug usa ka mahinulsulon nga espiritu?
Ang pagbaton og masulub-on nga kasingkasing ug mahinulsulon nga espiritu adunay kalabutan sa pagkamapainubsanon. Nagpasabut kini sa pagkaandam sa pagtugyan ngadto sa kabubut-on sa Dios. Ang mahimong mapainubsanon nangahulugan sa pagpangayo og pasaylo ug mopasaylo bisan kon kini lisud o kon kita mobati nga ang uban ang nasayop. Makaingon ka ba nga, “Nagtinarong ang akong kasingkasing sa tanan”? Aduna ka bay gipasakitan nga tawo sa imong palibut, o aduna ka bay kaligutgot sa usa ka tawo? Nagkinahanglan ka ba nga mangayo og pasaylo?
Kon ako adunay usa ka masulub-on nga kasingkasing ug mahinulsulon nga espiritu, andam ba ko nga maningkamot sa pagtarung sa mga butang diha sa Dios ug niadtong naglibut kanako. Naningkamot ko sa pagwagtang sa negatibong mga hunahuna ug mga pagbati ngadto sa uban. Ang Espiritu dili mopuyo uban nato kon kita adunay mabingkilon nga mga pagbati, busa ang pagwagtang niini maoy importanting lakang sa pag-andam sa atong kaugalingon aron madawat ang saad sa sakramento.
Nagtinguha ba ako sa pagkahimong limpyo na usab, ug makasaksi nga ako naghinulsol sa tanan nakong mga sala?
Ang laing gikinahanglan diha sa Doktrina ug mga Pakigsaad 20:37 mao ang “tinud-anay nga maghinulsol sa atong mga sala.” Sa dihang kita gibunyagan, kita nahugasan nga nalimpyo gikan sa atong mga sala. Kita mohimo og usa ka saad sa pagpaningkamot sa pagtuman sa mga sugo sa Dios ug maghinulsol kon kita masayop.
Mangutana ko sa akong kaugalingon, “Moambit ba lang ko sa sakramento tungod kay naghunahuna ko nga gikinahanglan nako, o gikinahanglan ba gayud nako aron mahimong limpyo pag-usab?” Akong gihunahuna ang mahitungod sa akong mga sala ug mga kasaypanan gikan nianang semanaha ug nangutana sa akong kaugalingon kon tinud-anay ba ko nga gustong mag-usab ug wagtangon kini. Samtang kamo makabaton og tinguha aron mahimong limpyo, inyong makita, pinaagi sa Espiritu, ang mga butang nga inyong gikinahanglan nga palamboon, ug Siya mopadayon sa pag-aghat kaninyo sa paghinulsol ug sa paghimo og mas maayong pagpili.
Pagkumpisal ngadto sa Ginoo (ug sa uban nga atong napasakitan o nasilo kon gikinahanglan) mao ang usa ka bahin sa atong pagpangandam.
Pangutan-a ang imong kaugalingon, “Aduna bay butang nga gikinahanglan nakong usbon nga wala pa nako nahimo? Aduna pa bay butang nga kinahanglan pa nakong hinulsulan?” Ang pagsulbad sa mga problema pinaagi sa sinsero nga paghinulsol makapasarang kanato aron takus nga moambit sa sakramento.
Andam ba ko nga modala ngari kanako sa ngalan ni Jesukristo?
Ang matag pakigsaad nga atong gihimo nagpasabut og usa ka pasalig sa pagdala sa ngalan ni Kristo diha kanato sa mas hingpit nga paagi. Dihang gibunyagan kita, atong gipakita ang atong kaandam sa pagdala diha sa atong kaugalingon ang ngalan ni Jesukristo ug mosunod sa Iyang mga sugo. Kon kita mohimo og dugang nga mga pakigsaad sa templo o modawat og mga calling, kita mas dugang pa nagdala ngari kanato ang kawsa ni Kristo ug sa Iyang mga pagtulon-an. Ang pagpakita sa atong kaandam sa pagdala diha sa atong kaugalingon sa Iyang ngalan isip kabahin sa sakramento matag semana nagpasabut sa pagbag-o sa pasalig ngadto sa tanang mga pakigsaad ug mga pasalig nga kanhi na natong gihimo uban Kaniya.
Agig pagtimbang-timbang sa akong pagpangandam sa pag-ambit sa sakramento, akong pangutan-on ang akong kaugalingon sa mga pangutana sama sa: “Naghimo ba ko sa akong labing maayo nga mahimong usa ka ehemplo ni Kristo ug sa Iyang mga pagtulun-an? Nagtuman ba ko sa tanang mga saad nga akong gihimo nga may kalabutan uban sa akong mga pakigsaad? Sama pa ba ako kamapasaligon karon ngadto ni Kristo ug sa akong mga pakigsaad uban Kaniya sama sa unang adlaw nga ako mihimo niini?”
Ako aduna bay determinasyon sa pagserbisyo Kaniya hangtud sa katapusan?
Misaad kita sa Ginoo sa dihang mihimo kita sa atong mga pakigsaad sa bunyag nga kita maningkamot sa pagtuman sa Iyang mga sugo. Ang duha ka dagkong mga sugo mao ang paghigugma sa Ginoo ug ang paghigugma sa imong silingan (tan-awa sa Mateo 22:36–40). Kita mopakita sa atong gugma sa Dios ug sa atong isig ka tawo pinaagi sa pagserbisyo kanila.
Mangutana ko sa akong kaugalingon, “Mogahin ba ko og panahon sa pagserbisyo? Magduhaduha ba ko sa pagserbisyo, o malipayon ba ko nga moserbisyo?” “Naningkamot ba ko sa pagpalambo sa akong calling?” Ang pagserbisyo sa uban maoy usa ka maanindot nga paagi nga maandam sa pag-ambit sa sakramento. Sa pagkatinuod, sagad kaayo nga diha sa pagserbisyo sa uban nga kita nagkinahanglan sa Espiritu.
Salig sa mga Saad sa Ginoo
Samtang kita motuyo sa pagpangandam sa matag semana aron takus nga moambit sa sakramento, kita maangayan sa pagbaton kanunay sa Espiritu aron mo-impluwensya ug mogiya sa atong kinabuhi. Mao kana ang usa ka saad gikan sa Ginoo.